Read idege EmọsịEmọ 6 Bible Online

EmọsịEmọ 6 - idege bible

EmọsịEmọ 6

¹Iyoo nya inyiribyi ọtụka ka juwa hanụ anụ alụchụ-atịra ịlẹ kanụ hi ụbwọ, go abwọ ju ẹ-ẹpwụ ata ị-ịSayọn. Anụ angịlẹ kanụ kụ epweji nya ịSameriya, kanụ byi ịlọnụ ya ịwa nyị be lẹ. Anụ angịlẹ kanụ ri ikopya ị-kụ ịlahị nya epwoja ọtụka nya ala Isirẹlụ ọlẹ ká angịnyị kaa warị ka tọnụ kanụ kaa daa ụbwọ.

²Anụ jẹ kpoye kele ka epweji nya ịKalụne kanụ yẹ wẹẹ. Anụ jẹ kele pwụ ịHamatị epweji ọtụka ọwẹ wẹẹ. Kanụ myịmyị pwọ kpuru hireji kele ka epweji nya ịGaatị ọlẹ kọ juwa ọ-ọpyị nya ala iFilisitiya yẹ wẹẹ. Epweji ọhẹ-lọhẹ ẹ-ẹpwụ nya epweji ịwẹ á lọngịrị bala o-ju ẹpwụ gbam lụmẹ lee kpụ ụdụ gụ ịpyị nya iJuda bala iJerusalẹm ka.

³Áyáà woo, anụ pwa ọ-ka myị ju ịngịngịhyẹ nya ẹnụtụrụ nya ayịreji ọtata o-juwa chwẹẹ, anụ juwa tọọ rụ hwẹẹẹ kanụ byi ịlọnụ, ma ọlẹ kanụ tị họ ịnyị wẹẹ ri ọ-tụ ẹnụtụrụ ọọwa nyà ju ịlọnụ chwẹẹ gụ ọọwa.

⁴Anụ gogo nya inyiribyi ọtụka anụ angịlẹ kanụ nọ une u-uhye nya ịbẹẹdị ọlịnya ọlẹ kị kpa angịrị nya inyi lee ugba nya inyi-enyi họ, ọlẹ kanụ kaa nịra kpaaa u-uhye nyamwụ, anụ a kaa ri iyo nya omilodo ọlẹ kọ hagụ bala o-ri iyo nya ẹna ọlẹ kọ ju eyo gụ wuu lẹlẹ.

⁵Anụ angịlẹ kanụ kaa mwu eje nya ụbwọ ohihi ọlẹ kọ du kanụ kele ka họ ẹnwụ ọ-kpa mwu eje chajị kanụ ka lala iDevidi onyogo.

⁶Anụ angịlẹ kanụ kaa nwa ere ọgbagala ọtụka bala ọ-kaa wụ ida ochoru kwọkwọ ọtụka, ma ẹla nya ayịreji ọtata nya anyị ịtụma nya iJosẹfụ á tị tọnụ olujwo kpá pyịnyẹng ka.

⁷Chajị nya ọọwa lẹ, anụ a ka ri angị jene ji ịlahị lee ri angịnyị nya ọgbanyẹ ịlẹ kị ka wu kpa rụ bwu ẹwụ lahị-lahị lẹlẹ. Ụka ọọwa, ọkẹkẹnị nyanụ bala ang oriri nya ụya ọyaya ịlẹ kanụ ka hụ ẹpwa nya adịrahụ ri juwa nọnọ hị ụbwọ bala ata da dẹẹlẹẹẹ ị-ịbẹẹdị ịlịnya ka myị cheju ẹnụ ọọwa.

⁸Ọngọlahị Amkpaa ọlẹ kọ ri Ohe Oluhye Agụgụ nwa iro da ọna lịlọmwụ yẹkẹẹ, “Ọbọọchẹ bala ahị-ohihi nya ala Isirẹlụ wụm ẹjẹ lụmẹ. Ẹpwang ịtụka nyaa ịlẹ kị ri ẹchị ịdịrịhụ kị kpịbaa ẹpwụ nyaa wụm ẹjẹ. M̀ ka tụụbwọ hi epweji ịtụka nya ala ịSameriya bala ang myị ang ilepweji ọwẹ wuu ju aluji nyaa ụ-ụbwọ.”

⁹Ụka ọọwa, ó-ri ká angịnyị-ị́ hi angị iwo chiriri juwa ẹ-ẹpwa nya ọdọdẹpwa ookpokpo, ị ka gbu wuu.

¹⁰Ọọnịna nya ogu ọlẹ kọ kpẹhị rịrị ogu bala ẹla nya ejida nyamwụ ka hu ogu nya kpa kpehe wẹ odehe. Ọọnamwụ ọọwa ka be ẹkọ wụrụ ọngọngọhẹ ọlẹ kọ juwa u-ube ọlẹpwụ godayị rịrị ịkịka ọbaba wuu nya ẹpwang kaka tọọ wo yẹkẹẹ, ọngọngọhẹ juwa tang wẹẹ? Ọ ka wẹ yẹkẹẹ, Ehe! Ọ ka byọọ yẹkẹẹ, Ba la emwuru. Ehile ọlẹ ri ọpyii. Áhị ka ya ẹla gu ẹnyị nya Amkpaa kpong-kpong kaka.

¹¹Anụ yẹ mẹẹ, Amkpaa da ehile ká ẹpwang ịtụka ka tụrụ ju eji, bene kpá yịgẹ-yịgẹ. Ebe ichiche ka bene kpụ kpa pwụrẹ-pwụrẹ kpa ị ka dọmwụ jẹ-ẹ yile egburu-ịpyị nyaa ka.

¹²Ụnyịrẹ ka lọngịrị rụ ụnyẹ ẹpwụ nya ikpokpo nya ajwọ ịtụka myị? E-ehe! Ọngịnyị ka jẹ-ẹ kpa agba nya ịna bwuru eji wu ẹrụ ẹ-ẹpwụ nya Ihu ọtụka myị? Ma, anụ tị mwẹẹkpẹ ji eje nya abwẹla ọnyịịla kpata ka ri ẹhwa bala ọ-kpa ugbe nya abwẹla ọnyịịla yẹ ka ri ugbe nya okoji olujujwo.

¹³Anụ angịlẹ kanụ wẹẹ chị ọkẹkẹnị u-uhwo timajẹ la ọbọọchẹ ihihi juwa yẹkẹẹ, ọ́ọngịrị nya ịlọhị-ịlọhị ayịdang ahị kpa dẹwụ kụrụ du kahị ye epweji nya ịKaanayim wẹ ka-á?

¹⁴Chajị nya ọọwa lẹ, anụ ala Isirẹlụ anụ yẹ mẹ, ịịlẹ Amkpaa Ohe Oluhye Agụgụ a ya lẹ: M̀ ka wule epwoja eji ọlẹ kọ ka tụụnụ pyịpyị, ị ka tụụnụ pyị eji, họnụ ri, bwu ẹga Ọchịpwụrụ bwu ọla ịHamatị ẹ-ẹtẹ lalaala ka ju ka Ọkpọọ nya Araba e-edii.