Read idege ỌWAWA 8 Bible Online

ỌWAWA 8 - idege bible

ỌWAWA 8

¹Ụka ọhẹ, Amkpaa byi iMosisi yẹkẹẹ,

²“Aa byi Erọn mẹ, ụkọ kọ ka ya itinika irwiye ịwẹ rịrị a-ang ọ-ya rịrị nyaa, ọ ka ya rịrị ụgbẹyị ọlẹ ká ahịgboo nyaa ka hụ́ ka ịlahị.”

³Erọn họ jaabwọ ká Amkpaa ya. Ọ ya itinika rịrị la ahịgboo nyaa juwa hụ́ ka ịlahị nya ang ọ-ya rịrị nyaa.

⁴Ị kpa okpoko ịgọm ọlẹ kị hyà yẹẹyẹẹ kem họ ang ọ-ya itinika rịrị ọọwa bwu ọmwụ nyamwụ lalaala ju ka egbeju inmenmeenme nyamwụ iluhye. Jaabwọ ká Amkpaa chị abwọ nya ọhọhọ nyamwụ ya ye iMosisi kpangga ị họọ lẹ.

⁵Ọọwa, Amkpaa-à byi iMosisi yẹkẹẹ,

⁶“Chị ala iLivayị ịgọ hi ala Isirẹlụ ịkịla ká họ kị la charị-charị mẹ.

⁷Jaabwọ ká ka bwu họ ọọwa ri à ka nyí enyi-ịlọ ọ-kpa họ ọhọhọ nya ọcharị-charị ọlala hwaa. Byaa kị pwọ ịlaa inyi myị ịnyịrọ-ịnyịrọ wuu bala ọ-hụ́ ang ịkụrụ-kụrụ nyaa. Ọọwa, ị ka la charị-charị lẹlẹ.

⁸Ị ka kpa ụgba nya ẹna bala ọrụ nya ajẹ nya ang-ẹrụ ọlẹ kị hunọ lida nya olivu jwoo. Ị ka kpa ụgba nya ẹna ọkịla warị nyọka ya kịla iya ọ-hụ́ ọhọbịrị.

⁹Wụrụ ala Isirẹlụ kaka tụguru, ká kpa ala Ilivayị kaka godayị ọ-ọnụ nya Ọdụ nyam mẹ.

¹⁰Ụka ká kpa ala Ilivayị warị ịnyị lẹ, ala Isirẹlụ ā yụbwọ nịraa e-egbeju mẹ,

¹¹ká Erọn ā gyaa jum ụ-ụbwọ lala ọhaha ọdatị-datị ọlẹ ká ala Isirẹlụ ya ham am Amkpaa mẹ. Ọwẹ à ri o-hu ala iLivayị ha kị ka họ ụkụrwọ nyam lẹlẹ.

¹²“Ụka kanụ họ ọwẹ kpá, ala iLivayị ka yabwọ nịrọ agba nya ịna ịwẹ e-egbeju kị ka ya ham am Amkpaa. Ọhẹ nya ịna ịwẹ ka ri nya iya ọ-hụ́ ọhọbịrị, ọkịla ka ri nya iya ọ-rụ ila nyọka họ ọhọhọ nya ọcharị-charị ọlala nya ala ILivayị.

¹³Byi ala iLivayị kị godayị ị-ịlahị nya Erọn bala anyị alẹng nyamwụ, ká gyaa ịwa ala iLivayị ham nya iya ọdatị-datị mẹ.

¹⁴Ịịwẹ ā ka bwu chị ala iLivayị ịgọ hi ala Isirẹlụ ịkịla lẹ, ịwa ala iLivayị à ka ri angịnyị nyam lẹlẹ.

¹⁵Ụka ká da ịlọ hụ́ ala iLivayị kị la charị-charị bala o-gyaa jum ụ-ụbwọ lẹ, ị ka jẹ-ẹ̀ họ ụkụrwọ ẹ-ẹpwụ nya Ọdụ nyam wẹẹ lẹ.

¹⁶Ịwa ala iLivayị à ri angịlẹ kam ye la lụbwọ-lẹta bwu ẹpwụ nya ala Isirẹlụ ịkịla wuu lẹ. Ị ri ịnyam ku ọmwakpa nya anyị alẹng nya ọgbahị nya ala Isirẹlụ lẹ.

¹⁷Anụ tị́ jẹ lẹ, ọnyị ọlẹng nya ọgbahị nya ala Isirẹlụ wuu tụ ịnya iyo ileji ri ịnyam. M̀ chaa ebwo ha ịlọm ụka kam nwụ anyị alẹng ịgbahị nya ala Ijipiti lẹẹ ugbeene.

¹⁸M̀ jam ye ala iLivayị la ku ọmwakpa nya anyị alẹng nya ọgbanyẹ nya ala Isirẹlụ lẹ.

¹⁹M̀ tị yaa ha Erọn bala anyị alẹng nyamwụ lala ang-ahị o-bwu ẹga nya ala Isirẹlụ chajị kị ka họ ụkụrwọ ẹ-ẹpwụ nya Ọdụ nyam wọnụ nya ala Isirẹlụ ju. Ịwa-à ka ke ala Isirẹlụ hi akama ọlẹ kị ka yẹ ó-ri kị jẹ tụ ju Ẹga Ọlịgọgọ chwẹẹ lụmẹ lẹlẹ.”

²⁰Ọọwa, iMosisi bala Erọn bala ala Isirẹlụ wuu à chị ịgọgọ ju ala iLivayị jaabwọ ká Amkpaa da iMosisi ehile lẹlẹ.

²¹Ala iLivayị nyí enyi-ịlọ hụ ịlaa bala ọ-hụ́ ang ịkụrụ-kụrụ nyaa cheri-cheri. Erọn hwaa ha Amkpaa lala ọhaha ọdatị-datị. Ọọwa, ọ kịla iya nya ọcharị-charị ọlala nya ala iLivayị ịnyịnyị lẹlẹ.

²²Aa Isirẹlụ họ ang myị ang ịlẹ ká Amkpaa ya nyị họ ẹ-ẹga nya ala iLivayị. Bwu ụka ọọwa kịlahị lẹ, ala iLivayị à dọmwụ nyọka họ ụkụrwọ nyaa ẹ-ẹpwụ nya Ọdụ nya Amkpaa juwa ba ọmẹjẹ nya Erọn bala anyị alẹng nyamwụ jẹ lẹlẹ.

²³Ụka ọọwa, Amkpaa byi iMosis yẹkẹẹ,

²⁴“Ehile ọlẹ ká ọla iLivayị ọnyị myị ọnyị ka ba jẹ ri ọng myị ọng nyaa ka dọmwụ nyọka họ ụkụrwọ ẹ-ẹpwụ nya Ọdụ nyam bwu ụka kị gu ẹka iwo imiiye kụrụ ịrụ.

²⁵Ụka kị tị gu ẹka iwo ịrụ lẹ aalẹ, ị ka hịnyọ lụkụrwọ ọhọhọ lẹlẹ.

²⁶Ụka kị hịnyọ lụkụrwọ kpá, ị ka juwa da ala iLivayị aanaa ịkịla ụbwọ lụkụrwọ nya eji ogbegbe ọ-Ọdụ nyam myị, ị́ tị ka họ ụkụrwọ ọkpọnchị ọhẹ nya ịnya ịla kaka. Jaabwọ ká ka bwu yẹ ụkụrwọ nya ala iLivayị abwọ à wẹ lẹlẹ.”