Read idege ỌWAWA 19 Bible Online

ỌWAWA 19 - idege bible

ỌWAWA 19

¹Ụka ọhẹ, Amkpaa byi iMosisi bala Erọn yẹkẹẹ,

²“Ọlẹ à ri ehile ọkịla ọlẹ kam da lẹ. Anụ byi ala Isirẹlụ kị kpa ụgba nya ẹna ọnyọmịla ọlẹ ká ehe-é họ ka, kị tị kpa wu ẹrụ ẹnẹnẹhẹ ene lẹka warị wanụ.

³Anụ hu ẹna ọọwa ha Eliyesa ọngọkiliya kọ kpa kpehe ka odehe nya ịkampụ, kị nwọọ i-ijata nya Eliyesa mẹ.

⁴Eliyesa ka ya ụkụchụ nyamwụ ju ịwọ nya ẹna ọọwa, kọ ka nyọ́ọ̄ pwááá jahị da Ọdụ Ọlịgọgọ.

⁵Ụka ọọwa, ị ka jụ ẹna ọwẹ wuu lẹpwụ-lẹpwụ ila. Ọọwa ri ị ka jụ ugba bala iyo bala ịwọ tụ igbeene nyamwụ wuu ila.

⁶Ọọwa, Eliyesa ọngọkiliya-à ka go okoji nya isida bala uke nya okoji ihisọpụ bala ochiri ọnyọmịla chị ka ẹpwụ nya ila ọlẹ ká iyo nya ẹna ọwẹ ji lẹlẹ.

⁷Ụka ká ọwẹ-ẹ́ myị kpa, ọngọkiliya ka hụ́ ang ịwụrụ nyamwụ, hyo enyi cheri-cheri lẹ, ọ ka nyà tịrẹkpẹ wẹ ẹpwụ nya ịkampụ lẹlẹ. Ọ tị ka ji libyi gbee da ka alobyi.

⁸Ọlẹng ọlẹ kọ kpa ụbwọ jụ ẹna ọọwa ila ka hụ́ ịwụrụ nyamwụ cheri-cheri bala o-hyo enyi. Ọwa tị̀tị̀ ka ji libyi gbee da ka alobyi ịnyịnyị.

⁹“Ụka ọọwa, ọlẹng ọlẹ kọ la charị-charị tụ agbụ nya ẹna ọwẹ kọ ka gyaa kpa ka guru ẹ-ẹga ọcharị-charị odehe nya ịkampụ. Ị ka guru ụ-ụwa ká ala Isirẹlụ ka kpa ju enyi nya ịlọ nya ọcharị-charị ọhọhọ. Ọhọhọ ọọwa ri nyọka hụ́ ọhọbịrị.

¹⁰Ọlẹng ọlẹ kọ tụ agbụ nya ẹna ọwẹ tị̀tị̀ hụ́ ịwụrụ nyamwụ cheri-cheri. Ọwa ayịdang tị ka ji libyi gbee da ka alobyi. Ọwẹ ri ehile ọpyịyọọ ọlẹ kọ juwa ha ala Isirẹlụ tụ angga ịlẹ kị kụ ọ-ọpyị nyaa.

¹¹“Ọng myị ọng kọ ya ịnyịrọ gu ogu aalẹ, ọngọọwa ka ji libyi jịra ẹnụtụrụ irwiye gbẹgbịlẹ.

¹²Ọ ka hụ́ ịlọmwụ lenyi nya ịlọ ẹnụtụrụ ọhata bala ẹnụtụrụ ọharwiye. Ọọwa, ọ ka la charị-charị lẹlẹ. Ọ́ tị ri kọ hụ́ ịlọmwụ ẹnụtụrụ ọhata bala ẹnụtụrụ ọharwiye ka aalẹ, ọ́ ka la charị-charị ka.

¹³Ọng myị ọng kọ ya ịnyịrọ gu ogu, kọ tị hụ́ ịlọmwụ jaabwọ ká ọhọhọ ri ka aalẹ, ọngọọwa juwa libyi wẹẹ, chajị í nyí enyi-ịlọ nya ọcharị-charị ọhọhọ hwọọ ka. Ọ chị Ọdụ nya Amkpaa ịrị lẹ, ị ka boo deeji hi ẹpwụ nya ala Isirẹlụ.

¹⁴“Ó-ri ká ọngịnyị-ị́ gbu nụwa ẹ-ẹpwang nya ọdụ, ọng myị ọng ọlẹ kọ juwa lụka ká ọngọọwa gbu bala ọng myị ọlẹ kọ jụ kpẹẹ ka ẹpwang ọọwa ka ji libyi jịra ẹnụtụrụ irwiye gbẹgbịlẹ.

¹⁵Ẹja lee ang ọ-kpa ju ang ọlẹ kị ya ọnụ kụrụ ka ọnyị myị ọnyị kọ juwa ẹ-ẹpwang ọọwa lụka ọwẹ ju ibyi ịnyịnyị.

¹⁶“Ọngọngọhẹ kọ ya ịnyịrọ gu ogu nya ọngọlẹ kị nwụ lee o-gbu igu nya adoohe dụwa u-ugbọdọda lee ọngọngọhẹ kọ ya ịnyịrọ gu ukpunogu nya ọngịnyị ehe lee iworu aalẹ, ọngọọwa ka ji libyi ẹnụtụrụ irwiye gbẹgbịlẹ.

¹⁷“Jaabwọ kị ka họ kị ka hụ́ ibyi hi ọngịnyị ri ọ-ka chụ agbụ nya ẹnụ ọlẹ kị jụ ila ju ọ-ọta kị ka chị enyi onyeewe jwoo.

¹⁸Ịnya iwe-ahụrụ ọhọhẹ lẹ, ọngọlẹ kọ la charị-charị ka hu uke nya okoji ihisọpụ ju enyi ọọwa chwaaa kọ ka nyọ́ọ̄ hụ ẹpwang nya ọdụ ọọwa bala ang myị ang ịlẹpwụ nyamwụ tụ angịlẹ kị juwa ụka ọọwa. Ịnya iwe-ahụrụ oheeye lẹ, ọngọlẹ kọ lala charị-charị ka nyí enyi-ịlọ ọọwa hụ ọngọlẹ kọ ya ịnyịrọ gu ukpunogu nya ọngịnyị lee iworu lee ọngọlẹ kị nwụ dụwa lee o-gu igu nya adoohe.

¹⁹Ọngọ charị-charị ọọwa ka nyí enyi ọwẹ hụ angị ji libyi ịwẹ ẹnụtụrụ ọhata bala ẹnụtụrụ ọharwiye. Ẹnụtụrụ ọharwiye, angịịwa ka hụ́ ịwụrụ nyaa kị ka hyo enyi cheri-cheri. Ọọwa, lobyi nya ẹnẹwẹ lẹ, ị ka la charị-charị lẹlẹ.

²⁰“Ọng myị ọng kọ ji libyi, kọ tị hụ́ ịlọmwụ jaabwọ ká ọhọhọ ri ka aalẹ, ọngọọwa juwa libyi ọọwa wẹẹ, chajị í nyí enyi-ịlọ nya ọcharị-charị ọhọhọ hwọọ ka. Ọ chị Ọdụ nya Amkpaa ịrị lẹ, ị ka boo deeji hi ẹpwụ nya ala Isirẹlụ.

²¹Ọwẹ ri ehile ọlẹ kanụ ka kpa gbe oyi myị oyi. Ọngọlẹ kọ kpụbwọ nyí enyi-ịlọ hụ angịkịla ịwẹ ka hụ́ ang ịkụrụ-kụrụ nyamwụ. Ọngọngọhẹ kọ tị yụbwọ gu enyi ọ-kpa họ ọhọhọ nya ọcharị-charị ọwẹ ka ji libyi da ka alobyi.

²²Ang myị ang ká ọngọ kpa ibyi-í nya ịnyịrọ gu aalẹ, ang ọọwa tị̀tị̀ ji libyi lẹ. Ọng myị ọng kọ ya ịnyịrọ gu ang ọọwa aalẹ, ọngọọwa tị̀tị̀ ka ji libyi gbee da ka alobyi.”