Read idege ỌWAWA 14 Bible Online

ỌWAWA 14 - idege bible

ỌWAWA 14

¹Ụka ká ala Isirẹlụ wo ọnụ-ẹdịyẹ ọtịrịị-tịrị nya alịbajẹ iwo kụrụ imiiye, ịwa wuu jida ẹnẹwẹ lodu ọọwa wuu lẹpwụ-lẹpwụ.

²Ị juwa mwẹla ya ba iMosisi bala Erọn, juwa byaa yẹkẹẹ, “Ó-ri kahị gbu ọ-ọpyị nya Ijipiti lẹẹ lee am̀ u-ugbileji ịnọ, ọ dọmwụ haahị gụ ọlẹ lẹ-ẹ̄!

³Anụ yẹ ẹla nyahị dụwẹ wẹẹ! Ajị kị ka nwụhị ẹ-ẹwụ à du ká Amkpaa wẹẹ kpahị ka ọpyị ọwẹ lẹ-ẹ́? Ahyu! kị ka wu ịhụ bala anyị nyahị kpa rụ kaka ri anyịhị-ị́? Ahị rụ bwu ẹgẹlẹ tịrẹkpẹ ka Ijipiti mẹ pyiiì!”

⁴Ọọwa lẹ, ị juwa byi awụlẹ yẹkẹẹ, “Anụ kẹwẹ kahị hu ọngọ ka ri olegbeju nyahị mẹ kahị rụ tịrẹkpẹ ka ọpyị nya Ijipiti mẹ.”

⁵Ụka ká iMosisị bala Erọn wo ẹla oyaya nyaa, ị yahị cheji ị-ịlahị nya ala Isirẹlụ wuu.

⁶Ụka ọọwa, iJochuwa ọnyị nya iNun bala ịKalẹbụ ọnyị nya iJefune kị ri angịhyẹ ẹ-ẹpwarịrị nya angịlẹ kị kaka wụla ọpyị yẹ à gu ịwụrụ nyaa ene ọọ-la ọjụjụ ọlẹpwụ nyaa lẹ,

⁷ị byi ala Isirẹlụ wuu yẹkẹẹ, “Ọpyị ọlẹ kahị jẹ̀ kaka wụlayẹ lẹẹ ri ọpyị ọnyịịla lụmẹ-lụmẹ.

⁸Ó-ri ká ẹla nyahị á kpụ Amkpaa ịpyọ aalẹ, ọ ka kpahị kele kọ ka hwoo hahị. Ọpyị o-ju eyo bala ọ-há ang yẹẹyẹẹ ịnyị.

⁹Anụ gbokẹ̀kẹ, ānụ la egbeju-ọngịrị tụ Amkpaa pyịpyị kaka. Ānụ tị ju uhi nya alụwa ka! Ahị ka waa ri dọọnụ lẹnụ-ẹnụ. Amkpaa ji oye nyahị, ọ tị kụrụ ijiga ịlẹ kị byi ịlaa nyị kaa gbe ịwa lẹ. Anụ ju uhi nyaa kaka.”

¹⁰Ụka ọwẹ, aluche wuu juwa hwàhwà nyọka da ajwọ nwụ iJochuwa bala ịKalẹbụ. Lụka ọmwaaa lẹ, ahịgboo nya ụmụmẹ nya Amkpaa-à wẹ uhye nya Ọdụ Ọlịgọgọ lẹlẹ.

¹¹Ọọwa, Amkpaa-à byi iMosisi yẹkẹẹ, “Yẹ wẹẹ, m̀ họ iru nya ụkụrwọ ẹbyẹbyi ẹ-ẹpwarịrị nya angịlẹ. Tị kpọkpọọkpọ, ị́ myị dahịhilem ka. Ị tị́ ka nyẹẹkpẹ dam ịịwẹ tata ba anyị-ị̀anyị iru nya ala Isirẹlụ?

¹²M̀ ka du ẹdụrụ ịdọlọ-dọlọ ọ-chịkịla angịnyị ka taa ayịreji. Ahụ tị lẹ, m̀ ka họ ká ka pyẹ ka ri ẹpwụma ọlẹ kọ ri ọtụka bala ọ-la ọngịrị gwaa ịwa wẹẹ.”

¹³Ma, iMosisi byi Amkpaa yẹkẹẹ, “Yẹ wẹẹ, ọngịrị nyang ā kpa gba angịnyị nyang kpehe bwu Ijipiti lẹ! Ó-ri ká taa ayịreji ẹgẹlẹ, ala Ijipiti-í ka dayi lowowo kaka.

¹⁴Ị ka kpa kaka ya je angị kụ ọ-ọpyị ọlẹ. Alọpyị ọlẹ tị lẹẹ wo ene-ene jaabwọ kaahụ Amkpaa jam tahị bala o-ri ahị nyị kaa yẹng lẹhị gede-gede. Ị wo ịnyịnyị jaabwọ ká egbamwụ nyang kaa godayị u-uhye nyahị bala jaabwọ ká kaa kpahị ụgbẹyị bwula egbamwụ ọlụka nya ahị ọpyẹpyẹ bala ila ọlụka nya odu ohihi.

¹⁵Lẹẹlẹ, ó-ri ká nwụ angịnyị nyang ịlẹ wuu, alepwoja ịkịla ịlẹ kị wo ohi oruru nyang ka ya

¹⁶ahụ nyị́ kpa angịnyị nyang pwụ ọpyị ọlẹ kaahụ nyị myị ọnụ nyọka ya haa myị kaka lẹ, ahụ nyị nwaa hụrụ u-ugbileji lẹ.

¹⁷“Chajị nya ọọwa lẹ, m̀ jam bịlẹng, Ọngọlahị, mẹ ọngịrị nyang jẹẹhị ká họ jaabwọ ká myị ọnụ mẹ. À ya ene-ene ya

¹⁸Ọwa Amkpaa nyị́-ị̀ wụ ẹjẹ hyaa ka. Ọwa nyị kaa la ọháha bala ọ-kaa hịnyọhi ang onyobyi ọhọhọ bala egbeju ọnyọọngịrị ọlala nya angịnyị ga haa. Ọwa nyị tị kaa yẹ ọngọ họ ang onyobyi akama bala ọ-dọmwụ kaa ya uri nya ang onyobyi ọhọhọ nya adịda wu anyị nyaa bwu oyi ọhata ju ka ohene.

¹⁹Chajị nya ọháha o-gbu enyi-ka nyang ká pẹhi ang onyobyi nya angịlẹ ga haa jaabwọ ká họ bwu ụka-ụka kị yegiri bwu Ijipiti gbee da wẹ amachanyị mẹ.”

²⁰Ọọwa, Amkpaa-à yẹkẹẹ, “M̀ hịnyọhi haa jaabwọ ká bịlẹm lẹ.

²¹Ma, m̀ jam ya nya ịlẹhị-ịlẹhị ya jaabwọ kam juwa hịhị bala jaabwọ ká ụmụmẹ nyam myị̀ odehe ọlẹ wuu pwẹẹpwẹẹ lẹ,

²²Ọngọngọhẹ lẹpwụ nya angịwẹ-ẹ́ ka jụ ka ọpyị ọọwa kaka. Ị yẹ ụmụmẹ nyam bala ụkụrwọ ẹbyẹbyị ịlẹ kam họ Ijipiti bala u-ugbileji, ị tị kụ ụwa juwa dam uya, nyẹẹkpẹ dam kịla ụka ohu kụrụ iwo lẹ.

²³Ịwa lẹ, ị́ ka ya ugbẹhị nyaa gu ọpyị ọlẹ kam myị ọnụ ha adaa igogo anyị kaka. Ọngọngọhẹ nya angị hu ẹpẹpẹ jum ịwẹ-ẹ́ ka ya ẹta nya chị ụwa kpong-kpong ka.

²⁴Ma, chajị nyọlẹ ká ịKalẹbụ ọnchẹ nyam ọngọ la irya ọ-datị, kọ lẹẹ dịrẹm kpẹẹkpẹẹ lọkịlẹtụ ookpokpo lẹ, m̀ ka kpọọ pwụ ọpyị ọlẹ kọ kaka wụlayẹ. Anyị ịtụma nyamwụ ka yẹ ọpyị nya ang ọlala nya lụbwọ-lẹta.

²⁵Aa wo mẹ, iMosisi, ọ-ọkpọọ ịla iKenan ala Amalẹkị bala ala iKenan à kụ lẹ. Lẹẹlẹ, ijuju lẹ, anụ wuleji ẹdịyẹ jahị da kẹkpẹ kanụ bwu ugbileji yahị da koye nya Ihu Oletungkohyo mẹ.”

²⁶Ọọwa lẹ, Amkpaa-à byi iMosisi bala Erọn yẹkẹẹ,

²⁷“Ẹla ọ-mwọ ya bam nya ala Isirẹlụ chịm aga pwẹẹpwẹẹ lẹ! Ọ tị́ ka tata ba anyị ene ká angịnyị inyibyi ịwẹ ka hịnyọ la ọ-mwẹla ya bam mẹ?

²⁸Anụ byaa mẹ, m̀ jam ya nya ịlẹhị-ịlẹhị nyori jaabwọ kam jam hịhị lẹ, ang ịlẹ kị kpa ọnụ nya ịlaa ya wẹ, m̄ ka họ lẹlẹ. Am Amkpaa-à ya ịnyị lẹ.

²⁹Anụ ka gbu, lẹgu nyanụ chị páta-páta am̀ u-ugbileji! Ajị nyọlẹ kanụ mwẹla ya bam lẹ, ọngọngọhẹ nyanụ anụ angị gu ẹka iwo imiiye lee ọ-gụ ọwẹ, kị wanụ lụka nya angịnyị ọwawa-á

³⁰ka jụ ka ọpyị ọlẹ kam myị ọnụ nyọka ya hanụ nya ẹpwa nyanụ kaka. ỊKalẹbụ ọnyị nya iJefune bala iJochuwa ọnyị nya iNun ụbwaa-à ka kele lẹlẹ.

³¹Anyị nyanụ ịlẹ kanụ yaya aluji nyị ka wu kpa kaka ri anyịhị lẹ, m̀ ka kpaa ịwa kaka pwụ ọpyị ọwẹ lokpunyi. Ịwa-à ka ye ọpyị ọlẹ kanụ pwa wẹ la nya ẹpwa nyaa lẹlẹ.

³²Anụ tị lẹ, egu nyanụ ka chị páta-páta u-ugbileji ọlẹ.

³³Anyị nyanụ ka ga tụ ugbileji-ugbileji ọlẹ da lala angịgbikpịlọ ẹ-ẹpwụ nya ẹka iwo ine gbẹgbịlẹ. Ọọwa ri ọ-ka yẹ akama chajị nya ang onyobyi nyanụ gbee ká ọng myị ọng nyanụ ka gbu.

³⁴Ẹka iwo ine ịwẹ gbẹgbịlẹ kanụ ka yẹ akama chajị nya ang onyobyi ọhọhọ nyanụ. Ẹka ọnyị myị ọnyị ku ọmwakpa nya ahị ọpyẹpyẹ ọnyọnyọọnyị jaabwọ kanụ bịrị ẹnụtụrụ iwo ine lẹpwụ-lẹpwụ ju ọpyị ọwụlayẹ. Ụka ọọwa, anụ ka jẹ jaabwọ kọ ri ang ọtịpyọ nyọka jum uji lẹlẹ.

³⁵Am Amkpaa-à ya ẹlẹwẹ lẹ. Ẹla nya ịlẹhị m̄ ya jenu lẹ. M̀ ka ya ẹlẹwẹ kam ya wẹ họnụ anụ eguru nya ala Isirẹlụ ịlẹ wuu kanụ myị ju awụlẹ juwa mwẹla tam. Am̀ u-ugbileji ẹgẹlẹ ọng myị ọng nyanụ à ka gbu ta ayịreji lẹ.”

³⁶Angị iwo ẹ-ẹpwụ nya angịlẹ ká iMosisi du kaka wụla ọpyị yẹ à nyà kaka tịrọnụ ẹdịyẹ ọ-byị ụrụ du ká angịnyị mwẹla ya ba Amkpaa lẹ.

³⁷Ọọ-lajị nya ọọwa lẹ, Amkpaa du ẹdụrụ onyobyi ọhẹ wẹ ẹga nya angịịwa lẹ, ị gbu chajị jwoo lẹlẹ.

³⁸Ẹ-ẹpwụ nya alịbaje angị iwo kụrụ imiiye ịlẹ kị du kaka wụla ọpyị yẹ, iJochuwa bala ịKalẹbụ kẹnẹ-kẹnẹ à gbu kaka lẹlẹ.

³⁹Ụka ká iMosisi tịrọnụ nya ẹla ịlẹ ká Amkpaa ya je ala Isirẹlụ wuu, ị bida onyuujujwo.

⁴⁰Lụtụrụ gbegbegbe nya ahị ọpyẹpyẹ ọọnamwụ, ị yegiri nyọka be ịpyị ilikiti nya iKenan ẹpwa. Ị juwa byi awụlẹ yẹkẹẹ, “Āhị hu ang kele mẹ. Ahị jẹ kahị họ tịpyọ lẹ. Ugbẹnyị lẹ, ahị tị nwụlanọ nyọka kele ka ọpyị ọlẹ ká Amkpaa myị ọnụ hahị lẹ.”

⁴¹Ma, iMosisi byaa yẹkẹẹ, “Ányị tị́ du kanụ wẹẹ bịrị ehile nya Amkpaa ugbẹnyị nyọlẹ kpá kọ byinu anụ nyị tịrẹkpẹ ka ugbileji lẹẹ mẹ? Ánụ ka chọọ jụ koo.

⁴²Anụ kele lẹẹlẹẹ lẹka. Aluji nyanụ ka kụrụụnụ chẹẹchẹẹ, chajị Amkpaa-á juwa tanụ ka.

⁴³Ánụ wuleji jahị da ala Amalẹkị bala ala iKenan, ẹwụ ka rinu. Amkpaa ka nyẹẹkpẹ danụ, chajị anụ pwa ọ-ba ụgbẹyị nyamwụ jẹ.”

⁴⁴Ma, ị ya ụrụ nyí ẹla nya iMosisi ajị. Ị juwa wule yahị da ịpyị ilikiti nya iKenan kpá nyọlẹ ká iMosisi lee Akpa nya Iro nya Amkpaa-á hu ẹta chụtẹ hi ịkampụ nyaa ka.

⁴⁵Ụka ọọwa, ala Amalẹkị bala ala iKenan ịlẹ kị kụ ikiti ịịwa-à hireji warị lẹ, ị gba mịla ala Isirẹlụ, kụrwaa chẹẹchẹẹ bala o-kwaa rụ hwẹẹ lalaala ka pwụ ịHọma lẹlẹ.