Read idege ỊMAYỊKA 4 Bible Online

ỊMAYỊKA 4 - idege bible

ỊMAYỊKA 4

¹Ụka ohyẹẹkpẹ, ọgbọdọ ọlẹ kị nwụ Ube Ịgọgọ nya Amkpaa rịrị a ka gụ ịgbọdọ ịkịla wuu lẹlẹ; ọ ka la ehe gụ ikiti ịkịla wuu, aloja datị-datị ka pá tọọ wẹ ẹga nyamwụ.

²Alụma lụmẹ-lụmẹ ka yẹkẹẹ, “Anụ kẹwẹ, kahị wule ka uhye nya ọgbọdọ nya Amkpaa, kahị ka Ube Ịgọgọ nya Ohe Oluhye nya anyị nya iJekọbụ. Ọ ka mẹ ụgbẹyị nyamwụ jẹẹhị, ahị ka ju ihi nya ẹla ọmẹjẹ nyamwụ.” Ẹla ọmẹjẹ juwa ọ-Ọgbọdọ nya ịSayọn, Amkpaa ka ya ẹla ta angịnyị nyamwụ bwu iJerusalẹm.

³Amkpaa ka leje ha alụma nya odehe wuu, ọ ka cheje nya arụ ọrụrụ nyaa. Ị ka go oge nyaa hyà alẹ, ị ka go awangga nyaa hyà egbima. Ụma ọhẹ-lọhẹ-ẹ́ ka da ọkịla ẹwụ kaka, ị́ tị ka mẹ ang jẹ chajị nya ẹwụ ọdada kaka.

⁴Ọng myị ọng ka mwụ ịnyọ ọ-ọmwụ nya alakọnụ nya ịlọmwụ, lee ọmwụ nya okiledu nya ịlọmwụ myị lẹ. Ọngọngọhẹ-ẹ́ ka chị uhi jwaa ka, chajị Amkpaa nya Agụgụ à ya ịnyị lẹ.

⁵Alụma ịkịla ka myị ẹrụ ha ijiga nyaa myị, ma, ahị ka myị ẹrụ ha Amkpaa Ohe Oluhye nyahị gbe oyi myị oyi.

⁶Amkpaa yẹkẹẹ, “Ụka ká ẹnụ ọọwa-á pwụ eji, m ka kpa ikuku wuu nya ka tụchawụlẹ; bala angịlẹ kị wu kpa rụ nya anyịhị, angịlẹ kam yẹ akama wuu;

⁷m ka họ ká ikuku ka ri angị hihi lahị. M ka yẹ angịlẹ kị wu kpa rụ nya anyịhị la ụma ọtụka; ọọwa Amkpaa a ka ri adịrahụ nyaa ọ-Ọgbọdọ nya ịSayọn, bwu ụka ọọwa gbe oyi myị oyi lẹlẹ.

⁸Ahụ Ọgbọdọ nya ala ịSayọn, ẹga ọ-kụ gbe ịkpịlọ; a ka ri ụpwọma nya ịlọng myịmyị lala olene-ene, ọngịrị nya adịrahụ oriri ka nyà wẹ iJerusalẹm.”

⁹Ịyẹ tị́ du kanụ juwa jida gboo ịnyị? Adịrahụ nyanụ bẹẹ? Angị junu irya ta ayịreji lẹ-ẹ́? Lee anyị tị́ kanụ juwa ẹ-ẹpwụ nya ọjụjụ lala ọnyang a hya ụma nya ọnyị ọmama-a?

¹⁰Anụ rị ebilo, juwa mwu eru, lala ọnyang à hya ụma nya ọnyị ọmama mẹ, chajị anụ ka rụ bwu epweji ọlẹ lẹẹlẹẹ, ka kụ ẹpwụmẹ. Anụ ka rụ ka ịBabịlọn lẹ. Ma, Amkpaa ka chịnụ da ụ-ụwa, ọ ka gbanụ kpehe, bwu ẹpwụtụbwọ nya aluji nyanụ.

¹¹Ma, ọlẹẹlẹẹ lẹ, alụma lụmẹ-lụmẹ nwụlanọ nyọka mwẹla tanụ lẹ. Ị yẹkẹẹ, “Ahị ka chị ịSayọn ịrị, kahị ka hụlọ ẹhụ jwọọ.”

¹²Ị́ tị jẹ ang ọlẹ ká Amkpaa me irya ka, ị́ jẹ ang ọlẹ kọ nwụlanọ ka; ị́ jẹ ká Amkpaa taa guru lala igbi ẹ-ẹga o-ru ang ka.

¹³Amkpaa yẹkẹẹ, “Anụ wuleji kanụ rwaa mẹ, ala ịSayọn, M ka họ kanụ ka la ọngịrị lala àchụ oloje-oje. M ka họ kanụ ka la ọngịrị lala apatẹ nyanụ nyaa ri achú iloje-oje. Anụ ka be alụma ịlẹ kị ri aluji nyanụ ene yịgẹ-yịgẹ.” Anụ ka ya ang-ụdụ nyaa ha ọhaha ha Amkpaa, Ayịbaba nya odehe wuu.