Read idege ỌWAWA 3 Bible Online

ỌWAWA 3 - idege bible

ỌWAWA 3

¹Ụka ọhẹ, Amkpaa ya ẹla ta iMosisi ọ-Ọgbọdọ nyị ịSayịnayị. Ụka ọọwa, ị da ju jaabwọ ká alugbiyegu nya Erọn bala iMosisi la.

²Erọn ma anyị alẹng angị ine ịlẹ ká ẹnyị nyaa ri ịNadabụ ọlẹ kọ ri ọgbahị nyaa wuu bala Abihu bala Eliyesa bala Itamaa.

³Ị ya ida hwaa, chị ịgọgọ jwaa kị ka họ ụkụrwọ nya angịkiliya.

⁴ỊNadabụ bala Abihu tị gbu ụka kị tụ ila ọ-datị hi ọlẹ ká Amkpaa byaa ju ị-ịlahị nyamwụ u-ugbileji nya ịSayịnayị. Ịwa angị imimiiye-é ma anyị ka lẹ, Eliyesa bala Itamaa-à hi ri angịkịla lụka nya ọhịhị nya Erọn wuu lẹ.

⁵Ọọwa, Amkpaa-à byi iMosisi yẹkẹẹ,

⁶“Kele ká kpa alimwawụ nya iLivayị warị, ká yaa ju Erọn ọngọkiliya ụ-ụbwọ kị ka ri angị dọọ ụbwọ mẹ.

⁷Ịwa-à ka myị ẹrụ ha Erọn bala ala Isirẹlụ, kị ka juwa họ ụkụrwọ ọlẹ kọ baba ọ-Ọdụ nyam am Amkpaa lẹ.

⁸Ị ka kpẹhị rịrị ang-abwọ ịlụwa wuu bala ọ-họ ụkụrwọ ku ọmwakpa nya ala Isirẹlụ.

⁹Aa ya alimwawụ nya iLivayị ju Erọn bala anyị alẹng nyamwụ ụ-ụbwọ chajị kị ka juwa myị ẹrụ haa mẹ.

¹⁰Ya ụkụrwọ nya iya ọkịlaakịla ju Erọn bala anyị nyamwụ ụ-ụbwọ mẹ. Ọngọkịla ọhẹ kọ maga nyọka ju ụkụrwọ ọwẹ taa aalẹ, ị ka nwụ ọngọọwa.”

¹¹Ọọwa, Amkpaa-à byi iMosisi yẹkẹẹ,

¹²“Wo mẹ, m̀ chụ ala iLivayị bwu ẹpwụ nya ala Isirẹlụ wuu ha ịlọm ku ọmwakpa nya anyị alẹng nya ọgbanyẹ nya ala Isirẹlụ bala anyị alẹng nya ọgbanyẹ nya ịmwụ bala ịna nyaa lẹ. Lẹẹlẹ, ala iLivayị ri ịnyam lẹ,

¹³chajị, ụka kam nwụ anyị alẹng nya ọgbanyẹ nya ala Ijipiti, m̄ chị anyị nya ọgbanyẹ nya ala Isirẹlụ tụ́ ịnya iyo ileji nyaa ebwo ha ịlọm lẹ. Ị ri ịnyam. Am à ri Amkpaa lẹ.”

¹⁴Ọọwa, Amkpaa-à ya ẹla ta iMosisi myịmyị u-ugbileji nya ịSayịnayị yẹkẹẹ,

¹⁵“Aa wa anyị alẹng ilimwawụ nya iLivayị jaabwọ kị la ogang-ogang bala ugbiyegu-ugbiyegu nyaa ka ba mẹ. Ọnyị ọlẹng ọnyị myị ọnyị kọ ri ọya ookpokpo myị lee ọ-gụ ọwẹ lẹ, à wọọ mẹ.”

¹⁶Ọọwa, iMosisi à waa jaabwọ ká Amkpaa dọọ ehile lẹlẹ.

¹⁷Ẹnyị nya anyị alẹng ịlẹ ká iLivayị ma ri ịGẹẹchọn bala iKohatị bala iMerarị. Ịwa-à ri adịda igogo nya ogang-ogang nyaa lẹ.

¹⁸Ẹnyị nya anyị nya ịGẹẹchọn ri iLibini bala iChimeyi.

¹⁹Ẹnyị nya anyị ine nya iKohatị ri Amram bala Isaa bala iHebirọn bala Usiyẹlụ. Ịwa-à ri adịda igogo nya ogang-ogang nyaa lẹ.

²⁰Ẹnyị nya anyị imiiye nya iMerarị ri ịMahali bala iMuchi. Ogang ịlẹ kị bwu imwawụ nya iLivayị kị wa ugbiyegu-ugbiyegu à wẹ ịwẹ lẹlẹ.

²¹Anyị ịtụma nya iGẹẹchọn à ri alogang ịlẹ ká iLibini bala iChimeyi anyị alẹng imiiye nyamwụ ma lẹ.

²²Ọtụchawụlẹ nya alẹng i-ri ọya ookpokpo lee ọ-gụ ọọwa ịlẹ kị wa wuu ri angị ụnọ irwiye da angị ohu ịrụ (7,500)

²³Alogang ọwẹ ka kụ ka ọmwẹnụ-obyi nya Ọdụ nya Amkpaa.

²⁴Eliyasafụ ọnyị nya ịLayẹlụ à ri olegbeju nya alogang ịla ịGẹẹchọn ọwẹ lẹ.

²⁵Ụkụrwọ nyaa ri ọ-ka kpẹhị rịrị Ọdụ nya Amkpaa tụ ịpwụ ị-da kụrwọọ ẹ-ẹpwụ bala odehe bala apwụ o-ke ọnang bala

²⁶apwụ ọdagaga ju ọdọda bala ogidi bala iri nyaa. Ịwa-à ri angị ka họ ụkụrwọ ọlẹga nya Ọdụ bala ang-abwọ ịwẹ lẹ.

²⁷Ogang ịlẹ kị ri nya anyị ịtụma nya iKohatị ri Amram bala Isaa bala iHebirọn bala Usiyẹlụ.

²⁸Ọtụchawụlẹ nya alẹng i-ri ọya ookpokpo lee ọ-gụ ọọwa ịlẹ kị wa wuu ri angị ụnọ ineku da angị ohu ịrwọnyẹ (8,600).

²⁹Edii nya Ọdụ nya Amkpaa à ri ẹga kị ya haa kị ka kụ lẹ.

³⁰Elisafan ọnyị nya Usiyẹlụ à ka ri olegbeju nyaa lẹ.

³¹Ụkụrwọ nyaa ịwa ri ọ-ka kpẹhị rịrị Akpa nya Iro bala itebwuru bala ang ọ-ya itinika rịrị bala ogidi bala ang-abwọ datị-datị ị-kpa họ ụkụrwọ ẹ-Ẹga Ọlịgọgọ bala apwụ okeke ọlọnang nya Ẹga Ọlịgọgọ Ọgụgụ. Ịwa-à ka họ ụkụrwọ nya ẹrụ ọmyịmyị ọnyị myị ọnyị ọlẹga nya ang-abwọ ịwẹ wuu lẹ.

³²Olegbeju ọgbahị nya ala iLivayị wuu à ri Eliyesa ọnyị nya Erọn ọngọkiliya lẹ. Ọwa-à ri olegbeju ọgbahị nya ala iLivayị ịlẹ wuu kị kaa họ ụkụrwọ nya ọkpẹhị rịrị Ọdụ nya Amkpaa lẹ.

³³Ogang ịlẹ kị ri nya anyị ịtụma nya iMerarị ri ịMahali bala iMuchi.

³⁴Ọtụchawụlẹ nya alẹng i-ri ọya ookpokpo lee ọ-gụ ọọwa ịlẹ kị wa wuu ri angị ụnọ ịrwọnyẹ da angị ohu imiiye (6,200).

³⁵Oye nya ẹtẹ nya Ọdụ nya Amkpaa alogang ịwẹ à kụ lẹ. ISuriyẹlụ ọnyị nya Abihẹlụ à ri olegbeju nyaa lẹ.

³⁶Ụkụrwọ nya alogang imiiye nya iMerarị ri ọ-ka kpẹhị rịrị ekeji iweji bala ekeji ịhịlabwọ bala igbilo tụ ang-abwọ nyaa ịkịla nya Ọdụ nya Amkpaa.

³⁷Ị ka kpẹhị rịrị ekeji iweji bala ang ị-daa ọ-ọmwụ bala iloo tụ iri nya ọdọda olodehe nya Ọdụ ịnyịnyị.

³⁸IMosisi bala Erọn bala anyị nya Erọn tị lẹ, ịlahị ọlọmwẹnụ-ụtụrụ nya Ọdụ ị ya da haa kị ka kụ lẹ. Ang ọlẹ kịịwa ka họ ri ọ-ka ri olegbeju kpẹhị rịrị ụkụrwọ ịlẹ kịị họ wuu ọ-Ọdụ nya Amkpa ku ọmwakpa nya alụma nya Isirẹlụ. Ọngọkịla ọhẹ-lọhẹ kọ maga nyọka yụbwọ ju ụkụrwọ ọwẹ taa aalẹ, ị ka nwụ ọngọọwa.

³⁹Ọtụchawụlẹ nya alẹng nya ala iLivayị ịlẹ kị ri ọya ookpokpo lee ọ-gụ ọọwa ịlẹ kị wa wuu jaabwọ ká Amkpaa ya ri angị ụnọ iwo imiiye da ụnọ imiiye (22,000).

⁴⁰Ọọwa, Amkpaa-à byi iMosisi yẹkẹẹ, “Ugbẹnyị lẹ, wa anyị alẹng nya ọgbanyẹ nya ala Isirẹlụ ịlẹ kị ri ọya ookpokpo lee ọ-gụ ọọwa ka da ẹnyị nyaa ju kpẹẹkpẹẹ mẹ.

⁴¹Aa ya ala iLivayị wuu ham ku ọmwakpa nya anyị alẹng nya ọgbanyẹ nya ala Isirẹlụ mẹ. Am à ri Amkpaa lẹ. M̀ tị̀tị̀ ye iyo ịlẹji nya ala iLivayị ku ọmwakpa nya anyị alẹng nya ọgbanyẹ nya iyo ileji nya ala Isirẹlụ lẹ.”

⁴²IMosisi wa anyị alẹng nya ọgbanyẹ nya ala Isirẹlụ wuu jaabwọ ká Amkpaa dọọ ehile.

⁴³Ọtụchawụlẹ nya anyị alẹng nya ọgbanyẹ ịlẹ kị ri ọya ookpokpo lee ọ-gụ ọọwa ri angị ụnọ iwo imiiye da ụnọ imiiye da angị ohu imiiye da iwo irwiye kụrụ ịta (22,273).

⁴⁴Ọọwa, Amkpaa-à byi iMosis yẹkẹẹ,

⁴⁵“Aa ya ala iLivayị wuu ham ku ọmwakpa nya anyị alẹng nya ọgbanyẹ nya ala Isirẹlụ, ká ya iyo ileji nya ala iLivayị ham ku ọmwakpa nya anyị alẹng nya ọgbanyẹ nya ala Isirẹlụ ịnyịnyị mẹ. Ala iLivayị ri ịnyam lẹ. Am à ri Amkpaa lẹ.

⁴⁶Ajị nyọlẹ ká anyị alẹng nya ọgbanyẹ nya ala Isirẹlụ ju iru kọnụgo nya ala iLivayị lala angị ohu imiiye da angị iwo irwiye kụrụ ịta (273) lẹ, à ka nyẹ angị nwà hi ịwẹ tịrẹkpẹ.

⁴⁷Okpoko onyoowuru ịrụ ọlẹ kị hunọ ā ka nwụ̀ u-uhye egbeju nya ọngọngọọng lẹ.

⁴⁸Aa ya okpoko ọọwa ha Erọn bala anyị alẹng nyamwụ mẹ.”

⁴⁹Ọọwa, iMosisi à ye okpoko wọnụ nya anyị alẹng nya ọgbanyẹ nya ala Isirẹlụ ịlẹ kị jịra hi ju lẹlẹ.

⁵⁰Ọtụchawụlẹ nyamwụ ri okpoko onyoowuru ụnọ ookpkpo da ohu ịta da iwo ịrwọnyẹ kụrụ ịrụ (1,365) jaabwọ kị hunọ.

⁵¹Ọọwa, ọ ya okpoko ọọwa ha Erọn bala anyị alẹng nyamwụ jaabwọ ká Amkpaa byoo lẹlẹ.