Read idege ỌWAWA 34 Bible Online

ỌWAWA 34 - idege bible

ỌWAWA 34

¹Ụka ọhẹ, Amkpaa byi iMosisi yẹkẹẹ,

²“Byi ala Isirẹlụ mẹ, ụka kanụ jụ ka ọpyị nya iKenan, oyi nya ọpyị ọlẹ kam wẹẹ ya hanụ ka la jaabwọ kam wẹẹ ka ya jeng.

³Oyi oledii ka jẹ bwu ugbileji nya iSiin tụ oyi nya ọpyị nya Ẹdọm da. Oyi oledii ọwẹ ka dọmwụ bwu oye nya ọmwẹnụ-ụtụrụ nya Ihu Ọlịma-ịma.

⁴Oyi nya ọpyị nyanụ ọwẹ ka yẹgẹmwụ yahị da ka edii koye nya ẹga Ọchịpwụrụ bwu ọla Akịrabim gbee ka kpoye nya iSiin lalaala ka ju ka ịKadẹchị-ịbaniya. Ọ bwu ẹgẹwẹ lẹ, ọ jẹ kele ka ju ka ịHasaa-adaa bwuru ẹgẹwẹ pyóòò kele ka ju ka Asịmọn,

⁵ene kọọ yẹ hyàà yahị da ka ọkpọọ ọla Ijipiti kele kaka ba Ihu nya iMeditareniya.

⁶“Oyi ọlọmwẹnụ-obyi nya ọpyị nyanụ ba Ihu nya iMeditareniya.

⁷“Oyi ọlẹtẹ nyanụ ka dọmwụ bwu Ihu nya iMeditareniya jẹ yahị da ka ọmwẹnụ-ụtụrụ gbee ka pwụ Ọgbọdọ nya ịHọọ.

⁸Ọ ka bwu Ọgbọdọ nya ịHọọ kele ka ju ka ẹga Ọchịpwụrụ bwu ọla ịHamatị. Ọ ka kịnyaa bwu ụwa kele ka ịSẹdadị

⁹lalaala ka pwụ iSifurọn ene kọ jẹ kaka ba ị-ịHasaa-ẹnan.

¹⁰“Oyi ọlọmwẹnụ-ụtụrụ nyanụ ka dịrẹ ọgụ o-bwu ịHasaa-ẹnan kele ka ju ka ịChẹfam.

¹¹Ọọwa, ọ ka jẹ yahị da daa ka iRibila ọlẹ kọ ji ka ọmwẹnụ-ụtụrụ nya Ayin ene kọ ka bwu ẹgẹwẹ tụ ikiti ịlọmwẹnụ-ụtụrụ nya Ihu Ọkịlọlọ nya ịGalili[19] lẹlẹ.

¹²Oyi ọwẹ ka jẹ ka edii tụ Ihu ịJọdan da kele ka ju ka Ihu Ọlịma-ịma. “Jaabwọ ká oyi ọlịkịka ine-ine nya ọpyị nyanụ ka la à wẹ lẹlẹ.”

¹³Ọọwa, iMosisi à byi ala Isirẹlụ yẹkẹẹ, “Ọpyị ọlẹ kanụ ka la lụbwọ-lẹta bwula iwo ọdada à lẹẹ lẹlẹ. Amkpaa da ehile ya nyị ya ọpyị ọlẹ gịla imwawụ ihikichu ba ẹhya mẹ.

¹⁴Imwawụ nya iRubẹn bala imwawụ nya ịGadị bala ẹhya nya imwawụ nya ịManasẹ lẹ, ịwa la ọpyị nyaa ịwa jaabwọ kị la ugbiyegu-ugbiyegu

¹⁵ịkịla ọlọmwẹnụ-ụtụrụ nya Ihu ịJọdan ba iJeriko ba lẹ.”

¹⁶Ọọwa, Amkpaa-à byi iMosisi yẹkẹẹ,

¹⁷“Eliyesa ọngọkiliya bala iJochuwa ọnyị nya iNun à ka ga ọpyị ha ala Isirẹlụ lẹ.

¹⁸Chụ olegbeju ookpokpo bwu imwawụ ọnyọnyọọnyị nyọka da ụbwọ lụkụrwọ nya ọpyị ọgaga ịnyịnyị mẹ.

¹⁹Ẹnyị nya alegbeju i-bwu imwawụ-imwawụ à lẹẹ lẹ: Ị chụ ịKalẹbụ ọnyị nya iJefune bwu imwawụ nya iJuda.

²⁰Ị chụ ịChẹmwẹlụ ọnyị nya Amihudu bwu imwawụ nya iSimyọn.

²¹Ị chụ Elidadị ọnyị nya iKisilọn bwu imwawụ nya iBenjamịn.

²²Ị chụ iBuki ọnyị nya iJogili bwu imwawụ nya ịDan.

²³Bwu ẹpwụ nya anyị ịtụma nya iJosẹfụ, Ị chụ ịHaniyẹlụ ọnyị nya Ẹfọdụ bwu imwawụ nya ịManasẹ

²⁴bala iKemwẹlụ ọnyị nya iChifutan bwu imwawụ nya Ifurem.

²⁵Ị chụ Elisafan ọnyị nya ịPaanakị bwu imwawụ nya iSebulọn.

²⁶Ị chụ ịPalitiyẹlụ ọnyị nya Asan bwu imwawụ nya Isakaa.

²⁷Ị chụ Ahihudu ọnyị nya iChelomi bwu imwawụ nya Achẹẹ.

²⁸Ị chụ iPedahẹlụ ọnyị nya Amihudu bwu imwawụ nya ịNafụtali.”

²⁹Alẹng ịwẹ Amkpaa-à chụ nyọka ga ọpyị ha ala Isirẹlụ ụ-ụwa i-iKenan lẹ.