Read idege IJONA 2 Bible Online

IJONA 2 - idege bible

IJONA 2

¹Ịnyị, iJona a raabwọ ha Amkpaa Ohe Oluhye nyamwụ ụ-ụwa ẹ-ẹpwụ nya iyenyi lẹlẹ.

²Ọ yẹkẹẹ: “Ụka kam juwa ẹ-ẹpwụ nya akama ọtụka-ọtụka, m be ẹkọ wụrụng Ahụ Amkpaa, a wo lam, a wẹm. M cheko bwu ẹpwụ nya ejegu, a wo omyi nyam.

³A hum ju ka ẹpwụ nya Ihu ọtụka o-kpori-kpori, dọmwụ ju ka ẹpwụ nya ụjẹ-ẹmwụ nya Ihu pẹtẹẹ, ẹga ọlẹ ọhụụ nya enyi, ọnyọọngịrị mwụ dagaga jum bala ẹga ká igbachịwụ ọtụka họ ká enyi gu ágbu birim wuu.

⁴Ịnọ am me irya ya Ahụ Amkpaa kum rụ hi ahị nyang pyịyọọ, nyọka jẹ-ẹ yẹng kpá ẹnẹnẹhẹ kaka; ma am tị la ẹhị ọrịrị rịrị nya ọ-ka yẹ ẹpwang ịgọgọ nyang kiji wẹẹ.

⁵Enyi myị birim hi pyịnyẹng ịnọ kam ka gbu lẹ; abakiiri daba rịm e-egbeju mẹnẹ mẹnẹ myị kpá wuu lẹ.

⁶M kpụ myọọ pwụ ẹga ká ịgbọdọ dọmwụ bwu gbee kam pwụ ọpyị nya alejegu ẹga ká ogirigba nyaa kaa tụ ku angịnyị pyịyọọ, Amkpaa Ohe Oluhye nyam tị gbam kpehe lahị-lahị bwu ụjẹ ọọwa lẹ.

⁷“Ụka kpá ká ọhịhị nyam ri ịmwụrụkpẹ wuu lẹ, m kpịtịya nyang Ahụ Amkpaa. Ọọwa m raabwọ hang wẹ ube ịgọgọ nyang lẹlẹ.

⁸“Angịlẹ kị myị la ọ-raabwọ ha ijiga ịnịịkịla tụụbwọ hi o-hu ọkịlẹtụ hang nyaa deeji gbanggbang lẹ.

⁹Ma, am ka kpa omyi nya obe ojiji bala iya ọkịlaakịla mwu eje gwogbo hang; ang myị ang kam myị ọnụ hang m ka họọ. Amkpaa a ri Ọngọchịda lẹ.”

¹⁰Ọọwa lẹ, Ọngọlahị Amkpaa a ya ẹla ta iyenyi ọọwa lẹ, ọ kpa iJona kpehe kele ka kọ dụwa u-ugbọọnụ ụka nya ihu lẹlẹ.