Read idege ỌWAWA 18 Bible Online

ỌWAWA 18 - idege bible

ỌWAWA 18

¹Ụka ọọwa, Amkpaa byi Erọn yẹkẹẹ, “Ahụ bala anyị nyang bala ala iLivayị aanang à ka yẹ akama chajị nya ang ọtịpyọ ọhẹ-lọhẹ ọlẹ ká angịnyị họ ba Ọdụ nyam am Amkpaa lẹ. Ahụ bala anyị nyang ụbwọọnụ kem à tị ka yẹ akama chajị nya ang ọtịpyọ ọhẹ-lọhẹ ọlẹ kọ ri ọlẹga nya ụkụrwọ nya angịkiliya lẹ.

²Aa kpa aanang alimwawụ nya iLivayị ba ịlọng kaka họ ụkụrwọ bala ọ-ka dang ụbwọ ụka kaahụ bala anyị nyang ka juwa họ ụkụrwọ nyanụ ẹ-ẹpwụ nya Ọdụ Ọlịgọgọ.

³Ị ka họ ụkụrwọ ịlẹ kị baba kị ka họ hang bala ọ-ka họ ẹ-ẹpwụ nya Ọdụ nyam. Ma, ị́ ka yụbwọ gu ang ịlịgọgọ ịlẹpwụ nya Ẹga Ọlịgọgọ lee ogidi koo. Ó-ri kị họ ịnyị, ahụ bala ịwa ka gbu wuu lawụlẹ-awụlẹ.

⁴Ị ka yẹju lanụ ẹ-ẹpwụ nya ụkụrwọ tanụ bala ọ-họ ụkụrwọ ọnyị myị ọnyị ọlẹ kọ ri nyaa ọ-Ọdụ nyam am Amkpaa. Ọngọngọhẹ ọlẹ kọ ri ọla iLivayị ka á họ ụkụrwọ tang koo.

⁵“Ahụ ayịdang bala anyị alẹng ụbwọọnụ à ka họ ụkụrwọ ọlẹpwụ nya Ẹga Ọlịgọgọ bala ogidi okiliya lẹ. Ó-ri kanụ họ kpẹẹkpẹẹ ịnyị lẹ aalẹ, ikẹjẹ-awụrụ nya Amkpaa-á myịmyị-ị̀ wẹ uhye nya ala Isirẹlụ kaka.

⁶Am Amkpaa lịlọm à chụ ala iLivayị aanang bwu ẹpwụ nya ala Isirẹlụ ịkịla wuu hang kị ka ri angịụbwọ nyang lẹ. Ị chaa ịgọgọ ham kị ka họ ụkụrwọ ọla Ọdụ nyam.

⁷Ma, ahụ ayịdang bala anyị nyang à ka họ ụkụrwọ ọnyị myị ọnyị ọlẹ kọ ri nya angịkiliya ọlẹga nya ogidi bala Ẹga Ọlịgọgọ Ọgụgụ wuu lẹ, chajị m̀ hu ahị nya angịkilya oriri hanụ. Ọngọkịla ọhẹ-lọhẹ kọ jẹ tụ ju ang ịlịgọgọ chwẹẹ aalẹ, ị ka nwụ ọngọọwa.”

⁸Ụka ọọwa, Amkpaa byi Erọn yẹkẹẹ, “Wo mẹ, ang myị ang ikiliya ịlẹ ká ala Isirẹlụ kaa kpa warị wam wẹẹ, m̀ jam hwaa hang bala anyị nyang lẹ. M̀ ya ang ịwẹ hanụ nya ang ọlala nyanụ bwu ẹpwụ nya iya ịlẹ kị juwa kịla ịnyịnyịịnyị pyịyọọ.

⁹Bwu ẹpwụ nya ang ikiliya wuu, ebwo ịlẹ kị ri ịnyanụ ri ịlẹ kị jụ ila ogidi ka. Ang ikiliya nya ajẹ nya ang-ẹrụ bla iya ọ-hụ́ ọhọbịrị bala iya ọ-wụ́ abyị ịlẹ kị kaa ya ham wuu ri ịnyanụ.

¹⁰Anụ ka ya ang ịwẹ ri ẹ-ẹga ọlịgọgọ. Alẹng ịlẹng wuu ka ri ang ịwụ. Anụ ka kpaa nya ang ịlịgọgọ.

¹¹“Ebwo nya ang ịkịla ịlẹ kị ka ri nyanụ pyịyọọ ri ang nya ọhaha ịlẹ ka ala Isirẹlụ ka hu hwaa nyaa kile-kile ham. Ọnyang tụ ọlẹng ọlẹ kọ la charị-charị bwu ugbiyegu nyang ka ri ebwo nya ang ịwẹ myị.

¹²“M̀ jam hụ ang myị ang ịlẹ kị hagụ wuu bwu ẹpwụ nya ida nya olivu bala ere bala ambakpa ịlẹ ká ala Isirẹlụ kaa kpa warị wam nya ọhaha nya egbe nya ọgbanyẹ ẹka myị ẹka hang lẹ.

¹³Egbe nya ọgbanyẹ ịlọpyị nyaa ịlẹ kị kpa warị wam am Amkpaa wuu ri ịnyang lẹ. Ọng myị ọng kọ la charị-charị bwu ugbiyegu nyang ka ri ang nya ọhaha ọwẹ myị.

¹⁴“Ang myị ang kị hu chị ịgọgọ ju ham am Amkpaa ọ-ọpyị nya ala Isirẹlụ lẹ aalẹ, ang ọọwa ri ịnyang lẹ.

¹⁵Ọnyị nya ọgbanyẹ nya ọngịnyị tụ iyo oleji ịlẹ ká ala Isirẹlụ hu ham ri ịnyang. À tị ka nyẹ ọnyị nya ọgbanyẹ nya ọngịnyị ehe bala ịnya iyo oleji ọlẹ kọ la charị-charị ka.

¹⁶Ị ka nyẹ anyị nya angịnyị ehe tịrẹkpẹ ụka kị gu ẹka ookpokpo lokpoko onyoowuru ịrụ jaabwọ kị hunọ.

¹⁷“Anyị nya ọgbanyẹ nya ẹna bala ọkpịlọ bala embiri tị lẹ, ánụ ka nyáa ịwa tịrẹkpẹ kpong-kpong ka, chajị ị ri ịnyam am Amkpaa. Ị ka yaa kịla iya. Anụ ka ya ịwọ nyaa yẹ hụ ogidi, kanụ ka jụ eyo nyaa ila lala nya iya ọkịlaakịla ọlẹ kọọ chịm am Amkpaa oru kwọkwọ.

¹⁸Ma, iyo nya ang ikiliya ka ri nyang jaabwọ ká ẹmẹ bala ugbẹta olupwuriri nya ang okiliya o-nyi kile-kile ri nyang.

¹⁹“Ang ikiliya ịlịgọgọ ịwẹ ká ala Isirẹlụ kaa kpa warị wam wẹẹ, m̀ jam yaa hang bala anyị alẹng tụ anyị anyang nyang lẹ. Ị ri ịnyanụ kanụ ka ya ri lala ang ọlala nyanụ bwu ẹpwụ nya iya ịlẹ kị juwa kịla ịnyịnyịịnyị pyịyọọ. Iro ọlẹ kọ ka jẹ-ẹ̀ bịrị ẹnẹnẹhẹ kaka à wẹ kam nwa tang bala anyị ịtụma nyang lẹ.”

²⁰Ụka ọọwa, Amkpaa byi Erọn ịnyịnyị yẹkẹẹ, “Anụ angịkiliya-á ka la ebwo nya ọpyị ọhẹ am̀ Isirẹlụ lee ịngịhyẹ ọlẹ kọ ka ri nya ang-ugu nyanụ kaka. Am Amkpaa-à ri ang ọlala nyanụ lẹ.

²¹“Alimwawụ nya iLivayị aananụ tị lẹ, ebwo nya ang ookpokpo ẹ-ẹpwụ nya iwo nya ang myị ang ịlẹ ká ala Isirẹlụ ka nwụ kpa wam wuu ri nyaa. Ọwẹ à ri uri ọlẹ kam nwaa chajị nya ẹrụ ọlẹ kị wẹẹ myị ham ọ-Ọdụ nyam lẹ.

²²Ọ bwu ọlẹẹlẹẹ kịlahị, ala Isirẹlụ ịkịla ā tụ ju Ọdụ nyam chwẹẹ kaka. Ó-ri ịnyị ka aalẹ, ị ka gbu chajị nya ọọwa.

²³Ala iLivayị ụbwaa-à ka họ ụkụrwọ nya ẹhị ọ-kpa rịrị Ọdụ nyam am Amkpaa lẹ. Ịwa-à ka yẹ akama chajị nya ibyi ọhẹ-lọhẹ kị họ ba Ọdụ lẹ. Ọwẹ ri ehile ọpyịyọọ ọlẹ kọ juwa hang tụ anyị ịtụma nyang lẹ. Ịwa-á ka la ebwo nya ọpyị ọhẹ nya ịnya ịlaa ẹ-ẹpwụ nya ala Isirẹlụ kaka,

²⁴chajị m̀ ya ebwo ookpokpo ẹ-ẹpwụ nya iwo nya ang ịlẹ ká ala Isirẹlụ kaa kpa wam wuu haa nya ang ọlala nyaa lẹ. Ọọwa-à du kam byaa gbagbịla ya ịwa-á ka la ebwo nya ọpyị ọhẹ lala ang-ugu nyaa am̀ Isirẹlụ kaka lẹ.”

²⁵Ụka ọọwa, Amkpaa byi iMosisi yẹkẹẹ,

²⁶“Byi ala iLivayị mẹ, ụka kị ye ọhaha nya ebwo ookpokpo ẹ-ẹpwụ nya iwo wuu bwu ẹga nya ala Isirẹlụ kpá, ị tị̀tị̀ ka hu ebwo ookpokpo bwu ẹpwụ nya iwo nya ang ịịwa nọ kị ka ya ha ọhaha ham am Amkpaa.

²⁷Am Amkpaa ka ye ọhaha ọọwa lala ọhaha nya egbe nya ọgbanyẹ i-bwu ẹrụ nyaa lee ere onyeewe o-bwu ẹga ọ-họ ere nyaa.

²⁸Ịịwẹ ị ka bwu hu ebwo nya ọhaha ọlẹ kọ ri ịnyam am Amkpaa ham bwu ẹpwụ nya ebwo ookpokpo ẹ-ẹpwụ nya iwo ịlẹ kị ye bwu ẹga nya ala Isirẹlụ wuu lẹlẹ. Ọhaha ọwẹ kọ ri nya Amkpaa wẹ ị ka ya ha Erọn ọngọkiliya lẹ.

²⁹Ang ịlẹ kị ri ịlahịchịng gụ wuu bwu ẹpwụ nya ọhaha ịlẹ kị kpa waa ị ka ya ham am Amkpaa lẹ.

³⁰Ụka ká ala iLivayị-ị́ hu ang ịlẹ kị ri ịlahịchịng gụ wuu ha kpá lẹ aalẹ, ị ka ya ihihi ri myị jaabwọ ká ala Isirẹlụ ịkịla kaa họ ụka kị hu ọhaha ham kpá.

³¹Ala iLivayị bala alugbiyegu nyaa ka ya ihihi ri ẹ-ẹga myị ẹga kọ haa myị, chajị ọwẹ à ri uri oyeye nya ụkụrwọ ọlẹ kị wẹẹ họ ọ-Ọdụ nyam lẹlẹ.

³²Í hu ọlahịchịng gụ wuu bwu ẹpwụ nya ọhaha ọwẹ ham kpá lẹ aalẹ, ị́ ka la abyị nya o-ye ọhaha nyam la kaka. Ị tị dụmwọ-dụmwọ mẹ, kị ya ẹpẹpẹ ju ọhaha ịlịgọgọ koo. Ó-ri kị ya ọhẹ-lọhẹ nyaa ri ene nyọka ya ọlahịchịng gụ wuu ham bwu ẹpwụ nyaa aalẹ, ị ka gbu.”