Read idege ỌWAWA 21 Bible Online

ỌWAWA 21 - idege bible

ỌWAWA 21

¹Ụka ọhẹ, adịrahụ nya ala Aradị ọlọpyị nya iKenan ọlẹ kọ kụ oyedii wo ya ala Isirẹlụ nyị juwa tụ ụgbẹyị o-bwu Atarim da warị. Ọọwa, ọ kele ka dẹwụ ala Isirẹlụ kpụ ọ wu angịhyẹ nyaa kpa rụ lala anyịhị lẹlẹ.

²Ọọwa, ala Isirẹlụ à nwa iro ha Amkpaa yẹkẹẹ, “Amkpaa ee, ó-ri ká dahị ụbwọ kahị kụrụ angịwẹ aalẹ, ahị ka gyaa bala epweji nyaa wuu hang bwula ọ-taa ayịreji gbanggbang.”

³Ọọwa, Amkpaa-à wo ọbịlẹ-bịlẹ nya ala Isirẹlụ lẹ, ọ daa ụbwọ du kị kụrụ ala iKenan lẹlẹ. Ụka ọọwa, ala Isirẹlụ taa ayịreji tụ epweji nyaa wuu. Ọọwa-à du kị wụrụ ẹnyị nya ẹgẹwẹ ịHọma[8] lẹ.

⁴Ala Isirẹlụ hu ang ẹdịyẹ nyaa bwu Ọgbọdọ nya ịHọọ tụ ụgbẹyị ọlẹ kọ da ka Ihu Oletungkohyo da kị ka jẹ gịlọ-gịlọ dagaga ju ọpyị nya Ẹdọm. Ụka kị tị jẹ ịnyịnyịịnyị, ọhụ-ụ́ ba angịnyị e-eji kaka.

⁵Ọọwa, ị juwa ya ẹla ba Ohe Oluhye bala iMosisi lẹlẹ. Ị juwa byi iMosisi yẹkẹẹ, “Anyị tị́ du ká gbahị kpehe bwu Ijipiti warị kahị ka gbu u-ugbileji ene-è? Ang oriri-í jam ji ka, enyi jam ji ka. Ịmána ọlẹ chịhị aga pwẹẹpwẹẹ la oriri lẹ.”

⁶Ọọwa, Amkpaa-à du iru nya ilo kele ka ẹpwụ nya ala Isirẹlụ lẹ, ilo à chụụ lẹ, iru nyaa-à gbu lẹlẹ.

⁷Ọọwa, angịnyị à wẹ ẹga nya iMosisi kaka byoo yẹkẹẹ, “Ahị họ ang onyobyi bwula o-ya ẹla ba Amkpaa bala ahụ lẹ. Chuchuu raabwọ ha Amkpaa kọ tụ ilo ịlẹ kịnyaa hiihi mẹ.” Ọọwa, iMosisi à raabwọ chajị nyaa lẹlẹ.

⁸Ọọwa, Amkpaa-à byi iMosisi nyị họ ilo nya oje, kịị hwoo pịlẹ u-uhye nya okoji wu eji, chajị ká angịlẹ ká ịlo-ò nyị chị nyị́ hu ẹhị hwaa yọọ lẹ, kịị nyị ka hagụ mẹ lẹlẹ.

⁹Ọọwa, iMosisi à họ ilo nya oje ọnyọmịla pịlẹ okoji wu eji lẹlẹ. Ụka ká angịlẹ ká ilo chị-ị́ chẹhị yẹ ilo nya oje ọnyọmịla ọwẹ, ị la gogo.

¹⁰Ọọwa, ala Isirẹlụ à hu ang ẹdịyẹ kịlahị lẹ, ị jẹ kaka chịkụ ẹ-ẹga kị wụrụ Obotu lẹlẹ.

¹¹Ụka kị yegiri bwu ẹgẹwẹ, ị jẹ kaka chịkụ i-Iye-Abarim u-ugbileji ọlọmwẹnụ-ụtụrụ nya ọpyị nya ala iMowabụ.

¹²Ọọwa, ị tị rụ bwu ẹgẹwẹ kaka chịkụ ọ-Ọkpọọ nya ịSẹrẹdị lẹlẹ.

¹³Ụka kị yegiri bwu ẹgẹwẹ, ị myịmyị jẹ kaka chịkụ ịkịka ọlẹtẹ nya Ihu Aanọn u-ugbileji ọlẹ kọ juwa gbee ju ka ọpyị nya ala iMowabụ. Ọ̀bá nya Aanọn ọwẹ ayịdang à oyi hi awụlẹ lẹ.

¹⁴Ọọwa-à du kị ya ẹla ẹ-ẹpwụ nya ụpwụ nya Ẹwụ Ọdada nya Amkpaa[9] rụ “Ẹpweji nya ịWahẹbụ ọlẹ kọ ji oye nya iSufa bala iru ọkpọọ ịlụwa lẹ. Ọ ya ẹla rụ Ihu Aanọn

¹⁵bala ọkpọọ ịlụwa ịlẹ kị ji gbee pwụ epweji nya Aarị bala ọ-tụ oyi nya ọpyị nya iMowabụ da.”

¹⁶Ala Isirẹlụ yegiri bwu Aanọn jẹ kịlahị ka pwụ ẹga kị wụrụ ịWẹẹlụ. Ụwa-à ri ẹga ká Amkpaa byi iMosisi ụka ọọwa yẹkẹẹ, “Tụ angịnyị wuu guru mẹ aalẹ, m̀ ka ya enyi haa nwa lẹ” lẹ.

¹⁷Ụka ọọwa, ala Isirẹlụ à mwu eje ọlẹ lẹ: “Ịwẹẹlụ ee, rụ̄ enyi mẹ, Āhị mwu eje rwọ́ọ̄ mẹ!

¹⁸Āhị mwu eje rụ́ ịwẹẹlụ ọlẹ ká ịdịrịhụ nya alụma wu. Ịwẹẹlụ kị kpa otuma nyaa wu, ịwẹẹlụ kị kpa ọkụtụ nyaa wu ịnyị.” Ọọwa, ala Isirẹlụ à rụ bwu ugbileji kele ka ịMatana lẹlẹ.

¹⁹Ị rụ bwu ịMatana kele ka ịNahaliyẹlụ. Ị rụ bwu ịNahaliyẹlụ kele ka ịBamotu.

²⁰Ị rụ bwu ịBamotu kele ka ọkpọọ ọlọpyị nya iMowabụ weji nya Ọgbọdọ nya iPisiga ọlẹ ká achinege nyamwụ yahị da ugbileji[10].

²¹Ụka ọhẹ, ala Isirẹlụ du angịhyẹ ẹrụ ka ẹga nya iSihọn Adịrahụ nya ala Amọ ka byoo yẹkẹẹ,

²²“Ọ tị́ ka lanyị-ị̀ wẹ̄ẹ̀, chuchuu hi iwe da hahị kahị chịpwụrụ bwu ọpyị nyang mẹ. Áhị ka pẹ ka ẹpwụ nya ẹrụ ọhẹ-lọhẹ tụ ẹrụ nya alakọnụ nyanụ ka. Áhị ka chị enyi bwu ịwẹẹlụ nyanụ nwa kpong-kpong ka. Ụgbẹyị-uche[11] kẹnẹ-kẹnẹ ahị ka tụda kpụrụrụ gbee kahị ka kpoye nya ọpyị nyanụ lẹ.”

²³Ma, iSihọn á myị ala Isirẹlụ chịpwụrụ bwu epweji nyamwụ ka. Ọ wụrụ angịdẹwụ nyamwụ dalawụlẹ lẹ, ị hu ang kele ka ịJahasị u-ugbileji lẹ, ị dẹwụ ta ala Isirẹlụ ụ-ụwa lẹlẹ.

²⁴Ala Isirẹlụ tị nwụ iru nya alẹwụ ịịwa kpụ ị kụ ọpyị nya ala Amọ ọwẹ ẹpwa bwu Ihu Aanọn lalaala ka ju ka Ihu ịJabọkụ. Ị jẹ gbee ka ba o-oyi nya ala Amọn kem, chajị ịwa chị ajẹ ju ọpyị nyaa giri-giri.

²⁵Ala Isirẹlụ ye epweji nya ala Amọ wuu la bala ọ-kwaa ẹpwa wuu tụ epweji ọtụka nya ịHẹchịbọn bala epweji ichiche ịdagaga jwoo wuu.

²⁶Epweji nya ịHẹchịbọn ọwẹ à ri egbeju-ẹpwa nya iSihọn Adịrahụ nya ala Amọ lẹ. Adịrahụ ọwẹ lẹẹ dẹwụ ta adịrahụ olene nya ala iMowabụ kpụ o-nu ala iMowabụ ọpyị wuu lalaala ka pwụ Ihu Aanọn.

²⁷Ajị nya ọọwa lẹ, alaroro iligbalẹ kaa mwu eje rụ iSihọn yẹkẹẹ, “Anụ kẹwẹ wẹ ịHẹchịbọn, epweji nya iSihọn! Ị ma epweji ọwẹ nwụ́ mẹ-ẹ̀, ká epweji nya iSihọn à tịrẹkpẹ ka la jaabwọ kọ la ene mẹ!

²⁸Angịdẹwụ nya iSihọn gbehe tileleele lala ila bwu epweji nya ịHẹchịbọn. Ị ta epweji nya Aarị ọla iMowabụ ayịreji Ị myị alegbeju ilikiti iloye oluhye nya Ihu Aanọn.

²⁹Anụ ala iMowabụ, anụ ri enyi gu obyi lẹ ooo! Anụ angị kpụ́ ojiga iKemochi, anụ gbu hụrụ lẹ oo! Ojiga nyanụ nyẹẹkpẹ da alẹng du kị la edawụ kaka, ọ họ anyang yẹ kaka ri alagba— ịnyịlẹhị ịnyị, ị ri alagba nya iSihọn Adịrahụ nya ala Amọ.

³⁰Ahị tị gu anyị ịtụma nyaa cheji bwu iHechibọn lalalaala ka ju ka iDibọn, bwu ịNachim kele ka ju ka iNofa ọlẹ kọ ba iMedeba ba”[12].

³¹Lẹẹlẹ, ala Isirẹlụ ye ọpyị nya ala Amọ kụ ẹpwa.

³²Ọọwa, iMosis à du alịbaje ịhyẹ kaka wụla epweji ọtụka nya ịJasẹẹ yẹ lẹ, ala Isirẹlụ à dẹwụ nu epweji iloye ọọwa wuu bala o-ku ala Amọ ịlẹ kị kụ ụ-ụwa rụ bwu ụwa lẹlẹ.

³³Ụka ọkịla, ala Isirẹlụ ji kpata chẹwụ yahị da ka ịBachan. Ụka ọọwa, Ọọgụ Adịrahụ nya ala ịBachan kpehe la angịdẹwụ nyamwụ kaka mwẹla taa ụ-ụwa Edireyii.

³⁴Ụka ọọwa, Amkpaa byi iMosisi yẹkẹẹ, “A ju uhi nyamwụ koo, chajị m̀ ka họ ká ka kụrwọọ bala angịnyị nyamwụ tụ ọpyị nyamwụ wuu. Jaabwọ ká họ iSihọn Adịrahụ nya ala Amọ ọlẹ kụ ị-ịHẹchịbọn lẹẹ, ịnyịnyị ā ka họ Ọọgụ ọwẹ lẹ.”

³⁵Ala Isirẹlụ kụrụ ịnyịlẹhị. Ị nwụ Ọọgụ Adịrahụ bala anyị nyamwụ tụ angịnyị nyamwụ wuu. Ọngọngọhẹ nyaa-á be myị ka. Ọọwa, ị yẹ ọpyị nyaa wuu la lẹlẹ.