Read idege ỊMAYỊKA 6 Bible Online

ỊMAYỊKA 6 - idege bible

ỊMAYỊKA 6

¹Anụ wo ẹla ọlẹ ká Amkpaa wẹẹ ya mẹ, “Wuleji kanụ tịrọnụ ẹla nyanụ i-ijata nya ịgbọdọ; ká ikiti a wo ẹla ọlẹ kanụ ka ya.

²Anụ ịgbọdọ, anụ wo ẹla ọlẹ kọ hi Amkpaa ọnụ mẹ, anụ itiwe i-wu odehe kpa, anụ wo; Amkpaa jam ka wụrụ angịnyị nyamwụ eje, Ọ ka gbe ẹla ju ala Isirẹlụ.

³“Angịnyị nyam ee! Ang onyobyi oyina m tị́ họnụ kpong-kpong? Anyị m tị́ ri olo hanụ wẹẹ? Anụ wẹm mẹ!

⁴Kpakpakpa lẹẹ, am a tị́ gbanụ kpehe bwu ọpyị nya Ijipiti, m chịnụ da bwu ẹpwụ nya ọnyọhị oriri; M du iMosisi bala Erọn bala iMiriyam ọọnaa ọnyang kaka kpanụ ụgbẹyị.

⁵Angịnyị nyam ee! Anụ kpịtịya nya obyi ọlẹ ká ịBalakị Adịrahụ nya ala iMowabụ me junu, bala jaabwọ ká ịBẹlam ọnyị ọlẹng nya ịBẹyọọ byọọ wẹẹ. Anụ kpịtịya nya ang ịlẹ kị họ ẹ-ẹpwụ nya ẹdịyẹ nyanụ o-bwu iChitim gbee ka pwụ iGiligalụ aalẹ, jaabwọ kam Amkpaa chịnụ da wẹ wuu ka myịnụ lẹhị.”

⁶Ịyẹ kpá m tị́ ka kpa wẹ ijata nya Amkpaa, ụka kam ka gbịgba họọ ọwa Ohe Oluhye nya epwoohe wẹ-ẹ̀? M kpa ágba nya ịna i-gu ẹka ookpokpo warị kaka kịla iya ọ-rụ ila họọ mẹ-ẹ́?

⁷Iru nya ụnọ nya imilodo ka myị Amkpaa lẹhị-ị́? Ida ọtụka-ọtụka ọlẹ kọ ka ba iya ọkịlaakịla nya ajẹ nya ang-ẹrụ ka myọọ lẹhị-ị? M ya ọnyị nya ọgbanyẹ nyam kịla iya wọnụ nya ang onyobyi nya ịlọm ju mẹ-ẹ? M ya ọnyị nya ịlọm kịla iya chajị nya ịhọbịrị nyam mẹ-ẹ?

⁸Eheehe, Amkpaa tị́ mẹjẹng ang ọlẹ kọ pwoku ọhọhọ, bala ang ọlẹ kọ tịtọ bwu ẹga nyang lẹ. Ọ-ka la kpẹẹkpẹẹ, juwa họ ọnahị bala ọ-kpa ịlọng keji dụmwọ ha Ohe Oluhye nyang ịnyị.

⁹Anụ ke ụrụ wẹẹ, Amkpaa lalẹẹ wụrụ alepweji— ọngọ jẹ ẹla kaa ju uhi nyang, ahụ Ohe Oluhye, Anụ kpẹhị chịng nya ọgọdọ nya akama ọyẹyẹ bala ọngọ kpọọ ụ-ụbwọ nyọka yẹnụ akama.

¹⁰Ḿ ka jẹ-ẹ deeri nya ụdụ nya ọkwọ ọwẹ kanụ kpụ, bala eku nya abang ọ-kpa me ang ọlẹ kam gọlọ ju wẹ ka.

¹¹Ḿ ka hịnyọhi ọngọ họ angịnyị ri bwula ọ-kpa ọchanjẹ ọ-jẹ ẹla me ang ka.

¹²Alụdụ ịlụwa ri alimajẹ, alepweji ọwẹ ri alọnọọkịla.

¹³Am ayịdang dọmwụ nyọka yẹnụ akama lẹ. M ka tanụ ayịreji ọọ-la ịhọbịrị nyanụ.

¹⁴Anụ ka ye ang ri, ánụ tị ka wu ẹpwụ kaka. Ẹpwụ nyanụ ka la peke-peke; Anụ ka hya ụma la ọ-ma ọnyị ka, ó-ri kanụ mama wẹẹ, ẹwụ ka taa ayịreji.

¹⁵Ánụ wu ẹrụ la owuwu, ánụ ka ye ang wụ ka; anụ ka pyị ida nya olivu ju a-ang, ánụ tị ka ye ida wụ ka; anụ ka chị ere nya alakọnụ, la ọ-yọọ kpa ka ọnụ ka.

¹⁶Chajị anụ ba ehile ịtịpyọ nya adịrahụ Omri jẹ, bala ọ-họ ang ịtịpyọ ịlẹ ká ọnyị nyamwụ adịrahụ Ehabụ bala alugbiyegu nyamwụ họ; anụ ba ọmẹjẹ nyaa jẹ. Lẹẹlẹ, m ka pẹhiinu ta ayịreji, alepweji nyanụ ka ri ang ọ-hụlọ ẹhụ ju; anụ ka ri angịlẹ ká angịnyị ka ya ẹpẹpẹ ju.