Read idege ỌWAWA 36 Bible Online

ỌWAWA 36 - idege bible

ỌWAWA 36

¹Ẹnẹhẹ, alegbeju nya ugbiyegu ilogang nya iGiliyadị ọnyị nya ịMakii ọlẹ kọ ri ọnyị ọtụma nya ịManasẹ ọnyị nya iJosẹfụ kele ka ẹga nya iMosisi bala alegbeju nya ala Isirẹlụ ịkịla lẹ,

²ị byaa yẹkẹẹ, “Ayịbahị, à tị́ kpịtịya ká Amkpaa dang ehile nyọka ga ịpyị ha ala Isirẹlụ bwu iwo ọdada wẹẹ. Ụka ọọwa, ọ dang ahụ ayịbam ehile ịnyịnyị ya ahụ nyị ya ọpyị ọlẹ kịị nyị ka ri nya iSelofẹhadị ọnyịnahị ọlẹng ha anyị anyang nyamwụ.

³Ó-ri kị lẹẹ rwọ ọrụ i-imwawụ ịkịla nya ala Isirẹlụ ịnọ, ọpyị ọlẹ kị gaa ka yẹ kpáta ri nya alimwawụ nya ọrwaa lẹ. Ọlịnyị du ká ọpyị ọlẹ kọ ka ri nya imwawụ nyahị ka gbile hi.

⁴Ó-ri kọ pwụ Ẹka Ọtịrị Ang Ẹkpẹ wẹwẹ, ọpyị nya anyị nya iSelofẹhadị-ị́ ka jẹ-ẹ̀ nyà tịrẹkpẹ wẹ imwawụ nyahị kaka, ọ ka ri nya imwawụ nya ọrwaa anyị pyịyọọ lẹ. Ahị à ka kụ abwabwọ lẹlẹ.”

⁵Ọọwa, iMosisi à ya je ala Isirẹlụ ẹla ọlẹ ká Amkpaa ya yẹkẹẹ, “Ẹlẹwẹ ká alimwawụ nya iManasẹ ya wẹ la kpakpa.

⁶Ẹhile ọlẹ ká Amkpaa da chajị nya anyị anyang nya iSelofẹhadị ri ị ka rụrwọ ọng myị ọng ọlẹ kọ haa myị. Angịịwa tị ka bwu imwawụ-imwawụ nyaa.

⁷Ọpyị ọlẹ ká ọngọngọhẹ nya ala Isirẹlụ la nya ang-ugu ri nya alimwawụ nyamwụ pyịyọọ. Imwawụ ọhẹ-ẹ́ ka ye ọpyị nya imwawụ ọkịla la nya ang ọlala nyaa lụbwọ-lẹta ka.

⁸Ọnyang ọnyị myị ọnyị kọ ri ugu nya ọpyị ẹ-ẹpwụ nya ala Isirẹlụ aalẹ, ọ ka rụrwọ ọlẹng ọlẹ kọ ri olimwawụ nyamwụ. Ụgbẹyị ọlịịwẹ ala Isirẹlụ wuu à ka kpa la ang-ugu hi ta awụlẹ bwu adịda ogogo ju ka anyị ịtụma ịnyịnyịịnyị lẹ.

⁹Ọpyị nya imwawụ ọhẹ-ẹ́ ka hi pwụ imwawụ ọkịla nyọka lọọ nya ang-ugu ka. Imwawụ ọnyị myị ọnyị ka kpa ọpyị nyamwụ ụ-ụwa nya ang ọlala nyamwụ pyịyọọ.”

¹⁰Ọọwa, anyị anyang nya iSelofẹhadị à họ jaabwọ ká Amkpaa da iMosis ehile lẹlẹ.

¹¹ỊMahala bala iTiisa bala ịHọgịla bala iMilika bala iNuwa anyị anyang angị ịrụ ịwẹ wuu rụrwọ anyị nya anyịnịna nya adaa.

¹²Ị rụrwọ alogang-ogang ilimwawụ nya ịManasẹ ọnyị nya iJosẹfụ. Ọọwa. ọpyị ọlẹ kị gaa-à ri nya imwawụ nya adaa anyị lẹlẹ.

¹³Ịwẹ à ri ehile bala ọmẹjẹ ịlẹ ká Amkpaa ya ha ala Isirẹlụ bwula iMosisi ụteeji nya iMowabụ ba Ihu ịJọdan ba koye ọkịla nya iJeriko lẹlẹ.