Read idege ỌWAWA 27 Bible Online

ỌWAWA 27 - idege bible

ỌWAWA 27

¹ISelofehadị ọlẹ kọ ri ọnyị nya ịHẹfẹẹ ọnyị nya iGiliyadị bwu imwawụ nya ịManasẹ. Adamwụ ogogo à ri ịMakii lẹ. Ọ ma anyị anyang angị ịrụ ịlẹ ká ẹnyị nyaa ri ịMahala bala iNuwa bala ịHọgịla bala iMilika bala iTiisa.

²Ẹnẹhẹ lẹ, anyị anyang ịwẹ à kele ka ọnang nya Ọdụ nya Amkpaa kaka tọ iMosisi bala Eliyesa ọngọkiliya bala alegbeju ị-ịlahị nya alụma wuu lẹ, ị yẹkẹẹ,

³“Anụ yẹ mẹ, anụ tị́ jẹ ká adahị gbu lẹẹ u-ugbileji lẹ. Aajị nyori ri ọ ji ẹpwụ nya angị dịrẹ iKora-à du koo. Ajị nya ọ-họ tịpyọ nya ụbwọ nya ịlọmwụ ọwa ịnyị. Ọ́ tị ma ọnyị ọlẹng ọhẹ-lọhẹ

⁴nyọka wo ẹnyị-ehe nyamwụ ka. Lẹẹlẹ, ọọwa du ká ẹnyị nya adahị ka myị ta ayịreji yịra-yịra hi ọpyị nya Isirẹlụ-ụ́? Anụ gahị ọpyị lala anyadamwụ ilogang nyahị ịnyịnyị mẹ-ẹ̀.”

⁵Ọọwa, iMosisi à kpa ẹla nyaa ọwẹ kaka tọ Amkpaa lẹlẹ.

⁶Ọọwa, Amkpaa-à byi iMosisi yẹkẹẹ,

⁷“Anyị anyang nya iSelofehadị ri oku ẹ-ẹpwụ nya ọbịlẹ-bịlẹ nyaa ọwẹ. Gaa ọpyị ọlẹ kọ pwoku kọ ka ri nya adaa jaabwọ kanụ ga ha anyadịda nya adaa alẹng-ǹg wẹ ịnyịnyị mẹ.

⁸Aa byi ala Isirẹlụ mẹ, ó-ri ká ọlẹng-ńg gbu la ọ-ma ọnyị ọlẹng ka aalẹ, ọnyị ọnyang nyamwụ la ka ye ebwo nya ang ọlẹ kọ ka ri nyamwụ lẹ.

⁹Ọ́ tị ri kọ ma ọnyị ọnyang ka aalẹ, anyịnamwụ alẹng à ka la ang-ugu nyamwụ lẹ.

¹⁰Ọ́ tị ri kọ la ọnyịnịna ọlẹng ka aalẹ, anyịna alẹng nya adamwụ à ka la ang ọọwa lẹ.

¹¹Ó-ri ká adamwụ-ụ́ tị la anyịnịna alẹng kpong-kpong ka aalẹ, ọngọhẹ ọlẹ ri ọọnịna ọ-bọọ chii bwu ogang nyamwụ à ka ye ang-ugu nyamwụ la lẹ. Ọwẹ ri ehile ọlẹ ká ala Isirẹlụ wuu ka kpahị ju ehile jaabwọ ká am Amkpaa dang ehile-è wẹ.”

¹²Ẹnẹhẹ lẹ, Amkpaa-à byi iMosisi yẹkẹẹ, “Wule kele ka uhye nya Ịgbọdọ nya Abarim ká chẹhị ka yẹ ọpyị ọlẹ kam wẹẹ ka hu ha ala Isirẹlụ mẹ.

¹³Ụka ká yọọ kpá lẹ, ā ka gbu lala Erọn ọnyịnang lẹlẹ.

¹⁴Ang odudu ri anụ angị imimiiye la egbeju-ọngịrị tụ ọmẹjẹ nyam pyịpyị u-ugbileji nya iSiin. Ụka ká aluche wuu mwẹla ya bam i-iMeriba lẹ, anụ myị ju ihi nya ọngịrị ọtụka nyam ị-ịlahị nyaa ẹ-ẹga nya enyi ka. Ẹga ọọwa ri ẹmwụ-enyi nya iMeriba ọlẹ kọ ji epweji nya ịKadẹchị u-ugbileji nya iSin.”

¹⁵Ọọwa, iMosisi à byi Amkpaa yẹkẹẹ,

¹⁶“Amkpaa Ohe Oluhye ọlẹ kaahụ à ri ọngọ ya ọhịhị ha angịnyị ehe wuu ee, aa chuchuu, ká chụ olegbeju onyeewe ọlẹ kọ ka kpa angịnyị nyang ji ịlahị mẹ.

¹⁷Ọngọọwa ka ri ọngọ ka kpaa kụ ịlahị kaka dẹwụ chajị ká angịnyị nyang-ńg ka chị ị́parịịpà lala ịkpịlọ ị-la ọngọgbaa gbe ka lẹ ka.”

¹⁸Ọọwa, Amkpaa-à byi iMosisi yẹkẹẹ, “Chụ iJochuwa ọnyị nya iNun, ká yụbwọ nyang nịrọọ mẹ. Ọ la kpịra-kpịra o-olegu.

¹⁹Kpọọ ịlahị nya Eliyesa ọngọkiliya bala aluche nya ala Isirẹlụ wuu, ká ya ụkụrwọ jwoo ụ-ụbwọ u-ugbọdọda nyọka ri olegbeju ku ọmwakpa nyang mẹ.

²⁰Aa ya ọngịrị nyang jwoo ụ-ụbwọ chajị ká ala Isirẹlụ wuu ka jwoo ihi.

²¹Ụka kọ tịtọ nyọka jẹ irya nyam am Amkpaa, ọ ka wẹ ẹga nya Eliyesa ọngọkiliya. Ọọwa, Eliyesa-à ka kpa Urim bala iTumim[16] jẹ irya nyam ene kọ ka ya je iJochuwa lẹlẹ. Ịịwẹ iJochuwa bala aluche wuu à ka bwu jẹ ang ọlẹ kị ka họ datị lẹlẹ.”

²²IMosisi họ kpẹẹkpẹẹ jaabwọ ká Amkpaa dọọ ehile. Ọ kpa iJochuwa kaka godayị ị-ịlahị nya Eliyesa ọngọkiliya bala ịlahị nya aluche nya ala Isirẹlụ wuu.

²³Ọọwa, iMosisi à yụbwọ nyamwụ nịrọọ e-egbeju lẹ, ọ yoo dodehe lala olegbeju ku ọmwakpa nya ịlọmwụ jaabwọ ká Amkpaa doo ehile lẹlẹ.