Read idege ỊMAYỊKA 7 Bible Online

ỊMAYỊKA 7 - idege bible

ỊMAYỊKA 7

¹Am à ri enyi gụ obyi lẹẹ-ẹ́! M lala ọngọlẹ ká imyi nwụ. Ḿ tị ye egbe nya alakọnụ ka nẹ ka, chajị ị hyaa kpá lẹ. Egbe ịgaga nya ọgbanyẹ nya ikiledu ịlẹ kịị ham wuu myị lẹ, chajị ị da ụmwọ nyaa kpá lẹ.

²Angị ju uhi nya Ohe Oluhye wuu myị hi ọpyị ọlẹ lẹ, ọngọ kpẹẹkpẹẹ ọhẹ-lọhẹ-ẹ́ hi jam kaka. Ọng myị ọng wuu kụ ịnya gbe ọngịnyị ọ-ka nwụnwụ, ọng myị ọng juwa kpa ẹla tịtọ nya ọngọkịla ọọnamwụ.

³Ịwa wuu ri ọnggwọ ẹ-ẹpwụ nya ang onyobyi ọhọhọ; adịrahụ-ụ̀ ye okpoko ochikiriju, ọngọleje-è cheje dahịhile okpoko; angịtụka anyị-ị̀ ya ẹla jaabwọ kọ haa i-irya, ịịwe ị ya ẹkpẹ chawụlẹ wuu lẹ.

⁴Angịnyị ịnyịịla ịlẹpwụ nyaa tịpyọ lala ujwo-owuru, ọngọ la kpẹẹkpẹẹ gụ ẹ-ẹpwụ nyaa wuu tịpyọ gụ ụpáa; ẹnụtụrụ ọlẹ ká alọmwụ nyanụ ya ẹla rụ́ pwụ eji lẹ, Ohe Oluhye ka yẹnụ akama lẹ. Ahị ka họnụ bwuu.

⁵A dahịhile ọngọ nọ ẹpwa bang ba ka, a tị ya irya nyang nịrọ oligu nyang koo; ó-ri ẹga nya ahụ nyang ri, aa gbe ọnụ nyang.

⁶Anyị alẹng jam ya ẹpẹpẹ ju adaa lẹ, anyị anyang kpahị ijwo-ijwo ta ịnaa; ịhụ juwa kụ larụ ọrụrụ ta ịnaa-ẹpwa chị̀taaa, aluji nya ọngịnyị ehe wuu bwu ẹpwa-ẹpwa nya ịlọmwụ.

⁷Am tị lẹ, m ka ya ẹhị rịrị gbe Amkpaa, m ka godayị gbe Ohe Oluhye ọlẹ kọ ka chịm da; Ohe Oluhye nyam ka wo lam.

⁸A hụlọọhị ẹhụ ka, oluji nyahị, ọ ri nya ịlẹhị, ahị ka eji, ahị tị ka wuleji wẹẹ; ọ ri nya ịlẹhị, ahị kụ ẹ-ẹpwụ nya ukpowu nya akama, Amkpaa tị ka ya ahịgboo hahị.

⁹Ahị họ ang onyobyi ba Amkpaa, lẹẹ lẹ, ọ ka wụ ẹjẹ tahị; gbee kọ ka leje yẹẹhị dada, kọ ka chị oku ọlẹ kọ la kpakpa hahị; ọọwa ọ ka kpahị ju ka ẹpwụ nya ahịgboo lẹ, ahị ka yẹ ọchịda nyamwụ lẹlẹ.

¹⁰Ụka ọọwa, aluji nyahị ka yẹ lẹhị nya ịlaa, oyoyi ka ri nyaa; Ịwa angị lẹẹ kpahị họ, kị tọhị wo yẹkẹẹ, “Amkpaa Ohe Oluhye nyanụ tí ji ale-è?” Ahị ka kpẹhị nyahị yẹ jaabwọ kị ka kụrwaa chẹẹchẹẹ, ị ka jẹdịyẹ bwu uhye nyaa lala ịwa ịlụgbẹyị.

¹¹Ẹnụtụrụ nya egwalọ nyanụ ọ-nwụ me juwa wẹ, anụ ka tụ oyi nya ọpyị nyanụ kẹkpẹ hwẹẹẹ ẹnụ ọọwa.

¹²Ẹnụtụrụ ọọwa, angịnyị nyanụ ka nya tịrẹkpẹ chịnụ ogu bwu Asiriya bala epweji ịlọpyị nya Ijipiti, ị ka nya bwu ịpyị i-bwu Ijipiti lalaala ka ju ka ihu nya iYufuretisi; ị ka nya bwụ oye nya Ihu ọnyị myị ọnyị bala oye nya ọgbọdọ ọnyị myị ọnyị.

¹³Ma, oye ọkịla nya odehe wuu ka kpụ egwawụ-egwawụ, ọọ-la ang ọtịpyọ ọhọhọ nya angịlẹ kị kụ ụwa.

¹⁴Gbe angịnyị nyang la ọkụta nyang, gbaa lala ịkpịlọ ịlẹ ká la lịlọng; ịkpịlọ ịlẹ kị kụ ipyinu nwee, ká ọpyị ọlahịchịng ọ-há ẹrụ tị dagaga jwaa; myị kị ga ri bwu ịBachan lalaala ka ju ka iGiliyadị, lala ụka oligbalẹ nyaa.

¹⁵“Jaabwọ kọ la ụka kanụ gba kpehe bwu ọpyị nya Ijipiti, ịnyịnyị m ka chị ụkụrwọ ẹbyẹbyị nyam ehe lẹ”.

¹⁶Alụma ịkịla ka yẹ ụkụrwọ ịịwa, ọngịrị ọlala nya ịlaa ka laa ẹpẹpẹ; ị́ ka ya ẹla bwu ọnụ myị ka, arụ nyaa ka kpụ ịla.

¹⁷Ị ka kpa ọnụ ri ịpyị lala ilo, bala ang ịwụlọọ-wụlọ ị-ịpyị; ị ka kpehe bwu ebe ịtụka nyaa juwa che kpákpakpa. Ị ka jahị kpata wẹ ẹga nya Amkpaa Ohe Oluhye nyahị, chajị nya uhi ojuju; ị ka ju uhi nyang ahụ Amkpaa Ohe Oluhye nyahị.

¹⁸Oowo a tị́ lala ahụ Ohe Oluhye wẹ-ẹ; ahụ ọngọ hịnyọhi ịhọbịrị, bala o-deeri nya ang inyibyi nya angịnyị nyang ịlẹ kị hi lọhịhị? Aa kpa agbama nyang ụ-ụwa pyịyọọ ka, chajị a ri ọngọ la ọháha.

¹⁹A ka yẹ ahyẹẹrwẹrwa nya angịnyị nyang myịmyị lẹ. A ka tụ ata tudu eji la ang inyibyi nyaa, a ka da ịhọbịrị nyahị wuu ẹjwọ ju ka ẹpwụ nya ihu.

²⁰A ka họ ọnụ ọmyịmyị nyang jịra ẹ-ẹga nya anyị ịtụma nya iJekọbụ, a ka chị ọháha o-gbu enyi-ka nyang ehe ẹ-ẹga nya anyị ịtụma nya Ebiraham; jaabwọ ká nwa iro ta adahị ịgọgọ anyị gbalẹ-gbalẹ.