Read idege ỌWAWA 31 Bible Online

ỌWAWA 31 - idege bible

ỌWAWA 31

²“Kele kanụ yẹ ala iMidiyan akama kwiwa nyọlẹ kị kpa ala Isirẹlụ ju ka ẹpwụ nya ojiga ọkpụkpụ. Ụka kanụ họ ịnyị kpá lẹ, ugo-ọbẹhị nyang à ka nwa ọ-da nọ lala adang anyị lẹlẹ.”

³Ọọwa, iMosisi à byi ala Isirẹlụ yẹkẹẹ, “Anụ ju alẹng nyanụ ịhyẹ agidi nya ẹwụ chajị kị kele ka gu ala iMidiyan ịwẹ ụbwọ kị haa kwiwa ha Amkpaa mẹ.

⁴Alẹng angị ụnọ ookpokpo (1,000) anụ ka du bwu imwawụ ọnyọnyọọnyị nya ala Isirẹlụ ka ẹwụ lẹ.”

⁵Ọọwa, ị chụ alẹng angị ụnọ ookpokpo bwu imwawụ ọnyọnyọọnyị ju lawụlẹ lẹ, ị la angị ụnọ iwo kụrụ imiiye (12,000) nya alẹng ịlẹ kị nwụlanọ nya ẹwụ ọdada lẹlẹ.

⁶IMosisi du angịwẹ wuu kele ka ẹwụ. IFinihasị ọnyị nya Eliyesa ọngọkiliya à kpaa kụ ịlahị lẹ. Ọ kpa ang-abwọ ịlịgọgọ bala ipyike ịlẹ kị ka chị nya ang-ẹjẹẹ ha awụlẹ.

⁷Ị gba mịla ala iMidiyan nmoóó jaabwọ ká Amkpaa da iMosisi ehile. Ị nwụ alẹng nya alụwa wuu gbanggbang.

⁸Datị hi alẹng ịwẹ, ị nwụ Evi bala ịRẹkẹm bala iSuu bala iHuu bala ịRẹba ịdịrịhụ ịrụ nya ala iMidiyan. Ị nwụ ịBẹlam ọnyị nya ịBẹyọọ ịnyịnyị.

⁹Ụka ọọwa, angịdẹwụ nya ala Isirẹlụ wu anyang nya ala iMidiyan bala anjwo ichiche nyaa kpa nyà bwu ẹwụ. Ị wu ịna bala ịmwụ nyaa ịnyịnyị. Ị wụ ang-ụdụ nyaa wuu wụ kpa nyà bala

¹⁰ọ-jụ epweji ịtụka bala ichiche nyaa ila wuu hụrụ.

¹¹Ọọwa, ị tụ ang myị ang ịlẹ kị go bwu ọgbẹwụ guru tụ angịnyị ehe bala iyo ileji wuu lẹ,

¹²ị kpaa wẹ iMosisi bala Eliyesa bala uche nya ala Isirẹlụ wuu ẹ-ẹga kị chịkụ ụteeji nya iMowabụ ba Ihu ịJọdan ba o-oye ọkịla nya iJeriko lẹlẹ.

¹³Ụka ọọwa, iMosisi bala Eliyesa ọngọkiliya bala alegbeju nya ala Isirẹlụ wuu yegiri kpehe bwu ịkampụ nyaa kele nyọka tọ angịdẹwụ.

¹⁴IMosisi tị wụ ẹjẹ ta alegbeju nya angịdẹwụ ịlẹ wuu kị nyà bwu ẹwụ.

¹⁵Ọ taa wo yẹkẹẹ, “Ányị tị́ du kanụ chị anyang da kanụ nwaa kaka mẹ?

¹⁶Ánụ kpịtịya ka-á? Ịwa anyang kpangga-à ri angịlẹ kị ba ọmẹjẹ nya ịBẹlam jẹ lee ugbeene du kị kpa ala Isirẹlụ kaka la egbeju-ọngịrị ta Amkpaa ị-ịPẹyọ lẹ! Ịwa-à ju ọmwụ nya ẹdụrụ nya ịdọlọ-dọlọ ọlẹ kọ jụ angịnyị nya Amkpaa lẹẹ lẹ.

¹⁷Chajị nya ọọwa lẹ, anụ kele kanụ nwụ anyị alẹng ịwẹ wuu, kanụ nwụ ọnyang ọnyị myị ọnyị ọlẹ kọ jẹ ọlẹng lẹ lẹẹlẹẹ mẹ!

¹⁸Anjwo ịyẹẹnọ ị-jẹ ọlẹng ẹnẹnẹhẹ lẹka kẹnẹ-kẹnẹ à ka hi lọhịhị lẹlẹ. Anụ pẹhyaa ịwa ha ịlọnụ mẹ.

¹⁹“Anụ angịlẹ kanụ họ ẹga lee ọ-ya ịnyịrọ gu ogu tị lẹ, anụ ji libyi. Lẹẹlẹ, anụ ka chịkụ odehe nya ịkampụ jịra ẹnụtụrụ irwiye gbẹgbịlẹ. Ẹnụtụrụ ọhata bala ẹnụtụrụ ọharwiye anụ ka hụ́ ịlọnụ bala anyang ịlẹ kanụ wu kpa nyà wẹ charị-charị.

²⁰Anụ ka hụ́ ang ịkụrụ-kụrụ nyanụ bala ang myị ang ịlẹ kị kpa egbii nya ẹmwụ lee okoji họ ịnyịnyị.”

²¹Ọọwa, Eliyesa ọngọkiliya-à byi angịlẹ kị nyà bwu ẹwụ yẹkẹẹ, “Ehile ịlẹ ká Amkpaa da iMosisi ri

²²ang myị ang ọlẹ kị kpa okpoko ịgọm lee okpoko onyoowuru lee oje ọnyọmịla lee oje

²³ụma datị-datị họ ịlẹ kị ka jẹ-ẹ̀ rụ ila ka kẹnẹ-kẹnẹ ị ka kpa chịpwụrụ bwu ẹpwụ nya ila ene kị ka la charị-charị lẹ. Ang myị ang ịkịla wuu lẹ, ị ka da enyi-ịlọ ọ-kpa họ ọhọhọ nya ọcharị-charị hwaa chajị kị ka la charị-charị.

²⁴Ẹnụtụrụ ọharwiye, anụ ka hụ́ ang ịkụrụ-kụrụ. Ọọwa, anụ ka la charị-charị lẹ, anụ ka nyà tịrẹkpẹ wẹ ẹpwụ nya ịkampụ lẹlẹ.”

²⁵Ọọwa, Amkpaa-à byi iMosisi yẹkẹẹ,

²⁶“Ahụ bala Eliyesa bala alegbeju nya imwawụ ọnyọnyọọnyị ā da ang-ẹwụ ịlẹ kị kpa nya wuu tụ angịnyị ehe bala iyo ileji ju kanụ jẹ jaabwọ kị ju iru kaka ba mẹ.

²⁷Anụ ga ang ịwẹ ebwo imiiye kpị̀ra mẹ. Anụ ya ebwo ọhẹ ha angịlẹ kị ka ẹwụ, kanụ ya ebwọ ọkịla ha angị ihihi nya ala Isirẹlụ mẹ.

²⁸Bwu ẹpwụ nya ebwo ọlẹ kọ ri nya angịdẹwụ wẹẹ, ànụ hu ookpokpo ẹ-ẹpwụ nya ohu ịrụ ọnyọnyọọnyị nya alagba ịwẹ bala ịna bala ibyiyó bala ịkpịlọ bala imbiri nọ nyọka ya nyẹ ẹpwa ha Amkpaa.

²⁹Anụ hu ebwo ọwẹ bwu ẹpwụ nya ẹhya ọlẹ kọ ri nyaa-à wẹ ha Eliyesa ọngọkiliya nya ọhaha nya Amkpaa mẹ.

³⁰Bwu ẹpwụ nya ebwo ọlẹ kọ ri nya angị ihihi nya ala Isirẹlụ wẹẹ, ànụ hu ookpokpo ẹ-ẹpwụ nya iwo ịrụ ọnyọnyọọnyị nya alagba ịwẹ bala ịna bala ibyiyó bala ịkpịlọ bala imbiri nọ ịnyịnyị mẹ. Anụ ya ebwo ọọwa ha ala iLivayị ịlẹ kịị wẹẹ kpẹhị rịrị Ọdụ nya Amkpaa mẹ.”

³¹IMosisi bala Eliyesa ọngọkiliya họ kpẹẹkpẹẹ jaabwọ ká Amkpaa daa ehile.

³²Ang-ẹwụ ịlẹ kị hi bwu ẹpwụ nya ang ịlẹ ká angịdẹwụ la nya ịnya ịlaa ri ịkpịlọ ụnọ ohu ịrwọnyẹ da ụnọ iwo irwiye da ụnọ ịrụ (675,000).

³³Ịna hi ụnọ iwo irwiye da ụnọ imiiye (72,000).

³⁴Ibyiyó hi ụnọ iwo ịrwọnyẹ da ụnọ ookpokpo (61,000).

³⁵Anjwo ịyang ị-jẹ ọlẹng ka hi angị ụnọ iwo ịta da ụnọ imiiye (32,000) gbẹgbịlẹ.

³⁶Ẹhya nya ang-ẹwụ ọlẹ kị ga ha angịdẹwụ ri ịkpịlọ ụnọ ohu ịta da ụnọ iwo ịta da ụnọ irwiye da ohu ịrụ (337,500).

³⁷Ịkpịlọ ịlẹ kị ya nyẹ ẹpwa ha Amkpaa bwu ẹpwụ nya ịwẹ la ohu ịrwọnyẹ da iwo irwiye kụrụ ịrụ (675).

³⁸Ịna ịlẹ ká angịdẹwụ la ri ụnọ iwo ịta da ụnọ ịrwọnyẹ (36,000). Ịlẹ kị ya nyẹ ẹpwa ha Amkpaa bwu ẹpwụ nya ịwẹ la iwo irwiye kụrụ imiiye.

³⁹Ibyiyó ịlẹ ká angịdẹwụ la ri ụnọ iwo ịta da ohu ịrụ (30,500). Ịlẹ kị ya nyẹ ẹpwa ha Amkpaa la iwo ịrwọnyẹ kụrụ ookpokpo.

⁴⁰Anjwo ịyang ị-jẹ ọlẹng ka ịlẹ ká angịdẹwụ la ri angị ụnọ iwo kụrụ ịrwọnyẹ (16,000). Angịlẹ kị ya nyẹ ẹpwa ha Amkpaa bwu ẹpwụ nyaa la angị iwo ịta kụrụ imiiye.

⁴¹IMosisi ya ebwo nya ang ịlẹ kị ri ịnya ọhaha ha Amkpaa wuu ha Eliyesa ọngọkiliya jaabwọ ká Amkpaa dọọ ehile lẹlẹ.

⁴²Ẹhya nya ang-ẹwụ ịlẹ kị ri nya ala Isirẹlụ ihihi ká iMosisi chị ebwo hi ịlẹ kị ri nya angịdẹwụ ri

⁴³ịkpịlọ ụnọ ohu ịta da ụnọ iwo ịta da ụnọ irwiye da ohu ịrụ (337,500).

⁴⁴Ịna la ri ụnọ iwo ịta da ụnọ ịrwọnyẹ (36,000).

⁴⁵Ibyiyó la ụnọ iwo ịta da ohu ịrụ (30,500).

⁴⁶Anjwo ịyang ị-jẹ ọlẹng ka la angị ụnọ iwo kụrụ ịrwọnyẹ (16,000).

⁴⁷Bwu ẹpwụ nya ẹhya ọlẹ kọ ri nya ala Isirẹlụ ihihi, iMosisi gba ọngọ ookpokpo-ookpokpo bwu ẹpwụ nya iwo ịrụ ọnyọnyọọnyị nya alagba bala iyo ileji wuu ha ala iLivayị ịlẹ kịị kpẹhị rịrị Ọdụ nya Amkpaa jaabwọ ká Amkpaa da ehile ya nyị họ.

⁴⁸Ọọwa, alegbeju nya angịdẹwụ ịlẹ kị kpa angịdẹwụ kụ ịlahị nya ẹwụ ọọwa-à wẹ ẹga nya iMosisi lẹ,

⁴⁹ị byoo yẹkẹẹ, “Ayịbahị ee, ahị wa angịdẹwụ ịlẹ kahị kpa ka ẹwụ wuu lẹ. Ila-á ba ọngọngọhẹ nyahị kpong-kpong ka.

⁵⁰Lẹẹlẹ, ahị jam kpa ọhaha bwu ẹpwụ nya ang ịlẹ kị kpa okpoko ịgọm họ ịlẹ kahị go wẹ Amkpaa nyọka nwụ uri nya egbeju nya ịlọhị nyọlẹ kọ chẹwụ keehi. Ang ịlẹ kahị kpa warị ri ang ịdaabwọ bala ịmapẹ bala ang igwarụ bala idoomyi bala ịjang.”

⁵¹Ọọwa, iMosisi bala Eliyesa ọngọkiliya-à yẹ ang datị-datị ịwẹ kị họ lokpoko ịgọm bwu ẹga nya alegbeju nya angịdẹwụ ịwẹ lẹlẹ.

⁵²Ọtụchawụlẹ nya okpoko ịgọm ọlẹ kị kpa họ ang ịwẹ wuu ri ụnọ iwo kụrụ ịrwọnyẹ da ohu irwiye da iwo ịrụ (16,750).

⁵³Ọngọngọọng nya angịdẹwụ ịlẹ kị ri alegbeju ka lẹẹ kpa ang-ẹwụ ịlẹ kịịwa go ụ-ụwa ha ịlọmwụ.

⁵⁴IMosisi bala Eliyesa ọngọkiliya ye okpoko ịgọm ịịwa bwu ụbwọ nya alegbeju nya angịdẹwụ lẹ, ị kpa kele ka ẹpwụ nya Ọdụ chajị ká Amkpaa ka chẹwụ ke ala Isirẹlụ kịnyaa kịlahị-ịlahị lẹlẹ.