Read idege ỌWAWA 25 Bible Online

ỌWAWA 25 - idege bible

ỌWAWA 25

¹Ụka ọlẹ ká ala Isirẹlụ chịkụ ọ-Ọkpọọ nya iChitim, alẹng nyaa juwa ga họ ụya ta anyang nya ala iMowabụ.

²Anyang ịịwa kaa wụrwaa ẹpwa kele ka ọhụhụ nya iya ọkịlaakịla ka ẹga kịị kpụ ojiga nya ala iMowabụ. Ọọwa, ị juwa kaa ri ang bala ọ-kpụ eteji ha ojiga

³ịBaalụ ọla ịPẹyọ lẹlẹ. Agbama nya Amkpaa wuru pwuuu jahị da ala Isirẹlụ ọọ-lajị nya ọọwa.

⁴Ọọwa, Amkpaa-à byi iMosisi yẹkẹẹ, “Wu alegbeju nya ala Isirẹlụ ịlẹ kị kpa angịnyị kụ ịlahị nya uguru ẹla ọwẹ, ka nwaa ị-ịlahị nya Ọdụ nyam u-ugbọdọda ká ọng myị ọng ā yẹ mẹ aalẹ, agbama nyam à ka pwuru hi ala Isirẹlụ lẹlẹ.”

⁵Ọọwa, iMosisi à byi angịleje nya ala Isirẹlụ yẹkẹẹ, “Ọng myị ọng nyanụ ā nwụ ọngọngọhẹ ọlẹ kọ kpụ ẹtẹ-eji ha ojiga ịBaalụ ọla ịPẹyọ mẹ.”

⁶Ụka ọwẹ kpangga, ọlẹng nya ala Isirẹlụ ọhẹ kpa ọnyang nya ala iMidiyan ọhẹ wẹ ẹpwang nyamwụ ịịwẹ jaaa a-ahị nya iMosisi bala aluche wuu. Ụka ọọwa, ala Isirẹlụ wuu godayị ọ-ọnang nya Ọdụ nya Amkpaa juwa jẹ ida.

⁷Ụka ká iFinihasị ọnyị nya Eliyesa ọlẹ kọ ri ọnyị nya Erọn ọngọkiliya yẹ ẹlẹwẹ, ọ wuleji pwụram kpehe rụ hi ẹpwụ nya aluche kaka hu ọkpachị kpa ụ-ụbwọ lẹ,

⁸ọ ba ọla Isirẹlụ bala ọnyang nya ala iMidiyan ọọwa kele ka ẹpwang nya ọdụ lẹ, ọ da ya ọkpachị gwaa bwurwaa ịwa angị imimiiye kpoye-kpoye lẹlẹ. Ụka kọ lịnyị lẹ, ẹdụrụ nya ịdọlọ-dọlọ ọlẹ kọ juwa ta angịnyị ayịreji à kpụba hi ala Isirẹlụ lẹlẹ.

⁹Ẹdụrụ ọọwa tị ka kpụba kpá lẹ, angịnyị angị ụnọ iwo imiiye da angị ụnọ ine (24,000) lẹẹ gbu lẹ

¹⁰Ọọwa, Amkpaa-à byi iMosisi yẹkẹẹ,

¹¹“Yẹ mẹ, iFinihasị tụ ikẹjẹ-awụrụ nyam kịnyaa hi ala Isirẹlụ lẹ. Ọ ju agbama ta angị wẹẹ kpụ ojiga dachichi him am Ohe Oluhye deeji ka jaabwọ kam ju. Ịnyị à du kam ta ala Isirẹlụ wuu ayịreji kaka lẹ.

¹²Lẹẹlẹ, aa byoo mẹ, m̀ jam nwa iro nya okpunyi tọọ ọlẹ kọ ka juwa gbe oyi myị oyi lẹ.

¹³Iro ọọwa ri ọwa bala anyị ịtụma nyamwụ ka ri angịkiliya pyịyọọ lẹ. Ọ ka lịnyị chajị ọ́ yẹ ẹga da ha angị wẹẹ chị ihi nyam ịrị ka, du kọ kpa ọhịnyọhi warị wẹ ala nyọlẹ kọ godayị kpọọ ham Isirẹlụ u-uhye nya ang onyobyi ọlẹ kị họ.”

¹⁴Ẹnyị nya ọlẹng nya ala Isirẹlụ ọlẹ kị nwụ bala ọnyang nya ala iMidiyan ọọwa-à ri iSimri ọnyị nya ịSalu lẹ. Ọ ri olegbeju nya ugbiyegu ọhẹ i-imwawụ nya iSimyọn.

¹⁵Ẹnyị nya ọnyang ri iKosibi ọnyị nya iSuu. ISuu adamwụ ri olegbeju nya ogang ọhẹ i-iMidiyan.

¹⁶Ọọwa, Amkpaa-à byi iMosisi yẹkẹẹ,

¹⁷“Anụ gba mịla ala iMidiyan, kanụ taa ayịreji mẹ.

¹⁸Anụ haa ịnyị chajị nya ang onyobyi ọlẹ kị họnụ bwula ọ-pịrịịnụ ju ị-ịPẹyọ bala ajị nya iKosibi ọnyị ọnyang nya olegbeju nya ala iMidiyan ọlẹ kị nwụ ị-ịPẹyọ lụka nya ẹdụrụ nya ịdọlọ-dọlọ.”