Read idege EmọsịEmọ 9 Bible Online

EmọsịEmọ 9 - idege bible

EmọsịEmọ 9

¹M̀ chẹhị kaka yẹ Amkpaa kọ godayị u-uhye nya ogidi okiliya lẹ, ọ da ehile yẹkẹẹ, Wa ugulọ nya ube nya Ohe Oluhye ọwẹ abwọ ẹ-ẹpwayịrẹtẹ chajị ká itiwe nya ẹpwang ā hụ jigi-jigi weji-weji mẹ. Bọọ ene chajị kọ tụrụ ba angịnyị wuu e-egbeju mẹ aalẹ, m ka nwụ ihihi lẹma nya ẹwụ ọ-ọgbẹwụ. Ọngọngọhẹ-ẹ́ ka rụnyẹ rụ myị kaka. Ọngọngọhẹ-ẹ́ tị ja gụm be kaka.

²Ó-riri kọ háa kị ka jẹ-ẹ̀ wu ụjẹ da ụgbẹyị lagbụrụ kele ka ejegu kaka kpụ ịbaa, ụ-ụwa ụbwọ nyam am Ohe Oluhye a ka jẹ-ẹ̀ gbaa kpehe bwu wẹ-ẹ̀ lẹ. Ó-ri kọ háa ị kpụ uhye nya egbamwụ mẹ, m̀ tị ka chaa abwọ ka mileji.

³Ó-ri kị rụ kpịbaa ka uhye nya Ọgbọdọ nya ịKaamẹlụ, m̀ ka pịlahị nyaa gbaa kpehe bwu ụwa. M̀ ka waa. Ó-ri kị rụ kele ka ọmwụ-eji ọbaba nya Ihu ịtụka ka kpịbaa hi ẹhị nyam, m̀ ka da ilo-enyi ehile, ọ ka chaa.

⁴Ọ́ tị ri ka aluji-í waa kpa rụ bwu ọgbẹwụ ka ri anyịhị, m̀ ka da ẹma nya ẹwụ ehile ọ ka nwaa ụ-ụwa.

⁵Ọngọlahị Amkpaa Agụgụ-ụ́ yụbwọ gu ọpyị, ọ kaa hụ jigi-jigi la uhi ojuju ọlẹ kọ họ ká iru nya angịnyị lụmẹ-lụmẹ kaa gbu. Ụka ọọwa, odehe ọlẹ wuu ka wuleji wirim nwa gbọnọ-gbọnọ lala ihu ọtụka nya ala Ijipiti ọlẹ kị wụrụ ịNayịlị, ọlẹ kọ kaa kpụ lee pwọ myọọ keji myịmyị. Ọọwa angị hi eku ịlẹ kị hi kụ am odehe a ka bida chajị nya angị gbugbu lẹlẹ.

⁶Ụka ọọwa, Emọsị a yẹkẹẹ, “Amkpaa nwụ ẹpwa nyamwụ ẹ-ẹpwụ nya egbamwụ, u-uhye nya ọpyị tị lẹ, ọ hu ọmwọrụ nya egbamwụ kpa chọọ achụ.”

⁷Amkpaa tọ angịnyị nya ala Isirẹlụ ịtọ wo yẹkẹẹ, “Ahyu! Anụ anyị nya ala Isirẹlụ ee! Anụ me kanụ datị hi ala Itiyopyiya ị-ịlahị nyam kpong-kpong wẹẹ? Ám a gba ala Isirẹlụ kpehe bwu ọpyị nya ala Ijipiti bala ala iFilisitiya bwu iKiiri ka-á?”

⁸Anụ yẹ mẹ, Egbahị nyam am Ohe Oluhye Agụgụ juwa gbeji kụ lẹẹlẹẹ u-uhye nya ịpyị adịrahụ ọ-myị la ọhọbịrị nya ala Isirẹlụ ọwẹ lẹ. M̀ ka tọọ ayịreji yịlọọ hi uhye nya ọpyị olodehe ọlẹ. Ang kẹnẹ-kẹnẹ ri ḿ ka ta ọdọdẹpwa nya iJekọbụ ayịreji wuu myị gbanggbang kaka lẹ, ọọwa mẹ ịnyị. Amkpaa lịlọmwụ a wẹẹ ya ẹla lẹ.

⁹Chajị m̀ juwa ka da aluji ehile kị ka hụ ala Isirẹlụ jigi-jigi ẹ-ẹpwarịrị nya epwoja ịkịla wuu jaabwọ ka ọngịnyị kaa kpa ịyarịya hịrị ehya ka egbanjwọ kaa gba bwu iwa nyamwụ hụrụ hi ajẹ nya ehya wẹẹ, ịnyịnyị m̄ ka hịraa kam ka gba angịlẹ kị chịla-ka chịịrụ ọlẹ ká ẹjẹ ọlam ookpokpo ọhẹ-lọhẹ á tị ka gba deeji ka lẹ.

¹⁰Alọhọbịrị ila ẹ-ẹpwarịrị nya angịnyị nyam ị ka nwa lẹẹma nya ẹwụ. Angịlẹ kị kaa byi ịlaa yẹkẹẹ, Ohe Oluhye-é ka myị ang onyobyi ka tụ juhi chwẹẹ ka.

¹¹Ụka ọọwa, Amkpaa yẹkẹẹ, Ẹnụtụrụ ookpokpo ọhẹ juwa wẹ ụka kam ka tịrị ịpyị-adịrahụ nya iDevidi ẹkpẹ họọ, ọlẹ kọ lala ugulọ nya ẹpwang ọlẹ kọ tụrụ ju eji ká egbirịịpyị nyamwụ tụguru ẹ-ẹga ookpokpo gbudum. M̀ ka nwụla ugulọ tịrẹkpẹ, ka họọ hiigu jaabwọ kọ la lụka olene.

¹²Chajị ka anyị ihihi nya ala Isirẹlụ ka dẹwụ tịrẹkpẹ lọngịrị ka ye une nya ọpyị ohihi nya ala Ẹdọm bala epwoja ịkịla ịlẹ wuu kị jẹm kaa raabwọ ham ene-ene. Ịnyị Amkpaa ọlẹ kọ ka họọ a ya lẹ.

¹³Yẹ mẹ, Ẹnụtụrụ juwa wẹ ụka ká eyo nya ọpyị ka họ ká ambakpa ka nwa lagaga lụmẹ gbee kị ka chị ego ịmịla ụ-ụwa ẹ-ẹrụ wẹẹ, chajị ụka a ka hi nyọka nwaa ka. Egbiji ịtụka ịwẹ ka ga myị ẹga rịrị gbee ka angịnyị-ị́ ka lọngịrị juwa pyị enyi ju ang nyọka kpa họ ere kpa myị ẹnẹnẹhẹ kaka. Ere ịlịpyọ ka juwa mwụ gbụrụ-gbụrụ bwu ịgbọdọ ịtụka ọlẹ ká ere ka juwa mwụ tụ ikiti ichiche wuu da ịnyịnyị.

¹⁴M̀ ka kpa angịnyị nyam tịrẹkpẹ gbaa kpehe bwu ẹpwụ nya ọnyọhị oriri, ị ka nyà tịrẹkpẹ, nwụ ẹpwa bala epweji nyaa ịlẹ kị ta ayịreji ene-ene, ị ka kụ ẹpwa ẹ-ẹpwụ nya egwawụ nyaa myịmyị. Ị ka nwa ere nyaa. Ị ka wu ẹrụ. Ị ka bá iku jwaa, ị ka juwa nwa ere bwu ẹpwụ nyaa, ị ka juwa hya egbe nya ang ri bwu ẹpwụ nyaa ịnyịnyị.

¹⁵M̀ ka kpa angịnyị nyam nyà tịrẹkpẹ ka kụ ọpyị nya ịlaa ịwa ayịdang ọlẹ ká ọngọngọhẹ-ẹ́ ka jẹ-ẹ̀ pyaa yii lee pyaa nyẹẹ hi ọpyị nyaa ọlẹ kam hu haa kpá ẹnẹnẹhẹ kaka. Amkpaa Ohe Oluhye nyang a ya ịnyị lẹ.