Read idege IJONA 3 Bible Online

IJONA 3 - idege bible

IJONA 3

¹Ụka ọọwa lẹ, Amkpaa a myịmyị ya ẹla ta iJona ụka oheeye yẹkẹẹ:

²“Wuleji ká rụ ka epweji nya iNineve ọtụka ọwẹ ká ya ẹrụ nyam ọlẹ kam bying ma ya jaa mẹ.”

³Ọọwa lẹ, iJona a wuleji rụ ka iNineve jaabwọ ká Amkpaa ya lẹlẹ. Ma, iNineve tị ri epweji ọtụka ọlẹ kọ ka lala ẹnụtụrụ ịta gbẹgbịlẹ ene kị ka jẹdịyẹ bwu ọbaba nyamwụ ọhẹ pwụ ọkịla mị.

⁴Ẹnụtụrụ ọhọhẹ ọlẹ ká iJona pwụ epweji ọwẹ bwaa lẹ, ọ juwa ya ẹla nya Ohe Oluhye lomi gboo juwa byaa yẹkẹẹ: “O hi ẹnụtụrụ iwo ine (40) ká iNineve ka ta ayịreji lẹ.”

⁵Ọọwa lẹ, ala iNineve a myị ẹla nya Ohe Oluhye lẹlẹ. I ya ọng myị ọng nyị hụ limyi mẹ. Ịwa wuu, bwu angịpyẹhị nyaa bala anjwo ichiche wuu hu awụrụ nya owuru ọkpakpa. Ọọwa lẹ, ị dọmwụ nya ọnọlimi ahyaahị lẹlẹ.

⁶Ụka ká oja ọwẹ pwụ ụrụ nya Adịrahụ nya ala iNineve, ọ hireji bwu ẹchị adịrahụ nyamwụ, ọ nwụla awụrụ nya adịrahụ, ọ hu awụrụ nya owuru kụrụ lẹ, ọ kele kaka hụhụ ẹ-ẹpwụ nya agbụ lẹlẹ.

⁷Ọọwa, ọ du ẹrụ kaka da ọna ya je ala iNineve lẹlẹ. Ọ da ọna ọọwa yẹkẹẹ: Ọlẹ ri ehile nya adịrahụ bala alegbeju ịtụkụ yọọ: Ọngọngọhẹ lee iyo lala ịna bala ịmwụ a kpa ịngịngịhyẹ ka ọnụ lala ang oriri lee ang ọnwanwa koo!

⁸Ma, ká angịnyị wuu bala iyo a hu awụrụ nya owuru ọkpakpa kụrụ kị juwa be ẹkọ nya ịlẹhị-ịlẹhị wụrụ Ohe Oluhye mẹ. Ọng myị ọng a tụụbwọ hi imajẹ bala ọkwọ ọlala nyamwụ wuu mẹ.

⁹Ọhẹka, Ohe Oluhye ka pwuru agbama nyamwụ. Ọ ka yẹhị ahyẹẹrwẹrwa, chajị kahị ka ta ayịreji ka.

¹⁰Ụka ká Ohe Oluhye yẹ ọhọhọ nyaa bala jaabwọ kị yẹ irya da hi ụgbẹyị onyobyi nyaa lẹ, ọ yaa ahyẹẹrwẹrwa. Ọ tụtụm taa ayịreji jaabwọ kọ byaa ene kaka.