Read idege ỌWAWA 6 Bible Online

ỌWAWA 6 - idege bible

ỌWAWA 6

¹Ụka ọhẹ, Amkpaa ya ẹla ta iMosisi yẹkẹẹ,

²“Ya ẹla ta ala Isirẹlụ ka byaa mẹ, ụka ká ọlẹng lee ọnyang á myị ọnụ kọ ka ri ịnasịrayịtị[2] ọ-chị ịlọmwụ ịgọgọ ha Amkpaa aalẹ,

³ọngọọwa ka chị ebwo hi ere ọnwanwa. Ọ́ ka nwa ere ọ-chagbịlangịrị ọhẹ-lọhẹ ọlẹ kị kpa alakọnụ họ ka. Ọ́ tị ka nẹ alakọnụ lee o-ri ịkama nyaa ka ịnyịnyị.

⁴Jaabwọ myị abwọ ká ọngọọwa-á ri ịnasịrayịtị tata kaka ba, ọ́ ka ri lee ọ-nwa ịngịngịhyẹ ọlẹ kị kpa alakọnụ họ ka. Ó-ri ajẹ ri lee ego nya alakọnụ kị kpa họ ang ọọwa lẹ aalẹ, ọ́ ka kpa ka ọnụ nyamwụ kaka.

⁵“Lụka ọlẹ wuu kọ ji ẹpwụ ehile nya ịnasịrayịtị ọkpakpa, ị́ ka kpa iju ọ-pwọ inyi ka egbeju nyamwụ ka. Ọ ka ba ká inyi nyamwụ ka nwa ludiyo pyọlọ-pyọlọ gbee ká ụka ohunọ nya ehile nya ịnasịrayịtị oriri nyamwụ ka cheju.

⁶Lụka ọwẹ wuu ịnyịnyị, ọ́ ka tụ ka ẹga nya ogu kpong-kpong ka.

⁷Ó-ri adamwụ lee ịnamwụ lee ọnyịnamwụ ọlẹng lee ọnyịnamwụ ọnyang kọ gbu wẹwẹ, ọ́ ka ya ịlọmwụ ju ibyi bwula ọ-tụ ju ogu nyaa chwẹẹ ka. Inyi ọkpakpa ọwẹ à ri ang-ẹjẹẹ nyori ọ hu ịlọmwụ ham am Ohe Oluhye lẹ.

⁸Jaabwọ myị abwọ kọ ri ịnasịrayịtị tata ka ba, ọ juwa ẹ-ẹpwụ ịlọmwụ o-hu ham Amkpaa lẹ.

⁹“Ó-ri ká inyi nya ịnasịrayịtị-ị́ ju ibyi chajị nyori ọngịnyị gbu kpịlagada chahị jwoo lọmwaaa aalẹ, ọ ka hụ ẹnụtụrụ irwiye gbẹgbịlẹ lẹ, ọ ka pwọ inyi nyamwụ lẹlẹ. Ọọwa, ọ ka la charị-charị myịmyị lẹlẹ.

¹⁰Ẹnụtụrụ ọhaneku ọ ka kpa enewulo imiiye lee ikiripete imiiye kele kịla ọngọkiliya ọ-ọnang nya Ọdụ Ọlịgọgọ.

¹¹Ụka ọọwa, ọngọkiliya ka hu ọchịnụ ọhẹ kịla iya ọ-hụ́ ọhọbịrị, ọ ka ya ọkịla kịla iya ọ-rụ ila. Ịịwẹ ọngọkiliya-à ka bwu họ ká ịnasịrayịtị ọọwa ka la charị-charị bwu ẹpwụ nya ibyi ọlẹ kọ la bwu ẹga nya ogu lẹlẹ. Ẹnẹwẹ-ẹnẹwẹ, ọ ka chị iro nya ịnasịrayịtị oriri nyamwụ ahị lẹ, ọ ka ba hi inyi nyamwụ kị ka nwa lẹlẹ.

¹²Ụka ọkẹkpẹ ọlẹ wuu kọ kpa ịlọmwụ nya ịnasịrayịtị-ị́ ri kaka, chajị ibyi ọwẹ tụ ọọwa biri lẹ. Ọ ka ma iro nwa onyeewe bala o-hu ịlọmwụ chị ịgọgọ ju ha Amkpaa gbee jịra ụ-ụka ọlẹ kọ myị ọnụ nyọka ri ịnasịrayịtị. Ọ ka kpa ọkpịlọ o-gu ẹka ookpokpo warị kị ka ya kịla iya ọ-wụ́ abyị.

¹³“Ụka ká ọngọ ri ịnasịrayịtị-ị́ họ ụka ọlẹ kọ myị ọnụ cheju kpá, ịịlẹ à ka ri ọhọhọ ọlụka ọọwa lẹ. Ọ ka kele ka ọnang nya Ọdụ nya Amkpaa

¹⁴kọ ka hu iya nyamwụ ha Amkpaa. Iya ọọwa ri ọkpịlọ ọlẹng o-gu ẹka ookpokpo ọlẹ kị ka ya kịla iya ọ-rụ ila bala ọkpịlọ ọnyang o-gu ẹka ookpokpo ọlẹ kị ka ya kịla iya ọ-hụ́ ọhọbịrị bala omilodo ọlẹ kị ka ya kịla iya nya ọhọlawụlẹ. Iyo ịtịta ịwẹ ka ri ịlẹ ká ehe-é họ kpong-kpong ka.

¹⁵Ang ịkịla ịlẹpwụ nya iya ọwẹ ri udo nya ịkaa ịlẹ kị ya ang ọ-mịrị ịkaa ju-ka. Ịhyẹ nya ịkaa ịịwa ka ri abẹ nya ịlẹ kị ya ida nya olivu ju bala ịkama ịlẹ kị gu ida nya olivu wụ́. Ọ ka kpa ọhaha nya ajẹ nya ang-ẹrụ tụ́ ere ịlẹ kị hunọ baa warị ịnyịnyị.

¹⁶“Ọngọkiliya ka hu ọhaha ịwẹ wuu ha Amkpaa lẹ, ọ ka kịla iya ọ-hụ́ ọhọbịrị bala ịya ọ-rụ ila

¹⁷ene kọ ka ya omilodo kịla iya nya ọhọlawụlẹ bala ọ-hu udo nya ịkaa ha ba iya ọwẹ lẹlẹ. Ọ ka ya ajẹ nya ang-ẹrụ bala ere ịlẹ kị hunọ ha ọhaha ịnyịnyị.

¹⁸“Ụka kị họ ọwẹ kpá lẹ, ịnasịrayịtị ọọwa-à ka pwọ inyi ụ-ụwa ọ-ọnang nya Ọdụ nya Amkpaa lẹ, ọ ka go inyi ịịwa kpa kaka ju ka ẹpwụ nya ila ọlẹ kị wẹẹ jụ iya nya ọhọlawụlẹ lẹlẹ.

¹⁹“Ụka kị kpụ́ ụmwụchwọ nya omilodo kpá, ọngọkiliya ka hwoo bala ẹbẹ nya ịkaa ọmịrịị-mịrị-ka ọhẹ bala ịkama ọmịrịị-mịrị-ka bwu ẹpwụ nya udo lẹ, ọ ka ya ang ịwẹ wuu ju ịnasịrayịrịtị ọọwa ẹ-ẹpwụtụbwọ lẹlẹ.

²⁰Ụka ọọwa, ọngọkiliya ka hu ọhaha ịwẹ hwaa kọ ka nyaa kile-kile ị-ịlahị nya Amkpaa. Ang ịlịgọgọ ịwẹ ri nya ọngọkiliya tụ́ ẹmẹ ọlẹ kị nyi kile-kile bala ugbẹta ọlẹ kị ya ha. Ị́ họ ịnyị kpá lẹ aalẹ, ịnasịrayịtị ọọwa lọngịrị nyọka nwa ere myị lẹ.

²¹“Ọwẹ à ri ehile chajị nya ịnasịrayịtị oriri lẹlẹ. Ọ́ tị ri ká ịnasịrayịtị ọhẹ-ẹ́ myị ọnụ nya ọhaha ọhẹ ọlẹ kọ kọnugo nyọlẹ ká ehile hunọ họọ aalẹ, ọ ri opyii kọ ka họ ọnụ ọmyịmyị ọọwa jịra jaabwọ kọ ya ọnụ deeji ka ba.”

²²Ọọwa, Amkpaa-à byi iMosisi yẹkẹẹ,

²³“Byi Erọn bala anyị nyamwụ mẹ, ụka kị ka wahị kụrụ ala Isirẹlụ, ị ka ya ọnụ nọ kpa wahị ịịlẹ,

²⁴“ ‘Amkpaa-ā wahị kụrụụnụ kọ gbenu mẹ.

²⁵Amkpaa-ā yẹnụ lẹhị nya ahyẹẹrwẹrwa, kọ họnụ ọnahị.

²⁶Amkpaa-ā họ ang ọnyịịla hanụ, kọ ya okpunyi hanụ mẹ.’ ”

²⁷Ọọwa Amkpaa a yẹkẹẹ, “Ó-ri kị gu ẹnyị nyam juwa kpa wahị kụrụ ala Isirẹlụ ịịwẹ lẹ aalẹ, m̄ ka wahị kụrwaa lẹlẹ.”