Read idege ỌWAWA 9 Bible Online

ỌWAWA 9 - idege bible

ỌWAWA 9

¹Ụka ọhẹ ẹ-ẹpwụ nya ọya ọhọhẹ nya ẹka oheeye nyọlẹ ká ala Isirẹlụ kpehe bwu ọpyị nya Ijipiti kpá, Amkpaa ya ẹla ta iMosisi u-Ugbileji nya ịSayịnaị yẹkẹẹ,

²“Aa byi ala Isirẹlụ kị la ọhụhụ nya Ang Oriri Ọchịpwụrụ ụka ọlẹ kị hwoo nọ mẹ.

³Lụka nya ewu-obyi nya ẹnụtụrụ iwo kụrụ ine nya ọya ọlẹ ị ka lọọ jaabwọ ká ehile bala ọmẹjẹ nya ọhụhụ ọwẹ wuu la lẹ.”

⁴Ọọwa, iMosisi à byi ala Isirẹlụ kị ka la ọhụhụ nya Ang Oriri Ọchịpwụrụ lẹ,

⁵ị lọọ lewu-obyi nya ẹnụtụrụ iwo kụrụ ine nya ọya ọhọhẹ u-Ugbileji nya ịSayịnayị lẹlẹ. Jaabwọ ká Amkpaa byi iMosisi nyị họ, ịnyịnyị kpangga ala Isirẹlụ à họ lẹ.

⁶Angịhyẹ nyaa tị juwa kị ri Ang Oriri Ọchịpwụrụ myị ẹnẹwẹ ka, chajị ị ya ịnyịrọ gu ogu lẹ, ị ji libyi. Angịịwa wẹ ẹga nya iMosisi bala Erọn lẹ,

⁷ị byaa yẹkẹẹ, “Ịnyịlẹhị lẹ, áhị la charị-charị koo ọọ-lajị nyọlẹ kahị ya ịnyịrọ kịla ogu. Ọ́ tị chịla kị ka dahị yi la ọ-kpa ọhaha kịla Amkpaa ta ala Isirẹlụ ịkịla ụka ọlẹ kị hunọ ka.”

⁸Ọọwa, iMosisi à byaa yẹkẹẹ, “M̀ wo ẹla nyanụ lẹ. Anụ tị godayị ẹgẹlẹ wẹẹ ká Amkpaa-ā mẹjẹm jaabwọ kam ka họ ẹla nyanụ ọwẹ ene mẹ.”

⁹Ọọwa, Amkpaa-à byi iMosisi yẹkẹẹ,

¹⁰“Byi ala Isirẹlụ mẹ, ụka ká angịhyẹ nyanụ lee anyị ịtụma nyanụ-ụ́ ji libyi lụka nya Ang Oriri Ọchịpwụrụ chajị nyori ị ya ịnyịro gu ogu lee ó-ri kị kanyị du kị ji ẹpwa lụka ọọwa ka aalẹ, angịịwa ka jẹ-ẹ̀ la ọhụhụ nya Ang Oriri Ọchịpwụrụ myị wẹ́ẹ̀.

¹¹Ị ka la ịnyaa ịwa lewu-obyi nya ẹnụtụrụ iwo kụrụ ine nya ọya ọ-ba ọọwa ba ọlẹ kọ ri ọya oheeye. Ịkaa ọmịrịị-mịra ka bala apwụ ilejwejwo ị ka kpa ryoo lẹ.

¹²Ụpịlẹ nya ang oriri ọwẹ ọhẹ-lọhẹ-ẹ́ ka hi da ka alụtụrụ nya ahị ọpyẹpyẹ ọọnamwụ ka, ị́ tị ka be ukpunogu nya iyo ọọwa ene ka ịnyịnyị. Ị ka ri Ang Oriri Ọchịpwụ ọwẹ ba ehile nyamwụ jẹ kpẹẹkpẹẹ.

¹³Ọ́ tị ri ká ọngọlẹ kọ la charị-charị, kọ kanyị ka-á ri Ang Oriri Ọchịpwụrụ ọwẹ ka aalẹ, ị ka be ọngọọwa deeji hi ẹpwụ nya angịnyị nyam. Ang odudu ri ọ́ myị kpa ọhaha nyam am Amkpaa warị wam ụka kị hunọ ka. Olo nya akama nya ọhọhọ nyamwụ ọwẹ tị juwa u-uhye nya egbeju nya ịlọmwụ kem.

¹⁴“Ọngga ọhẹ-lọhẹ ọlẹ kọ kụ tụnụ kọ tịtọ nyọka ri Ang Oriri Ọchịpwụrụ nyam am Amkpaa aalẹ, ọngọọwa ka ba ehile nya ọhụhụ ọwẹ wuu jẹ kpẹẹkpẹẹ. Ehile nya ọhụhụ ọwẹ wuu gu ọng myị ọng, ó-ri ọngga ri lee ọnyị ọlọpyị wẹwẹ.”

¹⁵Ẹnụ ọlẹ kị ya Ọdụ nya Amkpaa yeji kpangga, Egbamwụ ọhẹ warị kaka kpụ koo u-uhye. Bwu alobyi gbee da ka alụtụrụ egbamwụ oluhye nya Ọdụ ọwẹ ka lala ila.

¹⁶Ịịwẹ ọ la kịnyaa kịlahị lẹ. Alodu, egbamwụ ọọwa kaa yẹ la abwụma nya ila.

¹⁷Ụka myị ụka ká egbamwụ ọọwa-á hu hwaa juwa rụ hi Ọdụ, ala Isirẹlụ wuleji tọọ da. Ụka kọ tị godayị, ala Isirẹlụ tị̀tị̀ chịkụ ịnyịnyị.

¹⁸Ịịwẹ ịị bwu kịnyaa lẹdịyẹ nyaa ụka ká Amkpaa-á byaa nyị yegiri bala ọ-chịkụ ụka ká Amkpaa-á byaa nyị kpụba lẹlẹ. Jaabwọ myị abwọ ká egbamwụ-ụ́ godayị u-uhye nya Ọdụ tata ka ba, ị kaa hụ ụwa ẹ-ẹga kị chịkụ.

¹⁹Ó-ri ká egbamwụ-ụ́ godayị ụ-ụwa lụka ọtata, ala Isirẹlụ ju ihi nya Amkpaa, ịị wuleji ẹdịyẹ ka ịnyịnyị.

²⁰Ụka ọhẹ, egbamwụ kaa godayị u-uhye nya Ọdụ nya Amkpaa ẹnụtụrụ ịmanyị-ịmanyị kem. Ụka ọlịnyị, ị kaa chịkụ ẹnụtụrụ ịmanyị-ịmanyị. Ụka ká Amkpaa-á tị daa ehile lẹ, ị kaa wuleji ẹdịyẹ lẹlẹ.

²¹Ụka ọkịla, egbamwụ kaa godayị bwu alobyi da ka alụtụrụ nya ahị ọpyẹpyẹ ọọnamwụ kem. Ụka kọ yegiri lụtụrụ, ị tị̀tị̀ wuleji ẹdịyẹ ịnyịnyị. Ụka myị ụka ká egbamwụ-ụ́ gu gbaáá hi Ọdụ lodu lee lẹnụ, ụka ọọwa ala Isirẹlụ à kaa wuleji ẹdịyẹ lẹ.

²²Ó-ri ẹnụtụrụ imiiye lee ọya lee ẹka lee ọ-gụ ọwẹ ká egbamwụ-ụ́ godayị u-uhye nya Ọdụ nya Amkpaa, ala Isirẹlụ-ụ́ kaa wuleji ẹdịyẹ lụka ọọwa ka. Ụka kọ tị gu gbaáá nya ọrụrụ hi ụwa lẹ, ị kaa yegiri ịnyịnyị lẹlẹ.

²³Lẹẹlẹ, ị ba ehile nya Amkpaa ịlẹ kọ da iMosisị jẹ juwa kaa chịkụ lee ọ-kịnyaa lẹdịyẹ nyaa jaabwọ kọ byaa.