Read idege ỌWAWA 24 Bible Online

ỌWAWA 24 - idege bible

ỌWAWA 24

¹Ụka ọwẹ, ịBalam jẹ́ kọ ri irya nya Amkpaa nyọka wahị kụrụ ala Isirẹlụ lẹ. Ọ́ tụtụm kpa ụgbẹyị nya ịnwa ọmwụmwụ jaabwọ kọ họ ụka ịkịla ịkẹkpẹ kaka. Ọkọkọ nya ọọwa, ọ jahị kpata da ka ugbileji lẹ,

²Ọ yẹ jaabwọ ká ala Isirẹlụ nọ ẹpwa nyaa imwawụ-imwawụ lẹlẹ. Ọọwa, olegu nya Ohe Oluhye à warị wẹ uhye nyamwụ lẹ,

³ọ yẹ ọmwụ dodehe yẹkẹẹ, “Ọlẹ ri ọmwụ ọlẹ kam̀ ịBalam ọnyị nya ịBẹyọọ yẹ— ọmwụ nyam am ọngọlẹ ká ẹhị rịrịm ẹ-ẹpwụ ẹhị yọyị jogo-jogo.

⁴Am ọngọ kaa wo ẹla bwu ẹga nya Ohe Oluhye, ḿ nọnọ nọ, ahị chị ụwa jogo-jogo, kam kaa yọyị a-arụrụ bwula ẹga nya Ohe Oluhye Agụgụ.

⁵“Anụ anyị nya iJekọbụ kanụ ri ala Isirẹlụ ee, ẹpwang nya ọdụ nyanụ chakpá há ụhị! ẹpwa nyanụ la ihi-ihi lụmẹ!

⁶Ị pyẹ kpanggbaa lala ọgba nya ịmwụ nya ịrị, lala ẹrụ ịlụtọ. Ị lala apwụ ịjwọọjwọọ ịlẹ ká Amkpaa wu lịlọmwụ, bala ekeji isida ịlẹ kị ji ba enyi ba.

⁷Ị ka ye enyi myị ang pwẹẹpwẹẹ, anyị nyaa ka ye ang myị and kọ baba haa. Adịrahụ nyaa ka lụmẹ gụ Agagị, ọpyị adịrahụ nyamwụ ka pyẹ gu onwu gu ọba.

⁸Ohe Oluhye gbaa kpehe bwu Ijipiti, ọ ma uya lala ọtachụ yaa dada. Ịị wu aluji nyaa du ọnụ, be ekpinegu nyaa ene yịgẹ-yịgẹ, cha ịcha kpọ́ngkpọ̀ngkpọ́ng.

⁹Ala Isirẹlụ go kụ ị̀nya lala ugẹbẹ, ọ́ juwa nune nọ, oowo tị́ ka byẹjẹ-ẹ̀ jwoo jwẹẹ myị? Ọng myị ọng kọ wahị ha ala Isirẹlụ aalẹ, ị ka wahị ha ọngọọwa ịnyịnyị. ọng myị ọng kọ tị gọlọ jwaa aalẹ, ị tị̀tị̀ ka gọlọ ju ọngọọwa ịnyịnyị.”

¹⁰Ọọwa, agbama nya ịBalakị à wuru jahị da ịBalam lẹ, ọ da ịBalam ụchụ byoo yẹkẹẹ, “M̀ wụrụng ká ka gọlọ ju aluji nyam, à tị dachichi wahị kụrwaa ugbabwọ ịta-ịta.

¹¹Lẹẹlẹ, rụ ka ẹpwa, ká tụkịnyaa hi ẹhị nyam lẹẹlẹẹ mẹ! Ịnọ, m̀ myị ọnụ nyọka nwụng uri bwọọọ. Amkpaa tị dang uri ọọwa oyeye yi lẹ.”

¹²Ọọwa, ịBalam à byi ịBalakị yẹkẹẹ, “Ḿ ya ẹlẹwẹ deeji je angịlẹ ká du ẹrụ tọm ka-á?

¹³M̀ tị́ byaa lẹẹ ya ó-riri kaahụ ịBalakị á ka hu ẹpwa nyang hu wuu lẹpwụ-lẹpwụ lokpoko onyoowuru bala okpoko ịgọm myọọmyọọ ga ham wẹwẹ, ḿ lọngịrị nyọka kpoye nya ehile nya Amkpaa bwula ọ-họ ang ọlẹ kọ ri irya nya ịlọm koo! M̀ byaa ẹla myị ẹla ká Amkpaa-á byim ọwa m̄ ka ya lẹ.

¹⁴“Ọlẹẹlẹẹ lẹ, m̀ jam rụ chị angịnyị nyam ọgụ lẹ. Ene nya ọọwa tị lẹ, ba kam ya jeng ang ọlẹ ká ala Isirẹlụ ka họ alụma nyang ị-ịlahị mẹ.”

¹⁵Ọọwa, ịBalam à yẹ ọmwụ dodehe yẹkẹẹ, “Ọlẹ ri ọmwụ ọlẹ kam̀ ịBalam ọnyị nya ịBẹyọọ yẹ— ọmwụ nyam am ọngọlẹ ká ẹhị rịrịm ẹ-ẹpwụ ẹhị yọyị jogo-jogo.

¹⁶Ọmwụ nyam am ọngọ kaa wo ẹla bwu ẹga nya Ohe Oluhye, am ká ẹla ọjẹjẹ nyam bwu ẹga nya Agụgụ wuu, kam kaa yọyị a-arụrụ bwu ẹga nya Ohe Oluhye Agụgụ, ḿ nọnọ nọ, ahị nyam chị ụwa jogo-jogo.

¹⁷M̀ yọyị kpoye nya ijata ọlẹ kaka yẹ ẹpwụma nya Isirẹlụ. M̀ yọọ myị̀myịịmyị aamachanyị ọlẹ tị koo, ị-ịlahị lalẹẹ hwẹẹẹ ịnyị. Ẹnẹhẹ wẹ ị-ịlahị ká adịrahụ ka kpehe ụ-ụma nya anyị nya iJekọbụ, Ọ ka wẹ lala ọdọchụ ọ-hụ́ myịrị-myịrị. Adịrahụ ka kpehe lotuma ọpyị nya Isirẹlụ, ọ ka mịla alegbeju nya ala iMowabụ nmoo, bala ọ-kpụ ala ịChẹtị wuu nọnọ bwụjẹ-bwụjẹ.

¹⁸Ị ka kụrụ ala Ẹdọm— ịnọọ, ịwa ala ịSẹyii aluji nya ala Isirẹlụ ịnyị! Ị ta kụrwaa chẹẹchẹẹ, ala Isirẹlụ tị ka la ọkụrụ-kụrụ kịlahị-ịlahị.

¹⁹Alẹpwụma nya Isirẹlụ ka kpa ata táa tudu eji, angị bebe kpá myị ịnọ lẹ, ị ka táā kpilo gbanggbang.”

²⁰Ụka ọọwa, ịBẹlam yẹ ala Amalẹkị ọyị lẹ, ọ yẹ ọmwụ dodehe yẹkẹẹ, “Ịnọ, ala Amalẹkị à tị́ kụ ịlahị nya alẹpwụma ịkịla wuu ẹ-ẹpwụ nya ọngịrị ọlala, ijuju nya ụma ọwẹ tịị̀ wẹẹ ri ayịreji ọtata pyịyọọ.”

²¹ỊBalam yẹ ala ịKayin ọyị ịnyịnyị lẹ, ọ yẹ ọmwụ dodehe yẹkẹẹ, “Ẹga ọlẹ kaanụ ala ịKayin kụ ẹpwa wẹẹ la giri-giri lụmẹ ịnọ, kanụ kpa awụ nyanụ kaka nọ lalẹẹ tenee u-uhye nya ajwọ lẹ.

²²Anụ tị́ jẹ lẹ, anụ ala ịKayin juwa ka ta ayịreji, ụka ká ala Asiriya-á baanụ ụbwọ, wunu nya alagba nyaa.”[15]

²³Ọọwa, ịBẹlam à kpa ọmwụ ọyẹyẹ nyamwụ wẹ ocheju bwula o-ya dodehe yẹkẹẹ, “Chaahoho! Oowo tị́ ka be myị ụka ká Ohe Oluhye-é họ ẹla ọlịịwẹ-ẹ̀?

²⁴Angị be angịnyị ẹpwụ ka ju agbọ nya enyi bwu ịSayịpịrọsị warị. Ị ka kpa ala Asiriya bala ala Ẹbẹẹ ẹkpa ri eji. Ụka ohyẹẹkpẹ ịwa ala ịSayịpịrọsị tị̀tị̀ ka ta ayịreji gbanggbang.”

²⁵Ụka ká ịBalam ya ẹla kpá lẹ, ọ wuleji ẹdịyẹ nyọka rụ tịrẹkpẹ ka ẹpwa nyamwụ lẹ, ịBalakị à tị̀tị̀ rụ nyamwụ lẹlẹ.