Read idege ỌWAWA 17 Bible Online

ỌWAWA 17 - idege bible

ỌWAWA 17

¹Ọọwa, Amkpaa-à byi iMosisi yẹkẹẹ,

²“Byi ala Isirẹlụ kị ya ọgọdọ ookpokpo bwu imwawụ ọnyọnyọọnyị jịra iwo kụrụ imiiye hang. Da ẹnyị nya olegbeju o-bwu imwawụ ọnyọnyọọnyị ba ọgọdọ nyamwụ.

³Á họ ịnyị lẹ, à da ẹnyị nya Erọn ba ọgọdọ o-bwu imwawụ nya iLivayị mẹ. Ọgọdọ ookpokpo à ka ri nya olegbeju o-bwu ịmwawụ ọnyọnyọọnyị lẹ.

⁴Gyaa kpa kele ka ẹpwụ nya Ọdụ nyam ká ya guru ị-ịlahị nya Akpa nya Iro ẹga kam kaa tọng mẹ.

⁵Ụka ọọwa, ọgọdọ nya ọngọlẹ kam chụ ka jú apwụ inyeewe-inyeewe kpehe. Ịịwẹ m̄ ka bwu họ ká ala Isirẹlụ ka kpụba la ọ-mwẹla ya bang ịnyịnyịịnyị lẹlẹ.”

⁶Ọọwa, iMosisi à ya ẹla ta ala Isirẹlụ lẹ, olegbeju nya imwawụ ọnyọnyọọnyị à ya ọgọdọ nyamwụ họọ lẹlẹ. Ịgọdọ wuu la iwo kụrụ imiiye. Ịnya Erọn juwa ẹ-ẹpwụ nyaa ịnyịnyị.

⁷Ọọwa, iMosisi à go ịgọdọ ịịwa wuu kpa kele ka guru ị-ịlahị nya Akpa nya Iro ọ-Ọdụ nya Amkpaa lẹlẹ.

⁸Ahị ọpyẹpyẹ ọọnamwụ ká iMosis jụ ka ẹpwụ nya Ọdụ nya Amkpa, ọ yẹ ká ọgọdọ nya Erọn ọlẹ kọ ku ọmwakpa nya imwawụ nya iLivayị be onyeewe-onyeewe. Ọ dọmwụ jú apwụ inyeewe-inyeewe, gu àpwụ bala ọ-nwụ egbe nya amọndụ!

⁹Ụka ká iMosisi gba ịgọdọ iwo kụrụ imiiye ịwẹ wuu kpehe, ọ ya mẹjẹ ala Isirẹlụ. Ọọwa, olegbeju ọnyọnyọọnyị à ye ọgọdọ nyamwụ tịrẹkpẹ lẹlẹ.

¹⁰Ọọwa, Amkpaa-à byi iMosisi yẹkẹẹ, “Tịrị ọgọdọ nya Erọn ẹkpẹ kaka nụwa ị-ịlahị nya Akpa nya Iro mẹ. Ọ ka nụwa kọ ka ri ọna ọdada ha ala Isirẹlụ ịlẹ kị ka ẹhị dam bwee, chajị kị ka kpụba la ọ-mwẹla ya bam. Ó-ri kị kpụba ị ka gbu.”

¹¹IMosisi họ kpẹẹkpẹẹ jaabwọ ká Amkpaa byoo ya nyị họ.

¹²Ọọwa, ala Isirẹlụ à byi iMosisi yẹkẹẹ, “Ahị ri enyi gu obyi lẹ! Ahị gbu hụrụ lẹ ooo!

¹³Ó-ri ká ọngịnyị ọhẹ-lọhẹ kọ tụ ju Ọdụ nya Amkpaa chwẹẹ-ẹ́ ka gbu lẹ aalẹ, áhị́ be igu kokoo.”