Read idege ỌWAWA 20 Bible Online

ỌWAWA 20 - idege bible

ỌWAWA 20

¹Ẹ-epwụ nya ọya ọhọhẹ nya ẹka, ká ala Isirẹlụ wuu jẹ kaka pwụ ugbileji nya iSiin lẹ, ị chịkụ ụ-ụwa ị-ịKadẹchị lẹlẹ. Ẹga ọọwa iMiriyam à gbu lẹ, ị jwoo eji ụ-ụwa lẹlẹ.

²Enyi-í juwa ẹ-ẹgẹwẹ kị chịkụ kpụ ị ka yẹ nwa ka. Ọọwa, ịwa wuu à tụ gbiriri kaka guru iMosisi bala Erọn lẹ,

³ị juwa mwẹla ya yẹkẹẹ, “IMosisi ee, ó-ri kahị gbu ị-ịlahị nya Ọdụ nya Amkpaa jaabwọ ká ala Isirẹlụ aanahị gbu lẹ̄ẹ, ịnọ ọ ka haahị há hagụ lẹ̄ẹ lẹ̀ẹ̄!

⁴Ịyẹ tị́ du ká kpahị ahị angịnyị nya Amkpaa warị wẹ ugbileji ọlẹ lẹẹ ene-è? Ajị kahị ka gbu bala iyo ileji nyahị ịnyị-ị́?

⁵Ányị tị́ dọmwụ du ká gbahị kpehe bwu ọpyị nya Ijipiti warị wẹ ẹga onyobyi ọlẹ ene-è? Ambakpa lee ikiledu lee alakọnụ lee ipomegịraneti-í jam ẹgẹlẹ ka. Enyi ọnwanwa ọlẹrwa-á jam ka ịnyịnyị!”

⁶Ọọwa, iMosisi bala Erọn à yegiri rụ hi ẹga nya ala Isirẹlụ lẹ ị kele ka godayị rịrị ọ-ọnang nya Ọdụ nya Amkpaa lẹlẹ. Ị hirikpẹẹ yahị kụrụ eji lẹ, Amkpaa-à chị ụmụmẹ nyamụ ehe haa lẹlẹ.

⁷Ọọwa, Amkpaa-à byi iMosisi yẹkẹẹ,

⁸“Hu ọgọdọ nyang, kaahụ bala Erọn ọnyịnang ā tụ ala Isirẹlụ wuu guru mẹ. Á họ lẹ, à ya ẹla ta ẹjwọ ọlaanyị a-ahị nya aluche wuu mẹ, aalẹ, enyi ka kpehe bwu ẹpwụ nyamwụ. Ịịwẹ ā ka họ lẹ, enyi à ka kpehe bwu ẹpwụ nya ẹjwọ ha ala Isirẹlụ kịịwa bala iyo ileji nyaa ka ye nwà lẹlẹ.”

⁹Ọọwa, iMosisi à hu ọgọdọ bwu ẹga kị ya nọ ọ-Ọdụ nya Amkpaa jaabwọ ká Amkpaa ya lẹlẹ.

¹⁰IMosisi bala Erọn à tụ angịnyị wuu guru ẹ-ẹga ookpokpo ụ-ụwa ị-ịlahị nya ẹjwọ ọọwa lẹ, iMosisi à byaa yẹkẹẹ, “Anụ wo mẹ, anụ angị la egbeju-ọngịrị ịwẹ. Āhị gba enyi kpehe bwu ẹpwụ nya ẹjwọ ọlẹ hanụ mẹ-ẹ̄ẹ́?”

¹¹Ụka ọọwa, iMosisi hu ụbwọ nyamwụ hwaaa lẹ, ọ ya ọgọdọ mịla ẹjwọ ugbabwọ imiiye lẹ, ọ̀bá nya enyi ọtụka-ọtụka à mwụ kpehe bwu ẹpwụ nyamwụ lẹlẹ. Angịnyị wuu bala iyo ileji nyaa-à nwa enyi lẹlẹ.

¹²Ma, Amkpaa byi iMosisi bala Erọn yẹkẹẹ, “Chajị nyọlẹ kanụ dahịhilem kpụ anụ mẹ ọngịrị ịgọgọ nyam jẹ ị-ịlahị nya ala Isirẹlụ kaka lẹ, aanụ à ka kpa ala Isirẹlụ kele ka ọpyị ọlẹ kam myị ọnụ haa kaka.”

¹³Ẹlẹwẹ họ ẹ-ẹga kị wụrụ iMeriba[6]. Ẹgẹwẹ ala Isirẹlụ à mwẹla ya ba Amkpaa lẹ. Ụwa Amkpaa-à tị mẹjaa ya ọwa nyị lịgọgọ lẹ.

¹⁴Ụka ọọwa, iMosisi du alẹrụ nyamwụ ẹrụ bwu ịKadẹchị kele kaka byi adịrahụ nya ala Ẹdọm yẹkẹẹ, “Aanang ala Isirẹlụ à duuhi ẹrụ lẹẹ wẹ ẹga nyang lẹ. À tị́ jẹ uhila nya akama ịlẹ wuu kahị chịpwụrụ bwu lẹẹ lẹ.

¹⁵Adahị igogo anyị rụ kele ka kụ Ijipiti ẹ-ẹpwụ nya ẹka lụmẹ-lụmẹ. Ala Ijipiti yẹ adahị igogo anyị ụhị tụụhị ahị ayịdang ịnyịnyị.

¹⁶Ụka kahị jida wụrụ Amkpaa kọ ka dahị ụbwọ lẹ, ọ wo ọmyị nyahị lẹ, ọ du olegu-ẹrụ nyamwụ ọhẹ warị kaka gbahị kpehe bwu ọpyị nya ala Ijipiti lẹlẹ. Ọlẹẹlẹẹ, ahị chịkụ am̀ e-epweji nya ịKadẹchị ba oyi nya ọpyị nyanụ ba.

¹⁷Lẹẹlẹ, ọ tị́ ka lanyị-ị̀ wẹ̄ẹ̀, chuchuu hi iwe da hahị kahị chịpwụrụ bwu ọpyị nyang mẹ. Áhị ka pẹ ka ẹpwụ nya ẹrụ ọhẹ-lọhẹ tụ ẹrụ nya alakọnụ nyanụ ka. Áhị ka chị enyi bwu ịwẹẹlụ nyanụ nwa kpong-kpong ka. Ụgbẹyị-uche[7] kẹnẹ-kẹnẹ ahị ka tụda kpụrụrụ gbee kahị ka kpoye nya ọpyị nyanụ lẹ.”

¹⁸Ma, adịrahụ nya ala Ẹdọm byaa yẹkẹẹ, “Eheehe, áhị ya ẹga da hanụ nyọka chịpwụrụ bwu am̀ ka. Ọ́ tị ri kanụ ma ịngịhyẹ yẹ, ahị wuleji wirim lẹ, ahị ka hịrọọ danụ lẹlẹ.”

¹⁹Ala Isirẹlụ wẹ byoo yẹkẹẹ, “Ụgbẹyị-uche kẹnẹ-kẹnẹ ahị ka tụda lẹ. Ọ́ dọmwụ ri kaahị lee iyo oleji nyahị á nwa enyi nyanụ aalẹ, ahị ka nwụ uri nya enyi ọọwa. Ọ-ka chịpwụrụ kpoye bwu ọpyị nyanụ kem ịnyị. Áhị tịtọ nya ịngịhyẹ gụ ọwẹ kaka.”

²⁰Adịrahụ nya ala Ẹdọm myịmyị ma ya yẹkẹẹ, “Ahị pwa lẹ! Anụ tụkịnyaa hi ọpyị nyahị mẹ.” Ụka kọ ya ẹlẹwẹ kpá, ọ wụrụ angịdẹwụ nyamwụ dalawụlẹ lẹ, ị kpehe bwọọọ jahị da ala Ịisrẹlụ kị ka mwẹla taa lẹlẹ.

²¹Ajị nyọlẹ ká ala Ẹdọm-ḿ myị ha ala Isirẹlụ kpụ ị chịpwụrụ bwu ọpyị nyaa kaka lẹ, ala Isirẹlụ à ji kpata rụ bwu ụgbẹyị ọkịla lẹlẹ.

²²Ala Isirẹlụ wuu yegiri bwu ịKadẹchị lẹ, ị jẹ ka pwụ Ọgbọdọ nya ịHọọ

²³ọlẹ kọ ji oyi nya ọpyị nya ala Ẹdọm lẹlẹ. Ọọwa, Amkpaa-à byi iMosisi bala Erọn ụ-ụwa yẹkẹẹ,

²⁴“Erọn jam ka gbu am̀ ẹgẹlẹ lẹ. Ọ́ ka jụ ka ọpyị ọlẹ kam wẹẹ ya ha ala Isirẹlụ kaka, chajị anụ angị imimiiye la egbeju-ọngịrị tụ ehile nyam pyịpyị ẹ-ẹga nya enyi ọla iMeriba.

²⁵IMosisi ee, kpa Erọn bala Eliyesa ọnyị nyamwụ kele ka uhye nya Ọgbọdọ nya ịHọọ mẹ.

²⁶Ánụ pwụ ụwa lẹ, à pwọ ịwụrụ nya ọngọkiliya ịlẹ ká Erọn kụrụ-ụ̀ wẹ ka ya kụrụ Eliyesa mẹ. Ụ-ụwa Erọn à juwa ka gbu lẹ.”

²⁷IMosisi họ jaabwọ ká Amkpaa dọọ ehilẹ. Ị wule ka uhye nya Ọgbọdọ nya ịHọọ ị-ịlahị nya ala Isirẹlụ wuu.

²⁸Ọọwa lẹ, iMosisi à pwọ ịwụrụ nya ọngọkiliya hi Erọn lẹ, ọ yaa kụrụ Eliyesa ọnyị nya Erọn lẹlẹ. Ọọwa, Erọn à gbu ẹ-ẹpwayịrẹtẹ nya ọgbọdọ ọwẹ lẹlẹ.

²⁹Ụka ká ala Isirẹlụ wuu jẹ ká Erọn gbu, ị bida chajị nyamwụ ahị ọpyẹpyẹ iwo ịta gbẹgbịlẹ lẹlẹ.