Read idege IJONA 4 Bible Online

IJONA 4 - idege bible

IJONA 4

¹Ma, ahyẹẹrwẹrwa nya Ohe Oluhye ọọwa wụ iJona ẹjẹ lụmẹ, du kọ bwọ ayiiji.

²Ọọwa lẹ, ọ raabwọ ha Amkpaa byọọ yẹkẹẹ, “Amkpaa nyam ee, ẹla ọlẹ m ya lẹẹ ene ụka ọlẹ kam juwa ẹ-ẹpwa weẹ ka? Ọọ lajị nya ọọwa a du kam lẹẹ rụnyẹ rụ ka ịTasisi lẹ: chajị m jẹ ká ahụ a ri Ohe Oluhye ọlọnahị bala ọngọ yẹ ahyẹẹrwẹrwa. A kaa wụ ẹjẹ hyaa ka, ọháha ọlala nyang lụmẹ. Am jẹ kọ chịng kpẹẹ la ọ-hịnyọhi haa, chajị Ohe Oluhye nya ọháha bala ahyẹẹrwẹrwa a rị lẹ.

³Chajị nya ọọwa lẹ, Amkpaa, m bịlẹng ká ka ye ọhịhị nyam lẹ. Igu ham gụ ọhịhị lẹ.”

⁴Ụka ọọwa lẹ, Amkpaa a byọọ yẹkẹẹ: “Ọlẹ ká wẹẹ bwọ ayiiji wẹẹ, a họ hiigu?”

⁵Ọọwa, iJona a rụ ka ọmwẹnụ-ụtụrụ nya epweji ọwẹ lẹ, ọ nwụ ụdaa ụ-ụwa ha ịlọmwụ lẹlẹ. Ọ hụ ẹ-ẹpwụ nyamwụ, juwa ya ẹhị rịrị gbe ang ọlẹ kọ ka họ alepweji ọwẹ.

⁶Ọọwa, Amkpaa Ohe Oluhye a họ ká akwọ-ogo ọhẹ da ka uhye-ọgba nya iJona lẹlẹ. Ụrụrụ nya akwọ-ogo ọọwa ke egbeju nya iJona hi ọchịpwuu nya ẹnụ. IJona chị ọkẹkẹnị lụmẹ ọọ-la akwọ-ogo ọọwa.

⁷Ma, Ohe Oluhye nwụla ukpungjuju ọhẹ nọ gbọọ. Lụtụrụ nya ahị ọpyẹpyẹ ọọnamwụ, ukpungjuju oowa a ri akwọ-ogo ọwẹ lẹ, ọ gbu wombooo lẹlẹ.

⁸Ụka ká ẹnụ chị lẹ, Ohe Oluhye a da igbachịwụ ochila ọhẹ bwu ọmwẹnụ-ụtụrụ lẹlẹ. Ọọwa, ẹnụ a jụ iJona e-egbeju lẹ, ọ hi pyịnyẹng kọ ka kpụ ịbwọ lẹlẹ. Ọọwa, ọ juwa ma ịlọmwụ igu ma yẹkẹẹ: “Ó-ri kam gbugbu lẹẹ, ọ ham gụ ọ-ka hịhị lẹ.”

⁹Ohe Oluhye tọ iJona wo yẹkẹẹ, “A họ kpakpa nyọlẹ ká wẹẹ ju agbama ta akwọ-ogo ọwẹ wẹẹ?” Ọ wẹ byi Ohe Oluhye yẹkẹẹ, “M dọmwụ họ kpakpa ẹ-ẹpwụ nya agbama nyam. Igu chịm kpẹẹ gụ lẹ.”

¹⁰Ọọwa lẹ, Amkpaa a yẹkẹẹ: “Ahụ jujwo nya akwọ ọlẹ ka họ ụkụrwọ u-uhye nyamwụ ka. Aahụ a tị họ ọ nwa ka; ọ bwu kpehe lepwodu, kọ tị ta ayịreji lodu ịnyịnyị.

¹¹Ee lẹ, anyị a tị me irya? Ọ chịla kam ka jujwo nya iNineve, epweji ọtụka ọlẹ ká angịnyị ehe linyi e-egbeju ị-jẹ ẹlẹlẹhẹ ka ịlẹ kị ju iru gụ angị ụnọ ohu da ụnọ iwo imiiye (120,000) kụ. Iru nya iyo ileji juwa ụ-ụwa ịnyịnyị.”