Read idege IJONA 1 Bible Online

IJONA 1 - idege bible

IJONA 1

¹Ụka ọhẹ lẹ, Amkpaa ya ẹla ta iJona ọnyị nya Amitayị yẹkẹẹ:

²“IJona ee, kele ka epweji ọtụka nya iNineve ọwẹ, ká ya ẹla nyam je alụwa mẹ, chajị m jẹ ẹla nya ọkwọ ọlala nya alụwa lẹ-ẹ̄.”

³Ma, iJona tị mwọọgịlẹ rụ bwu ẹga nya Amkpaa juwa yahị da ka ịTasisi. Ụka kọ jẹ kaka pwụ ịJọpa, kọ yẹ ụgbọ nya enyi ọhẹ kọ juwa jẹ ka ịTasisi lẹ, ọ nwụ uri ha alegbeju nya angị ju ụgbọ lẹ, ọ rụ ka ẹpwụ nyamwụ lẹlẹ. Ịnyị, iJona a juwa rụnyẹ rụ hi Amkpaa kele ka ịTasisi lẹlẹ.

⁴Ọọwa lẹ, Amkpaa a du igbachịwụ ọnyọọngịrị ọhẹ ka ẹpwụ nya ihu lẹlẹ. Igbachịwụ ọọwa da lọngịrị ọngịrị gbee ká ụgbọ nya enyi juwa họ lala ịnyaa ka bene.

⁵Alụkụrwọ nya ụgbọ nya enyi ọọwa ojuju wuu ju uhi ọtụka-ọtụka. Ịnyị, ọng myị ọng nyaa a juwa cheko wụrụ ohe nyamwụ kọ ka daa ụbwọ lẹlẹ. Ụka ọọwa, ị go olo nyaa da ju ka ẹpwụ nya enyi chajị ká ụgbọ ka hi huke huke. Ma, iJona ayịdang tị juwa ẹ-ẹpwụ oleji nya ụgbọ nya enyi ọwẹ juwa nọ une pịị.

⁶Ịnyị, olegbeju nya angị ju ụgbọ nya enyi ọwẹ a kele ka ẹga nya iJona lẹ, ọ byọọ yẹkẹẹ: “Ẹnwa ọlẹng, anyị tị́ ká juwa nọ une ịnyị? Wuleji, ká raabwọ ha ohe nyang kọ dahị ụbwọ mẹ. Ọhẹka ọ ka yẹ ahyẹẹrwẹrwa nyahị ọọ chịhị da bwu ẹpwụ nya ayịreji ọtata.”

⁷Ọọwa lẹ, alụkụrwọ nya ụgbọ nya enyi ojuju a byi awụlẹ yẹkẹẹ: “Ahị da iwo chajị kahị jẹ ọngọ ju ọmwụ nya akama onyobyi ọlẹ kọ lẹẹ pyẹjị mẹ.” Ịnyị, ị da iwo ịnyịlẹhị lẹ, iwo a wu iJona bẹẹ lẹlẹ.

⁸Ịnyị, ị tọ iJona wo yẹkẹẹ: “Ọọwa ri ahụ a ju ọmwụ nya akama ọlẹ rẹẹ hahị lẹ? Ụma nya ụkụrwọ ọlanyị a tịị họ? Epweji oyina a tị dọmwụ nya ẹdịyẹ nyang ọlẹ bwu? Ẹpwụma oyina ahụ ayịdang a tị bwu kpong-kpong ene? Alụma oyina a tị́ ri?”

⁹Lẹ, iJona a wẹ byaa yẹkẹẹ: “M ri alụma nya iHiburu. M kaa gbịgba ha Ohe Oluhye Amkpaa olepwoohe, ọlẹ kọ họ ịpyị bala ihu ịtụka wuu.”

¹⁰Ịnyị iJona a tịrọnụ ya jaa kpẹẹkpẹẹ jaabwọ kọ juwa rụnyẹ rụ hi Amkpaa lẹlẹ. Ụka ká alụkụrwọ nya ụgbọ nya enyi ojuju ịịwa wo ọnụ-ẹla ọtịrị tịrị nya iJona, ejiri ọtụka-ọtụka waa. Ịnyị, ị tọọ wo yẹkẹẹ: “Ịyẹ tị́ du ká juwa rụnyẹ kaka kpịbaa hi Ohe Oluhye ịnyị ene?”

¹¹Ụka ká enyi juwa gu ágbụ gụ olene-ene ọọ-la igbachịwụ ọnyọọngịrị ọọwa lẹ, alụkụrwọ ịịwa a tọ iJona wo yẹkẹẹ: “Anyị ahị tị ka họ ẹ-ẹga nyang ká igbachịwụ ọlẹ ka mị-ị kpụba lẹẹ mẹ?”

¹²Ọọwa, iJona a wẹ byaa yẹkẹẹ: “Anụ hum da ju ka ẹpwụ nya Ihu mẹ aalẹ, igbachịwụ a ka ba kem lẹlẹ. Am ayịdang jẹ kam a ju ọmwụ nya igbachịwụ ọwẹ kọ wẹẹ hu akama hanụ.”

¹³Ma, ọkọkọ nyọka hu iJona da ju ka ẹpwụ nya enyi lẹ, alụkụrwọ nya ụgbọ nya enyi ojuju ịịwa juwa kpa ọngịrị nyaa wuu maga nyọka kpa ochi ju ụgbọ ọọwa tịrẹkpẹ ka ọnụụka nya enyi. Ị́ tị jẹ pwụ ẹgẹgẹhẹ myị ka, chajị jaabwọ ká igbachịwụ á pwuru ka lẹ, enyi juwa gu ágbụ gụ ọọwa ọọwa.

¹⁴Ụka ọọwa lẹ, ị juwa raabwọ ha Amkpaa la omyi gboo yẹkẹẹ, “Amkpaa, ahị jam bịlẹng, a yẹhị akama ụgbẹyị ọhẹ-lọhẹ chajị nya ọhịhị nya ọlẹng ọlẹ koo. Ahị jẹ kpangga ká ang ọlẹ kọ ri irya nyang a wẹ ka họ.”

¹⁵Ịnyị, ị hu iJona da ju ka ẹpwụ nya Ihu jurum lẹ, ihu a kpụba kem i-ijata ijata lẹlẹ.

¹⁶Ẹlẹwẹ wu alụkụrwọ nya ụgbọ nya enyi ojuju ịịwa ejiri ọtụka-ọtụka lụmẹ. Ọọwa lẹ, ị kịla iya ha Amkpaa bala ọ-mị ọnụ họọ ya ịwa nyị ka myị ẹrụ họọ bwu ụka ọọwa kịlahị lẹlẹ.

¹⁷Ma, Amkpaa tị nwụla iyenyi ọtụka ọhẹ nọ kọ ka wu iJona mile. Ụka ká iyenyi ọọwa wọọ mile, ọ hyehe ẹ-ẹpwụ nya iyenyi ọọwa ahị ọpyẹpyẹ ịta bala odu ohihi ịta gbẹgbịlẹ.