Read idege ỊMAYỊKA 3 Bible Online

ỊMAYỊKA 3 - idege bible

ỊMAYỊKA 3

¹Ọọwa, m yẹkẹẹ, Anụ wo lẹẹlẹẹ mẹ, alegbeju nya anyị nya iJekọbụ, anụ angị kpẹhị rịrị ala Isirẹlụ. Ọ kpụ kanụ-ụ jẹ ẹla opwoku ọhọhọ,

²ang onyobyi tị́ haanụ gụ ang ọnyịịla ọhọhọ. Anụ da angịnyị nyam egba lahị-lahị, hyaa ahwiiyo hi ekpinegu-ekpinegu kwoncho.

³Anụ wu angịnyị nyam ri, daa egba bala o-baa ekpinegu ene pwụrẹ-pwụrẹ lẹ, anụ chaa eku kpiki-kpiki lala ịnyaa wọ iyo ju ẹ-ẹchụ lẹlẹ.

⁴Anụ ka bịlẹ ụbwọ ọdada bwu ẹga nya Amkpaa ẹnẹhẹ wẹẹ, ọ́ tị ka myị-ị wẹẹnụ ka; Ọ ka nyẹẹkpẹ danụ ụka ọọwa, ajị nya ang inyibyi ịlẹ kanụ họ.

⁵Amkpaa yẹkẹẹ, “Alọmwụ ịlẹ kịị hụ angịnyị nyam ahị; kịị wahị nya okpunyi ha angị ye ang oriri kpa waa ri wẹẹ, ị kaa mwẹla ta angị ye ịngịngịhyẹ daa ka ọnụ ka.

⁶Lẹẹlẹ, odu hiinu lẹ, ọyị ọ-yẹ a-arụrụ-ụ́ ka ji hanụ ka; ánu ka jẹ-ẹ yọyị ka ijuju myị ka. Ẹnụ ka byi alọmwụ ịwẹ, ahị ọpyẹpyẹ nyaa ka yẹ la ukpowu.

⁷Ẹpẹpẹ ka ju angị yọyị a-arụrụ, oyoyi ka ri nya alegino; ị ka yahị cheji la oyi chajị am Ohe Oluhye-é waa ẹla ka.”

⁸Am kpakpakpa lẹ, m myị la ọngịrị nya Amkpaa; olegu nyamwụ kụ tam, m la ọ-jẹ́ kpakpa bala ugbodu ojuju nyọka ya je anyị nya iJekọbụ jaabwọ kị la egbeju-ọngịrị ta Ohe Oluhye; bala jaabwọ kị họ ang onyobyi bọọ.

⁹Anụ wo mẹ, anụ alegbeju nya anyị nya iJekọbụ, anụ angị kpẹhị rịrị ala Isirẹlụ; anụ angị pwa ang ọnyịịla ọhọhọ, kanụ́-ụ pyị ang ọ-la kpẹẹkpẹẹ wuu anyoko.

¹⁰Anụ nwụ́ epweji nya ịSayọn la angịnyị ọnwụnwụ, anụ nwụ́ epweji nya iJerusalẹm la ịhọbịrị nyanụ.

¹¹Alegbeju nya alụwa kaa cheje nya ẹla dahịhile okpoko ochikiriju, angịkiliya nyaa kaa mẹ ehile nya Ohe Oluhye jẹ chajị nya uri ọlọka; alọmwụ nyaa kaa yẹ ọmwụ kị ka nwaa uri; ị tị myịmyị kpụnịrọ Amkpaa kpụ ịị yẹkẹẹ, “Amkpaa jam ẹ-ẹpwarịrị nyahị, akama ọhẹ-lọhẹ a ka wẹ chịhị ọgụ ka.”

¹²Ọọ-lajị nyanụ lẹ, ị ka bwuru ịSayọn jaabwọ kịị wu ẹrụ; IJerusalẹm ka yẹ ka ri ọtẹwụụ nya egu nya ang, ọgbọdọ ọlẹ kị nwụ Ube Ịgọgọ rịrị ka ri ugbudu ọlẹ ká ipyinu myị ju.