Read idege ỌWAWA 30 Bible Online

ỌWAWA 30 - idege bible

ỌWAWA 30

¹Ụka ọhẹ, iMosisi ya ẹla ta alegbeju nya imwawụ nya ala Isirẹlụ yẹkẹẹ, “Ehile ọlẹ ká Amkpaa da ri,

²ụka ká ọlẹng-ńg nwa iro nyọka ya ịngịhyẹ ha Amkpaa lee nyọka chị ịlọmwụ ịgọ hi ịngịngịhyẹ aalẹ, ọ́ ka pẹhi ẹla ọọwa deeji ka. Ọ ka họ jịra kpẹẹkpẹẹ ang myị ang ọlẹ kọ nwa iro ya ọwa nyị ka họ.

³“Ọhẹka ọyẹẹnọ ọhẹ ọlẹ kọ juwa ẹ-ẹpwa-adamwụ wẹẹ ka nwa iro nyọka ya ịngịhyẹ ha Amkpaa lee nyọka chị ịlọmwụ ịgọ hi ịngịhyẹ myị.

⁴Ó-ri ká adamwụ-ụ́ wo ẹla nya iro ọọwa, kọ tị dọọ otaá ka aalẹ, ọyẹẹnọ ọọwa ka họ jịra kpẹẹkpẹẹ ang myị ọlẹ kọ nwa iro ya ọwa nyị ka họ.

⁵Ma, ọ́ tị ri ká adamwụ-ụ́ myị jwoo ka kpụ kọ dọọ otaá ẹnụ kọ wo ẹla nya iro ọọwa aalẹ, iro ọlẹ kọ nwa wẹ wuu tụbiri lẹ. Ọ́ tụtụm ka họọ jịra kaka. Amkpaa ka hịnyọhi họọ, chajị adamwụ-ụ́ myị ju iro ọọwa ka.

⁶“Ọhẹka ọyẹẹnọ tị ka tọchị-tọchị nwa iro lee ọ-myị ọnụ chụkpala ịịwẹ nyọka chị ịlọmwụ ịgọ hi ịngịhyẹ myị ene kọọ rụ kaka rwọ ọrụ myị.

⁷Ó-ri ká ọrụmwụ-ụ́ wo ẹla nya iro ọọwa, kọ tị dọọ otaá ka aalẹ, ọnyang ọọwa ka họ jịra kpẹẹkpẹẹ ang myị ọlẹ kọ nwa iro ya ọwa nyị ka họ.

⁸Ma, ọ́ tị ri ká ọrụmwụ-ụ́ myị jwoo ka kpụ kọ dọọ otaá ẹnụ kọ wo ẹla nya iro ọọwa aalẹ, iro ọlẹ kọ nwa wẹ wuu tụbiri lẹ. Ọ́ tụtụm ka họọ jịra kaka. Amkpaa ka hịnyọhi họọ.

⁹“Ó-ri ká ahụ-ogu lee ọnyang ọ-pwa ọrụ-ụ́ nwa iro aalẹ, ọ ri opyii kọ ka họ jịra kpẹẹkpẹẹ ang myị ang kọ nwụ iro ya ọwa nyị ka họ.

¹⁰“Ọhẹka ọnyang-ahụ ka nwa iro lee ọ-myị ọnụ ọhẹ ha Amkpaa myị.

¹¹Ó-ri ká ọrụmwụ-ụ́ wo ẹla nya iro ọọwa, kọ tị dọọ otaá ka aalẹ, ọnyang ọọwa ka họ jịra kpẹẹkpẹẹ ang myị ọlẹ kọ nwa iro ya ọwa nyị ka họ.

¹²Ma, ọ́ tị ri ká ọrụmwụ-ụ́ myị jwoo ka kpụ kọ dọọ otaá ẹnụ kọ wo ẹla nya iro ọọwa aalẹ, iro ọlẹ kọ nwa wẹ wuu tụbiri lẹ. Ọ́ tụtụm ka họọ jịra kaka. Amkpaa ka hịnyọhi họọ, ọrụmwụ-ụ́ myị ju iro ọọwa ka.

¹³Ọrụmwụ lọngịrị nyọka ye iro ọọwa myị lee ọ-pwọọ deeji myị.

¹⁴Ọ́ tị ri kọ wo ẹla nya iro ọwẹ kpá kọ ya ẹlẹlẹhẹ ẹnụ ọọwa ka gbee da ka ọkịla aalẹ, ọrụmwụ tị̀ tị̄ myị jwoo lẹ, chajị ọ pwọọ deeji ụka kọ wo ẹlẹwẹ ka. Lẹẹlẹ, ọ ka họ iro ọọwa jịra.

¹⁵Ma, ọ́ tị ri ká ọrụmwụ-ụ́ godayị gbee kpoye nya ẹnụtụrụ nya ọgbanyẹ ọlẹ kọ wo ẹla ọọwa ene kọ ka pwa juwa ku ahụ nyamwụ aalẹ, ọwa-à ka ye akama nya abyị nya ahụ nyamwụ ọwẹ yẹ lẹ.”

¹⁶Ịwẹ à ri ehile ịlẹ ká Amkpaa da ha iMosisi chajị nya iro ịlẹ ká ọnyang-ọnyị ọlẹ kọ juwa ẹ-ẹpwa-adamwụ wẹẹ lee ọnyang-ahụ kaa nwa lẹlẹ.