Read idege ỌWAWA 1 Bible Online

ỌWAWA 1 - idege bible

ỌWAWA 1

¹Ụka ọhẹ, Amkpaa ya ẹla ta iMosisi ẹ-ẹpwụ nya Ọdụ nya Amkpaa u-ugileji nya ịSayịnayị. Ọ ya ẹla ọọwa ẹnụtụrụ ọhọhẹ nya ọya oheeye ẹ-ẹpwụ nya ẹka oheeye nyọlẹ kị yegiri bwu Ijipiti kpá. Ọ byoo yẹkẹẹ,

²“IMosisi ee, ahụ bala Erọn ā kele kanụ wa ala Isirẹlụ wuu jaabwọ kị ju iru kaka ba ogang-ogang bala ugbiyegu-ugbiyegu nyaa wuu mẹ. Anụ da ẹnyị nya ọlẹng ọnyọnyọọnyị ju

³ẹ-ẹpwụ nya angịlẹ kị gu ẹka pwụ iwo imiiye kele ka uhye kị ka la gogo ka ẹwụ myị.

⁴Anụ hu olegbeju nya ogang ookpokpo-ookpokpo bwu imwawụ ọnyọnyọọnyị kọ ka danụ ụbwọ mẹ.

⁵Ẹnyị nya alẹng ịlẹ kị ka dang ụbwọ bwu imwawụ ọnyọnyọọnyị ri Elisuu ọnyị nya iChedewu bwu imwawụ nya iRubẹn.

⁶Ị chụ iChelumiyẹlụ ọnyị nya iSurichadayị bwu imwawụ iSimyọn.

⁷Ị chụ ịNachọn ọnyị nya Aminadabụ bwu imwawụ nya iJuda.

⁸Ị chụ iNetanẹlụ ọnyị nya iSuwa bwu imwawụ nya iSakaa.

⁹Ị chụ Eliyabụ ọnyị nya iHelọn bwu imwawụ nya iSebulọn.

¹⁰O-bwu ẹpwụ nya anyị ịtụma nya iJosẹfụ lẹ, ị chụ Elichama ọnyị nya Amihudu bwu imwawụ nya Ifurem. Ị chụ ịGamaliyẹlụ ọnyị nya iPedasuu bwu imwawụ nya ịManasẹ.

¹¹Ị chụ Abidan ọnyị nya iGidyoni bwu imwawụ nya iBenjamịn.

¹²Ị chụ Ahiyesa ọnyị nya Amichadayị bwu imwawụ nya ịDan.

¹³Ị chụ ịPagiyẹlụ ọnyị nya Ọkịran bwu imwawụ nya Achẹẹ.

¹⁴Ị chụ Elichafụ ọnyị nya iDeyuwẹlụ bwu imwawụ nya ịGadị.

¹⁵Ị chụ Ahira ọnyị nya Ẹnan bwu imwawụ nya ịNafụtali.”

¹⁶Angịwẹ à ri alegbeju nya ogang-ogang i-bwu imwawụ ọnyọnyọọnyị ịlẹ kị chụ bwu ẹpwụ nya alụma nya ala Isirẹlụ lẹlẹ.

¹⁷Ụka ọọwa, iMosisi bala Erọn tụ alegbeju ịwẹ à

¹⁸wụrụ angịnyị wuu guru ẹnụtụrụ ọhọhẹ nya ọya oheeye lẹ, ị wa angịnyị wuu jaabwọ kị la ogang-ogang bala ugbiyegu-ugbiyegu wuu lẹlẹ. Ị da ẹnyị nya angịlẹ wuu kị gu ẹka pwụ iwo imiiye kele ka uhye ju

¹⁹jaabwọ ká Amkpaa da iMosisi ehile. U-ugbileji nya ịSayịnayị iMosisi à da ẹnyị nya angịnyị wuu lẹ.

²⁰Ị dọmwụ nya angịnyị ọwawa bwu ẹga nya anyị ịtụma nya iRubẹn kọ ri ọnyị ọgbahị nya iJekọbụ. Alẹng ịlẹ wuu kị gu ẹka iwo imiiye lee o-gu kịlahị nya ọọwa kị tị la ọngịrị ka dẹwụ myị lẹ aalẹ, ị da ẹnyị nya ọngọngọọng nyaa wuu ju ogang-ogang bala ugbiyegu-ugbiyegu lẹ.

²¹Alẹng ịlẹ kị da ẹnyị nyaa bwu imwawụ nya iRubẹn la angị ụnọ iwo ine da ụnọ ịrwọnyẹ kụrụ ohu ịrụ (46,500).

²²Angị bwu imwawụ nya iSimyọn la angị ụnọ iwo ịrụ da ụnọ ihikichu da ohu ịta (59,300).

²³

²⁴Angị bwu imwawụ nya ịGadị la angị ụnọ iwo ine da ụnọ ịrụ da ohu ịrwọnyẹ da iwo ịrụ (45,650).

²⁵

²⁶Angị bwu imwawụ nya iJuda la angị ụnọ iwo irwiye da ụnọ ine da angị ohu ịrwọnyẹ (74,600).

²⁷

²⁸Angị bwu imwawụ nya Isakaa la angị ụnọ iwo ine da ụnọ ine da angị ohu ine (54,400).

²⁹

³⁰Angị bwu imwawụ nya iSebulọn la angị ụnọ iwo ịrụ da ụnọ irwiye da angị ohu ine (57,400).

³¹

³²Angị bwu imwawụ nya Ifurem ọnyị nya iJosẹfụ la angị ụnọ iwo ine da angị ohu ịrụ (40,500).

³³

³⁴Angị bwu imwawụ nya ịManasẹ ọnyị nya iJosẹfụ la angị ụnọ iwo ịta da ụnọ imiiye da angị ohu imiiye (32,200).

³⁵

³⁶Angị bwu imwawụ nya iBenjamịn la angị ụnọ iwo ịta da ụnọ ịrụ da angị ohu ine (35,400).

³⁷

³⁸Angị bwu imwawụ nya ịDan la angị ụnọ iwo ịrwọnyẹ da ụnọ imiiye da angị ohu irwiye (62,700).

³⁹

⁴⁰Angị bwu imwawụ nya Achẹẹ la angị ụnọ iwo ine da ụnọ ookpokpo da angị ohu ịrụ (41,500).

⁴¹

⁴²Angị bwu imwawụ nya ịNafụtali la angị ụnọ iwo ịrụ da ụnọ ịta da angị ohu ine (53,400).

⁴³

⁴⁴Alẹng ịlẹ ká iMosisi bala Erọn bala alegbeju iwo kụrụ imiiye nya ala Isirẹlụ wa jaabwọ kị la ogang-ogang bala ugbiyegu-ugbiyegu nyaa-à wẹ lẹlẹ.

⁴⁵Alẹng ịlẹ kị gu ẹka pwụ iwo imiiye lee ọ-gụ ọọwa, kị tị la gogo ka dẹwụ myị ị wa lẹ.

⁴⁶Ọtụchawụlẹ nyaa wuu la angị ụnọ ohu ịrwọnyẹ da ụnọ ịta da angị ohu ịrụ da iwo ịrụ (603,550).

⁴⁷Ma, alimwawụ nya iLivayị-ị́ juwa ẹ-ẹpwụ nya angịlẹ kị wa wẹ wuu kpịlọ ka,

⁴⁸chajị Amkpaa lẹẹ byi iMosisi ene yẹkẹẹ,

⁴⁹“Ụka kanụ ka wa ala Isirẹlụ, ānụ wa ala iLivayị julaa kpịlọ koo.

⁵⁰Anụ tụ́tụ́ gyaa kị ri alegbeju ịkpẹhị rịrị Ọdụ nyam am Amkpaa bala ang-abwọ ị-kpa họ ụkụrwọ ọlẹpwụ nyamwụ. Ịwa-à kpa olo nya Ọdụ ọwẹ tụ́ ang-abwọ nyamwụ ụka kanụ juwa ẹ-ẹpwụ nya ẹdịyẹ nyanụ lẹ. Ị ka kpẹhị rịrọọ bala ọ-ya ebe nya ọdụ nya ịlaa kụ dagaga jwoo.

⁵¹Ụka myị ụka kanụ ka mwụ bwu ẹgẹhe ka ẹga ọkịla ẹ-ẹpwụ nya ẹdịyẹ nyanụ, ala iLivayị à ka mwụ Ọdụ bawụlẹ bala ọ-ka ya yeji ẹ-ẹga ọkịla ịnyịnyịịnyị lẹ. Ọngọkịla ọhẹ-lọhẹ kọ tụ́ jwoo chwẹẹ aalẹ, ị ka nwụ ọngọọwa.

⁵²Ala Isirẹlụ ihihi ịkịla wuu ka kụ dagaga ju Ọdụ nyam am Amkpaa ebwebweebwo. Ọngọngọọng ka kụ bala alebwo nyamwụ lụgbàńg nya ugbiyegu nyamwụ.

⁵³Ma, ala iLivayị tị lẹ, ị ka ya ịnawụ nya ọdụ nya yeji dagaga ju Ọdu nyam kị ka juwa gboo, chajị ká ọngọngọhẹ-ẹ́ ka tụ jwoo chwẹẹ kpụ y ̄mkà wụ ẹjẹ ta ala Isirẹlụ ka.”

⁵⁴Ọọwa, ala Isirẹlụ à họ jaabwọ ká Amkpaa da iMosisi ehile ya nyị họ wuu lẹlẹ.