Read idege ỌWAWA 29 Bible Online

ỌWAWA 29 - idege bible

ỌWAWA 29

¹“Ụka kọ pwụ ẹnụtụrụ ọhọhẹ nya ọya ọharwiye lẹ, anụ tụguru kanụ gbịgba mẹ. Anụ họ ụkụrwọ ẹnẹwẹ kokoo. Ẹnụ ọọwa à ri ẹnụ kanụ ka chị ẹkụrwẹ lẹlẹ.

²Anụ ka kịla iya ọ-rụ ila ọlẹ kọ ka chịm am Amkpaa oru kwọkwọ. Ụgba nya ẹna bala omilodo bala anyị-ịkpịlọ alẹng irwiye i-gu ẹka ookpokpo anụ ka ya kịla iya ọọwa lẹ. Iyo ịwẹ wuu ka ri ịlẹ ká ehe-é họ ka.

³Anụ ka kịla iya nya ajẹ nya ang-ẹrụ lida nya olivu jwoo jula iya nya iyo ọnyọnyọọnyị jaabwọ kọ pwoku. Okolo ịta nya ọrụ nya ajẹ nya ang-ẹrụ ị ka ya ba iya nya ẹna ọnyọnyọọnyị lẹ. Ị ka ya okolo imiiye ba omilodo ọnyọnyọọnyị.

⁴Ị ka ya okolo ookpokpo nya ọrụ nya ajẹ nya ang-ẹrụ ba ọnyị-ọkpịlọ ọnyọnyọọnyị.

⁵Ọ́ ba ọọwẹ ka, anụ ka ya oyichi ookpokpo kịla iya ọ-hụ́ ọhọbịrị chajị nya ọhọhọ nya ọcharị-charị ọlala nya ịlọnụ.

⁶Anụ ka kịla iya ịwẹ wuu da iya ọ-rụ ila ọlẹnụ nya ọgbanyẹ nya ọya myị ọya tụ ịnya ajẹ nya ang-ẹrụ ọ-tọọ jẹ bala iya ọ-rụ ila ọlẹnụ myị ẹnụ tụ ịnya ajẹ nya ang-ẹrụ bala ịnya ere ị-tọọ jẹ u-uhye. Iya ị-rụ ila ịwẹ kanụ-ụ̀ kịla ham am Amkpaa wẹẹ kaa chịm oru kwọkwọ.

⁷“Ahị ọpyẹpyẹ okiriwo nya ọya ọharwiye anụ ka tụguru nyọka gbịgba. Anụ hụ limyi. Ānụ họ ụkụrwọ ọhẹ-lọhẹ ẹnụtụrụ ọọwa ka.

⁸Anụ kpa ụgba ochoru kwọkwọ ham am Amkpaa. Iyo ịwẹ wuu ka ri ịlẹ ká ehe-é họ ka.

⁹Anụ ka kịla iya nya ajẹ nya ang-ẹrụ lida nya olivu jwoo jula iya nya iyo ọnyọnyọọnyị jaabwọ kọ pwoku. Okolo ịta nya ọrụ nya ajẹ nya ang-ẹrụ ị ka ya ba iya nya ẹna ọnyọnyọọnyị lẹ. Ị ka ya okolo imiiye ba omilodo ọnyọnyọọnyị.

¹⁰Ị ka ya okolo ookpokpo nya ọrụ nya ajẹ nya ang-ẹrụ ba ọnyị-ọkpịlọ ọnyọnyọọnyị.

¹¹Ọ́ ba ọọwẹ ka, anụ ka ya oyichi ookpokpo kịla iya ọ-hụ́ ọhọbịrị. Ọwẹ datị hi oyichi ọlẹ kị ya kịla iya ọ-hụ́ ọhọbịrị nya ọ-bịlẹ ọhịnyọhi nya alụma bala iya ọ-rụ ila ọlẹnụ myị ẹnụ tụ iya nya ajẹ nya ang-ẹrụ bala ịnya ere ị-tọọ jẹ.

¹²“Ẹnụtụrụ iwo kụrụ ịrụ nya ọya ọharwiye anụ ka tụguru nyọka gbịgba. Ẹ-ẹpwụ nya ẹnụtụrụ irwiye gbẹgbịlẹ, anụ ka la Ọhụhụ nya Adáa nyọka chị ihi jum am Amkpaa lẹ. Ánụ ka họ ụkụrwọ ọhẹ-lọhẹ lụka ọwẹ ka.

¹³Ẹnụ nya ọgbanyẹ nya ọhụhụ ọwẹ, anụ ka kịla iya ọ-rụ ila ọlẹ kọọ chịm oru kwọkwọ. Ang ikiliya ọọwa ka ri agba nya ịna iwo kụrụ ịta bala imilodo imiiye bala anyị-ịkpịlọ alẹng iwo kụrụ ine i-gu ẹka ookpokpo. Iyo ịwẹ wuu ka ri ịlẹ ká ehe-é họ ka.

¹⁴Anụ ka kịla iya nya ajẹ nya ang-ẹrụ lida nya olivu jwoo jula iya nya iyo ọnyọnyọọnyị jaabwọ kọ pwoku. Okolo ịta nya ọrụ nya ajẹ nya ang-ẹrụ ị ka ya ba iya nya ẹna ọnyọnyọọnyị lẹ. Ị ka ya okolo imiiye ba omilodo ọnyọnyọọnyị.

¹⁵Ị ka ya okolo ookpokpo nya ọrụ nya ajẹ nya ang-ẹrụ ba ọnyị-ọkpịlọ ọnyọnyọọnyị.

¹⁶Ọ́ ba ọọwẹ ka, anụ ka ya oyichi ookpokpo kịla iya ọ-hụ́ ọhọbịrị. Iya ịwẹ wuu ri ọ-da iya ọ-rụ ila ọlẹnụ myị ẹnụ ọlẹ kanụ ka kịla u-uhye tụ iya nya ajẹ nya ang-ẹrụ bala ịnya ere ị-tọọ jẹ.

¹⁷“Ẹnụtụrụ oheeye nya ọhụhụ nya ẹnụtụrụ irwiye ọwẹ, anụ ka ya agba nya ịna iwo kụrụ imiiye bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

¹⁸Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

¹⁹Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

²⁰“Ẹnụtụrụ ọhata nya ọhụhụ ọwẹ, anụ ka ya agba nya ịna iwo kụrụ ookpokpo bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

²¹Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

²²Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

²³“Ẹnụtụrụ ohene nya ọhụhụ ọwẹ, anụ ka ya agba nya ịna iwo chiriri bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

²⁴Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

²⁵Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

²⁶“Ẹnụtụrụ ọharụ nya ọhụhụ ọwẹ, anụ ka ya agba nya ịna ihikichu bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

²⁷Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

²⁸Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

²⁹“Ẹnụtụrụ ọharwọnyẹ nya ọhụhụ ọwẹ, anụ ka ya agba nya ịna ineku bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

³⁰Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

³¹Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

³²“Ẹnụtụrụ ọharwiye nya ọhụhụ ọwẹ, anụ ka ya agba nya ịna irwiye bala imilodo imiiye bala anyị-ịkpịlọ alẹng iwo kụrụ ine kịla iya. Iyo ịwẹ wuu ka ri ịlẹ ká ehe-é họ ka.

³³Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

³⁴Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

³⁵“Ẹnụtụrụ ọhaneku nya ọhụhụ ọwẹ, anụ ka tụguru nyọka gbịgba myịmyị. Ánụ ka họ ụkụrwọ ọhẹ-lọhẹ ẹnẹwẹ kokoo.

³⁶Anụ ka ya ẹna ookpokpo bala omilodo ookpokpo bala anyị-ịkpịlọ alẹng irwiye i-gu ẹka ookpokpo warị kaka kịla iya ọ-rụ ila ochoru kwọkwọ ham. Iyo ịwẹ wuu ka ri ịlẹ ká ehe-é họ ka.

³⁷Anụ ka kịla iya nya ajẹ nya ang-ẹrụ bala ịnya ere tọ iya nya iyo ọnyọnyọọnyị nya ịwẹ jẹ jaabwọ kị hunọ.

³⁸Anụ ka ya oyichi kịla iya ọ-hụ́ ọhọbịrị ịnyịnyị da iya ọlẹnụ myị ẹnụ bala iya nya ajẹ nya ang-ẹrụ bala ịnya ere ịlẹ kịị kịla tọọ jẹ u-uhye.

³⁹“Ịwẹ à ri iya ị-rụ ila bala iya nya ajẹ nya ang-ẹrụ bala iya nya ere bala iya nya ọhọlawụlẹ lụka nya ọhụhụ i-hunọ datị-datị nyanụ ịlẹ kanụ ka kịla lẹlẹ. Iya ịwẹ wuu ri ị-da iya nya ọ-họ iro ịlẹ kanụ nwa jịra bala ịnya ọhaha o-bwu irya nyanụ kpehe u-uhye.”

⁴⁰IMosisi ya ẹla myị ẹla ịwẹ wuu jẹ ala Isirẹlụ kpẹẹkpẹẹ jaabwọ ká Amkpaa dọọ ehile nyị ya.