Read idege ỌWAWA 12 Bible Online

ỌWAWA 12 - idege bible

ỌWAWA 12

¹Ụka ká ala Isirẹlụ juwa ị-ịHaserotu wẹẹ, iMiriyam bala Erọn ya ẹla ba iMosisi chajị nya ọlẹ kọ ye ahụ bwu ọpyị nya iKuchi.

²Ị yẹkẹẹ, “Kpakpaakpa lẹẹ, ẹga nya iMosisi ụbwọọmwụ kem Amkpaa-à kaa ya ẹla bwu lẹ-ẹ́? Ọ tị́-ị̀ ya ẹla bwulahị kpịlọ ịnyịnyị.” Ụka ọọwa, Amkpaa wo ẹlẹwẹ kị ya.

³(IMosisi ayịdang tị̄-ị̀ wẹẹ, ọ ri ọngọ la dụmwọ. Ọwa-à la dụmwọ gụ angịnyị ehe ịlẹ kị jam odehe ọlẹ wuu lẹlẹ.)

⁴Iijata-ijata lẹ, Amkpaa-à byi iMosisi bala Erọn bala iMiriyam yẹkẹẹ, “Anụ angị ịtịta, anụ kpehe warị wẹ Ọdụ nyam lẹẹlẹẹ.” Ọọwa, ị kele lẹ,

⁵Amkpaa-à hireji warị labwụma nya egbamwụ kaka godayị ọ-ọnang nya Ọdụ lẹlẹ. Ọ be ẹkọ wụrụ Erọn bala iMiriyam tụ ba ịlọmwụ lẹ, ịwa angị imiiye ịwẹ à jẹ tụ ka ịlahị lẹlẹ.

⁶Ọọwa, Amkpaa-à byaa yẹkẹẹ, “Anụ wo mẹ! “Angị ri alọmwụ ri ẹ-ẹpwụ nyanụ lẹ, a-arụrụ bala alaa m̄m̀ mẹ ịlọm jaa lẹ.

⁷Anụ tị yẹ wẹẹ̀, ụ-ụgbẹyị ọlịnyị m̄ kaa ya ẹla ta iMosisi ọnchẹ nyam ka. Ọwa m̄ hu kpẹhị rịrị angịnyị nyam wuu lẹ.

⁸M̀ kaa ya ẹla tọọ ọwa a-ahịchịng, m̀ kaa ya ẹla tọọ gbagbịla la ọ-kpa etu wu ẹla ẹhị dụrụ hyoo ka. Ọ dọmwụ la kpụ ọ kpẹhị yẹ abwụma ọlẹ kam la lẹ! Ọ tị́ ka la ányị ene kanụ ka ju uhi nya iMosis ọnchẹ nyam-m̀? Ọọwa, anụ nwà ịlọnụ gẹdẹẹ wẹẹ ya ẹla onyobyi bọọ ka le?”

⁹Amkpaa wụ ẹjẹ ta Erọn bala iMiriyam. Ọọwa, ọ yegiri rụ hyaa lẹ,

¹⁰egbamwụ à mwụ rụ hi Ọdụ nya Amkpaa lẹlẹ. Ọọwa, ẹdụrụ olugba nya ịnyịrọ à jụ iMiriyam iijata-ijata la ịnyịrọ nyamwụ pwowuru hụrátataata lala ara lẹlẹ. Ụka ká Erọn jahị kpata kọ yẹ ịnyịrọ nya iMiriyam,

¹¹ọ chị eko byi iMosisi yẹkẹẹ, “Chaahoho, ayịbam ee! Ā yẹhị akama chajị nya ang onyobyi ọlẹ kahị họ ẹ-ẹpwụ nya uchi-ì wẹ kaka, chuchuu.

¹²Ā myị ká ịnyịrọ nya iMiriyam ā wọwọ hụrụ lala ịnya ogu-ọnyị ọlẹ kị pwọpwọọ ká ịnyịrọ nyamwụ ri jọọjọọ koo.”

¹³Ọọwa, iMosisi à chị eko wụrụ Amkpaa byoo yẹkẹẹ, “Ohe Oluhye ee, chuchuu, họọ uda mẹ.”

¹⁴Ma, Amkpaa byi iMosisi yẹkẹẹ, “Ó-ri ká adamwụ-ụ́ chị ide hwọọ a-ahị, ọ́ ka juwa libyi ọọwa ẹnụtụrụ irwiye gbẹgbịlẹ ka-á? Byoo kọ rụ kpehe hi ịkampụ ka hụ ẹnụtụrụ irwiye mẹ. Ẹnụtụrụ ịwẹ-ẹ́ họ jịra kpá lẹ, ọ nyà wẹ ẹpwụ nya angịkịla mẹ.”

¹⁵Ọọwa, ị chị iMiriyam ịgọ hi ịkampụ jịra ẹnụtụrụ irwiye lẹlẹ. Ala Isirẹlụ-ụ́ wuleji ẹdịyẹ bwu ẹgẹwẹ ka gbee ká iMiriyam nyà tịrẹkpẹ kpá ene.

¹⁶Ọọwa, ala Isirẹlụ à yegiri bwu ịHaserotu lẹ, ị jẹ kaka chịkụ u-ugbileji nya ịParan lẹlẹ.