Read idege ỌWAWA 16 Bible Online

ỌWAWA 16 - idege bible

ỌWAWA 16

¹Ẹnẹhẹ, iKora ọnyị Isaa ọlẹ kọ ri ọnyị ọtụma nya iKohatị ọnyị nya iLivayị kọ̄ ju awụlẹ bala ịDatan bala Abiram anyị nya Eliyabụ bala Ọọn kọ ri ọnyị nya ịPẹlẹtị bwu imwawụ nya iRubẹn.

²Alẹng angị ine ịwẹ tụ angịnyị ahị ju iMosisi chajị nya olegbeju oriri nyamwụ. Angịịwa la angị ohu da iwo ịrụ (250) ịlẹ kị ri ịbagọ-ịbagọ ẹ-ẹpwụ nya alegbeju ịlẹ ká alụma nya ala Isirẹlụ chụchụ.

³Ị tụ gbiriri kaka guru iMosisi bala Erọn lẹ, ị byaa yẹkẹẹ, “Anụ chakpa hu ịlọnụ gẹdeẹ kpoye nya oyi lụmẹ! Ánụ jẹ ká ọng myị ọng nyahị ahị ala Isirẹlụ wuu ri angị ịlịgọgọ nya Amkpaa ịnyịnyị ka-á? Amkpaa jam tahị ịnyịnyị. Ee lẹ, ịyẹ tị́ du kaahụ iMosisi juwa hu ịlọng ngana-ngana ịnyị lala ahụ nyaa ri olegbeju ọ-gụ ọngọhẹ ẹ-ẹpwụ nyahị ahị angịnyị nya Amkpaa ịlẹ wuu-ūù?”

⁴Ụka ká iMosisi wo ẹlẹwẹ, ọ hị da ka ịpyị yahị kụrụ eji lẹ, ọ raabwọ lẹlẹ.

⁵Ọọwa, ọ byi iKora bala alakpa nyamwụ ịwẹ yẹkẹẹ, “Ijuju lụtụrụ, Amkpaa ka mẹ ọngọlẹ kọ ri ọngịnyị nyamwụ nya ịlẹhị bala ọngọlẹ kọ la ịgọgọ jẹẹhị. Ọ ka ya iwe da ha ọngọlẹ kọ chụ ká ọngọọwa ka tụ ju ogidi nyamwụ chwẹẹ.

⁶Ahụ iKora ee, ang ọlẹ kaahụ bala alakpa nyang wuu ka họ ri, anụ-ụ̀ go ịja nya iya nya ịtangare kpa a-abwọ

⁷kanụ ya ila jwaa lụtụrụ ijuju kpa wẹ ịlahị nya ogidi mẹ. Ụka ọọwa ahị ka yẹ ọngọlẹ ká Amkpaa chụ lẹlẹ. Anụ ala iLivayị, ánụ jẹ ka aalẹ, anụ kpangga à tọchị hu ịlọnụ gẹdẹẹ lụmẹ-ẹ̀ wẹ lẹ!”

⁸Ọọwa, iMosisi à kịnyaa juwa byi iKora yẹkẹẹ, “Anụ ala iLivayị ee, anụ wo myị̀myị mẹ!

⁹Ọọwa ri anụ hwoo nya ẹla ohuke nyọlẹ ká Ohe Oluhye chịnụ ebwo hi ala Isirẹlụ ịkịla wuu, chajị kanụ ka jẹ-ẹ̀ tụ jwoo chwẹẹ juwa myị ẹrụ ẹ-ẹpwụ nya Ọdụ nya Amkpaa bala ọ-ka myị ẹrụ ha alụma-á?

¹⁰Iwe-ahụrụ nya ụkụrwọ olihi-ihi ọwẹ kọ ya hang bala ala iLivayị ịkịla wuu-ú nwanụ kaka lẹ, anụ ka ye ụkụrwọ nya angịkiliya ba ọọwa u-uhye lẹ-ẹ́?

¹¹Ánụ jẹ ka tụbwọ aalẹ, Amkpaa lịlọmwụ ahụ bala alakpa nyang ịwẹ à wẹẹ mwẹla ta lẹ, Erọn koo. Ịnyamwụ tị́ ri ịyẹ ri-íì?”

¹²Ụka ọọwa, iMosisi du ẹrụ kaka wụrụ ịDatan bala Abiram anyị nya Eliyabụ, ị tị wẹ du tọọ yẹkẹẹ, “Áhị juwa wẹ koo!

¹³Ọlẹ ká gbahị kpehe bwu ọpyị o-ju eyo nya ala Ijipiti warị wẹ ugbileji ọlẹ nyọka nwụhị lẹ, ọ́ nwang lẹka. Ọọwa, ā wẹẹ tịtọ ká ka kpahị lala anchẹ nyang lẹ-ẹ́?

¹⁴Yẹ wẹẹ! Á kpahị kpa pwụ ọpyị o-ju eyo bala ọ-há ang lee ọ-ya ọpyị nya ẹrụ lee ẹrụ nya alakọnụ hahị ha nya ang ọlala nyahị lẹka. Ee lẹ, ányị ā tị́ me irya ká ka kpahị ahị angị ịlịịlẹ hu utungguru myị-ị̀? Áhị juwa wẹ ẹgẹhẹ koo.”

¹⁵Ẹla ọọwa ju iMosisi agbama lụmẹ kaka kpoye. Ọọwa, ọ byi Amkpaa yẹkẹẹ, “Ā ye iya ọkịlaakịla nya angịwẹ kpong-kpong koo. Ḿ họ ọngọngọhẹ nyaa ang onyobyi ọhẹ ka. Ḿ dọmwụ nu obyiyó amamadiroko bwu ụbwọ nya ọngọngọhẹ nyaa ẹnẹnẹhẹ lẹka.”

¹⁶Ọọwa, iMosisi à byi iKora yẹkẹẹ, “Ijuju lẹ, ahụ bala alakpa nyang angị ohu imiiye da iwo ịrụ (250) ịwẹ ā wẹ Ọdụ nya Amkpaa mẹ. Erọn ka juwa ịnyịnyị.

¹⁷Ọng myị ọng nyanụ ā kpa ẹja la iya nya ịtangare ẹ-ẹpwụ nyamwụ, kanụ jụ ịtangare ọlụwa ila ha Amkpaa mẹ. Erọn tị̀tị̀ ka kpa ẹja nya iya nya ịtangare nyamwụ warị ịnyịnyị.”

¹⁸Ahị ọpyẹpyẹ ọọnamwụ lẹ, alẹng ịwẹ à kele la ịja nyaa la ịtangare bala awụrụ-ila ẹ-ẹpwụ nyaa lẹ, ị kele kaka godayị ọ-ọnang nya Ọdụ nya Amkpaa ta iMosisi bala Erọn lẹlẹ.

¹⁹Ụka ọọwa, iKora wụrụ ala Isirẹlụ ihihi ịkịla wuu kaka tụguru jahị da iMosisi bala Erọn ọ-ọnang nya Ọdụ. Ahyaahị lẹ, ụmụmẹ nya ijata ojiji nya Amkpaa-à chị ehe mẹjẹ alụma wuu lẹlẹ.

²⁰Ọọwa, Amkpaa-à byi iMosis bala Erọn yẹkẹẹ,

²¹“Anụ tụ kẹkpẹ hwẹẹẹ hi angịwẹ, chajị kam taa ayịreji lẹẹlẹẹ mẹ!”

²²Ma, iMosisi bala Erọn hị chị ka ịpyị yahị kụrụ eji lẹ, ị bịlẹ Ohe Oluhye yẹkẹẹ, “Áhyu! Ohe Oluhye ee! Ahụ à tị́ ri Ohe Oluhye ọ-ya ọhịhị ha ang myị ang wuu. Ó-ri ká ọngọ ookpokpo-ó họ ang onyobyi, à ka ya ẹjẹ nya ọọwa wụ ta aluche wuu-ú?”

²³Ọọwa, Amkpaa-à byi iMosisi yẹkẹẹ,

²⁴“Ọ hiigu. Tị̀tị̄ byi ala Isirẹlụ ịkịla wuu kị rụ hwẹẹ hi ẹga ká iKora bala ịDatan bala Abiram anyị kụ ẹpwa mẹ.”

²⁵Ọọwa, iMosisi à wuleji, yegiri yahị da ka ẹga nya ịDatan bala Abiram lẹ, alegbeju nya ala Isirẹlụ ịkịla wuu à bọọ kele lẹlẹ.

²⁶IMosisi à byi alụma wuu yẹkẹẹ, “Anụ tụ kịnyaa hwẹẹ hi ẹga nya ẹpwang nya alẹng inyibyi ịwẹ mẹ. Ānụ họ atịmẹ koo. Ānụ yụbwọ gu ịngịngịhyẹ ọlẹ kọ ri nyaa ka. Ó-ri ịnyị ka aalẹ, anụ ka ta ayịreji laalaa ọọ-lajị nya ang onyobyi nyaa.”

²⁷Ọọwa, ọng myị ọng à tụ kẹkpẹ hi ẹpwang nya iKora bala ịDatan bala Abiram anyị lẹlẹ. Ụka ọwẹ, ịDatan bala Abiram gba kpehe kaka godayị ọ-ọnang nya ẹpwang nyaa bala ịhụ nyaa tụ anyị nyaa.

²⁸Ọọwa, iMosisi à yẹkẹẹ, “Bwula ọlẹ anụ ka jẹ ịnyịlẹhị ká Amkpaa-à dum ẹrụ nyọka họ ụkụrwọ ịlẹ wuu kam wẹẹ họ. Aam à kụ ịlọm wẹẹ haa ka.

²⁹Ó-ri ká alẹng ịwẹ-ẹ́ gbu igu adoohe ọlam-ọlam jaabwọ ká angịnyị ehe ịkịla wuu kaa gbu tụbwọ aalẹ, Ámkpaa à dum ẹrụ ka.

³⁰Ọ́ tị ri ká Amkpaa-á họ ang onyeewe ọhẹ ọlẹ ká ọngọhẹ-ẹ́ wo jẹ ka, ká ọpyị-ị́ pyẹ ọnụ maaa yaa mile wuu la ang myị ang ịlẹ kị la, kị rụ ju ka ejegu lahị-lahị aalẹ, anụ ka jẹ ká alẹng ịlẹ nyẹẹkpẹ da Amkpaa ịnyịlẹhị.”

³¹Jaabwọ ká iMosisi ya ẹlẹwẹ cheju kpá bwaaa lẹ, ọpyị olekpeleji nya ịDatan bala Abiram anyị à gu ene kpọọ,

³²yaa mile tụ alugbiyegu nyaa bala alakpa nyaa bala ang myị ang ịlẹ kị la wuu lẹlẹ.

³³Ịwa wuu rụ ju ka ejegu lahị-lahị bala ang myị ang ịlẹ wuu kị la. Ọọwa, ọpyị à tụ mịlaa hyẹkẹm lẹ, ịnyaa à myị́ bwu ẹpwarịrị nya ala Isirẹlụ wuu lẹlẹ.

³⁴Ala Isirẹlụ ịlẹ wuu kị juwa rụnyẹ mwụ ata bịmwụ ụka ká alẹng ịwẹ ya eko onyuujujwo kpọnụ. Ị juwa yẹkẹẹ, “Āhị rụ páaa mẹ, ká ọpyị ā yehi mile ịnyịnyị kaka.”

³⁵Ọọwa, Amkpaa-à du ila kele kaka rụ alẹng angị ohu imiiye da iwo ịrụ (250) ịlẹ kị juwa kịla iya nya ịtangarẹ họọ lẹlẹ.

³⁶Ọọwa, Amkpaa-à byi iMosisi yẹkẹẹ,

³⁷“Byi Eliyesa ọnyị nya Erọn ọngọkiliya kọ go ịja nya iya nya ịtangare kpehe hi ẹpwụ nya ila ọ-chakọọọ oluhye nya egu nya angịwẹ, chajị ịja ịwẹ lịgọgọ. Byoo ịnyịnyị kọ nyí awụrụ-ila epepe hwẹẹ chị ka ẹga ọkịla hi ịja nya iya nya ịtangare

³⁸nya angịlẹ kị gbu-ù wẹ ajị nya ọhọbịrị nya ịlaa. Ịja ịwẹ lịgọgọ lẹ, chajị ị kpaa wẹ ịlahị nya ogidi nyam. Lẹẹlẹ, byoo kọ hyà ịja ịwẹ ju awụlẹ papịla kị ka ya ke ogidi u-uhye mẹ. Ọwa-à ka ri ang-ẹjẹẹ nya ụbwọ ogbile ụ-ụrụ ha ala Isirẹlụ wuu lẹlẹ.”

³⁹Ọọwa, Eliyesa-à go ịja nya iya nya ịtangare ohu imiiye da iwo ịrụ ịlẹ ká alẹng ịịwa kpa ene kịị gu lẹ, ị hyàa ju awụlẹ papịla nyọka ya kụrụ ogidi lẹlẹ.

⁴⁰Ọwẹ ri ọ-ka mẹjẹ ala Isirẹlụ wuu nyori ọngọngọhẹ kọ ri ọnyị ọtụma nya Erọn ka-á chịla kọ ka tụ ju ogidi chwẹẹ nyọka kịla iya nya ịtangare ka. Ọngọngọhẹ kọ kpoye nya ehile ọwẹ aalẹ, ang ọlẹ kọ họ ta iKora bala alakpá nyamwụ tị̀tị̀ ka họ ta ọngọọwa. Jaabwọ ká Amkpaa da iMosisi ehile ị họ ịnyịnyị lẹ.

⁴¹Lụtụrụ nya ahị ọpyẹpyẹ ọọnamwụ lẹ, aluche wuu à yọnụ dawụlẹ juwa mwọ ala ya ba iMosisi bala Erọn yẹkẹẹ, “Anụ nwụ angịnyị nya Amkpaa kpá lẹ!”

⁴²Ụka ká angịnyị wuu tụgbiriri kaka guru iMosisi bala Erọn, kị jahị da ka ẹga nya Ọdụ nya Amkpaa, ị yẹ ká egbamwụ kpụ koo la ụmụmẹ nya ijata ojiji nya Amkpaa hyeehe haa.

⁴³Ọọwa, iMosisi bala Erọn kele ka ọnang nya Ọdụ lẹ,

⁴⁴Amkpaa-à byi iMosisi yẹkẹẹ,

⁴⁵“Anụ tụkịnyaa hi aluche nya angịwẹ kam taa ayịreji la ọ-bịrị ụka ka kị yẹ!” Ma, iMosisi bala Erọn hirikpẹẹ yahị cheji.

⁴⁶Ọọwa, iMosisi à byi Erọn yẹkẹẹ, “Erọn ee, hu ẹja nya iya nya ịtangare pááá, ká chụ awụrụ-ila bwu ogidi jwoo, ká chụ ịtangare gurwoo mẹ. Ka ẹga nya aluche ká kịla iya nya ọhịnyọhi wọnụ nyaa ju mẹ. Chị agaga mẹ, chajị agbama nya Amkpaa juwa wuru jahị da alụma lẹ. Ẹdụrụ nya ịdọlọ-dọlọ dọmwụ nyọka jụ angịnyị lẹ!”

⁴⁷Erọn họ jaabwọ ká iMosisi byoo. Ọ rụnyẹ ju ka ẹpwarịrị nya alụma. Ụka kọ yẹ jaabwọ ká ẹdụrụ ọọwa dọmwụ ịnyịlẹhị lẹ, ọ ya ila ju iya nya ịtangare lẹ, ọ kịla iya nya ọhịnyọhi wọnụ nyaa ju lẹlẹ.

⁴⁸Ọ godayị apewa nya angị hi lọhịhị bala egu nya angịlẹ kị chụwa ị-ịpyị gbee ká ẹdụrụ ọọwa kpụba.

⁴⁹Angịnyị angị ụnọ iwo kụrụ ine da angị ohu irwiye (14,700) lẹpwụ-lẹpwụ gbu ẹ-ẹpwụ nya ẹdụrụ ọọwa datị hi angịlẹ kị gbu ọọ-lajị nya egbeju-ọngịrị nya iKora bala alakpa nyamwụ.

⁵⁰Ụka ká ẹdụrụ ọọwa kpụba kpá lẹ, Erọn à rụ tịrẹkpẹ ka ẹga nya iMosisi ọ-ọnang nya Ọdụ nya Amkpaa lẹlẹ.