Read idege ỌWAWA 28 Bible Online

ỌWAWA 28 - idege bible

ỌWAWA 28

¹Ụka ọhẹ, Amkpaa byi iMosisi yẹkẹẹ,

²“Aa byi ala Isirẹlụ mẹ, ụka ọnyọnyọọnyị ọlẹ kị hunọ-ọ̀ wẹẹ, anụ ka kịla iya ị-rụ ila opwoku ham. Iya ịwẹ kaa chịm oru kwọkwọ.

³“Ang ịlẹ kanụ ka ya kịla iya ọ-rụ ila ẹnụ myị ẹnụ ri anyị-ịkpịlọ alẹng imiiye i-gu ẹka ookpokpo ịlẹ ká ehe-é họ ka.

⁴Anụ ka ya ọhẹ kịla iya lụtụrụ. Anụ ka ya ọkịla kịla iya lobyi.

⁵Ang ịlẹ kị ka ya kịla iya ta ọkpịlọ ọnyọnyọọnyị jẹ ri okolo ookpokpo nya ọrụ nya ajẹ nya ang-ẹrụ ọlẹ kị ka ya ekpem nya ida nya olivu ọlahịchịng dala.

⁶Ọwẹ à ri iya ọlẹnụ myị ẹnụ ọlẹ kị kịla dọmwụ nyamwụ ọ-Ọgbọdọ nya ịSayịnayị lẹ. Iya ọ-kịla ju ila ham am Amkpaa à wẹ lẹ. Ọ chịm oru kwọkwọ.

⁷Anụ ka ya ere ọlẹ kọ myị eku nya ịgalụwa kịla iya ta ọnyị-ọkpịlọ ọhọhẹ bwula ọ-yọọ hụ ogidi.

⁸Anụ-ụ̀ ya ọnyị-ọkpịlọ oheeye kịla iya lobyi jula iya nya ọrụ nya ajẹ nya ang-ẹrụ bala iya nya ere jaabwọ ká họ lụka nya iya ọlẹ kanụ kịla lụtụrụ mẹ. Iya ọ-kịla ju ila ham à wẹ lẹ. Ọ chịm oru kwọkwọ.

⁹“Ụka kọ pwụ Ẹnụtụrụ Ọhịnyọ lụkụrwọ, anụ ka ya anyị-ịkpịlọ alẹng imiiye i-gu ẹka ookpokpo ịlẹ ká ehe-é họ ka bala okolo imiiye nya ọrụ nya ajẹ nya ang-ẹrụ ọlẹ kị ya ida nya olivu kpịla la nyọka ya kịla iya bala ere kịla iya ham.

¹⁰Iya ọlẹ kpangga ri ọ-ka ba iya ọlẹnụ myị ẹnụ tụ iya nya ere nyamwụ u-uhye.

¹¹“Ẹnụtụrụ ọhọhẹ-họhẹ nya ọya ọnyị myị ọnyị, anụ ka kịla iya ọ-rụ ila ọkịla ham am Amkpaa. Ang ịlẹ kị ka ya kịla iya ọọwa ri agba nya ịna imiiye bala omilodo ookpokpo bala anyị-ịkpịlọ alẹng irwiye i-gu ẹka ookpokpo. Iyo ịwẹ wuu ka ri ịlẹ ká ehe-é họ ka.

¹²Anụ ka ya okolo ịta nya orụ nya ajẹ nya ang-ẹrụ kịla iya jula ẹna ọnyọnyọọnyị, kanụ ka ya okolo imiiye nya ọrụ nya ajẹ nya ang-ẹrụ kịla iya jula omilodo ọnyọnyọọnyị.

¹³Iya nya ajẹ nya ang-ẹrụ ọlẹ kanụ ka ya tọ ọnyị-ọkpịlọ ọnyọnyọọnyị jẹ ri okolo ookpokpo. Iya ị-rụ ila ịlẹ kịị chịm am Amkpaa oru kwọkwọ à wẹ ịwẹ lẹ.

¹⁴Anụ ka kịla iya nya ere jula iya ọnyọnyọọnyị. Ere ọlẹ kọ myị̀ ẹhya nya ịgalụwa ị ka ya kịla iya ba iya nya ẹna ọnyọnyọọnyị lẹ. Eku ba ẹhya nya ịgalụwa nya ere ị ka ya ba iya nya omilodo lẹ. Ọlẹ kị ka ya ba iya nya ọnyị-ọkpịlọ ri eku nya ịgalụwa nya ere. Anụ ka kịla iya ịwẹ ẹnụtụrụ ọhọhẹ nya ọya ọnyị myị ọnyị ẹ-ẹpwụ nya ẹka.

¹⁵Ọ da iya ọlẹnụ myị ẹnụ tụ iya nya ere ọ-tọọ jẹ ọwẹ ri, anụ ka ya oyichi ookpokpo kịla iya ọ-hụ́ ọhọbịrị.

¹⁶“Ẹnụtụrụ iwo kụrụ ine nya ọya ọhọhẹ anụ ka la ọhụhụ nya Ang Oriri Ọchịpwụrụ chajị nyọka chị ihi ju Amkpaa lẹ.

¹⁷Ẹnụtụrụ iwo kụrụ ịrụ ka ri ẹnụ kanụ ka dọmwụ nya ọhụhụ nya Ịkaa Ọmịrịị-mịrị ka. Anụ ka la ọhụhụ ọọwa jịra ụtụrụ irwiye gbẹgbịlẹ. Lụka ọwẹ, ọngọngọhẹ ā kpa ịkaa ọlẹ kị ya ang ọ-mịrị ịkaa ju ka ọnụ koo.

¹⁸Ẹnụtụrụ ọhọhẹ-họhẹ nya ọhụhụ ọwẹ, anụ ka tụguru kanụ ka gbịgba. Anụ ka hịnyọ lụkụrwọ ọhọhọ ẹnẹwẹ.

¹⁹Anụ ka kịla iya ọ-rụ ila ham am Amkpaa. Ang ikiliya ọọwa ri agba nya ịna imiiye bala omilodo ookpokpo bala anyị-ịkpịlọ alẹng irwiye i-gu ẹka ookpokpo. Iyo ịwẹ wuu ka ri ịlẹ ká ehe-é họ ka.

²⁰Anụ ka kịla iya nya ajẹ nya ang-ẹrụ lida nya olivu jwoo jula iya nya iyo ọnyọnyọọnyị jaabwọ kọ pwoku. Okolo ịta nya ọrụ nya ajẹ nya ang-ẹrụ ị ka ya ba iya nya ẹna ọnyọnyọọnyị lẹ. Ị ka ya okolo imiiye ba omilodo ọnyọnyọọnyị.

²¹Ị ka ya okolo ookpokpo nya ọrụ nya ajẹ nya ang-ẹrụ ba ọnyị-ọkpịlọ ọnyọnyọọnyị.

²²Ọ́ ba ọọwẹ ka, anụ ka ya oyichi ookpokpo kịla iya ọ-hụ́ ọhọbịrị chajị nya ọhọhọ nya ọcharị-charị ọlala nya ịlọnụ.

²³Iya ịwẹ wuu ri ọ-da iya ọ-rụ ila ọlẹnụ myị ẹnụ ọlẹ kanụ ka kịla u-uhye.

²⁴Ẹnụ myị ẹnụ jịra ụtụrụ irwiye nya ọhụhụ ọwẹ, ịịwẹ anụ ka bwu kịla iya ị-rụ ila ịlẹ ká oru nyaa kaa chịm am Amkpaa oru kwọkwọ lẹlẹ. Iya ịwẹ wuu ri ọ-dala iya ọlẹnụ myị ẹnụ tụ iya nya ere ọ-tọọ jẹ.

²⁵Anụ-ụ̀ tọ awụlẹ ẹnụtụrụ ọharwiye kanụ gbịgba mẹ. Ānụ họ ụkụrwọ ẹnụ ọọwa kokoo.

²⁶“Ẹnụ nya ọgbanyẹ-ọgbanyẹ nya Ọhụhụ nya Ang-ẹrụ Ọwụwụ ọlẹ kanụ wẹẹ ka kpa ọhaha nya ajẹ nya ang-ẹrụ inyeewe wam am Amkpaa, anụ ka tụguru kanụ ka gbịgba. Anụ họ ụkụrwọ ọhẹ-lọhẹ ẹnẹwẹ koo.

²⁷Anụ ka ya agba nya ịna imiiye bala omilodo ookpokpo bala anyị-ịkpịlọ alẹng irwiye i-gu ẹka ookpokpo kịla iya ochoru kwọkwọ ham ẹnụ ọọwa.

²⁸Anụ ka kịla iya nya ajẹ nya ang-ẹrụ lida nya olivu jwoo jula iya nya iyo ọnyọnyọọnyị jaabwọ kọ pwoku. Okolo ịta nya ọrụ nya ajẹ nya ang-ẹrụ ị ka ya ba iya nya ẹna ọnyọnyọọnyị lẹ. Ị ka ya okolo imiiye ba omilodo ọnyọnyọọnyị.

²⁹Ị ka ya okolo ookpokpo nya ọrụ nya ajẹ nya ang-ẹrụ ba ọnyị-ọkpịlọ ọnyọnyọọnyị.

³⁰Ọ́ ba ọọwẹ ka, anụ ka ya oyichi ookpokpo kịla iya ọ-hụ́ ọhọbịrị chajị nya ọhọhọ nya ọcharị-charị ọlala nya ịlọnụ.

³¹Anụ ka kịla iya ịwẹ wuu tụ iya nya ere ọ-taa jẹ da iya ọ-rụ ila ọlẹnụ myị ẹnụ bala iya nya ajẹ nya ang-ẹrụ ịlẹ kanụ ka kịla u-uhye. Anụ ka jẹ myị̀myị nyori ehe-é họ ọhẹ-lọhẹ nya iyo ikiliya ịwẹ ka.