Read idege ỌWAWA 35 Bible Online

ỌWAWA 35 - idege bible

ỌWAWA 35

¹Ụka ká ala Isirẹlụ chịkụ ụteeji nya iMowabụ ba Ihu ịJọdan ba o-oye ọkịla nya iJeriko, Amkpaa byi iMosisi yẹkẹẹ,

²“Aa byi ala Isirẹlụ mẹ, bwu ẹpwụ nya ịpyị ịlẹ kị la-à wẹ wuu, ị ka ya epweji ịhyẹ tụ ịpyị ị-kpa iyo ri amẹ ịdagaga jwaa ha alimwawụ nya iLivayị ẹga ịlẹ kị ka nọ ẹpwa.

³Epweji ịịwa-à ka ri ẹpwa nyaa lẹ, ịpyị ịdagaga jwaa-à ka ri ẹga kị ka kpa ịna bala ịmwụ bala iyo ileji ịkịla nyaa ri lẹlẹ.

⁴Ịpyị ị-kpa iyo ri amẹ ịlẹ kanụ ka be haa ka ju ẹpwụ hwẹẹ hi ugulọ nya epweji koye ọnyị myị ọnyị lala apatẹ ụnọ ookpokpo da ohu ịrụ.

⁵Ẹpwụ ojuju nya ịpyị ị-kpa iyo ri amẹ ịịwa bwu ẹkpẹ olodehe nya ugulọ nya epweji ka ri apatẹ ụnọ ịta koye nya ọmwẹnụ-ụtụrụ bala apatẹ ụnọ ịta koye nya edii bala apatẹ ụnọ ịta koye nya ọmwẹnụ-obyi bala apatẹ ụnọ ịta koye nya ẹtẹ jịra ịkịka ine wuu chọnụ, ká epweji ka ji ẹpwarịrị nya ọpyị ọọwa.

⁶Epweji ịrwọnyẹ ẹ-ẹpwụ nya epweji ịlẹ kanụ ka ya ha ala iLivayị ka ri epweji nya ịbaa ọkpụkpụ ịlẹ ká ọngọ nwụ ọngịnyị nya ụbwọ-anịya ka rụnyẹ ka kpụ ịbaa. Anụ ka ya epweji iwo ine kụrụ imiiye ịkịla ba ịwẹ haa.

⁷Ọọwa ri ọtụchawụlẹ nya epweji ịlẹ kanụ ka ya ha ala iLivayị tụ ịpyị ị-kpa iyo ri amẹ wuu ka ri epweji iwo ine kụrụ ineku.

⁸Epweji ịlẹ kanụ ka ye bwu imwawụ ọnyọnyọọnyị nya ala Isirẹlụ ịkịla ha ala iLivayị ka ju iru jaabwọ ká ụmụmẹ nya imwawụ la. Imwawụ ịtụka ka pẹhi epweji ju iru gụ imwawụ ichiche.”

⁹Ọọwa, Amkpaa-à byi iMosisi yẹkẹẹ,

¹⁰“Byi ala Isirẹlụ mẹ, ụka kanụ kpoye nya Ihu ịJọdan kanụ jụ kele ka ọpyị nya iKenan kpá,

¹¹anụ ka chụ epweji ịhyẹ ịlẹ kị ka ri epweji nya ịbaa ọkpụkụ chajị ká ọngọ nwụ ọngịnyị nya ụbwọ-anịya ka jẹ-ẹ̀ rụnyẹ kaka kpịbaa ụ-ụwa.

¹²Epweji ịlịnyị ka ri ẹga ịlẹ ká ọngịnyị ka rụnyẹ rụ kaka kpịbaa ọọnịna nya ọngọlẹ kị nwụ ó-ri juwa maga nyọka byi uri nya ọọnamwụ. Ị́ ka nwụ ọngọngọhẹ ọlẹ kị chị ẹla nya ọngịnyị ọnwụnwụ ba la alụma ọ-dịrẹ ẹla ọọwa ene ka lẹ ka.

¹³Epweji ịrwọnyẹ anụ ka chụ lẹ.

¹⁴Epweji ịịwa ka la ịta ọ-ọmwẹnụ-ụtụrụ nya ịJọdan. Ịta ịkịla ka ji ọpyị nya iKenan.

¹⁵Epweji ịwẹ ka juwa ha ala Isirẹlụ tụ angga ịlẹ kị taa. Ọngọngọhẹ kọ nwụ ọngịnyị nya ụbwọ-anịya ka kpa ọhịhị nyamwụ be kaka kpịbaa e-epweji ọhẹ nya ịwẹ myị.

¹⁶“Ma, ó-ri ká ọngịnyị á hu ang oloje-oje mịla ọngọkịla nmoo kọ gbu tụbwọ aalẹ, ọ kwaachụ kụ nwọọ. Ọngọlẹ kọ nwụ ọngịnyị aalẹ, ị ka nwọọ ịnyịnyị.

¹⁷Ọ́ tị ri ẹjwọ ká ọngọhẹ-ẹ́ ya mịla ọngọkịla nmoo kpụ kọ gbụ ọ ju ka eji ọ́-ri ká ẹjwọ ọọwa a mịlọọ kpụ kọ gbu aalẹ, ọngịnyị ọ tọchị-tọchị nwụ-ụ̀ wẹ lẹ. Ị tịtị ka nwọọ ịnyịnyị.

¹⁸Ọ́ tị ri okoji ká ọngọhẹ-ẹ́ hu mịla ọngọkịla kpụ ka ọngọọwa-á gbu aalẹ, ọngịnyị ọ tọchị-tọchị nwụ-ụ̀ wẹ lẹ. Ị ka nwọọ ịnyịnyị.

¹⁹Ọọnịna nya ọngọlẹ kị nwụ-ụ̀ wẹ à ri ọngọ ka kpa ụbwọ nwụ ọngọ mamachịng nwụ ọngọwẹ lẹ. Ụka myị ụka kọ yẹ ọngọ nwụ ọọnamwụ, ọ ka nwọọ ịnyịnyị.

²⁰Ọhẹka ọngọhẹ kpa ẹla nya ọngọkịla ẹ-ẹpwụ ene-ene. Ó-ri ká ọngọọwa-á gu ọngọkịla ọwẹ gbaá mileji ụjụjwọ lee ọ-ya ang da mịlọọ

²¹lẹẹ ọ-mịlọọ ẹwụ ọlam-ọlam ọwẹ kpụ kọ gbu aalẹ, ọ kwachụ kụ nwụ ọngọọwa. Ọọnịna nya ọngọlẹ kị nwụ-ụ̀ wẹ à ri ọngọ ka kpa ụbwọ nwụ ọngọ mamachịng nwụ ọngọwẹ lẹ. Ụka myị ụka kọ yẹ ọngọ nwụ ọọnamwụ, ọ ka nwọọ ịnyịnyị.

²²“Ọhẹka ọngọhẹ ka gu ọngọkịla gbaá mileji lee ọ ya ang da mịlọọ lọmamachịng ka myị

²³lee lọkpahị ju ka ya ẹjwọ da ka nwụ ọngịnyị, kọ tị me irya nyọka họ ịnyị ene ka lee ịwa o-ri aluji nya awụlẹ ka myị.

²⁴Ẹla-á lịịwẹ, alụma ka dịrọọ kị ka chẹkpẹ ju ọngọ nwụ ọngịnyị lọmamachịng ka ọkọkọ nya ọọnịna nya ogu ọlẹ kọ wẹẹ tịtọ nyọka byi uri nya ọnyịnamwụ.

²⁵Alụma ka chẹwụ ke ọngọ nwụ ọngịnyị ọwẹ hi ọọnịna nya ogu. Ị ka yọọ du tịrẹkpẹ ka epweji nya ịbaa ọkpụkpụ ẹga kọ rụnyẹ rụ ka kụ ụ-ụwa gbee pwụ ụka ká olegbeju okiliya ọlụka ọọwa ka gbu.

²⁶“Ọ́-ri ká ọlụbwọ-anịya ọwẹ-ẹ́ kpehe hi epweji ọlẹ kọ rụ kaka kpịbaa

²⁷kpụ ká ọọnịna nya ogu ọlaanyị-ị́ yọọ, ọ ka nwọọ myị. Ó-ri kọ lịnyị, ọọnịna nya ogu ọọwa-á la abyị ka.

²⁸Ọlụbwọ-anịya ọwẹ ka hụ e-epweji nya ịbaa ọkpụkpụ ọwẹ gbee ká olegbeju okiliya ọlụka ọọwa ka gbu. Ụka ká olegbeju okiliya-á gbu kpá lẹ, ọlụbwọ-anịya ọwẹ à ka jẹ-ẹ̀ nyà ka ẹpwa nya ịlọmwụ wẹẹ lẹ.

²⁹“Ehile ịwẹ ri ịlẹ kaanụ tụ anyị ịtụma nyanụ wuu ka kpa pyịyọọ ẹ-ẹga myị ẹga kanụ kụ.

³⁰“Ọng myị ọng ọlẹ kọ nwụ ọngịnyị aalẹ, ị ka nwụ ọngọọwa. Ene nya ọọwa tị lẹ, angịnyị angị imiiye lee ọ-gụ ọọwa ka họ ibeenu, gbe ẹla jwoo kpụ ị-ka jẹ nyori ọ la abyị. Ibeenu ọhọhọ nya ọngọ ookpokpo-ó nwa kpụ ị ka ya eje tù ọngọlẹ kị chị ẹla nya ọngịnyị ọnwụnwụ ba koo.

³¹“Ānụ ye okpoko lee ịngịngịhyẹ nyọka ya nyẹ ọhịhị nya ọngọ nwụ ọngịnyị ọlẹ ka eje nya igu wu koo. Ị ka nwụ ọngọ ọlịnyị pyii lẹ.

³²“Ānụ ye okpoko lee ịngịngịhyẹ wọnụ nya ọngọlẹ kọ be pwụ epweji nya ịbaa ọkpụkpụ lẹ, chajị ká ọngọọwa ka nyà tịrẹkpẹ wẹ ẹpwa nya ịlọmwụ ene nya igu nya olegbeju okiliya ọlụka ọọwa koo.

³³“Ọhọhọ ọlịịwẹ ka kpa ibyi wẹ Anụ chị ọpyị ọlẹ kanụ kụ. Ịwọ nya ọchịchị kaa kpa ibyi wẹ ọpyị. Ụgbẹyị ọhẹ-ẹ́ tị ị ka họ ọpyị ka la charị-charị kaka kẹnẹ-kẹnẹ ọ-ka nwụ ọngọ nwụ ọngịnyị ọọwa mẹ ịnyị.

³⁴Ānụ kpa ibyi wẹ ọpyị ọlẹ kanụ kụ-ụ̀ wẹ ka, chajị am Amkpaa ayịdang kụ ẹpwarịrị nyanụ anụ ala Isirẹlụ.”