Read idege ObadayaOba 1 Bible Online

ObadayaOba 1 - idege bible

ObadayaOba 1

¹Ụka ọhẹ, Amkpaa mẹ ẹrụ ọlẹ jẹ Obadaya a-arụrụ. Ịịlẹ Ohe Oluhye ọlẹ kọ lọngịrị gụ ang wuu a ya chajị nya ala Idom lẹ: Ahị wo oja kị ya Amkpaa nyị du ẹrụ ọhẹ warị wẹ epwoja nya Ẹdọm anyị tị wo ẹrụ ọlẹ kọ du lẹ. “Anụ wuleji kahị kele ka dẹwụ tụ Idom pyịpyị.”

²Idom wo mẹẹ: m ka họng ká ka jụ ịhyẹ dẹwụ ẹpwarịrị nya epwoja ịkịla ịlẹ kị jẹ Ohe ka, ọng myị ọng wuu ka yẹ ẹhị danụ bwee.

³Ọbọọchẹ ohihi ọlẹpwụ ọkịlẹtụ nyang pịrịng ju, chajị nyọlẹ ká ajwọ inyịngịrị a ri ajẹ ọchị yẹ epweji nyanụ dada, ẹpwa nyanụ kụ uhye ịgbọdọ ịlẹ kị la uhye lụmẹ lẹ, ọọwa a du lẹ ká irya nyang ri yẹkẹẹ, ọngọngọhẹ á lọngịrị kụ rụng myị kaka lẹ.

⁴Ọ́ háanụ, anụ hụ̀ nanaana lala idu, o-riịnyịlẹhị anụ kụ ẹpwa ẹga oluhye gidogboo kpá lala ẹga ka okpe kaa kpa awụ nyamwụ ka nọ, luhye kpá pyiipyii lala ụka kọ ori awụ nyamwụ juwa e ẹpwarịrị nya ịdịchụ myị, kpọkpọọkpọ m tị ka chịnụ abwọ ka mileji.

⁵Ụka ká oyi á warị wẹ ẹpwa nyanụ lodu, ịkaa go ang ịlẹ kị tịtọ kem. Ụka ká ayịdọlẹrụ lee angị wụ ang-ẹrụ á juwa hya alakọnụ, ị kaa mamachịng tụhi ịmanyị-ịmanyị ẹ-ẹrụ chẹẹ. Aluji nyanụ tị tanụ ayịreji kpa wuu hịlẹ-hịlẹ lala ịnyaa kpa ehe tụ eji.

⁶Anụ anyị ịtụma nya Ịsọ ee, aluji nyanụ nwụla ụdụ nyanụ kpa rụ kpá wuu lẹ.

⁷Epwoja ịkịla ịlẹ kị myị ọnụ kị ka danụ ụbwọ anụ jẹ ka lẹ, ị danụ lụgbaa lee pịrịrnụ ju lẹ-ẹ. Ori kanụ jẹ ka tụbwọ aalẹ ị mwụụnụ ẹpwa kunu rụ hi ẹpwụma nyanụ kpa wuu lẹ. Angịnyị ịlẹ kaanụ bala ịwaa anyị họ okpunyi bala aligu nyanụ a dẹwụ kụrụụnụ lẹ. Aluji nyanụ ịlẹ kị kaa ri ang oriri nyanụ tanụ a dọmwụ gbụrụ ụnya gbenu wẹ lẹ. Ela ọlẹ kị juwa ya rụụnụ ri yẹkẹẹ, ale ẹla ọjẹjẹ nyaa a tị ji lẹẹlẹẹ mẹ?

⁸Ẹnụ ụtụrụ ọlẹ ká am ka yẹ Ịdọm akama m ka ta angị ri ala ijẹẹhị nyaa ayịreji. M ka yịlẹ ẹla ọjẹjẹ nya anyị ịtụma nya Ịsọ hyaa kpá gbanggbang.

⁹Angịnyị angị ịtụka nya ala Tema ịlẹ kị kaa họ ẹga lụmẹ myị la uhi ojuju, ee, alẹwụ tị ka nwụ nya ala Ẹdọm wuu ịnyịnyị

¹⁰Chajị nyọlẹ kanụ kaa chị ẹjẹ kpa nu anyịnanụ, anyị ịtụma nya iJekọbụ ang lagbụrụ bala ọ nwaa nwụ, anụ ka ta ayịreji pyịyọọ gbe ọyi myị oyi, oyoyi tị ka ri ịnyanụ pyịyọọ.

¹¹Achị kataa ka dayị rịrị hwẹẹẹ ẹnụtụrụ ọọwa ụka ká aluji bịrị igirigba nya epweji jụ kele juwa nwụla ụdụ nya iJerusalẹm kpa rụ ka gịla awụlẹ: Ori ká jẹ ka tụụbwọ aalẹ a ri ọngịnyị onyobyi lala aluji ịịwa ịnyịnyị-ị.

¹²Ọ hiigu ká anụ ala Idom ka juwa chị ọkẹkẹnị ẹnụtụrụ ọlẹ ká akama a wẹ chị iJuda ọgụ ka: Ọdọmwụ pwoku kanụ ka juwa hụlọ ahụ ya abwọ nyí a kụ ụka kị juwa ẹ-ẹpwụ nya ang ọjụjụ ka.

¹³Ọ chịla kanụ ka ju kele ka epweji nya angịnyị nyam ẹnụtụrụ nya akama ọtụka ọyẹyẹ nyaa juwa nwụla ang-abwọ ịlẹpwa nyaa kpa rụ lagbụrụ ẹnụtụrụ ọlẹ ká aluji juwa ta epweji nyaa ayịreji ka.

¹⁴Opwoku nyọka wu angịlẹ kị juwa maga nya ọkpa ọhịhị nyaa be ka. Anụ waa kanụ tụbwọ hyaa kpata ju aluji nyaa ụ-ụbwọ ẹnụ nya akama nyaa ka.

¹⁵Chajị ẹnụtụrụ nya Amkpaa ji chwẹẹ, ụka ka am Amkpaa ka la epwoja ịlẹ kị jẹ Ohe ka eje. Ahụ Ẹdọm kpangga wẹẹ, ang onyobyi ọlẹ ká họ angịnyị ị juwa ka họng ịnyịnyị kwiwa. Ang ịlẹ ká hu ha lẹ ị juwa ka tịraa ẹkpẹ hang a juwa ye tịrẹkpẹ lẹ.

¹⁶Anụ ala Isirẹlụ angịnyị nyam ịlẹ kanụ juwa bwu iJerusalẹm epweji nya iJuda ee, ọtata ká am họ kanụ nwa okilo onyuujujwo nya akama ụ-ụwa ọgbọdọ ịgọgọ nyam lẹ. Ma epwoja ịkịla ịlẹ wuu kị dagaga junu juwa nwa okilo nya akama ọnyuujujwo ọlẹ kọ ka la ujujwo gụ ịnyanụ wẹẹ. Ị ka nwa gbee kị ka ya juwa jẹdịyẹ ya ata gboo-gbo-gboo, dọmwụ ka myị taa lala ụka kọ ri ị jam odehe ọlẹ ẹnẹnẹhẹ lẹka.

¹⁷Ma ụ-ụwa ọ-ọgbọdọ nya ịSayọn angị ịhyẹ ịlẹ kị be igu ọnụ a ka ji lẹ, ọ ka ri ẹga ọla ịgọgọ. Anyị ịtụma nya iJekọbụ bala anyị ịtụma nya iJosẹfu ka ye ọpyị ọlẹ kọ ri ịnyaa e—ene-ene tịrẹkpẹ.

¹⁸Angịnyị nya iJekob bala ịnya iJosẹf ka lala ịla: ịka ta angịnyị nya Ịsọ ayịreji jaabwọ ká ịla kaa rụ ewoo nya ambakpa, ọnyị ọtụma nya Ịsọ ọhẹ-lọhẹ a ka be myị kpong-kpong ka. Am Amkpaa a ya ịnyị lẹlẹ: Ala ịwẹ ka họ jịra pyii ká Am ya lẹ.

¹⁹Ụka ọọwa angịnyị nyam ịlẹ kị kụ iNegebụ ụ-ụwa edii nya iJuda ka mwụ kele ka kụ epweji nya Ịsọ. Angịlẹ kị kụ ẹpwa e-ekpeleji nya ọgbọdọ ụ-ụwa oye nya ọmwụ ẹnụ obyi nya iJudiya ka ye ụteji ọpẹẹpẹẹ nya ala iFilisitiya. Ala Isirẹlụ angịnyị nyam ka ye oyi nya ịpyị nya Ifurem bala Sameriya. Angịnyị nya iBenjamin ka ye epweji nya iGiliyadị.

²⁰Anyị nya ala Isirẹlụ ịlẹ kị ri anyịhị ụ-ụwa ọpyị nya ịHala ka kele ka mwụ ala iFonichiya ẹpwa, ka ye ọpyị nyaa lalaala kele ka pwụ epweji nya ịSarẹfatị. Anyị nya ala Isirẹlụ ịlẹ kị ji oye ẹtẹ ịlẹ kị ri anyịhị ụ-ụwa iJerusalẹm, kị tị kụ ịSefaradị ka ye epweji nya iNegebụ wuu jaabwọ kị ju iru kaba.

²¹Angịlẹ kị ku rụ bwu iJerusalẹm ka wuleji bwu Ọgbọdọ nya ịSayọn kele ka Ọgbọdọ nya Ịsọ ka ri adịrahụ nyaa kpehị rịraa. Ụka ọọwa Amkpaa lịlọmwụ ka ri Adịrahụ nya angịnyị nyamwụ.