Read idege ỌWAWA 2 Bible Online

ỌWAWA 2 - idege bible

ỌWAWA 2

¹Ụka ọhẹ, Amkpaa byi iMosisi bala Erọn yẹkẹẹ,

²“Ụka ká ala Isirẹlụ-ụ́ ka nọ ẹpwa ị-ịkampụ nyaa, ọlẹng ọnyị myị ọnyị ka ya ẹpwang nya yeji ẹ-ẹga nya ụgbàńg nya alebwo nyamwụ bala apwụ nya ang-ẹjẹẹ nya alogang nyamwụ. Ị ka ya ẹpwa ịwẹ kụ dagaga ju Ọdụ nya nyam, ị́ tị ka jwoo chwẹẹ lụmẹ koo.”

³Alimwawụ nya iJuda bala ebwo ịkịla ịlẹ kị ka ji ogu taa ka nọ ẹpwa ba ụgbàńg nya ugbiyegu nyaa ba ịkịka ọlọmwẹnụ-ụtụrụ nya Ọdụ nya Amkpaa. ỊNachọn ọnyị nya Aminadabụ à ka kpa angị ụnọ iwo irwiye da ụnọ ine da angị ohu ịrwọnyẹ (74,600) ịlẹ kị ri angịdẹwụ bwu iJuda kụ ịlahị lẹ.

⁵ỊNẹtanẹlụ ọnyị nya iSuwa ka kpa angị ụnọ iwo ịrụ da ụnọ ine da angị ohu ine (54,400) i-bwu imwawụ nya Isakaa kụ ẹpwa bala ala iJuda ba ịkịka ọhẹ,

⁷Eliyabụ ọnyị nya iHelọn ka kpa angị ụnọ iwo ịrụ da ụnọ irwiye da angị ohu ine i-bwu iSebulọn kụ ịkịka ọkịla.

⁹Ọtụchawụlẹ nya angịdẹwụ ịlẹ kị ji ogu nya ala iJuda wuu ri angị ụnọ ohu ookpokpo da ụnọ iwo ineku da ụnọ ịrwọnyẹ da angị ohu ine (186,400). Ụka myị ụka ká ala Isirẹlụ-ụ́ ka mwụ bwu ẹgẹhẹ ka ẹga ọkịla, alimwawụ ịta ịwẹ à ka hu ang ẹdịyẹ jene nya angịkịla lẹ.

¹⁰Alimwawụ nya iRubẹn bala ebwo ịkịla ịlẹ kị ka ji ogu taa ka nọ ẹpwa ba ụgbàńg nya ugbiyegu nyaa ba ịkịka oledii nya Ọdụ nya Amkpaa. Elisuu ọnyị nya iChedewu a ka kpa angịdẹwụ angị ụnọ iwo ine da ụnọ ịrwọnyẹ da angị ohu ịrụ (46,500) i-bwu imwawụ nya iRubẹn lẹ.

¹²IChelumiyẹlụ ọnyị nya iSurichadayị ka kpa angị ụnọ iwo ịrụ da ụnọ ihikichu da angị ohu ịta (59,300) i-bwu imwawụ nya iSimyọn kụ ịkịka nya ala iRubẹn ọhẹ,

¹⁴Elisafụ ọnyị nya iReyuwẹlụ ka kpa angịdẹwụ angị ụnọ iwo ine da ụnọ ịrụ da angị ohu ịrwọnyẹ da iwo ịrụ (45,650) i-bwu ịGadị kụ ịkịka ọkịla.

¹⁶Ọtụchawụlẹ nya angịdẹwụ ịlẹ kị ji ogu nya ala iRubẹn wuu ri angị ụnọ ohu ookpokpo da ụnọ iwo ịrụ da ụnọ ookpokpo da angị ohu ine da iwo ịrụ (151,450). Ịwa alebwo ọwẹ à hu ang ẹdịyẹ ju oheeye lẹ.

¹⁷Ọọwa, ala iLivayị à ka yegiri ịnyịnyị lẹlẹ. Ị ji apewa nya ogu imiiye ịwẹ la Ọdụ nya Amkpaa. Ebwo ọnyọnyọọnyị ka jẹ bala alebwo nyamwụ jaabwọ kị bwu chịkụ ị-ịkampụ nyaa ẹ-ẹga kị ya ụgbàńg nya yeji.

¹⁸Ịkịka ọlọmwẹnụ-obyi ebwo ịlẹ kị ji imwawụ nya Ifurem à ka kụ bala olegbeju nyaa ba ụgbàńg nya ugbiyegu nyaa lẹ. Elichama ọnyị nya Amihudu à ri olegbeju nya angịdẹwụ angị ụnọ iwo ine da angị ohu ịrụ (40,500) i-bwu Ifurem lẹ.

²⁰ỊGamaliyẹlụ ọnyị nya ịPẹdasuu kpa angịdẹwụ angị ụnọ iwo ịta da ụnọ imiiye da angị ohu imiiye (32,200) i-bwu ịManasẹ kụ ịkịka nya Ifurem ọhẹ,

²²Abidan ọnyị nya iGidyoni kpa angịdẹwụ angị ụnọ iwo ịta da ụnọ ịrụ da angị ohu ine (35,400) i-bwu iBenjamịn kụ ụpa ọkịla baa ba.

²⁴Ọtụchawụlẹ nya angịdẹwụ ịlẹ kị ji ogu nya ala Ifurem wuu ri angị ụnọ ohu ookpokpo da angị ụnọ ineku da angị ohu ookpokpo (108,100). Ịwa-à ka hu ang ẹdịyẹ tụ ala iLivayị da ju ebwo ọhata lẹ.

²⁵Alimwawụ nya ịDan bala ebwo ịkịla ịlẹ kị ka ji ogu taa ka nọ ẹpwa ba ụgbàńg nya ugbiyegu nyaa ba ịkịka ọlẹtẹ nya Ọdụ nya Amkpaa. Ahiyesa ọnyị nya Amichadayị à kpa angịdẹwụ angị ụnọ iwo ịrwọnyẹ da ụnọ imiiye da angị ohu irwiye (62,700) i-bwu ịDan lẹ.

²⁷ỊPagiyẹlụ ọnyị nya Ọkịran ka kpa angịdẹwụ angị ụnọ iwo ine da ụnọ ookpokpo da angị ohu ịrụ (41,500) i-bwu Achẹẹ kụ ba ala ịDan ba koye ọhẹ,

²⁹Ahira ọnyị nya Ẹnan ka kpa angịdẹwụ angị ụnọ iwo ịrụ da ụnọ ịta da angị ohu ine (53,400) i-bwu ịNafụtali kụ koye ọkịla baa ba.

³¹Ọtụchawụlẹ nya angịdẹwụ ịlẹ kị ji ogu nya ala ịDan wuu ri angị ụnọ ohu ookpokpo da ụnọ iwo ịrụ da ụnọ irwiye da angị ohu ịrwọnyẹ (157,600). Ịwa-à ka hu ang ẹdịyẹ ku ẹkpẹ wuu lẹlẹ.

³²Ọtụchawụlẹ nya ala Isirẹlụ ịlẹ kị wa nya angịdẹwụ ebwebweebwo wuu ri angị ụnọ ohu ịrwọnyẹ da ụnọ ịta da ang ohu ịrụ da iwo ịrụ (603,550).

³³Jaabwọ ká Amkpaa da iMosisi ehile neeji lẹ, ị́ wa alimwawụ nya iLivayị kpịla la angịkịla ka.

³⁴Ịịwẹ ala Isirẹlụ à họ ang myị ang kpẹẹkpẹẹ jaabwọ ká Amkpaa da iMosisi ehile ya nyị họ lẹ. Ogang bala ugbiyegu ọnyọnyọọnyị nọ ẹpwa ebwebweebwo ba ẹga kị ya ụgbàńg nya alebwo nya yeji jaabwọ ká Amkpaa ya.