Read idege ỊNahụm 1 Bible Online

ỊNahụm 1 - idege bible

ỊNahụm 1

¹Ụpwụ ọlẹ ri ẹrụ ọlẹ ká Ohe Oluhye du chajị nya epweji nya ịNineve. ỊNahụm ọla Ẹlịkọchị yẹ ang ịlẹ kị da ụ-ụpwụ ọlẹ a-arụrụ.

²Amkpaa ri Ohe Oluhye ọ-jẹ ijiiji, Ohe Oluhye kaa yẹ angịlẹ kị ri aluji nyamwụ wuu akama; Amkpaa kaa nwaa uri tịrẹkpẹ ẹ-ẹpwụ nya agbama, Amkpaa kaa kpa agbama nyamwụ jahị da angịlẹ kị bọọ ẹtẹ.

³Amkpaa-á kaa ju agbama hyaa ka, ma ọngịrị ọlala nyamwụ lụmẹ, Amkpaa ka yẹ angị họ ang onyobyi akama pyii. Ẹga ká Amkpaa-á chịpwụrụ bwu igbachịwụ ọtụka bala ugbọchịrị kaa da, egbamwụ ri ekuruwa ọchịchị nya apatẹ nyamwụ.

⁴Amkpaa da ishu ọtụka ehile du ká Ihu nwụ, ọ họ ká ihu wuu chọhụ kịra-kịra; amẹ ịla ịBachan bala ịlọgbọdọ nya ịKaamẹlụ gbu wombooo, apwụ nya ekeji ịla iLibanọn gbu piloo.

⁵I-ijata nya Amkpaa ịgbọdọ kaa hụ jigi-jigi, ikiti kaa wulo hụrụ. Ịpyị kaa hụ kpuka-kpuka ụka ká Amkpaa-á pwụ eji, odehe bala angịnyị ịlẹpwụ nyamwụ wuu hụ kpákpaakpa.

⁶Oowo a tị́ ka kụ lahị gbe agbama ojuju nyamwụ myị-ị? Oowo tị́ ka godayị gbe ikẹjẹ-awụrụ nyamwụ myị-ị? Ikẹjẹ awụrụ nyamwụ wuru lala ẹlẹlẹ ila; ọ họ ká ajwọ bene yịgẹ-yịgẹ.

⁷Amkpaa hiigu, ọ kaa chẹwụ ke angịnyị nyamwụ ụka nya akama; ọ kaa kpẹhị rịrị angịlẹ kị ka ẹga nyamwụ ka kpụ ịbaa.

⁸Amkpaa lala enyi ọtụka ọlẹ kọ kaa mwụ, ọ ka ta aluji nyamwụ ayịreji wuu; ọ ku aluji nyamwụ gbee kọ nwaa.

⁹Obyi nya ẹla-ịyẹ anụ tị́ wẹẹ me ju Amkpaa? Ọ ka tanụ ayịreji wuu; oluji nyamwụ ọhẹ-lọhẹ-ẹ́ ka ba ẹla tọọ ugbabwọ imiiye ka.

¹⁰Aluji ịịwa lala ejwo ịlẹ kị daba rị awụlẹ, ị họ diidii lala angị nwa ere kpụ ere; ị tị ka rụ ila wuu kpụ obyi lala awigbi.[1]

¹¹Ọngọhẹ bwu ẹga nyang, ahụ iNineve warị, ọ me obyi onyobyi tụ Amkpaa pyịpyị; ọ ju angịnyị irya onyobyi.

¹²Ịịlẹ Amkpaa a ya ta angịnyị nyamwụ lẹ: “Ịnọ ala Asiriya la ọngịrị bala o-ju iru, m ka taa ayịreji gbanggbang; m họ anụ yẹ akama ene-ene, ma ḿ ka họ ịnyị gụ ọwẹ kaka.

¹³M ka họ ọngịrị nya Asiriya ọlẹ kị la u-uhye nyanụ ka myị, m ka họ anụ ka la ịlọnụ.”

¹⁴Amkpaa da ehile chajị nyanụ ala Asiriya yẹkẹẹ, Ị́ ka wo ẹnyị-ehe nyanụ kịlahị kaka; m ka bịrị ekpeku ịlẹ kị kọ bala ịlẹ kị meme ilube nya ijiga nyanụ; m ka wu iworu nyanụ chajị anụ pwoku ọ-ka hịhị kaka.

¹⁵Chehị kele, ọlẹrụ lalẹẹ bwu uhye nya ọgbọdọ warị, ọ juwa kpa oja ọnyịịla warị; ọ juwa ya ẹrụ nya okpunyi dodehe, anụ ri ang oriri nya ụya ọyaya nyanụ mẹ, anụ ala iJuda, kanụ họ ọnụ ọlẹ kanụ myị ha Amkpaa jịra mẹ; alọkwọ ịwẹ-ẹ́ myịmyị ka mwẹla tanụ kaka, ị taa ayịreji gbanggbang lẹ.