Read idege ỌWAWA 11 Bible Online

ỌWAWA 11 - idege bible

ỌWAWA 11

¹Ẹnẹhẹ lẹ, ala Isirẹlụ à dọmwụ nyọka cheru chajị nya akama ịlẹ kị juwa yẹ lẹlẹ. Ụka ká Amkpaa wo ẹla ọ-mwọ ya nyaa ọọwa, ọ wụ ẹjẹ ọtụka-ọtụka taa kpụ ọ du ila wẹ ẹpwụ nya ịkampụ nyaa. Ịla ọọwa rụ ẹpwa ịlẹ kị kụ ka odehe nya ịkampa nyaa.

²Ụka ọọwa, angịnyị jida ju iMosisi kọ ka daa ụbwọ. Ọọwa, iMosisi à raabwọ bịlẹ Amkpaa lẹ, ila-à kpụba bịlọọọ lẹlẹ.

³Bwu ụka ọwẹ kịlahị lẹ, ị wụrụ ẹnyị nya ẹgẹwẹ ịTabera[4] lẹlẹ. Ang odudu ri ụ-ụwa Amkpaa-à du ila ka ẹpwụ nya angịnyị nyamwụ lẹ.

⁴Ụka ọọwa, angga ịhyẹ juwa bajẹ ta ala Isirẹlụ rụ bwu Ijipiti. Ịwa anyị juwa họ ìwò nya iyo ọ-ka riri kpụ ala Isirẹlụ dọmwụ nyọka cheru ịnyịnyị yẹkẹẹ, “Ang pyii kahị ka ye iyo ri ẹ-ẹgẹlẹ!

⁵Ụ-ụwa Ijipiti lẹ, ahị kaa ye iyenyi ri lorwaahị jaabwọ kọ haahị. Ahị kaa ri apwụ bala ịbẹhị bala ụma nya aribacha datị-datị bala ịgaliki wu ẹpwụ kpọngkpọng.

⁶Tị yẹ-ẹ̀ wẹ wẹẹ! Imyi gbu dahị ẹ-ẹpwụ lẹ. Áhị tị ye ịngịngịhyẹ ri dala ịmána ọlẹ ẹnụ myị ẹnụ kaka!”

⁷Ịmána ọọwa lala ajẹ ichiche-ichiche nya okoji ikoriyanda. Ị me ịkama.

⁸Ụka ká angịnyị-ị́ yilaa bwu eji lẹ, ị kaa gyaa i-igo lee o-rwaa ụ-ụchị gbee kị ka kpọrụ pwụrẹ-pwụrẹ lẹlẹ. Ị kaa ya kpụ́ ẹ-ẹchụ ene kị ka haa lala ịkịra i-hu ẹbẹ. Ị la ịpyị lala ịnyaa ya kpụ́ ẹ-ẹpwụ nya ida nya olivu.

⁹Ụka ká amwụ-ụ́ kpụ lodu, ịmána-à kaa du tọọ wẹ ịkampụ nyaa lẹ.

¹⁰Ụka ọọwa, iMosisi wo ká alugbiyegu ọnyị myị ọnyị nya ala Isirẹlụ wuu godayị ọ-ọnang nyaa juwa mwọ ala ya. Ẹla ọọwa wụ iMosisi ẹjẹ lụmẹ chajị nyọlẹ kị du agbama ju Amkpaa ịnyị.

¹¹Ọọwa, iMosisi à byi Amkpaa yẹkẹẹ, “Ịyẹ tị́ du ká họm am ọnchẹ nyang ẹla ọlịịlẹ-ẹ̀? Ẹla-ịyẹ m̄ tị́ họ wụng ẹjẹ kpụ ọ-ka hu olo nya ẹhị ọ-kpa rịrị iru nya angịlẹ wuu nịrọm ịnyị mẹ?

¹²Am à maa lẹ-ẹ́? Lee am à tị́ ri adaa ká ka byim am nyị hwaa jwẹgọ lala ịnọnyị nyọka kpaa gbee ka pwụ ọpyị ọlẹ ká myị ọnụ ha adaa igogo anyị?

¹³Ị wẹẹ cheru jum am nyị ya iyo hịwa ri mẹ. Ale kpong-kpong m̄ tị́ ka ye iyo bwu ha iru nya angịlẹ wuu ri myị-ị̀?

¹⁴Ḿ lọngịrị ka kpa iru nya angịlẹ wuu ụbwọm myị ka. Olo ọwẹ la nyẹẹnyẹẹ kịlam kịla!

¹⁵Ó-ri ịịwẹ ká ka họm tụbwọ aalẹ, tụtụ nwụm kpẹẹ mẹ. Chuchuu, ā myị kam kịnyaa ẹ-ẹpwụ nya uhila nya akama ọlẹ kaka.”

¹⁶Ọọwa, Amkpaa-à byi iMosisi yẹkẹẹ, “Wụrụ angị iwo irwiye bwu ẹpwụ nya ịgabwọ nya ala Isirẹlụ ịlẹ ká jẹ lala alegbeju ham wẹẹ. Kpaa warị wẹ ẹga nya Ọdụ ká byaa kị godayị ụ-ụwa bang ba mẹ.

¹⁷M̀ ka hireji warị kaka ya ẹla tang ụ-ụwa. Ọọwa, m̄ ka ye ebwo ọhẹ bwu ẹpwụ nya olegu oluhye nyang ọwẹ haa lẹ, ị ka dang ụbwọ kpẹhị rịrị angịnyị nyam tang lẹlẹ. Á tụtụm ka kpa olo ọwẹ wuu ụbwọng-ụbwọng kaka.

¹⁸“Lẹẹlẹ, aa byi angịnyị kị chị ịgọgọ ju ịlaa juwa nwụlanọ gbe ijuju mẹ. M̀ tị́ wo kị lẹẹ cheru nya o-ye iyo ri ka bala o-ya iwe-ahụrụ nyịwa ọla Ijipiti nyị hịịwa gụ lẹ. Byaa mẹ, am Amkpaa juwa ka ya iyo ọọwa haa lẹ, ị tị ka ryoo pyii.

¹⁹Ẹẹla nya ẹnụtụrụ ookpokpo kem lee ụtụrụ imiiye lee ụtụrụ ịrụ lee ụtụrụ iwo lee ụtụrụ iwo imiiye ị ka ri iyo kem ka.

²⁰Ma, ẹ-ẹpwụ nya ọya lẹpwụ-lẹpwụ ị ka juwa ri iyo ẹnụ myị ẹnụ lẹ. Ị ka ri gbee kọ ka chaa aga, wụ́ kwaa ọ-ọnụ bala ọ-jwaa ẹdụrụ. Ang odudu ri ị tị́ nyẹẹkpẹ dam am Amkpaa ọlẹ kam kụ ẹpwarịrị nyaa lẹẹ cheru jum ya ịyẹ nyaa tị́ du kịịwa nyị dọmwụ rụ bwu Ijipiti kpong-kpong lẹẹ ene-è?”

²¹Ma, iMosisi byi Amkpaa yẹkẹẹ, “À ya ányị lẹẹ? Angịnyị angị ụnọ ohu ịrwọnyẹ (600,000) lẹpwụ-lẹpwụ m̄ lẹẹ kpa ẹ-ẹpwụ nya ẹdịyẹ ọlẹ lẹ! Ale ā tị́ ka ye iyo bwu kpụ kọ ka nwaa ụga ẹ-ẹpwụ nya ọya lẹpwụ-lẹpwụ ịnyị myị-ị̀?

²²Ó-ri kahị nwụ ịna bala ịkpịlọ ịlẹ kahị la wuu, ọ tị́ ka pwáā ale? Ó-ri iyenyi ịlẹpwụ nya Ihu ịtụka wuu kị wuwu haa-ā ri, ọ́ ka pwụ ẹgẹgẹhẹ ka ịnyịnyị.”

²³Ọọwa, Amkpaa-à tọ iMosisi wo yẹkẹẹ, “Ịngịngịhyẹ ka jẹ-ẹ̀ chị ọngịrị nyam ọha la ọhọhọ myị-ị̄ị́? Ọ hiigu, godayị kpọọọ ká yẹ pwụ ọbaba ó-ri ká ẹla nyam-ḿ ka họ jịra lee ọ-ka họ jịra kaka lẹ ká yẹ mẹ-ẹ̀!”

²⁴Ọọwa, iMosisi à kele ka tịrọnụ nya ẹla nya Amkpaa ya je aluche lẹ, ọ wụrụ alegbeju angị iwo irwiye kaka godayị dagaga ju Ọdụ nya Amkpaa lẹlẹ.

²⁵Ọọwa, Amkpaa-à hireji ẹ-ẹpwụ nya egbamwụ warị kaka ya ẹla ta iMosisi lẹlẹ. Ọ ye ebwo ọhẹ nya olegu ọlẹ kọ ya ha iMosisi lẹ, ọ ya ha alegbeju angị iwo irwiye ịịwa lẹlẹ. Ụka ká olegu nya Amkpaa hwo kwaa, ị juwa yẹ ọmwụ gbogboogbo lala alọmwụ. Ụka ọwẹ kem ị tị họ ịnyị lẹ.

²⁶Ụka ọọwa, Elidadị bala iMedadị kị ri angịhyẹ ẹ-ẹpwụ nya alegbeju angị iwo irwiye hi hụ ị-ịkampụ. Ị́ kele ka ẹga nya Ọdụ nya Amkpaa ka. Ụka ká olegu tị hwo kwaa ịwa lẹ, ị dọmwụ nyọka yẹ ọmwụ gbogboogbo ẹ-ẹpwụ nya ịkampụ ịnyịnyị.

²⁷Ọọwa, okolobya ọhẹ à rụnyẹ kele ka byi iMosisi ya Elidadị bala iMedadị nyị lalẹẹ yẹ ọmwụ ị-ịkampụ lẹlẹ.

²⁸Ụka ọọwa, iJochuwa ọnyị nya iNun kọ lẹẹ myị ẹrụ ha iMosisi bwu ụka-ụka kọ ri okolobya-à wuleji kpịraka byi iMosisi yẹkẹẹ, “Ayịbam ee, byaa kị kpụba la ẹlẹwẹ mẹ-ẹ̀!”

²⁹Ma, iMosisi tọ iJochuwa wo yẹkẹẹ, “A juwa yẹ ijiiji nyaa nya ọ-chị uko nyam-ḿ? Ọ dọmwụ ham ịnọ ká angịnyị nya Amkpaa wuu kaa ri alọmwụ kọ ka ya olegu nyamwụ chị kụrwaa wuu!”

³⁰Ọọwa, iMosisi bala alegbeju nya ala Isirẹlụ ịwẹ à nyà tịrẹkpẹ ka ịkampụ nyaa lẹlẹ.

³¹Lụka ọmwaa, Amkpaa da igbachịwụ ọhẹ ọlẹ kọ kpa iru nya ikpekpile-ẹwa bwu oye nya Ihu ọtụka. Ị juwa hụ̀ ọ-ọnụ eji-eji bẹdẹẹ lala apatẹ ịta kẹnẹ-kẹnẹ hi ịpyị dagaga ju ịkampụ bala ọ-yịrị ẹga yịrị koye ọnyị myị ọnyị wuu lala ịmaalị lụmẹ-lụmẹ.

³²Ọọwa, angịnyị wuu à họ ụkụrwọ nya ikpekpile-ẹwa owuwu lụtụrụ gbee ká odu hi, lodu gbee ká ahị pyẹ bala lụtụrụ gbee ká odu nya ahị ọpyẹpyẹ hi ịnyịnyị lẹlẹ. Ọng myị ọng wuu wu lala ịnyaa ka myị̀ ụnọ ookpokpo nya okolo. Ọọwa, ị ya yịrị ọdọda nya ịkampụ nyaa pẹ̀pẹẹpẹ lẹlẹ.

³³Ụka ká iyo ịwẹ-ẹ́ chọpẹ́ẹ̄ chị la oriri lẹka, Amkpaa wụ ẹjẹ taa kpụ ọ du ẹdụrụ nya ịdọlọ-dọlọ onyobyi-obyi kaka jụ ala Isirẹlụ.

³⁴Ị wụrụ ẹgẹwẹ iKibirotu-ịHataava ọlẹ ká etu nyamwụ ri “Iwori nya Ịpyọnụ”, chajị ụ-ụwa ị ju egu nya angị họ ìwò nya iyo eji lẹ.

³⁵Ọọwa, ala Isirẹlụ à yegiri bwu ẹgẹwẹ lẹ, ị kele kaka chịkụ ị-ịHaserotu lẹlẹ.