Read idege ỌWAWA 5 Bible Online

ỌWAWA 5 - idege bible

ỌWAWA 5

¹Ụka ọhẹ, Amkpaa byi iMosisi yẹkẹẹ,

²“Da ala Isirẹlụ ehile kị ka ku angịnyị ịlịịlẹ kpehe hi ịkampụ nyanụ mẹ. Angịịwa ri ọngọngọhẹ ọlẹ ká ẹdụrụ olugba nya ịnyịrọ-ọ́ jụ lee enyi nya ịnyịrọ nyamwụ-ụ́ juwa nyà lee ọngọlẹ kọ ya ịlọmwụ ju ibyi bwula ọ-yụbwọ gu ogu.

³Ọngọọwa-á ri ọlẹng ri lee ọnyang, anụ ka kwoo kpehe chajị kọ ka kpa ibyi wẹ ẹpwụ nya ịkampụ ẹga kam kụ bala anụ wẹ kaka mẹ.”

⁴Ọọwa, ala Isirẹlụ à ju ihi nya ẹlẹwẹ lẹ, ị ku angịịwa wuu rụ hi ịkampụ nyaa lẹlẹ. Jaabwọ ká Amkpaa byi iMosisi nyị họ, ịnyịnyị kpangga ala Isirẹlụ à họ lẹ.

⁵Ụka ọhẹ, Amkpaa byi iMosisi yẹkẹẹ,

⁶“Aa ya ọmẹjẹ ịlẹ je ala Isirẹlụ mẹ. Ó-ri ká ọngọhẹ-ẹ́ họ ang ọtịpyọ ẹ-ẹga nya ọngịnyị ehe ọkịla aalẹ, ẹga nyam am Amkpaa ọ-họ ẹla opwoku-ka ọọwa lẹ. Ọ la abyị.

⁷Ọ ka ya ang onyobyi ọlẹ kọ họ dodehe. Ọ ka nwụ uri nya ang ọlẹ kọ họ-ọ̀ wẹ chọnụ-chọnụ, kọ ka ya ebwo ookpokpo ẹ-ẹpwụ nya ịrụ hajwoo ha ọngọlẹ kọ họ ẹla ọtịpyọ ba.

⁸Ma, ọ́ tị ri ká ọngọọwa-á gbu kọ tị la ọnyịnịna lee ọngọhẹ ọ-bọọ chii ọlẹ kị nwụ uri ha kaka aalẹ, ọ ka nwụ uri ha Amkpaa kọ ka ri nya ọngọkiliya. Uri ọnwụnwụ ọwẹ ri ọ-dala omilodo ọlẹ ká ọngọkiliya ya kịla iya nya ọcharị-charị nya ọngọ la abyị.

⁹Ọhaha ịlịgọgọ ịlẹ wuu ká ala Isirẹlụ kpa warị wam ri nya ọngọkiliya ọlẹ kọ wẹẹ kpa ụbwọ ye ọhaha ịịwa.

¹⁰Ọngịnyị à la ang nya ịlọmwụ ịlẹ kọ chị ịgọ ju lẹ. Ọnyị myị ọnyị nyaa kọ tị ya ha ọngọkiliya lẹ aalẹ, ịịwa ri nya ọngọkiliya ọọwa lẹ.”

¹¹Ụka ọọwa, Amkpaa byi iMosisi yẹkẹẹ,

¹²“Byi ala Isirẹlụ mẹ, ọchịkpẹẹ ahụ nya ọngịnyị-ị́ ka juwa hu ahị rịrị u-uhye yẹkpẹ kpụ ọrụmwụ

¹³ka juwa ri igu ta ọlẹng ọkịla la ọngọngọhẹ o-woo itinabwọ ẹ-ẹpwụ nya ụya ọhọhọ ka myị.

¹⁴Lee ọrụ ọnyang ọọwa tị ka yẹ ijiiji nya ahụmwụ ịịwẹ juwa chọọ ẹla la ahụ nyamwụ ọ-jẹdịyẹ nya ụya kpong-kpong ka myị.

¹⁵Ẹla-á la ịịwẹ aalẹ, ọlẹng ọọwa ka kpa ahụ nyamwụ kele ka ẹga nya ọngọkiliya. Ọ ka kpa ọhaha ọlẹ kị hunọ ọlẹ kọ ri okolo ookpokpo nya ọrụ nya ịbali. Ọ́ ka ya ida nya olivu jwoo lee ọ-ya ịtangare nịrọọ ka, chajị iya ọwẹ bwu ẹga nya ọrwahụ ọ-chị ahụ nyamwụ ẹla. Ọ ri iya nyọka jẹ ẹla nya ịlẹhị ẹ-ẹpwụ nya ẹlẹwẹ ịnyị.

¹⁶“Ọngọkiliya ka kpa ọnyang ọọwa kaka godayị ị-ịlahị nya ogidi okiliya.

¹⁷Ọngọkiliya ka ya enyi ọlịgọgọ ju ẹja-ọpyị. Ọ ka chụ ọrụ nya ịpyị bwu oye-eji nya Ọdụ Ọlịgọgọ kọ ka ya kpịla lenyi ọọwa, chajị kọ ka la ujujwo.

¹⁸Ụka ká ọngọkiliya-á kpa ọnyang ọwẹ wẹ ịlahị nya ogidi kpá, ọ ka yi inyi nyamwụ, kọ ka ya iya nya ọrụ nya ang ọlẹ kọ ri iya ọ-gba ẹla nya ịlẹhị dodehe jwoo ụ-ụbwọ. Ọngọkiliya ka godayị ị-ịlahị nyamwụ lenyi olujujwo ọlẹ kọọ kpa inyiribyi kịla angị họ ang onyobyi.

¹⁹Ụka ọọwa, ọngọkiliya ka yọnụ deeji la ọlọ-ehe lẹ, ọ ka byi ọnyang ọọwa nyị nwa iro myị ju ọnụ odeeji ọọwa lẹlẹ. Ọngọkiliya ka yọnụ deeji la ọlọ-ehe yẹkẹẹ, ‘Ó-ri ká ọlẹng ọhẹ-lọhẹ á họ ụya tang ka, ká tị hu ahị rịrị u-uhye yẹkpẹ kpụ ọrụng nyọlẹ ká lẹẹ ẹ-ẹpwa nyamwụ kpong-kpong ka aalẹ, inyiribyi ọlẹpwụ nya enyi ọlẹ-ẹ́ ka họng ịngịngịhyẹ ka.

²⁰Ma, ọ́ tị ri ka rá hụ am̀ ẹ-ẹpwa nya ọrụng jam kpa ụya họ kwẹkwẹẹkwẹ aalẹ,

²¹Amkpaa-ā họ kị tụ ẹnyị nyang ịmyị-ọnụ ẹ-ẹpwụ nya alịnyanụ bwula ọ-tụng ori-ụma pịrị bala ọ-mịrịng ẹpwụ[1].

²²Enyi nya inyiribyi ọlẹ ā ka ẹpwụ nyang kọ mịrịng ẹpwụ bala ọ-họ ká ori-ụma nyang ā tụ pịrị.’ “Ọọwa, ọnyang a ka wẹ yẹkẹẹ, ‘Ee kọ la ịịwẹ ịwẹ mẹ.’ “Ọọwa, ọnyang ọwẹ à ka myị yẹkẹẹ, ‘Ee, Amkpaa-ā họm ịnyị mẹ.’

²³“Ụka ọọwa, ọngọkiliya ka da ọlọ-ehe ọwẹ ju ụ-ụpwụ lẹ, ọ ka chị enyi há ọlọ ọọwa ju ka ẹpwụ nya enyi olujujwo ọwẹ lẹlẹ.

²⁴Ene ká ọngọkiliya ka ya enyi olujujwo ọwẹ ha ọnyang ọọwa nwa, chajị kọ ka hu akama họọ ó-ri kọ la abyị,

²⁵ọ ka ye ọhaha nya iya nya ijiiji ọwẹ bwu ụbwọ nya ọnyang ọọwa lẹ, ọ ka nyoo kile-kile ha Amkpaa ẹ-ẹga nya ogidi.

²⁶Ọọwa, ọngọkiliya-à ka chụ ọrụ nya ajẹ nya ang-ẹrụ ịwẹ myị ẹpwụtụbwọ nya ọnụ-odo lẹ, ọ ka jwọọ ila u-uhye nya ogidi wọnụ nya ohihi ju lẹlẹ. Ụka kọ họ kpá lẹ, ọ ka ya enyi ọọwa ha ọnyang ọwẹ nwa lẹlẹ.

²⁷Ó-ri ká ọnyang ọwẹ-ẹ́ họ ụya ịnyịlẹhị, enyi ọwẹ ka kpa ọjụjụ wọọ. Ọ ka mịrị ẹpwụ lala uba. Ọ ka du ká ori-ụma nyamwụ ka tụpịrị ịnyịnyị.

²⁸Ọ́ tị ri ká ọnyang ọwẹ-ẹ́ da ẹlẹlẹhẹ ka aalẹ, ịngịngịhyẹ-ẹ́ ka họọ ka. Ọ ka ma anyị myị wẹẹ.

²⁹“Ọwẹ à ri ehile ọ-kpa ru ẹla ori ụka ká ahụ-ụ́ kpa ịlọmwụ kaka ju ibyi bwula ọ-họ ụya lẹlẹ.

³⁰Ọ́ tị ri ká olegu nya ijiiji-í myị ju ọlẹng ẹ-ẹpwụ kọ me irya ahụ nyọwa nyị ka juwa họ ụya yẹkpẹ kpụ ọwa aalẹ, ọ ka kpa ahụ nyamwụ kele ka ịlahị nya ogidi i-ijata nya Amkpaa, ká ọngọkiliya ka ba ọhọhọ nya ehile ọlẹ jẹ.

³¹Ẹla ọ-chịba nya ọrụ-ahụ ọwẹ u-uhye nya ahụ nyamwụ-ụ́ lala kpakpa ka aalẹ, ị́ ka yọọ akama ọhẹ tù ọọwa ka. Ọ́ tị ri ká ahụ nyamwụ-ụ́ la abyị aalẹ, ahụ nyamwụ ka yẹ akama chajị nya ọọwa pyii lẹ.”