Read idege ỊMAYỊKA 5 Bible Online

ỊMAYỊKA 5 - idege bible

ỊMAYỊKA 5

¹Tụ angịdẹwụ guru mẹ, anụ ala epweji nya iJerusalẹm; aluji dagaga juhi lẹ. Ị ya ọgọdọ mịla olegbeju nya Isirẹlụ a-ábaa lẹ.

²Ahụ epweji nya ịBẹtịlẹhẹm ọla Efurata, ịnọ, ahụ a ri epweji ọ-byẹhị gụ wuu i-iJuda lẹ; M tị ka hu adịrahụ bwu ẹga nyang ha ịlọm, kọ ka kpẹhị rịrị ọpyị nya Isirẹlụ. Ọmwụ nya adịrahụ oriri nya ọngọọwa bwu lụka ọtata lẹ; ọ bwu ụka nya alene.

³Lẹẹlẹ, Amkpaa ka nyẹẹkpẹ da angịnyị nyamwụ, gbee ká ọnyang ọ-hya ụma ka ma ọnyị ọlẹng ọọwa; lẹ, aanịna nya ọnyị ọwẹ ịlẹ kị ji ẹpwụ nya ọnyọhị oriri, a ka nya chị ala Isirẹlụ aanaa ọgụ lẹlẹ.

⁴Ọ ka kpa angịnyị nyamwụ lala ọngọgbikpịlọ, ọ ka kpaa bwula ọngịrị nya Amkpaa; ọ ka kpaa bwula ụmụmẹ nya ẹnyị nya Amkpaa Ohe Oluhye nyamwụ. Angịnyị nyamwụ ka hụ lokpunyi, chajị alodehe wuu ka wo ẹla nya ụmụmẹ nyamwụ.

⁵Ọwa ayịdang ka ri ọngọ ya okpunyi haa. Ọ́-ri ká angịdẹwụ nya ala Asiriya-á beehi ẹpwa wẹ ọpyị nyahị, kị tụrụ ebe ịnyịịngịrị nyahị ba eji; ahị ka du iru nya alegbeju nyahị ka mwẹla taa.

⁶Ị ka kpa ọngịrị kpa ala Asiriya, ị ka kpa agbụrụ kpa angị ịnyịịngịrị ịwẹ. Ala Asiriya ka beehi ẹpwa wẹ ọpyị nyahị myị, ị ka rụ ẹwụ wẹ egeji nyahị myị; alegbeju nyahị tị ka gbahị kpehe bwu ẹpwụtụbwọ nyaa.

⁷Ụka ọọwa, angị ihihi nya anyị nya iJekọbụ, ka lala amwụ o-bwu ẹga nya Amkpaa; ha aloja lụmẹ-lụmẹ. ị ka lala emyo iluhye nya amẹ, ịlẹ kị bwu ẹga nya ọngịnyị ehe ka; kị tịị godayị gbe ọmẹjẹ nya ọngịnyị ehe ka.

⁸Angị ihihi nya anyị nya iJekọbụ ka nyi epepe tụ ẹpwụ nya ụma lụmẹ-lụmẹ da; ị ka ji ẹpwụ nya aloja lụmẹ-lụmẹ, ị ka lala ugẹbẹ ẹ-ẹpwarịrị nya iyo ịlẹpwamẹ; ị ka lala ụgba nya ugẹbẹ ọlẹ kọọ jẹ bwu ẹpwụ nya ogu nya ịkpịlọ, ọ kaa kpaa ẹkpa beji, hụlaa hwẹẹhwẹẹ; olewe nyaa-á tị ji ka.

⁹Ala Isirẹlụ ka kụrụ aluji nyaa, ị ka taa ayịreji wuu.

¹⁰Amkpaa yẹkẹẹ, “Ụka ká ẹnụ ọọwa-á pwụ eji, m ka ye anyịrẹ nyanụ kpa rụ hiinu; m ka ta ang ịrụnyẹ nyanụ ayịreji.

¹¹M ka ta epweji ịlọpyị nyanụ wuu ayịreji, m ka tụrụ egwalọ ịnyịịngịrị ịlẹ kị chẹwụ keenu wuu beji kpalị-kpalị.

¹²M ka ta angị mwụ ịnwa ịlẹpwụ nyanụ ayịreji, olugono ọhẹ-lọhẹ á tị ka hi hanụ kaka.

¹³M ka ta ekpeku nya ihye nyanụ ayịreji, bala ajwọ ịlẹ kanụ-ụ gbịgba ha; ánụ tụtụm ka gbịgba ha ang ịlẹ kanụ kpa ụbwọ nya ịlọnụ họ kaka.

¹⁴M ka ta ekpeku nya Achẹra ohe ojiga nyanụ ayịreji, m ka ta epweji nyanụ wuu ayịreji.

¹⁵M ka wụ agbama ọtụka-ọtụka ta alụma ịlẹ kị myị jum ihi ka, m ka yaa akama.”