Read idege ỊMAYỊKA 2 Bible Online

ỊMAYỊKA 2 - idege bible

ỊMAYỊKA 2

¹Ị ri enyi gu obyi lẹ! Ịwa angị kaa me obyi onyobyi, juwa nọ une me irya nya ang onyobyi ọhọhọ, kịị họ ang ọtịpyọ ọọwa ụka ká ahị pyẹ, chajị ị la ọngịrị ọ-kpa họ ịnyị myị.

²Ị ma ẹrụ nya angịnyị ma, naa lagbụrụ, ó-ri ẹpwa ri, ị ye la, ị tụ ayịdẹpwa la alẹpwa-alẹpwa nyamwụ pyịpyị, tụ ọngịnyị ọọnaa bala ang ọlala nyamwụ ịnyịnyị.

³Lẹẹlẹ, Amkpaa yẹkẹẹ, “M jam me obyi nya akama ọ-ka yẹnụ yẹ lẹ, ánụ tị ka be hi akama ọọwa myị ka. Ánụ ka jẹ-ẹ jẹdịyẹ ọbọọchẹ-ọbọọchẹ kaka, chajị ụka ọọwa ka ri ụka nya ájụjụ ọtụka.

⁴Ụka ká ụka ọọwa-á pwụ, angịnyị ka mwu eje nya ẹrwa kpanụ họ, juwa bida bala o-jida yẹkẹẹ, Àhị ta ayịreji gbanggbang lẹ̀, Amkpaa nyẹ ọpyị nyahị ugọyị ha angịkịla lẹ. Ọ ka myị-ị jẹ jum chwẹẹ wẹẹ wẹẹ-ẹ́? Ọ ka myị-ị tịrị ịpyị ịlẹ kọ go gà ahị ẹkpẹ wẹẹ-ẹ́?”

⁵Ụka ọọwa ọngọngọhẹ-ẹ́ ka me ọpyị ori jẹẹrịị la lẹpwụ nyanụ anụ angịnyị nya Amkpaa ka.

⁶Ị byim yẹkẹẹ, “A yẹ ọmwụ kaka. A yẹhị ọmwụ ọlịịwẹ ka; Oyoyi-í ka ri ịnyahị ka.

⁷Ị ka jẹ-ẹ ya ẹla ọlịịwẹ rụ ala Isirẹlụ-ụ́? Amkpaa ju agbama kpoye lẹ-ẹ́? Ọ ka myị-ị họ ịịwẹ-ẹ́? Ọ tị́ ya ẹla ọlọnụ nya ọọwa nyị ri ahị ọwawa, ha angị la kpẹẹkpẹẹ.”

⁸Ịnịyẹ, anụ angịnyị nyam wuleji gbirim lala aluji; nu ikpehika ịlẹ kị juwa chịpwụrụ ịwụrụ ịlẹ kị ri ihi ọlala nyaa, lala ịnyaa wụ ang-ẹwụ wụ.

⁹Anyang ịlẹpwụ nya angịnyị nyam, anụ kwaa lata-lata hi ẹpwa nya ịlaa. Anụ ku anyị nyaa hi ang-ugu o-ju ahị ọwawa nyam pyịyọọ.

¹⁰Anụ wuleji, kanụ rụ mẹ, ẹgẹlẹ-ẹ́ ri edawụ ọlahịchịng kaka. Ang onyobyi ọhọhọ nyanụ ju ẹgẹlẹ agụgụ lẹ, ibyi okwookwee kpa ayịreji warị lẹ.

¹¹Ụma nya ọlọmwụ ọlẹ kanụ tọ ri, ọngọlẹ kọ ka wẹ ka me ọnọọkịla, danụ lụgbaa yẹkẹẹ, “Ọyị kam yẹnụ wẹẹ, anụ ka ye ere ọnyọọngịrị ọnyị myị ọnyị nwa yẹẹyẹẹ lẹ.”

¹²M ka kpanụ wuu ka tụchawụlẹ wẹẹ, anyị nya iJekọbụ, m ka kpanụ ka tụchawụlẹ, anụ angị ihihi nya ala Isirẹlụ. M ka taa guru lala ịkpịlọ ẹ-ẹpwụ nya iku, lala ịkpịlọ ị-ju ogu ka ri ang, ụwa ka myị la iru nya angịnyị kpọrịkọọ.

¹³Ohe Oluhye ka wụrụ ụgbẹyị kpehe ji ịlahị nyaa, ị ka bwu ọnang ọọwa kpehe ịnyịnyị; Amkpaa ka kpaa ji ịlahị, Ọ juwa kpa angịnyị nyamwụ ụgbẹyị.