Read idege EmọsịEmọ 7 Bible Online

EmọsịEmọ 7 - idege bible

EmọsịEmọ 7

¹Ang ọlẹ ká Ọngọlahị Amkpaa mẹjẹm a lẹẹ lẹ: Yẹ mẹ, m̀ chẹhị kele ka yẹ ogu nya iru nya ịyịrị kị chị anyị inyeewe kpehe ụka ká ambakpa ihyẹẹkpẹ juwa dọmwụ nya obwubwu ẹ-ẹkpẹ nyọlẹ kị hya egbe nya ọgbanyẹ ịlẹrụ nya adịrahụ kpá lẹ. Ọọwa amẹ a juwa dọmwụ nya obwubwu myịmyị lẹlẹ.

²Ẹ-ẹpwụ nya ọyị ọyẹyẹ ọọwa, ụka kam yẹ ká ịyịrị ịịwa juwa ri amẹ bala apwụ bala ang myị ang ilekpo-lekpo ịlẹ kị juwa ọ-ọpyị kpá wuu lẹ, m̄ bịlẹ Ọngọlahị Amkpaa yẹkẹẹ, Ahyu! Amkpaa Agụgụ ee, Chuchuu m̀ bịlẹng, hịnyọhi ha angịnyị nyang. Ányị iJekọbụ à tị́ họ kọ ka juwa hịhị myị-ị̀? Yẹ jaabwọ kị byẹhị bala ọ-jụ ịhyẹ dẹwụ-dẹwụ wẹ-ẹ̀.

³Chajị nya ẹlẹwẹ ká Emọsị ya ịịwẹ lẹ, Amkpaa a nwụ irya nyamwụ họ lẹ, ọ yẹkẹẹ, “Ang ịlẹ ka yẹ wuu wẹ a ka họ kpong-kpong kaka.”

⁴Jaabwọ ká Ọngọlahị Amkpaa mẹjẹm ẹ-ẹpwụ nya ọyị ọyẹyẹ nyam myịmyị a lẹẹ lẹ: Ọ be ẹkọ nya akama ọ-ka yẹ angịnyị nyamwụ. Ọọwa, ihu ịtụka ịla kpori-kpori kpá kwẹhụ ka a nwụ kịrẹ-kịrẹ wuu lẹ, ịpyị nya ẹrụ a chị ọhụ la ọngịrị kịrọgbọ lee chị ọrụ pwụrẹ-pwụrẹ ekuruwa lẹlẹ.

⁵Ụka ọọwa lẹ, m̄ chị eko yẹkẹẹ, Ọngọlahị Amkpaa ee, hu abwọ, ā họ ịnyị koo, chuchuu, m̀ bịlẹng. Ányị iJekọbụ à tị́ ka họ kọ ka hị chẹẹ myị-ị̀? Yẹ jaabwọ ka angịnyị nyang byẹhị bala ọ-jụ ịhyẹ dẹwụ-dẹwụ lụmẹ wẹ-ẹ̀.

⁶Amkpaa myịmyị nwụ irya nyamwụ họ chajị nyọlẹ kọ yẹkẹẹ, “Ḿ ka họ jaabwọ kam ya kaka.”

⁷M̀ chẹhị ka yẹ Ọngọlahị kọ godayị kọkọ ịkịka nya ugulọ nya ube ọlẹ kị me. Ọ kpa ori ọ-kpa me ori nya ube ụ-ụbwọ nyamwụ.

⁸Ụka ọọwa, Amkpaa tọm wo yẹkẹẹ, “Emọsị ee, ịyẹ ā tị́ yẹ kpong-kpong wẹ-ẹ̀?” Ọọwa, m̄ wọọ yẹkẹẹ, Owu ọ-kpa me ori nya ube ịnyị. Ọọwa, Amkpaa a yẹkẹẹ, “M̀ jam kpa ori ọlẹ mẹjẹ ya ala Isirẹlụ angịnyị nyam á la kpụrụrụ ẹ-ẹpwụ nya abwẹla ka, jaabwọ ká ugulọ okeke la. Ḿ ka nwụ irya nyam họ lee ọ-hịnyọhi haa kpá ẹnẹnẹhẹ kaka.”

⁹Ogidi ikiliya nya anyị ịtụma nya Ayịsiki ịlẹ kị juwa u-uhye nya ịgbọdọ ẹ-ẹga datị-datị ka ta ayịreji, ube ọraabwọ bala ẹga ọlịgọgọ gụ wuu ka ta ayịreji. Adịda o-ri adịrahụ ká ọnyị ka hi ugu nyamwụ ri ka myị bwu ọdọdẹpwa nya adịrahụ iJerobowam la ẹma nya ẹwụ o-wuleji tọọ pyịpyị.

¹⁰Ụka ọọwa lẹ, Amasiya ọngọkiliya nya ịBẹtẹlụ a du ẹrụ tọ iJerobowam Adịrahụ nya ala Isirẹlụ yẹkẹẹ, “Ó-ri ká jẹ ka tụbwọ aalẹ, Emọsị me obyi onyobyi jung ẹ-ẹkpẹ-ẹkpẹ ẹ-ẹpwarịrị nya ala Isirẹlụ wuu lẹ. Iru nya ala ịlẹ kọ ya kụ ogu gbudumm lẹ, ẹẹla ká ọngọhẹ ka kpa lee kpịtịya nyaa myị am ọ-ọpyị ọlẹ ka. Ẹla ọ-ka ta ụma wuu ayịreji myị ịnyị.”

¹¹Chajị Emọsị ọwẹ ya pyị yẹkẹẹ, “IJerobowam ka gbu igu nya ẹma nya ẹwụ ọ-ọgbẹwụ. Ị tị ka wu ala Isirẹlụ wuu kpa rụ ka ri anyịhị ọ-ọpyị ọkịla hi epweji nyaa pyii lẹ. Ala Isirẹlụ ka rụ bwu ọpyị nya ịlaa kaka ri anyịhi ọ-ọpyị nya angịkịla pyii lẹ.”

¹²Ụka ọọwa, Amasiya a byi Emọsị yẹkẹẹ, “Ẹnwa ọlọmwụ ee, rụnyẹ rụ tịrẹkpẹ ka ọpyị nya iJuda ká yẹ ọmwụ ụ-ụwa mẹ, ọ nwa ẹgẹlẹ wẹẹ.

¹³Ma, ā yẹ ọmwụ am ị-ịBẹtẹlụ myịmyị gụ ọlẹ kpá ẹnẹnẹhẹ kokoo, chajị ẹga ọraabwọ nya adịrahụ ịnyị. Ube ịGọgọ ọraabwọ ha Ohe Oluhye nya alepwoja ọle wuu a lẹẹ lẹ.”

¹⁴Ụka ọọwa, Emọsị a wẹ Amasiya yẹkẹẹ, “Ḿ ri ọlọmwụ lee ọngọhẹ ẹ-ẹpwụ nya anyị nya alọmwụ ri kpong-kpong ka. Ma, ọngọ kpa iyo ịlẹpwamẹ ga ri tụ amẹ-amẹ da m̄ ri bala ọngọ họ ụkụrwọ ẹ-ẹrụ nya ekeji nya isikamọ am a ri lẹ.”

¹⁵Ọọwa lẹ, Amkpaa a kpam rụ hi ụkụrwọ nya ịkpịlọ ogbegbe lẹ, ọ byim yẹkẹẹ, Rụ kele ká yẹ ọmwụ ju ala Isirẹlụ angịnyị nyam mẹ lẹ.

¹⁶“Lẹẹlẹ, aa ke ụrụ la ẹla nya Amkpaa mẹ. À dam ehile ya am nyị yẹ ọmwụ tụ ala Isirẹlụ pyịpyị ka, am nyị tị ya ẹla nya Ohe Oluhye tụ anyị ịtụma nya Ayịsiki pyịpyị ka.

¹⁷Chajị nya ọọwa lẹ, Amasiya, wo mẹ, ịịlẹ Amkpaa a ya lẹ: ‘Ahụ nyang ka yẹ ri ọlakpara ẹ-ẹpwụ nya epweji. Anyị nyang alẹng bala anyang ka gbu igu nya ẹma nya ẹwụ. Aluji ịlẹ kị ri angga be ọpyị be hanụ la ori omeme, gọọ ga wulele-wulele. Ahụ lịlọng ka gbu ẹ-ẹpwụtụbwọ nya alepweji ịlẹ kị jẹ Ohe-ka. Ọ tị ri o-pyii ká aluji ka wu ala Isirẹlụ kpa rụ hi ịpyị nya ịlaa kaka ri anyịhị ọ-ọpyị nya angịkịla pyii lẹ.’ ”