Read idege ỌWAWA 26 Bible Online

ỌWAWA 26 - idege bible

ỌWAWA 26

¹Ụka ọlẹ ká ẹdụrụ nya ịdọlọ-dọlọ myị kpá, Amkpaa byi iMosisi bala Eliyesa ọnyị nya Erọn ọngọkiliya yẹkẹẹ,

²“Anụ kele kanụ wa ala Isirẹlụ wuu ugbiyegu-ugbiyegu nyaa wuu, kanụ da ẹnyị nya ọlẹng ọnyọnyọọnyị ju ẹ-ẹpwụ nya angịlẹ kị gu ẹka pwụ iwo imiiye kele ka uhye kị la gogo ka ẹwụ myị.”

³Ụka ọwẹ, ala Isirẹlụ wuu lẹẹ jẹ kaka chịkụ ụteeji nya ala iMowabụ ba Ihu ịJọdan ba ụ-ụpa ọkịla nya iJeriko. Ọọwa, iMosisi bala Eliyesa ọngọkiliya à ya ẹla taa ụ-ụwa yẹkẹẹ,

⁴“Anụ wa alẹng ịlẹ wuu kị gu ẹka pwụ iwo imiiye kele ka uhye jaabwọ ká Amkpaa da iMosisi ehile ya nyị họ mẹ.” Jaabwọ ká ala Isirẹlụ ịlẹ wuu kị kpehe bwu Ijipiti la à lẹẹ lẹ:

⁵Ogang ịlẹ kị ri nya anyị ịtụma nya iRubẹn ọnyị ọgbahị nya iJekọbụ ri ọgang nya ịHanọkụ bala ịnya ịPalu bala

⁶ịnya iHesirọn bala ịnya ịKami.

⁷Alẹng ịlẹ kị bwu ogang ilimwawụ nya iRubẹn wuu ri angị ụnọ iwo ine da ụnọ ịta da angị ohu irwiye da iwo ịta (43,730).

⁸ỊPalu à adịda nya Eliyabụ lẹ.

⁹Ẹnyị nya anyị nya Eliyabụ ri ịNẹmwẹlụ bala ịDatan bala Abiram. ỊDatan bala Abiram angị imiiye ịwẹ ri alegbeju ịhyẹ ịlẹ ká alụma chụ lụka ọhẹ. Ịwa kpangga-à kọ ju awụlẹ bala alogu nya iKora anyị yahị da iMosisi bala Erọn bwee, ya ẹpẹpẹ ju Amkpaa lẹ.

¹⁰Ụka ọọwa, ọpyị lẹẹ gu ene kpooo yaa mile bala iKora. Lụka ọwẹ ịnyịnyị, Amkpaa lẹẹ du ila kaka ta angị dịre iKora ang ohu imiiye da iwo ịrụ (250) ayịreji. Igu nyaa ri ụbwọ ogbile ụ-ụrụ ha ala Isirẹlụ wuu.

¹¹Ọ tị lịịwẹ la kpá nyàa lẹ, anyị nya iKora ayịdang-ńg gbu kpịlọ ẹnụ ọọwa ka.

¹²Ogang ịlẹ kị ri nya anyị ịtụma nya iSimyọn ri ogang nya ịNẹmwẹlụ bala ịnya ịJamin bala ịnya ịJakin bala

¹³ịnya ịSẹra bala ịnya ịChawulu.

¹⁴Ọtụchawụlẹ nya alẹng i-bwu ogang ilimwawụ nya iSimyọn ịwẹ wuu ri angị ụnọ iwo imiiye da ụnọ imiiye da ohu imiiye (22,200).

¹⁵Ogang ịlẹ kị ri nya anyị ịtụma nya ịGadị ri ogang ịSẹfọn bala ịnya ịHagii bala ịnya iChuni bala

¹⁶ịnya Osini bala ịnya bala

¹⁷ịnya Arọdụ bala ịnya Areli.

¹⁸Ọtụchawụlẹ nya alẹng i-bwu ogang ilimwawụ nya ịGadị wuu ri angị ụnọ iwo ine da angị ohu ịrụ (40,500).

¹⁹Ẹẹrị bala Ọnan kị ri anyị alẹng nya iJuda lẹẹ gbu ọ-ọpyị nya iKenan lẹ.

²⁰Ogang ịlẹ kị ri nya anyị ịtụma nya ịkịla ri ogang nya iChela bala ịnya ịPẹrẹsị bala ịnya ịSẹra.

²¹Anyị ịtụma nya ịPẹrẹsị ịlẹ kị nwa kaka ri ogang nya ịlaa ri iHesirọn bala ịHamulu.

²²Ọtụchawụlẹ nya alẹng i-bwu ogang ilimwawụ nya iJuda wuu ri angị ụnọ iwo irwiye da ụnọ ịrwọnyẹ da angị ohu ịrụ (76,500).

²³Ogang ịlẹ kị ri nya anyị ịtụma nya Isakaa ri ogang nya iTola bala ịnya iPuva bala

²⁴ịnya ịJachubu bala ịnya iChimrọn.

²⁵Ọtụchawụlẹ nya alẹng i-bwu ogang ilimwawụ nya Isakaa wuu ri angị ụnọ iwo ịrwọnyẹ da ụnọ ine da ohu ịta (64,300).

²⁶Ogang ịlẹ kị ri nya anyị ịtụma nya iSebulọn ri ogan nya ịSẹrẹdị bala ịnya Elọn bala ịJaliili.

²⁷Ọtụchụwlẹ nya alẹng i-bwu ogang ilimwawụ nya iSebulọn wuu ri angị ụnọ iwo ịrwọnyẹ da ohu ịrụ (60,500).

²⁸IJosẹfụ à ri adịda ogogo nya alimwawụ nya ịManasẹ bala Ifurem ịlẹ kị ri nya anyị alẹng imiiye nyamwụ lẹ.

²⁹Ogang ịlẹ kị bwu imwawụ nya ịManasẹ ri ogang nya ịMakii bala ịnya iGiliyadị kọọwa ri ọnyị nya ịMakii.

³⁰Anyị ịtụma nya iGiliyadị ịlẹ kị nwa kaka ri ogang nya ịlaa ri Iyẹsẹẹ bala ịHẹlẹkị bala

³¹Asirẹlụ bala iChekem bala

³²iChemida bala ịHẹfẹẹ.

³³ISelofẹhadị ọnyị nya ịHẹfẹẹ-ẹ́ ma anyị alẹng ka. Ẹnyị nya anyị anyang ịlẹ kọ ma ri ịMahala bala iNuwa bala ịHọgịla bala iMilika bala iTiisa.

³⁴Ọtụchawụlẹ nya alẹng i-bwu ogang ilimwawụ nya ịManasẹ wuu ri angị ụnọ iwo ịrụ da ụnọ imiiye da ohu irwiye (52,700).

³⁵Ogang ịlẹ kị ri nya anyị ịtụma nya Ifurem ri ogang nya iChutela bala ịnya ịBẹkẹẹ bala ịnya ịTahan.

³⁶Ọnyị ọtụma nya iChutela ọlẹ kọ nwa kaka ri ogang nya ịlọmwụ ri Eran.

³⁷Ọtụchawụlẹ nya alẹng i-bwu ogang ilimwawụ nya Ifurem wuu ri angị ụnọ iwo ịta da ụnọ imiiye da ohu ịrụ (32,500). Alogang nya ịManasẹ bala ịnya Ifurem ịwẹ wuu à ri anyị ịtụma nya iJosẹfụ lẹ.

³⁸Ogang ịlẹ kị ri nya anyị ịtụma nya iBenjamịn ri ogang nya ịBẹla bala ịnya Achịbẹlụ bala ịnya Ahịram bala

³⁹ịnya iChefufam bala ịnya iHufam.

⁴⁰Anyị ịtụma nya ịBẹla ịlẹ kị nwa kaka ri ogang nya ịlaa ri ogang nya Aridi bala ịnya ịNaaman.

⁴¹Ọtụchawụlẹ nya alẹng i-bwu imwawụ nya iBenjamịn wuu ri angị ụnọ iwo ine da ụnọ ịrụ da angị ohu ịrwọnyẹ (45,600).

⁴²Ogang ịlẹ kị ri nya anyị ịtụma nya ịDan ri ogang i-bwu ẹpwụ nya anyị nya iChuham.

⁴³Ọtụchawụlẹ nya alẹng i-bwu ogang ilimwawụ nya ịDan wuu ri angị ụnọ iwo ịrwọnyẹ da ụnọ ine da ohu ine (64,400).

⁴⁴Ogang ịlẹ kị ri nya anyị ịtụma nya Achẹẹ ri ogang nya Imna bla ịnya Ichivi bala ịnya iBeriya.

⁴⁵Anyị nya iBeriya ịlẹ kị nwa kaka ri ogan nya ịlaa ri ịHẹbẹẹ bala ịMalikiyẹlụ.

⁴⁶Achẹẹ ma ọnyị ọnyang ọhẹ ọlẹ ká ẹnyị nyamwụ ri iSera.

⁴⁷Ọtụchawụlẹ nya alẹng i-bwu ogang ilimwawụ nya Achẹẹ wuu ri angị ụnọ iwo ịrụ da ụnọ ịta da ohu ine (53,400).

⁴⁸Ogang ịlẹ kị ri nya anyị ịtụma nya ịNafụtali ri ogang nya ịJahasiili bala ịnya iGuni bala

⁴⁹ịnya ịJẹsẹẹ bala ịnya iChilẹm.

⁵⁰Ọtụchawụlẹ nya alẹng i-bwu ogang ilimwawụ nya ịNafụtali wuu ri angị ụnọ iwo ine da ụnọ ịrụ da ohu ine (45,400).

⁵¹Ọọwa ri ọtụchawụlẹ nya alẹng ịla Isirẹlụ wuu ri ụnọ ohu ịrwọnyẹ da ụnọ ookpokpo da ohu irwiye da iwo ịta (601,730).

⁵²Ọọwa, Amkpaa-à byi iMosisi yẹkẹẹ,

⁵³“Gu ọpyị ene cheechee gịla imwawụ ịla Isirẹlụ wuu yahị me jaabwọ ká iru ojuju nya ọnyọnyọọnyị la ka ba ẹ-ẹpwụ nya angịnyị ọwawa ọlẹ mẹ.

⁵⁴Ga ọpyị ju ẹpwụ gbamgbam ha imwawụ ọlẹ kọ ri ọtụka, ká ga ochichi meme labwọ ha imwawụ ọlẹ kọ la pyịnyẹng. Imwawụ ọnyọnyọọnyị ka la ọpyị pwoku iru ijuju nya alụwa.

⁵⁵Bwula iwo ọdada ā ka ga ọpyị nya alimwawụ ọnyọnyọọnyị ba ẹnyị ọlẹ kị da ju lụka nya angịnyị ọwawa jẹ lẹ.

⁵⁶Jaabwọ ká alimwawụ ju iru lee ọ-byẹhị ka ba ị ka kpa ga ọpyị nyaa haa lẹ.”

⁵⁷Ogang nya anyị ịtụma nya iLivayị ịlẹ kị wa ri ogang nya ịGẹẹchọn bala ịnya iKohatị bala ịnya iMerarị.

⁵⁸Anyị ịtụma nyaa ịlẹ kị nwa kaka ri ogang nya ịlaa ri iLibini bala iHebirọn bala ịMahali bala iMuchi bala iKora. IKohatị à ri adịda nya Amram

⁵⁹ọlẹ ká ahụ nyamwụ ri iJokebẹdị ọnyị nya iLivayị lẹ. Ị lẹẹ ma iJokebẹdị Ijipiti. Amram bala iJokebẹdị ahụ nyamwụ à ma Erọn bala iMosisi tụ iMiriyam ọnyịnaa ọnyang lẹ.

⁶⁰Ẹnyị nya anyị alẹng angị ine ịlẹ ká Erọn ma ri ịNadabụ bala Abihu bala Eliyesa bala Itamaa.

⁶¹Ma, ịNadabụ bala Abihu lẹẹ gbu ụka kị kpa ila opwoku-ka kịla iya ha Amkpaa.

⁶²Anyị alẹng i-ri ọya ookpokpo lee ọ-gụ ọọwa ịlẹ kị wa bwu imwawụ nya iLivayị wuu la angị ụnọ iwo imiiye da ụnọ ịta (23,000). Ị da ẹnyị nyaa ịwa ju datị hi ala Isirẹlụ ịkịla chajị ị́ gaa ọpyị jaabwọ kị ga angịkịla ka.

⁶³Alogang ịlẹ wuu ká IMosisi bala Eliyesa ọngọkiliya wa ụka kị wa ala Isirẹlụ ụ-ụwa ụteeji nya iMowabụ ba Ihu ịJọdan ba o-ye ọkịla nya iJeriko à wẹ lẹlẹ.

⁶⁴Ọngọngọhẹ lẹpwụ nya angịlẹ ká iMosisi bala Erọn wa u-ugbileji nya ịSayịnayị lụka kị wa angịnyị nya ọgbanyẹ-ẹ́ hi lahị da wẹ ụka nya angịnyị ọwawa ọlụka olẹ kaka.

⁶⁵Ang odudu ri Amkpaa lẹẹ byaa ya angịịwa wuu nyị ka gu u-gbileji. Angị hi kẹnẹ-kẹnẹ à ri ịKalẹbụ ọnyị nya iJefune bala iJochuwa ọnyị nya iNun lẹlẹ.