Read idege ỌWAWA 10 Bible Online

ỌWAWA 10 - idege bible

ỌWAWA 10

¹Ụka ọhẹ, Amkpaa byi iMosisi yẹkẹẹ,

²“Họ ẹkụrwẹ imiiye ịhyẹ lokpoko onyoowuru nyọka ka kpa chị wụrụ angịnyị wuu kaka tụguru bala ọ-ka kpa byi angịnyị nyị wuleji ẹdịyẹ mẹ oo.

³Ụka kị chị ẹkụrwẹ imimiiye ịwẹ, aluche wuu ka wẹ kaka jịra ẹ-ẹga nyang ọ-ọnang nya Ọdụ nyam.

⁴Ọ́ tị ri ookpokpo kem kị chị aalẹ, alegbeju i-bwu ogang datị-datị kem à ka wẹ ẹga nyang lẹ.

⁵Ụka kị chị ẹkụrwẹ lomyi oleji ọlẹ kọ ri nyọka wuleji ẹdịyẹ, alimwawụ ịlẹ kị kụ ka ọmwẹnụ-ụtụrụ ka wuleji ji ịlahị.

⁶Ụka kị chị ẹkụrwẹ lomyi oleji ugbabwọ oheeye, alimwawụ ịlẹ kị kụ ka edii ka wuleji baa ba. Ẹkụrwẹ ọ-chị lomyi oleji ri nyọka wuleji ẹdịyẹ.

⁷Ụka kọ ri nyọka wụrụ aluche kaka tụguru, ị ka chị ẹkụrwẹ lomyi oluhye.

⁸Angịkiliya anyị ịtụma nya Erọn kem à ka chị ẹkụrwẹ lẹ. Ọwẹ ri ehile ọlẹ kanụ ka ba jẹ pyịyọọ gbe oyi myị oyi.

⁹Ụka kanụ pwụ ọpyị nyanụ, kanụ juwa ka dẹwụ ta aluji nyanụ ịlẹ kị wuleji nya ẹwụ jahị danụ, anụ ka chị ẹkụrwẹ ịwẹ nya ẹwụ ọdada. Ọọwa, am Amkpaa Ohe Oluhye nyanụ à ka danụ ụbwọ chịnụ da bwu ẹpwụtụbwọ nya aluji nyanụ lẹlẹ.

¹⁰Ụka kanụ ka ya ụya lala ụka nya ọhụhụ nya Ọya Onyeewe bala ọhụhụ ọ-kpa gbịgba ịkịla, anụ ka chị ẹkụrwẹ ịwẹ lụka kanụ juwa kịla iya ọ-rụ ila bala iya nya ọhọlawụlẹ. Ẹkụrwẹ ọchịchị ọwẹ ka kpụm ịtịya nya iro ọlẹ kam nwa bala anụ. Am à ri Amkpaa Ohe Oluhye nyanụ lẹ.”

¹¹Ụka ká ẹnụtụrụ iwo imiiye nya ọya oheeye nya ẹka oheeye nyọlẹ kị yegiri bwu Ijipiti pwụ eji lẹ, egbamwụ oluhye nya Ọdụ à hu hwaa rụ hi ụwa lẹlẹ.

¹²Ọọwa, ala Isirẹlụ à wuleji ẹdịyẹ bwu Ugbileji nya ịSayịnayị juwa jẹ bwu ẹgẹhẹ ka ẹga ọkịla ịnyịnyịịnyị gbee ká egbamwụ ọọwa kpụba u-Ugbileji nya ịParan lẹlẹ.

¹³Ị wuleji ẹdịyẹ jaabwọ ká Amkpaa daa ehile bwula iMosisi.

¹⁴Ogu nya nya imwawụ ịlẹ kị hu ang ẹdịyẹ jene ri imwawụ ịlẹ kị kụ ta alimwawụ nya iJuda. Ị yegiri lụgbàńg nyaa. ỊNachọn ọnyị nya Aminadabụ à kpa ogu ọọwa kụ ịlahị lẹ.

¹⁵ỊNẹtanẹlụ ọnyị nya iSuwa-à kpa alimwawụ nya Isakaa kụ ịlahị lẹ.

¹⁶Eliyabụ ọnyị nya iHelọn à kpa alimwawụ nya iSebulọn kụ ịlahị lẹ.

¹⁷Ọọwa, ị nwụla Ọdụ neeji lẹ, alogang nya ịGẹẹchọn bala ịnya iMerarị kị ri angị kaa kpa olo nyamwụ à wuleji ẹdịyẹ lẹlẹ.

¹⁸Imwawụ ịlẹ kị kụ jula imwawụ nya iRubẹn wuleji ẹdịyẹ ju ebwo oheeye lụgbàńg nyaa. Elisuu ọnyị nya iChedewu à kpaa kụ ịlahị lẹ.

¹⁹IChelumiyẹlụ ọnyị nya iSurichadayị à kpa alimwawụ nya iSimyọn kụ ịlahị lẹ.

²⁰Elisafụ ọnyị nya iDeyuwẹlụ à kpa alimwawụ nya ịGadị kụ ịlahị lẹ.

²¹Ụka ọọwa, alogang nya iKohatị bwu imwawụ nya iLivayị à wuleji ẹdịyẹ la olo nya ang-abwọ ịlịgọgọ. Ụka kịịwa-á ka jẹ pwụ ịkampụ ọkịla ọlẹ kị ka chịkụ kpá ị ka lẹẹ ya Ọdụ nya Amkpaa yeji gbaa lẹ.

²²Ebwo nya imwawụ ịlẹ kị kụ jula imwawụ nya Ifurem à yegiri lụgbàńg nyaa ju ebwo ọkịla lẹ. Elichama ọnyị nya Amihudu à kpaa kụ ịlahị lẹ.

²³ỊGamaliyẹlụ ọnyị nya iPedasuu à kpa alimwawụ nya ịManasẹ kụ ịlahị lẹ.

²⁴Abidan ọnyị nya iGidiyọnị à tị kpa alimwawụ nya iBenjamịn kụ ịlahị lẹ.

²⁵Ohyẹẹkpẹ-ẹkpẹ wuu, alimwawụ ịlẹ kị kụ jula imwawụ nya ịDan wuleji ẹdịyẹ lụgbàńg nyaa juwa tụ alebwo ịkịla wuu da ẹ-ẹkpẹ-ẹkpẹ. Ịwa-à ri angịgbeji ịlẹkpẹ nya alimwawụ ịkịla wuu lẹlẹ. Ahiyesa ọnyị nya Amichadayị à kpa angị ji ogu ta imwawụ nya ịDan ịwẹ wuu kụ ịlahị lẹ.

²⁶ỊPagiyẹlụ ọnyị nya Ọkịran à kpa alimwawụ nya Achẹẹ kụ ịlahị lẹ.

²⁷Ahira ọnyị nya Ẹnan à kpa alimwawụ nya ịNafụtali kụ ịlahị lẹ.

²⁸Jaabwọ ká ala Isirẹlụ bwu chẹwụ rụ ebwebweebwo ụka myị ụka kị juwa ka mwụ ẹpwa bwu ẹgẹhẹ ka ẹga ọkịla ẹ-ẹpwụ nya ẹdịyẹ nyaa-à wẹ lẹlẹ.

²⁹Ẹnẹhẹ, iMosisi byi iHobabụ ọgọm nyamwụ kọ ri ọnyị nya ọnyị ọlẹng nya iJetiro[3] adamwụ-ẹpwa ọla iMidiyan yẹkẹẹ, “Ahị jam wuleji ẹdịyẹ nyọka rụ ka ẹga ọlẹ ká Amkpaa myị ọnụ kọ ka ya hahị lẹ. Lẹ, kẹwẹ kahị bajẹ kele lawụlẹ mẹ. Ahị ka kpang hiigu-hiigu, chajị Amkpaa myị ọnụ nyọka wahị ha ala Isirẹlụ kịlahị ẹ-ẹpwụ nya ang lụmẹ-lụmẹ.”

³⁰Ma, ọnyị nya adamwụ-ẹpwa ọọwa wọọ yẹkẹẹ, “Eheehe, ḿ juwa wẹ koo. M̀ jam rụ ka epweji nya ịlọm kaka tọ alugbiyegu nyam lẹ.”

³¹IMosisi byoo yẹkẹẹ, “Chuchuu, ā tụhiihi ka. Ahụ à jẹ ẹga kahị ka jẹ-ẹ̀ chịkụ u-ugbileji lẹ. A ka dahị ụbwọ nya ụgbẹyị myị.

³²Ó-ri ká baahị, ang ọnyịịla ọnyị myị ọnyị ká Amkpaa-á ya hahị, ahị tị̀tị̀ ka kụ ẹhị yẹng ịnyịnyị.”

³³Ọọwa, ị yegiri bwu ịSayịnayị ọgbọdọ nya Amkpaa juwa jẹdịyẹ ẹ-ẹpwụ nya ẹnụtụrụ ịta gbẹgbịlẹ lẹlẹ. Ị kaa kpa Akpa nya Iro nya Amkpaa ji ịlahị nya angịnyị wuu juwa pịlahị nya ẹga kị ka jẹ-ẹ̀ chịkụ.

³⁴Ụka kị juwa ẹ-ẹpwụ nya ẹdịyẹ ọjẹjẹ, egbamwụ nya Amkpaa kaa juwa u-uhye-ọgba nyaa lụka nya alẹnụ.

³⁵Ụka myị ụka kị hu Akpa nya Iro juwa kpa jẹ rụ, iMosisi kaa yẹkẹẹ, “Amkpaa ee, wuleji mẹ oo, ká nyi aluji nyang epepe mẹ. Angịlẹ ká waa ẹjẹ wuu ā rụnyẹ rụ mwụ ata bịmwụ mẹ.”

³⁶Ụka ká kị ya Akpa nya Iro mwụ ịnyọ, iMosisi kaa raabwọ byi Amkpaa yẹkẹẹ, “Amkpaa ee, nyà mẹ, nyà wẹ ẹga nya ụnụnụụnọ nya ala Isirẹlụ angịnyị nyang mẹ.”