Read idege ỊNahụm 2 Bible Online

ỊNahụm 2 - idege bible

ỊNahụm 2

¹INineve ee, ọngọ ka nying epepe pwụ eji lẹ. Gbè ẹga ịkpịbaa nyang ká ya ẹhị rịrị ụgbẹyị kee mẹ. Nwụlanọ gbe ẹwụ ọdada, ká gba ọngịrị nyang wuu kpehe mẹ.

²Amkpaa juwa ka tịrị ihi ọlala nya iJekọbụ ẹkpẹ, ihi ọlẹ ká ala Isirẹlụ la ene ká aluji warị ka waa ang wụ.

³Angịdẹwụ nya aluji kpa ọkụmada ịnyịmịla, ị kụrụ iwụrụ ịnyịmịla; ang ịrụnyẹ nyaa ịlẹ ka anyịrẹ gbile hụ́ myịrị-myịrị lala ila. Anyịrẹ nyaa juwa chị ọnjịrọ gbe ẹwụ ọdada.

⁴Ang ịrụnyẹ nyaa ịlẹ ka anyịrẹ gbile rụnyẹ lọngịrị-ọngịrị tụ opeje-opeje da, ị rụnyẹ kele warị ụ-ụwa ojiya nya epweji; ị hụ myịrị-myịrị lala ịtọchị, ị juwa rụnyẹ chị hwoo-hwoo-hwoo lala apya.

⁵Ị wụrụ alegbeju kaka tụguru, ị chị achụụ mileji tụ ụgbẹyị da ụka kị juwa kele; ị rụnyẹ lagaga ka ẹga nya ugulọ nya epweji; ị ya okụmada ọ-kpa gbe epweji weji.

⁶Ị wụrụ ogirigba ọlọnụ nya Ihu gbodoo, alẹpwa nya adịrahụ myị la uhi ojuju.

⁷Ị pwọ ahụ nya adịrahụ ang ịkụrụ-kụrụ nyamwụ la agbụrụ.[2] Ị wọọ kpa rụ; anchẹ anyang nyamwụ jida, ị gbokiri lala enewulo. Ị ya abwọ mịla ọkịlẹtụ.

⁸Angịnyị kpehe rụnyẹ rụ bwu epweji nya iNineve, jaabwọ ká enyi kaa be bwu ọhwọọ ọlẹ kị chị; ị juwa be ẹkọ yẹkẹẹ, “Anụ godayị! Anụ godayị!” Ma, ọngọngọhẹ-ẹ́ jahị kpata nyọka tịrẹkpẹ ka.

⁹Anụ go okpoko onyoowuru lagbụrụ, anụ nwụla okpoko ịgọm kpa rụ; epweji ọlẹ myị̀ la ang-ụdụ.

¹⁰INineve ta ayịreji lẹ, ị rụ hyọọ, ọ kpụ egwawụ-egwawụ lẹ; ọkịlẹtụ chaa pyẹpyẹ, arụụ nyaa tụ kpịla awụlẹ; ọngịrị gwaa myị, ahị nyaa gbu wombooo.

¹¹Ale ahụ epweji ọlala ẹpwa nya egabẹ a tị ji wẹ mẹ? Ẹga ká agba nya egabẹ kaa ri ang; ẹga ká anyị nyamwụ kaa ji la uko ọchịchị ka.

¹²Ugẹbẹ nwụ iyo lụmẹ-lụmẹ ha iko nyamwụ, ọ ya iyo lụmẹ-lụmẹ ha anyang nyamwụ; uku nyamwụ myị̀ la iyo ịlẹ kọ hụla hwẹẹhwẹẹ.

¹³Amkpaa Ọgẹwụ yẹkẹẹ, “M jam kpa ẹla tanụ lẹẹlẹẹ lẹ; M ka chị ang ịrụnyẹ nyanụ ịla, ẹwụ ka ri ikolobya nyanụ; m ka hunu abwọ la ang ogogo lagbụrụ bwu ẹga nya angịkịla, ọngọngọhẹ-ẹ́ ka ke ụrụ la omyi nya alẹrụ nyanụ kaka.”