Read idege ỌWAWA 32 Bible Online

ỌWAWA 32 - idege bible

ỌWAWA 32

¹Ụka ọọwa, alimwawụ nya iRubẹn bala alaimwawụ nya ịGadị la iru nya iyo ileji. Ụka kị yẹ jaabwọ ká ọpyị nya ịJasẹẹ bala ọpyị nya iGiliyadị há pwoku ọ-kpa iyo ri amẹ lụmẹ lẹ,

²ị kele ka ẹga nya iMosisi bala Eliyesa ọngọkiliya bala alegbeju nya ala Isirẹlụ ịkịla kaka byaa yẹkẹẹ,

³“Anụ wụla ẹla ọlẹ yẹ lẹẹ tahị wẹẹ—ịpyị nya Atarotu bala ịnya iDibon bala ịnya ịJasẹẹ bala ịnya iNimra bala ịHẹchịbọn bala ịnya Eleyale bala ịnya iSebam bala ịnya iNebo bala ịnya iBeyọn

⁴ịwẹ ká Amkpaa dahị ụbwọ kahị nu-ù wẹ wuu há ọ-kpa iyo ileji ri amẹ lụmẹ. Ahị tị la iyo ileji ju iru lẹẹ kwẹhụ ka.

⁵Lẹẹlẹ, ó-ri kanụ myị lẹ, anụ ya ịpyị ịwẹ hahị nya ang ọlala nyahị ahị chajị kaahị tụtụm ka kpoye koye ọkịla nya Ihu ịJọdan kaka mẹ.”

⁶Ọọwa, iMosisi yọnụ kpata tọ ala iRubẹn bala ala ịGadị wo yẹkẹẹ, “Ọọwa ri anụ tịtọ kanụ ka go abwọ ju ẹjẹ kụ am̀ ẹ-ẹgẹlẹ ká ala Isirẹlụ aananụ ịkịla ka dẹwụ ohihi ụbwaa-ụbwaa-á?

⁷Ānụ kpụ ala Isirẹlụ ọkịlẹtụ enyi nyọka kpoye kele ka ye ọpyị ọlẹ ká Amkpaa ya haa koo?

⁸Ịịwẹ adanụ igogo anyị à họ ụka kam daa ẹrụ bwu ịKadẹchị-ịbaniya kaka wụla ọpyị yẹ lẹ.

⁹Ụka ọọwa, ị jẹ gbee kị pwụ Ọkpọọ nya Ẹchịkolu kpụ ị wụla ọpyị ọọwa yẹ. Ụka kị tị nyà, ị kpụ ala Isirẹlụ ọkịlẹtụ enyi du Amkpaa ya haa ka.

¹⁰Amkpaa wụ ẹjẹ ọtụka-ọtụka ụka ọọwa du kọ ya ọnụ deeji byaa yẹkẹẹ,

¹¹‘Ọngọngọhẹ nya angị gu ẹka iwo imiiye lee o-gu gụ ọọwa ẹ-ẹpwụ nya angịlẹ kam gba kpehe bwu ọpyị nya Ijipiti-í ka jụ ka ọpyị ọlẹ kam nwa iro nyọka ka ya Ebiraham bala Ayịsiki bala iJekọbụ kaka, chajị angịwẹ-ẹ́ myị ba ẹla nyam jẹ lọkịlẹtụ ookpokpo ka.

¹²Angịlẹ kẹnẹ-kẹnẹ kị ka jụ kele à ri ịKalẹbụ ọnyị nya iJefune ọla iKenisijum bala iJochuwa ọnyị nya iNun lẹlẹ. Ang odudu ri ịwa ụbwaa kem à jum am Amkpaa ihi kpẹẹkpẹẹ lọkịlẹtụ nyaa wuu lẹlẹ.’

¹³Amkpaa wụ ẹjẹ ta ala Isirẹlụ kpụ ọ họ ị ga tụ ugbileji-ugbileji da gbee jịra ẹka iwo ine (40) gbẹgbịlẹ la aloyi ọọwa ịlẹ kị họ ang onyobyi ba Amkpaa wẹ gbu wuu.

¹⁴“Ọọwa, anụ anyị ịtụma nya angị họ ang onyobyi ịwẹ à nwụ̀ ịlọnụ gẹdẹẹ gọdayị rịrị ọ-ọgụ-ẹpẹtẹ nya adanụ anyị-ị̀ wẹ ka le! Anụ jam du Amkpaa kuukuu kọ ka ju agbama ta ala Isirẹlụ gụ olene lẹ-ẹ̄ẹ̄!

¹⁵Ó-ri kaanụ ala iRubẹn bala ala ịGadị á pwa nyọka ba Amkpaa jẹ, Chajị, ó-ri kanụ jahị kpata tịrẹkpẹ hi ọ-ba Amkpaa jẹ lẹ, ọ ka nyẹẹkpẹ da iru nya angịlẹ am̀ u-ugbileji myịmyị. Ayịreji ọtata nya angịlẹ wuu tị ka ji uhye egbeju nyanụ.”

¹⁶Ụka ọọwa lẹ, ị kụ iMosisi kpẹẹ lẹ, ị byoo yẹkẹẹ, “Hi iwe hahị kahị me ẹpwang ịlẹ kahị ka ya iyo ileji nyahị ju, kahị nwụ epweji la egwalọ dagaga jwaa ha ịhụ bala anjwo nyahị mẹ.

¹⁷Anjwo nyahị anyị ka kụ e-epweji ịwẹ ẹga ká alọpyị ịlẹ-ẹ́ ka jẹ-ẹ̀ yaa uyawụ kaka. Ọọwa, āhị ka ju ịlọhị agidi juwa kpa ịlahị nya ẹwa ha ala Isirẹlụ aanahị ịkịla gbee kahị ka kpaa ka pwụ ẹga kịịwa ka kụ lala ẹpwa nya ịlaa lẹlẹ.

¹⁸Áhị ka nyà tịrẹkpẹ wẹ ẹpwa nya ịlọhị ahị kaka gbee ká ala Isirẹlụ ịkịla wuu ka ye ọpyị ọlẹ kị ga ha ọngọngọọng nyaa kpá.

¹⁹Ahị lẹ, áhị tụtụm ka ye ọpyị ọhẹ la nya ịnya ịlọhị ahị ta aanahị o-oye ọlaanyị nya ịJọdan kaka, chajị ahị tị́ la ịnyahị lẹẹ am̀ ọ-ọmwẹnụ-ụtụrụ nya ịJọdan ene-ene lẹ.”

²⁰Ọọwa, iMosisi à byaa yẹkẹẹ, “Anụ à tị́ myị ọnụ nyọka nwụla ịlọnụ nọ nyọka dẹwụ ha Amkpaa wẹ lẹlẹ.

²¹Anụ myị ịnyịnyị angịdẹwụ nyịwa nyị ka kpoye nya Ihu ịJọdan ba ala Isirẹlụ ịkịla jaabwọ ká Amkpaa juwa kpa ịlahị nya ẹwụ gbee kọ ka ku aluji nyahị kpehe hi ọpyị hahị.

²²Anụ myị nyori ụka ká Amkpaa nyị daa ụbwọ ye ọpyị kụ kpá lẹ, ịwa nyaa-à ka nyà tịrẹkpẹ wẹẹ lẹ. Ó-ri kanụ họ ang ịwẹ wuu lẹ aalẹ, anụ họ ọnụ ọmyịmyị nyanụ jịra ẹ-ẹga nya Amkpaa bala ala Isirẹlụ aananụ lẹ. Aalẹ, Amkpaa ka myị ya ọpyị ọlọmwẹnụ-ụtụrụ nya ịJọdan nyị ri nyanụ lẹ.

²³Ma, ó-ri kanụ họ kpẹẹkpẹẹ jaabwọ kanụ ya wẹ ka aalẹ, anụ họ ang onyobyi ba Amkpaa lẹ. Ánụ ka be hi akama nyamwụ ka.

²⁴Anụ nwụ́ epweji ha anjwo nyanụ anyị kanụ chị ajẹ yaa dada, kanụ nwụ́ ẹpwang ha iyo ileji nyanụ kanụ họ jaabwọ kanụ myị ọnụ mẹ.”

²⁵Ọọwa, ala ịGadị bala ala iRubẹn à wẹ iMosisi yẹkẹẹ, “Ayịbahị, anchẹ nyang āhị tị́ ri. Ahị ka họ jaabwọ ká dahị ehile-è wẹ.

²⁶Anjwo bala ịhụ nyahị bala ịmwụ tụ ịna nyahị wuu ka hi jam e-epweji nya iGiliyadị lẹ.

²⁷Ma, angịdẹwụ wuu nwụlanọ nyọka kpoye nya Ihu ịJọdan ká Amkpaa ka kpa ịlahị nya ẹwụ ọdada hahị lẹ. Ahị ka họ jaabwọ ká byihi.”

²⁸Ọọwa, iMosisi à da Eliyesa bala iJochuwa bala alegbeju nya ala Isirẹlụ ịkịla ọna-eji

²⁹yẹkẹẹ, “Ó-ri ká ala ịGadị bala ala iRubẹn anyị-ị́ kpoye nya Ihu ịJọdan kaka dẹwụ ha Amkpaa, kị danụ ụbwọ kpụ kanụ jụ ọpyị ọlụwa ye lẹ aalẹ, anụ-ụ̀ ya ọpyị nya iGiliyadị haa nya ọpyị nyaa lụbwọ-lẹta mẹ.

³⁰Ma, ó-ri ri kị họ ọnụ ọmyịmyị nyaa jịra ị baanụ kpoye nya ịJọdan kaka dẹwụ hanụ ka aalẹ, ọ-ọpyị nya iKenan anụ ka gaa ọpyị lala angịkịla lẹ.”

³¹Ọọwa, ala ịGadị bala ala iRubẹn à wẹ myịmyị yẹkẹẹ, “Ayịbahị ee, ahị anchẹ nyang ka họ jaabwọ ká Amkpaa ya.

³²Ahị ka kpoye nya Ihu ịJọdan kaka dẹwụ ha Amkpaa ọ-ọpyị nya iKenan lẹ. Ọpyị ọlẹ kọ tị ka ri nyahị wẹẹ tị ka ji oye ọlẹ nya ịJọdan.”

³³Ịnyị, iMosisi à ya ọpyị nya iSihọn Adịrahụ nya ala Amọ bala ọpyị nya Ọọgụ Adịrahụ nya ala ịBachan tụ epweji ịtụka ịlụwa bala ịpyị ịdagaga jwaa wuu ha alimwawụ nya ịGadị bala ịnya iRubẹn bala ẹhya nya imwawụ nya ịManasẹ ọnyị nya iJosẹfụ lẹlẹ.

³⁴Alimwawụ nya ịGadị ma epweji ịtụka ịlẹ nwụ́. Epweji ịịwa ri iDibọn bala Atarotu bala Aroyẹẹ bala

³⁵Atirotu-ịchọfan bala ịJasẹẹ bala iJogibeha bala

³⁶ịBẹtị-inimra bala ịBẹtị-ịharan. Ịwẹ ri epweji ịlẹ kị me egwalọ dagaga ju la ẹga ká ịmwụ nyaa ka kụ gbịlẹ-gbịlẹ.

³⁷Epweji ịlẹ ká alimwawụ nya iRubẹn ma nwụ́ ri ịHẹchịbọn bala Eleyale bala iKiriyatayim

³⁸tụ iNebo bala ịBaalụ-ịmeyọn bala iSibima. Ị yẹ ẹnyị nya epweji ịhyẹ ịlẹ kị kụrụ bala ọ-ma nwụ́ da ka ri ẹnyị inyeewe ịlẹ kịịwa ayịdang jwaa.

³⁹Ụka ọọwa, alogang nya ịMakii ọnyị nya ịManasẹ kele ka be alọpyị nya iGiliyadị ẹpwa, kụrwaa chẹẹchẹẹ lẹ, ị ku ala Amọ ịlẹ kị kụ ụwa rụ lẹlẹ.

⁴⁰Ọọwa, iMosisi à ya ọpyị nya iGiliyadị ha alogang nya ịMakii ọnyị nya ịManasẹ lẹ, ị kụ ụ-ụwa lẹlẹ.

⁴¹Ala ịJayii kị ri ogang ọkịla olimwawụ nya ịManasẹ kele ka dẹwụ kụrụ epweji ịkịla lẹ, ị yẹ ẹnyị nyaa da kaka ri ịHavotu-ịjayii[17] lẹlẹ.

⁴²Ụka ọọwa, ọlẹng ọhẹ kị wụrụ iNoba kele dẹwụ kụrụ epweji nya ịKẹnatị bala epweji ịdagaga jwoo lẹ, ọ yẹ ẹnyị nya oye ọwẹ da kaka ri iNoba kọ ri ẹnyị nya ịlọmwụ lẹlẹ.