Read idege ỌWAWA 23 Bible Online

ỌWAWA 23 - idege bible

ỌWAWA 23

¹Ụka ọọwa lẹ, ịBalam à byi ịBalakị yẹkẹẹ, “Me ogidi irwiye ham, ká kpa ịna irwiye bala imilodo irwiye warị wam mẹ.”

²ỊBalakị họ jaabwọ ká ịBalam byoo. Ọọwa, ọwa bala ịBalam à ya ẹna ookpokpo bala omilodo ookpokpo kịla iya u-uhye nya ogidi ọnyọnyọọnyị lẹlẹ.

³Ọọwa, ịBalam à byi ịBalakị yẹkẹẹ, “Godayị ba iya nyang ba gbem, kam tụ kẹkpẹ dụmwọ wẹẹ. Ọhẹka Amkpaa ka tọm kpụ ọ ka hi ẹlẹhẹ iwa jem. Ẹla myị ẹla kọ ya jem, m̀ ka kpa kaka tịrọnụ ya jeng.” Ọọwa, ọ rụ ka uhye nya ikiti ọhẹ lẹlẹ.

⁴Ụka ká Ohe Oluhye warị kaka tọ ịBalam ụ-ụwa lẹ, ịBalam à byoo yẹkẹẹ, “M̀ me ogidi irwiye kpá wuu kpụ m̄ hu ẹna ookpokpo ba omilodo ookpokpo kịla iya u-uhye nya ogidi ọnyọnyọọnyị lẹ.”

⁵Ọọwa, Amkpaa-à ya je ịBalam ẹla ọlẹ kọ ka ya je ịBalakị lẹ, ọ byoo nyị tịrẹkpẹ ka ẹga nya ịBalakị mẹ lẹlẹ.

⁶Ụka ká ịBalam tịrẹkpẹ kele, ịBalakị godayị ụ-ụwa ba iya ọ-rụ ila ọlẹ kọ kịla ba bala alegbeju nya ala iMowabụ wuu.

⁷Ọọwa, ịBalam à yẹ ọmwụ dodehe yẹkẹẹ, “ỊBalakị kpam warị bwu Aram[13], Ee, ọwa Adịrahụ nya ala iMowabụ ịnyị, ọ kpam bwu ịgbọdọ ịlọmwẹnụ-ụtụrụ. ọ byim am nyị kẹwẹ kaka gọlọ ju ala Isirẹlụ họwa, kam̀ nyị ya dodehe ẹbyị nyị hāā lẹ mẹ!

⁸Ányị m̄ tị́ ka jẹ-ẹ̀ gọlọ ju angịlẹ ká Ohe Oluhye-é gọlọ ju ene ka mẹ? Ányị m̄ tị́ ka ya ma angịnyị kpụ ọlẹbyị lẹ, ká Amkpaa-á tị ya ịnyị kpong-kpong ka-à?

⁹M̀ kụ ẹga ogede yaa wuu, m̀ yẹ ala Isirẹlụ bwu ẹpwayịrẹtẹ nya ikiti. Ị ri ẹpwụma ọlẹ kị kụ ụbwaa-ụbwaa kem, ị́ ya ịlaa yẹjula alẹpwụma ịkịla ka.

¹⁰Oowo tị́ ka jụ anyị ịtụma nya iJekọbụ wa kpá myị-ị̀? Ị ju iru lala apwụ bala amẹ. Ị́ chaa chị ebwo ine, ị́ kị chaa jụ lọwawa ka. M̀ ka tụtụ-ụ̀ gbu igu nya ang ọnyịịla ọhọhọ, ká ọhịhị nyam ā cheju lala ịnya angịnyị nya Ohe Oluhye.”

¹¹Ọọwa, ịBalakị à tọ ịBalam wo yẹkẹẹ, “Ụma nya ẹla ọlanyị ā tị́ họm ịịwẹẹ mẹ? M̀ kpang warị ká ka gọlọ ju aluji nyam. À tị dachichi wahị kụrwaa!”

¹²Ọọwa, ịBalam à wọọ yẹkẹẹ, “Ẹẹla ọlẹ ká Amkpaa byim am nyị ya, ọọwa m̄ ka ya kem ka-á?”

¹³Ọọwa, ịBalakị à byoo yẹkẹẹ, “Chuchuu, kẹwẹ kam kpang ka ẹga ọkịla wẹẹ. Á pwụ ụwa, á ka jẹ-ẹ̀ yẹ ala Isirẹlụ wuu koo, à tị ka jẹ-ẹ̀ yẹ ebwọ ọhẹ nyaa bwu ụwa. Ó-ri ịwa ri kem, à gọlọ jwaa ham bwu ụwa mẹ.”

¹⁴Ọọwa, ọ kpa ịBalam kele ka ẹrụ nya iSofim u-uhye nya Ọgbọdọ nya iPisiga lẹlẹ. Ọ me ogidi ikiliya irwiye ụ-ụwa ịnyịnyị. Ọọwa, ọ ya ẹna ookpokpo ba omilodo ookpokpo kịla iya u-uhye nya ogidi ọnyọnyọọnyị lẹlẹ.

¹⁵Ọọwa, ịBalam à byi ịBalakị yẹkẹẹ, “Godayị ba iya nyang ba gbem kam kele kaka tọ Amkpaa o-oye ọlaanyị wẹ́ẹ̀.”

¹⁶Ọọwa, ụka ká Amkpaa wẹ kaka tọ ịBalam, kọ ya joo ẹla ọlẹ kọ ka ya jẹ ịBalakị kpá lẹ, ọ byi ịBalam nyị rụ tịrẹkpẹ ka ẹga nya ịBalakị mẹ lẹlẹ.

¹⁷Ụka ká ịBalam kele, ọ yẹ ká ịBalakị kọ godayị ba iya ọlẹ kọ kịla ba bala alegbeju nya iMowabụ. Ọọwa, ịBalakị à tọọ wo yẹkẹẹ, “Ányị Amkpaa-à tị́ ya mẹ?”

¹⁸Ọọwa, ịBalam à yẹ ọmwụ dodehe yẹkẹẹ, “ỊBalakị, wuleji ká wo mẹ, ke ụrụ lam mẹ, ẹnwa ọnyị nya iSipọ.

¹⁹Ohe Oluhye-é ri ọngịnyị kpụ ọ ka me ọnọọkịla ka. Ọọngịnyị ehe ọlam-ọlam ọlẹ ọ ri kpụ ọ ka nwụ̀ irya me abwọkịla koo. Jaabwọ kọ ya, ịnyịnyị-ịnyịnyị ọ kaa họ lẹ. Ọ́ myị ọnụ, ọ kaa họ ẹla ọọwa jịra.

²⁰Ohe Oluhye dum ẹrụ nyọka wahị kụrụ angịwẹ. Ọwa lịlọmwụ wahị kụrwaa ene lẹ, ḿ ka jẹ-ẹ̀ wa ahị ọwawa ọọwa wii kaka.

²¹Ụ̀nụ-ụ́ onyobyi ọhẹ-lọhẹ-ẹ́ ka anyị nya iJekọbụ koo, Ịwa ala Isirẹlụ-ụ́ ka ya ẹhị yẹ ang ọtịpyọ ka. Amkpaa Ohe Oluhye nyaa juwa taa. Ị da iwuru jwoo nya adịrahụ nyaa.

²²Ohe Oluhye gbaa kpehe bwu, ọ ma uya lala ọtachụ yaa dada.

²³Ọngịrị nya ogbo lee ịnya ụhwa-á họ ẹla nya anyị nya iJekọbụ myị koo, ọlọ nya olugono-ó chị ala Isirẹlụ jụ koo. Ugbẹnyị, angịnyị ka kpa ya dọ̀ọ̀ọ̀ yẹkẹẹ, ‘Hworuu! Anụ yẹ ụkụrwọ ẹbyẹbyị ịtụka ká Ohe Oluhye họ ha ala Isirẹlụ alẹ wẹ́ẹ̀!’

²⁴Ala Isirẹlụ chị ọnggwọ lala ugẹbẹ ọtụka, ị kụ giri-giri lala ugẹbẹ ọkpẹ̀hị́ ọlẹ kọọ mwụ ịnyọ ka gbee kọ ka hụla iyo ọlẹ kọ wu hwẹẹhwẹẹ ri kpá bala ọ-nwa ịwọ nya iyo ọọwa.”

²⁵Ọọwa, ịBalakị à byi ịBalam yẹkẹẹ, “Ọlẹ ká gọlọ ju angịwẹ kaka lẹ, ā tị̀tị̀ wahị haa kpong-kpong kaka ịnyịnyị!”

²⁶Ma, ịBalam wẹ byi ịBalakị yẹkẹẹ, “M̀ ya ẹlẹwẹ deeji lẹẹ ene ya ang myị ang ká Amkpaa-á byim am nyị họ m̄ ka họ lẹ.”

²⁷Ọọwa, ịBalakị à byi ịBalam yẹkẹẹ, “Kẹwẹ kam kpang ka ẹga ọkịla myịmyị wẹẹ. Ọhẹka, ẹga olugbẹnyị ka há Ohe Oluhye kpụ ọ ka myị ā ka gọlọ jwaa ham ụ-ụwa pyíì.”

²⁸Ọọwa, ịBalakị à kpa ịBalam kele ka uhye nya Ọgbọdọ ịPẹyọ ọlẹ kọ jahị da ka ugbileji[14] lẹlẹ.

²⁹Ụka kị pwụ ụwa, ịBalam byi ịBalakị yẹkẹẹ, “Me ogidi irwiye ham ẹgẹlẹ, ká kpa ịna irwiye bala imilodo irwiye wam mẹ.”

³⁰ỊBalakị họ jaabwọ ká ịBalam ya lẹ, ọ ya ẹna ookpokpo ba omilodo ookpokpo kịla iya u-uhye nya ogidi ọnyọnyọọnyị lẹlẹ.