Read idege ỌWAWA 13 Bible Online

ỌWAWA 13 - idege bible

ỌWAWA 13

¹Amkpaa byi ịMosisi yẹkẹẹ,

²“Chụ olegbeju ọngọ ookpokpo bwu imwawụ ọnyọnyọọnyị ká daa ẹrụ lala alịbaje kaka wụla ọpyị nya iKenan ọlẹ kam wẹẹ ya hanụ anụ ala Isirẹlụ yẹ mẹ.”

³Ọọwa, iMosisi à họ jaabwọ ká Amkpaa byoo lẹlẹ. Ọ du alẹng angị iwo kụrụ imiiye ịlẹ kị ri alegbeju bwu imwawụ datị-datị nya Isirẹlụ ẹrụ bwu ẹga kị chịkụ u-ugbileji nya ịParan.

⁴Ẹnyị nya angịịwa bala imwawụ ịlẹ kị bwu à lẹẹ lẹ: ị chụ ịChamụwa ọnyị nya ịSakuu bwu imwawụ nya iRubẹn.

⁵Ị chụ ịChafatị ọnyị nya iHori bwu imwawụ nya iSimyọn.

⁶Ị chụ ịKalẹbụ ọnyị nya iJefune bwu imwawụ nya iJuda.

⁷Ị chụ Igalụ ọnyị nya iJosẹfụ bwu imwawụ nya Isakaa.

⁸Ị chụ iHochiya ọnyị nya iNun bwu imwawụ nya Ifurem.

⁹Ị chụ ịPalụti ọnyị nya ịRafu bwu imwawụ nya iBenjamịn.

¹⁰Ị chụ ịGadiyẹlụ ọnyị nya iSodi bwu imwawụ nya iSebulọn.

¹¹Ị chụ ịGadi ọnyị nya iSusi bwu imwawụ nya ịManasẹ.

¹²Ị chụ Amyẹlụ ọnyị nya ịGẹmali bwu imwawụ nya ịDan.

¹³Ị chụ ịSẹtuu ọnyị nya ịMayịkẹlụ bwu imwawụ nya Achẹẹ.

¹⁴Ị chụ ịNabii ọnyị nya iVofusi bwu imwawụ nya ịNafụtali.

¹⁵Ị chụ iGeyuwẹlụ ọnyị nya ịMaki bwu imwawụ nya ịGadị.

¹⁶Ẹnyị nya alẹng ịlẹ ká iMosisi du ẹrụ kaka wụla ọpyị yẹ à wẹ lẹlẹ. Ụka ọọwa, iMosisi yẹ ẹnyị nya iHochiya ọnyị nya iNun da ka ri iJochuwa.

¹⁷Ụka ká iMosisi juwa daa kpehe nyọka wụla ọpyị nya iKenan yẹ, ọ byaa yẹkẹẹ, “Anụ yegiri kele bwu oye nya ẹtẹ, kanụ kpoye bwu ọpyị oledii rụ kele kaka ju ka ịpyị ilikiti mẹ.

¹⁸Anụ wụlayẹ kanụ jẹ ụma nya ọpyị ọlẹ ká ẹgẹwẹ ri. Anụ kpẹhị chịng kanụ jẹ ó-ri ká alụwa-á ju iru lee ọ-la wure-wure bala ó-ri kị lọngịrị lee ọ-la dẹwụ-dẹwụ.

¹⁹Anụ-ụ̀ yẹ ó-ri ká ọpyị ọwẹ-ẹ́ ri ọnyịịla lee ọ́ ri ọtịpyọ bala ó-ri kị me egwalọ yẹ epweji nyaa dada lee ó-ri kị kụ ẹpwa ịịwẹ gbagbịla.

²⁰Ọpyị ọọwa ju eyo ka há ang lee ọ́ tị́ ka há ang ka? Ọpyị ọwẹ tị́ myị̀ ipyinu lee anyị ọ tị́ la-à? Anụ jụ kele ka ụwa luhi ojuju-ka, kanụ kpa egbe nya ekeji ịhyẹ bwu ụwa nyà nya ang-ibeenu mẹ.” (Ụka ọwẹ kpangga pwoku ụka ká alakọnụ nya ọgbanyẹ juwa gā.)

²¹Ọọwa, alẹng ịwẹ à yahị da koye nya ẹtẹ lẹ, ị wụla ọpyị yẹ bwu ugbileji nya iSiin ọlẹ kọ ji oye nya edii lalaala ka pwụ iRehọbụ ọlẹ kọ ju ẹga Ọchịpwụrụ bwu ọla ịHamatị chwẹẹ koye nya ẹtẹ lẹlẹ.

²²Ị jẹ bwu ụpa oledii nya ọpyị ọwẹ jene gbee kị pwụ epweji iHebirọn kọ ri ọgbahị nya epweji nya iSowan ọlọpyị nya Ijipiti lala ẹka irwiye gbẹgbịlẹ. IHebịrọn ọwẹ à ri ẹga ká alogang nya Ahiman bala ịnya ịChẹchayị bala ịnya ịTalịmayị ịlẹ kị ri anyị ịtụma nya Anakị kụ lẹ.

²³Ụka kị jẹ kaka pwụ Ọkpọọ nya Ẹchịkolu, ị chị ụbwọ nya alakọnụ ọhẹ ọlẹ kọ tọ eju ọnyọọnyọọ ookpokpo. Ị ya ogbilo ọhẹ dụrụ eju nya alakọnụ ọwẹ lẹ, ịwa angị imiiye à yụbwọ chọọ oyiye-oyiye juwa kpa nyà lẹlẹ. Ị kpa egbe nya ipomegịraneti bala ịnyị ikiledu ba ịlaa nyà ịnyịnyị.

²⁴(Ị wụrụ ẹgẹwẹ Ọkpọọ nya Ẹchịkolu[5] ọọ-lajị nya eju nya alakọnụ ọlẹ ká ala Isirẹlụ kpa rụ bwu ụwa.)

²⁵Ụka ká alịbaje ịwẹ wụla ọpyị yẹ jịra ẹnụtụrụ iwo ine lẹ, ị nyà tịrẹkpẹ

²⁶kaka tọ iMosisi bala Erọn bala ala Isirẹlụ ịkịla ị-ịKadẹchị u-ugbileji nya ịParan lẹlẹ. Ị tịrọnụ ya je alụma nya Isirẹlụ wuu ang ịlẹ kị yẹ ọ-ọpyị ọọwa lẹ, ị mẹ egbe nya ekeji ịlẹ kị kpa nyà bwu ụwa jaa nya ang-ibeenu lẹlẹ.

²⁷Ị tịrọnụ ẹdịyẹ ya je iMosisi yẹkẹẹ, “Ahị kele ka wulayẹ ọpyị ọlẹ ká duuhi ka lẹ. Ọpyị ọọwa ju eyo bala ọ-há ang lụmẹ. À tị́ yẹ egbe nya ekeji ịlẹ kahị kpa nyà bwu ụwa lẹẹ nya ang-ẹjẹẹ lẹ.

²⁸Angịnyị ịlẹ kị kụ ọ-ọpyị ọọwa tị lọngịrị lụmẹ. Epweji nyaa ri ịtụka, ị me egwalọ dagaga jwaa wuu. Ọlẹ kọ babeji gụ wuu ri ahị yẹ anyị ịtụma nya Anakị kị kụ ụwa!

²⁹Ala Amalẹkị à kụ ka edii nya ọpyị ọwẹ lẹ. Ala iHiiti bala ala iJebusi bala ala Amọ kụ ịpyị ikiti. Ala iKenan lẹ, ịwa kụ tụ ọnụ nya Ihu iMeditareniya bala Ihu ịJọdan da.”

³⁰Ma, ịKalẹbụ ká angịnyị ọmọnyọ hi iMosisi lẹ, ọ yẹkẹẹ, “Āhị kele lẹẹlẹẹ kaka ye ọyị ọwẹ la mẹ. Ahị lọngịrị ka kụrụ alụwa myị.”

³¹Ụka ọọwa, angịlẹ kị bajẹ balọọ kele tị yẹkẹẹ, “Eheehe, Áhị lọngịrị nyọka mwẹla ta alụwa myị koo! Ị lọngịrị gụụhị.”

³²Ọọwa, ị juwa kpa ẹla onyobyi chajị nya ọpyị ọlẹ kị wụlayẹ pyebile ẹ-ẹpwarịrị nya ala Isirẹlụ lẹlẹ. Ị juwa yẹkẹẹ, “Ọpyị ọwẹ-ẹ́ há ang kpụ angị kụ ụwa ka ye ịngịhyẹ o-ju ahịchịng ri ka. Angịlẹ kahị yẹ ụ-ụwa wuu ri ekpongka nya angịnyị.

³³Ahị dọmwụ yẹ ịmaga nya anyị ịtụma nya Anakị ụ-ụwa. Ahị byị ịlọhị ẹhị lala aga a-ahị nyaa. Ịnyịnyị ahị tịtị laa ịwa ayịdang lẹ.”