Read idege ỌWAWA 15 Bible Online

ỌWAWA 15 - idege bible

ỌWAWA 15

¹Ụka ọhẹ, Amkpaa byi iMosisi yẹkẹẹ,

²“Ya ehile ịlẹ ha ala Isirẹlụ mẹ. Ụka kanụ pwụ ọpyị ọlẹ kam wẹẹ ya hanụ,

³kanụ tịtọ nyọka hu ọhaha kịla iya o-ju ila lee ụma nya iya ọkịla ha Amkpaa aalẹ, ịịlẹ anụ ka họ lẹ. Anụ ka ya ẹna lee omilodo lee ọkpịlọ lee embiri kịla iya ọ-rụ ila lee iya nya ọ-họ ọnụ ọmyịmyị jịra lee iya o-bwu irya nya ọngịnyị kpehe lee iya ịlẹ kanụ-ụ̀ kịla lụka nya ọhụhụ ịlẹ kanụ-ụ̀ la ẹkẹkẹẹka nya ọ-chị ihi ju Amkpaa nyanụ myị.

⁴Ụka ọọwa, ọngọlẹ kọ wẹẹ ka kịla iya ọwẹ ka kpa okolo ookpokpo nya ọrụ nya ajẹ nya ang-ẹrụ ọnyịịla-ọnyịịla ọlẹ kị ya ọchọja ookpokpo nya ida nya olivu ju bọọ warị.

⁵Ọkpịlọ ọnyị myị ọnyị kị ka ya kịla iya, ị ka ya ekpem nya ere ha ọlẹ kọ ka ri iya nya ere.

⁶Ọ́ tị ri omilodo ká ọngọọwa-á hu kịla iya aalẹ, ang ọlẹ kọ ka ya ha bọọ ri okolo imiiye nya ọrụ nya ajẹ nya ang-ẹrụ ọlẹ kị ya ọchọja ookpokpo ba ẹhya nya ida nya olivu ju

⁷bala ekpem ookpokpo ba ẹhya nya ere. Iya ịwẹ kaa chịm am Amkpaa oru kwọkwọ.

⁸“Ụka ká ọngịnyị ka ya ụgba nya ẹna ham Amkpaa nya iya nya ọnụ ọmyịmyị ọ-họ jịra lee iya nya ọhọlawụlẹ aalẹ,

⁹ang ịkịla ịlẹ ká ọngọọwa ka kpa kaka ha tọọ da ịnyịnyị ri okolo ịta nya ọrụ nya ajẹ nya ang-ẹrụ ịlẹ kị ya ọchọja imiiye nya ida nya olivu ju

¹⁰bala ekpem nya ere imiiye. Iya ọwẹ kaa chịm am Amkpaa oru kwọkwọ.

¹¹Ang ịlẹ kị ka ya ha ta ụgba nya ẹna lee omilodo lee ọkpịlọ lee embiri ọnyị myị ọnyị ọlẹ kị ka ya kịla iya à wẹ lẹlẹ.

¹²Jaabwọ ká iyo okiliya-à ju iru ka ba ịnyịnyị-ịnyịnyị ọhaha ọ-taa jẹ à ka lụmẹ lẹ.

¹³“Angịlẹ wuu kị ri anyị ịlọpyị nya Isirẹlụ ka ba ọhọhọ ịwẹ wuu jẹ ụka kị ka kịla iya o-ju ila ọlẹ kọ chịm am Amkpaa oru kwọkwọ.

¹⁴Ụka ọhẹ-lọhẹ ká ọngga ọ-kụ tanụ lee ọngọngọhẹ ọlẹ kọ chịkụ tanụ lụka okpii á tịtọ nyọka kịla iya ọ-chịm Amkpaa oru kwọkwọ ọlịịlẹ aalẹ, ọ ka ba ọhọhọ ọlala ịnyanụ ọwẹ jẹ kpẹẹkpẹẹ ịnyịnyị.

¹⁵Ehile ookpokpo ọlẹ kọ juwa hanụ anụ à tị̀tị̀ juwa ha angga ịlẹ kị kụ ọpyị nyanụ lẹ. Ehile ọwẹ ri ehile ọpyịyọọ hanụ. Anụ bala angga ịwẹ lookpokpo a-ahị nyam am Amkpaa.

¹⁶Ehile bala ọmẹjẹ ookpokpo anụ bala angga ịlẹ kị kụ ọpyị nyanụ à ka ba jẹ lẹ.”

¹⁷Amkpaa byi iMosisi ụka ọwẹ ịnyịnyị yẹkẹẹ,

¹⁸“Ya ehile ịlẹ ha ala Isirẹlụ ká byaa mẹ, ụka kanụ jẹ pwụ ọpyị ọlẹ kam wẹẹ kpanụ jẹ ka,

¹⁹anụ ka ri ang oriri ọlọpyị ọọwa. Anụ tị ka hu ebwo ọhẹ nya ang oriri ọlụwa nọ kanụ ka ya ha ọhaha ham am Amkpaa.

²⁰Ụka kanụ ya ajẹ nya ang-ẹrụ họ ịkaa, anụ ka hu ẹbẹ nya ọgbanyẹ-ọgbanyẹ ham lala ang-ahị jaabwọ kanụ kaa ya ajẹ nya ọgbanyẹ ha.

²¹Bwu ụka nya oyi nyanụ kele ka oyi nya anyị ịtụma nyanụ pyịyọọ, anụ ka ya ọhaha ọlẹ ha bwu ẹpwụ nya ịkaa nya ọgbanyẹ-ọgbanyẹ ịlẹ kanụ ka họ.

²²“Ọ chịkpẹẹ ọngọhẹ ka pẹhi ehile ọhẹ la ọkpakpa lọmamachịng ka ẹ-ẹpwụ nya ehile ịlẹ kam ya ha iMosisi wẹ myị

²³lee anyị ịtụma nyanụ ịhyẹ ị-ịlahị ọ-ka pẹhi ehile ịlẹ wuu kam ya du iMosisi wanụ deeji la ọkpakpa myị.

²⁴Ó-ri kị bịrị ehile ịwẹ lọmamachịng ka ọọ-lajị nya ájẹjẹ-ka nya uche nya ala Isirẹlụ aalẹ, ị ka ya ẹna kịla iya ọ-rụ ila ọlẹ kọọ chịm am Amkpaa oru kwọkwọ. Ị ka ya ọhaha nya ajẹ nya ang-ẹrụ bala ere ọlẹ kị hunọ ha tụ iya ọwẹ da. Ọ́ ba ọọwẹ ka, ị ka ya oyichi kịla iya ọ-hụ́ ọhọbịrị ịnyịnyị.

²⁵Ọngọkiliya-á kịla nya ọcharị-charị ọlala nya alụma lẹ, m̄ ka hịnyọhi haa lẹlẹ. M̀ ka hịnyọhi haa chajị ị́ mamachịng họ tịpyọ ka, ị tị kpa ang okiliya ọ-hụ́ ọhọbịrị nyaa warị lẹ.

²⁶Ụka ọọwa, ala Isirẹlụ wuu tụ angga ịlẹ kị kụ taa ka ye ọhịnyọhi nya ọ-họ tịpyọ nyaa, chajị ọ-họ tịpyọ ọwẹ debe chị ọng myị ọng wuu.

²⁷“Ọ́ ti ri ọngọ ookpokpo kem kọ họ ang ọtịpyọ lọmamachịng ka aalẹ, ọ ka kpa embiri o-gu ẹka ookpokpo kaka kịla iya ọ-hụ́ ọhọbịrị.

²⁸Ọọwa, ọngọkiliya-à ka kịla nya ọcharị-charị ọlala nya ọngọọwa lẹ, m̄ ka hịnyọhi ọhọbịrị nyamwụ họọ lẹlẹ.

²⁹Ehile ookpokpo ọwẹ kọ ri nya ọngọ họ tịpyọ lọmamachịng ka ọngọ ri ọnyị ọlọpyị nya Isirẹlụ à ka kpa tụ ọngọ ri ọngga kụ ẹ-ẹpwụ nyanụ lẹ.

³⁰“Ọngọngọhẹ lẹpwụ nyanụ anụ ala Isirẹlụ lee lẹpwụ nya angga ịlẹ kị kụ tanụ kọ tị mamachịng họ ang onyobyi aalẹ, ọngọọwa jum am Amkpaa ẹpẹ lẹ. Ị ka be ọngọọwa deeji hi ẹpwụ nya angịnyị nyam,

³¹chajị ọ ya ẹhị da ẹla nyam Amkpaa bwee kele kaka mamachịng bịrị ehile nyam. Ọwa-à ju ọmwụ-igu nya ịlọmwụ lẹ.”

³²Ẹnẹhẹ nyọlẹ ká ala Isirẹlụ juwa u-ugbileji wẹẹ, ị wu ọlẹng ọhẹ kọ juwa mwụ ịwụ Ẹnụtụrụ Ọhịnyọ Lụkụrwọ.

³³Ọọwa, ị kpọọ wẹ ẹga nya iMosisi bala Erọn a-ahị nya ala Isirẹlụ wuu lẹlẹ.

³⁴Ụka ọọwa, ị tọọ ju ube, chajị ị́ jẹ kpangga jaabwọ kị ka họọ lẹka.

³⁵Ọọwa, Amkpaa-à byi iMosisi yẹkẹẹ, “Ị ka nwụ ọlẹng ọwẹ. Aluche wuu ā gbọọ kpehe hi ịkampụ kị da ajwọ nwọọ o-ohwodehe mẹ.”

³⁶Ọọwa, aluche wuu à gbọọ kpehe hi ẹpwụ nya ịkampụ lẹ, ị da ajwọ nwọọ jaabwọ ká Amkpaa da iMosisi ehile ya nyị họ lẹlẹ.

³⁷Amkpaa byi iMosisi yẹkẹẹ,

³⁸“Ya ehile ọlẹ ha ala Isirẹlụ ká byaa mẹ, anụ ka ya owu do bwọ awụlẹ pịlẹ dadaada u-ugbọọnụ oleji nya awụrụ nyanụ. Anụ ka ya owu onyuukpuukpo wu egbeju nya owu ịpịlẹ dadaada ịwẹ ọnyọnyọọnyị bwọ awụlẹ. Ọwẹ ri ehile ọpyịyọọ ọlẹ kanụ ka kpa.

³⁹Ụka kanụ chẹhị yẹ iwu ịpịlẹ dadaada ịwẹ, anụ ka kpịtịya nya ehile nyam am Amkpaa wuu, kanụ ka baa jẹ ọkọkọ nyọka dịrẹ irya nya ụbwọ nya ịlọnụ jaabwọ kanụ kaa họ ụka lụmẹ-lụmẹ.

⁴⁰Iwu ịpịlẹ dadaada ịwẹ ka kpụnụ ịtịya nyọka ba ehile nyam wuu jẹ, kanụ ka chị ịlọnụ ịgọ ham am Ohe Oluhye nyanụ.

⁴¹Am à ri Amkpaa Ohe Oluhye nyanụ ọlẹ kam gbanụ kpehe bwu ọpyị nya Ijipiti kam ka ri Ohe Oluhye nyanụ lẹ. Am à ri Amkpaa Ohe Oluhye nyanụ lẹ!”