Read idege ỌWAWA 22 Bible Online

ỌWAWA 22 - idege bible

ỌWAWA 22

¹Ụka ọhẹ, ala Isirẹlụ kịnyaa ẹ-ẹpwụ nya ẹdịyẹ nyaa gbee kị kaka chịkụ ụteeji nya ala iMowabụ ọ-ọmwẹnụ-ụtụrụ nya Ihu ịJọdan ọlẹ kọ ji oye ọkịla nya iJeriko.

²Ụka ọwẹ, ịBalakị Adịrahụ nya ala iMowabụ kọ ri ọnyị nya iSipọ jẹ ang ọlẹ ká ala Isirẹlụ họ ala Amọ wuu.

³Ụka kọ yẹ jaabwọ ká ala Isirẹlụ ju iru kaka ba, ọwa bala angịnyị nyamwụ wuu dapwụ hụ amẹ.

⁴Ọọwa, ala iMowabụ à byi ịgabwọ nya ala iMidiyan yẹkẹẹ, “Ahyu! Iru nya angịwẹ-ẹ́ ka dayi la ọ-nẹ ang myị ang ịlẹ kị dagaga juhi wuu kịrẹmm jaabwọ ká ẹna kaa ri ụmẹ kẹnị-kẹnị kaka.” Ọọwa, ịBalakị Adịrahụ nya ala iMowabụ

⁵à du alẹrụ kaka wụrụ ịBalam ọnyị nya ịBẹyọọ ọlẹ kọ kụ e-epweji nya ịPẹtọọ ba Ihu iYufuretisi ba ọ-ọpyị nya ala Amavụ lẹlẹ. Ọ du ẹrụ ọọwa kaka bịlẹ ká ịBalam ka dọọ ụbwọ yẹkẹẹ, “Wo mẹ, iru nya angịhyẹ hị ụbwụrụ kpehe bwu ọpyị nya Ijipiti warị lẹẹ. Ị ju iru kịlẹhị kịla kpụ ị pyẹ yịrị odehe ọlẹ wuu yịrị. Ị wẹ kaka kụ bam ba pyaaa jahị da ọpyị nyam lẹẹ.

⁶Chuchuu kẹwẹ ká gọlọ jwaa ham mẹ, chajị ị ju iru kịlaahị kịla. Ó-ri ká họ ịnyị, m̀ me irya kahị ka kụrwaa myị. M̀ jẹ ọng myị ọng ọlẹ ká wahị ha lẹ, ọngọọwa kaa pyẹ̀ẹẹ lẹ. Ọngọlẹ ká tị gọlọ ju lẹ aalẹ, ọngọọwa kaa tịrị bwụjẹ-bwụjẹ lẹ.”

⁷Ọọwa, alegbeju nya ala iMowabụ bala alegbeju nya ala iMidiyan à wuleji ẹdịyẹ. Ị kpa okpoko ọlẹ kị ka ya nwụ ịBalam uri chajị kọ ka gọlọ ju ala Isirẹlụ. Ụka kị pwụ ẹga nya ịBalam, ị tịrọnụ ya joo ẹrụ ọlẹ ká ịBalakị du lẹlẹ.

⁸Ọọwa, ịBalam à byaa yẹkẹẹ, “Anụ hyehe ẹgẹlẹ lodu gbe ụtụrụ mẹ. Ọọwa, m̄ ka wẹẹnụ ẹla ijuju lụtụrụ jaabwọ ká Amkpaa-á byim am nyị ya lẹlẹ.” Ọọwa, alegbeju nya ala iMowabụ ịwẹ à hyehe tọọ lẹlẹ.

⁹Ọọwa, Ohe Oluhye à wẹ ẹga nya ịBalam lẹ, ọ tọọ wo yẹkẹẹ, “Oowo anyị à tị́-ị wẹ ẹ-ẹga nyang-ǹg?”

¹⁰ỊBalam wẹ byi Ohe Oluhye yẹkẹẹ, “ỊBalakị Adịrahụ nya ala iMowabụ kọ ri ọnyị nya iSipọ à du angịlẹ ẹrụ lẹẹ tọm lẹ. Ọ ya

¹¹iru nya angịhyẹ kị nyị hị ụbwụrụ kpehe bwu ọpyị nya Ijipiti warị lẹẹ nyị pyẹ yịrị ẹga myị ẹga wuu. Lẹẹlẹ, am nyị kẹwẹ ahyaahị kam nyị gọlọ jwaa họwa, chajị kọọwa nyị ka mwẹla taa bala ọ-táā kịnyaa hi ịlọwa.”

¹²Ọọwa, Ohe Oluhye à byi ịBalam yẹkẹẹ, “Ā baa kele koo. Ā tị gọlọ ju angịịwa koo, chajị m̀ wahị kụrwaa lẹ.”

¹³Ụka ká ahị pyẹ lụtụrụ, ịBalam à kele ka ẹga nya alẹrụ nya ịBalakị lẹ, ọ byaa yẹkẹẹ, “Anụ rụ tịrẹkpẹ ka ẹpwa mẹ, chajị Amkpaa pwa am nyị baanụ rụ ka.”

¹⁴Ọọwa, ị rụ tịrẹkpẹ ka ẹga nya ịBalakị lẹ, ị byoo yẹkẹẹ, “ỊBalam pwa ọwa nyị ka baahị warị ka.”

¹⁵Ụka ọọwa, ịBalakị du alegbeji ịkịla ịlẹ kị ju iru bala ọ-la ihi-ihi gụ angị ilene nya ọgbanyẹ ẹrụ kele.

¹⁶Ị ka ẹga nya ịBalam lẹ, ị byoo yẹkẹẹ, “ỊBalakị ọnyị nya iSipọ ya ahị nyị bying ya, ahụ nyị myị ká ịngịngịhyẹ nyị dang yi la ọwẹwẹ kaka yẹ ọwa koo.

¹⁷Ọ ya ịnyịnyị ọwẹ nyị ka nwụng uri yẹẹyẹẹ bala ọ-ka họ ang myị ang ọlẹ kaahụ nyị́ byi ọwa nyị họ. Lẹẹlẹ, ahụ nyị kẹwẹ kaahụ nyị gọlọ ju angịịwa họwa mẹ.”

¹⁸Ma, ịBalam wẹ byaa yẹkẹẹ, “Ó-riri ká ịBalakị-ị́ ka hu ẹpwa nyamwụ ọlẹ ká okpoko onyoowuru bala okpoko ịgọm myị pwẹẹpwẹẹ ga ham, ḿ ka jẹ-ẹ̀ ịngịngịhyẹ ọlẹ kọ ka kpoye nya ehile nya Amkpaa Ohe Oluhye nyam kaka.

¹⁹Anụ tị hyehe lodu gbe ụtụrụ lala angịkịla nyanụ, chajị kam myịmyị wo ẹla bwu ẹga nya Amkpaa ó-ri kọ la ẹla ọkịla ọhẹ ka ya tam gụ olene wẹẹ.”

²⁰Lodu ọọwa, Ohe Oluhye wẹ ẹga nya ịBalam lẹ, ọ byoo yẹkẹẹ, “Alẹng ịwẹ-ẹ́ warị kaka dirong ẹpwa lẹ, a báā kele mẹ-ẹ̀. Ma, ẹla ọlẹ kam dang ehile nyọka họhọ kẹnẹ-kẹnẹ ā ka họ lẹ.”

²¹Lụtụrụ nya ahị ọpyẹpyẹ ọọnamwụ lẹ, ịBalam à gba kụ obyiyó nyamwụ lẹ, ọ ba alegbeju nya ala iMowabụ ịịwa rụ lẹlẹ.

²²Ohe Oluhye tị wụ ẹjẹ lụmẹ chajị nyọlẹ ká ịBalam myị kwẹẹ wẹ̄ẹ̀ kele. Ọọwa, olegu-ẹrụ nya Amkpaa à kele ka godayị hịla ẹ̀ga ụ-ụgbẹyị gboo kọ ka dọọ yi la ọkaka lẹlẹ. Jaabwọ ká ịBalam juwa u-uhye nya obyiyó nyamwụ juwa jẹ ịnyịnyịịnyị la anchẹ nyamwụ angị imiiye juwa tọọ da lẹ,

²³obyiyó nyamwụ à chẹhị yẹ olegu-ẹrụ nya Amkpaa kọ godayị ụ-ụgbẹyị likonggo ụ-ụbwọ nyamwụ lẹlẹ. Obyiyó à yẹ hyàaa yahị da ẹpwụmẹ hi ụgbẹyị lẹlẹ. Ọọwa, ịBalam à wọọ ugboji kpúùù, kpọọ tịrẹkpẹ wẹ ụgbẹyị lẹlẹ.

²⁴Ọọwa, olegu-ẹrụ à tị godayị ẹ-ẹga ká ụgbẹyị la kpiilee apewa nya ẹrụ imiiye nya alakọnụ ịlẹ kị me egwalọ lẹjwọ-ẹjwọ ju ịkịka oyiye-oyiye lẹlẹ.

²⁵Ụka ká obyiyó ọwẹ chẹhị ka yẹ olegu-ẹrụ nya Amkpaa, ọ cheji ba bwu ẹga nya ugulọ lẹ, ọ tụ ẹta nya ịBalam pyị ugulọ lẹlẹ. ỊBalam myịmyị wa obyiyó ugboji.

²⁶Ọọwa, olegu-ẹrụ à myịmyị jẹ tụ kịlahị kaka godayị ẹ-ẹga ká ụgbẹyị la kpiilee, ká ẹgẹgẹhẹ-ẹ́ hi kpụ obyiyó ka jẹ-ẹ̀ bwu kaka lẹlẹ.

²⁷Ụka ká obyiyó chẹhị ka yẹ olegu-ẹrụ nya Amkpaa ugbẹnyị myịmyị, ọ hị nọnọ ị-ịpyị. ỊBalam-ḿ wu agbama nyamwụ kpa myị ka, ọ ya ọgọdọ nyamwụ mịla obyiyó.

²⁸Ụka ọọwa, Amkpaa-à họ obyiyó à ya ẹla byi ịBalam yẹkẹẹ, “Anyị m̄ tị́ họng kpụ ọ-ka nyim enyiri ugbabwọ ịtịta ịịwẹ-ẹ̀?”

²⁹Ọọwa, ịBalam à kpụ obyiyó ịkata yẹkẹẹ, “Ajị nyọlẹ ká họ ḿ me oluchi ịnyị. Ang pyii kam ka kpa ikonggo ẹgẹlẹ, ịnọ m̀ ka nwụng ā ka yẹ!”

³⁰Ọọwa, obyiyó à byi ịBalam yẹkẹẹ, “Yẹ wẹẹ! Aam à ri obyiyó ọlẹ ká kaa kụ gbalẹ-gbalẹ ka-á? M̀ họng ẹla ọlịịwẹ ẹnẹnẹhẹ lẹ-ẹ́?” ỊBalam wọọ nyi ehe.

³¹Ọọwa, Amkpaa-à họ ịBalam à jẹ yẹ olegu-ẹrụ kọ godayị ụ-ụgbẹyị likonggo ụ-ụbwọ nyamwụ lẹlẹ. Ịnyị, ịBalam à hirikpẹẹ yahị kụrụ eji lẹlẹ.

³²Olegu-ẹrụ tọọ wo yẹkẹẹ, “Ányị tị́ du ká nyi obyiyó nyang ugbabwọ ịta ịịwẹ-ẹ̀? Am à wẹ kaka tụng ụgbẹyị ku wẹ lẹ, chajị ẹdịyẹ nya arụwoka nya ịlọng ā wẹẹ jẹ lẹ.

³³Obyiyó yẹm ụ-ụgbẹyị kpụ ọ myẹ bee him ugbabwọ ịtịta. Ọ́ họ ịnyị ka, ịnọ m̀ ka nwụng, m̀ tị ka bahyoo.”

³⁴Ọọwa, ịBalam à byi olegu-ẹrụ nya Amkpaa yẹkẹẹ, “M̀ họ ang onyobyi lẹ. Ḿ jẹ ká godayị rịrị ụ-ụgbẹyị nyọka dam ẹdịyẹ ọlẹ yi ka. Ó-ri ká ọ-ka kele nyam-ḿ hang ka aalẹ, m̀ ka rụ tịrẹkpẹ bwu ẹgẹlẹ.”

³⁵Ọọwa, olegu-ẹrụ à byi ịBalam yẹkẹẹ, “Ba alẹng ịwẹ kele mẹ. Ma, ọkẹnẹ-kẹnẹ ri ẹla ọlẹ kam bying ā ka ya lẹ.” Ịnyị, ịBalam à ba alẹrụ nya ịBalakị Adịrahụ lẹlẹ.

³⁶Ụka ká ịBalakị Adịrahụ wo ya ịBalam nyị juwa warị lẹ, ọ kele nyọka tọọ e-epweji nya Aa ọlẹ kọ ji ọnụ nya Ihu Aanọn o-oyi nya ọpyị nya iMowabụ.

³⁷ỊBalakị à tọ ịBalam wo yẹkẹẹ, “Á jẹ ká ẹrụ o-ju agaga m̄ du tọng ka-á? Ányị tị́ ká warị ahyaahị ka? À me kam ka nwụng uri yẹẹyẹẹ myị ka-á?”

³⁸ỊBalam wẹ ịBalakị yẹkẹẹ, “Ee lẹ, m̀ tị́ wẹ lẹẹ lẹ. Tị wo mẹ, ẹla nya ịlọm oyina m̄ tị́ lọngịrị ka ya-āà? Ẹla myị ẹla ká Ohe Oluhye-é byim nyị ya, m̄ ka ya lẹ.”

³⁹Ọọwa, ịBalam à ba ịBalakị kele ka epweji nya iKiriyatị-ịhụsotu lẹlẹ.

⁴⁰Ụka kị pwụ ụwa, ịBalakị ya ịna bala ịkpịlọ kịla iya. Ọọwa, ọ chị iyo ịịwa ha ịBalam bala alegbeju ịlẹ kị juwa tọọ lẹlẹ.

⁴¹Lụtụrụ nya ahị ọpyẹpyẹ ọọnamwụ lẹ, ịBalakị à kpa ịBalam wule kele ka ịBamotu-ịbaalụ ẹga kọ ka jẹ-ẹ̀ kụ yẹ ebwo ọhẹ nya ala Isirẹlụ lẹlẹ.