Read idege ỊNahụm 3 Bible Online

ỊNahụm 3 - idege bible

ỊNahụm 3

¹A ri enyi gu obyi lẹ, ahụ epweji nya angị nwụ angịnyị; a myị la ọnọọkịla omeme, a myị la ang-ụdụ kpọng-kpọng ịlẹ kị ka go kpa rụ.

²Ke ụrụ wo arụ ọhyahya nya ichiri ị-kpa du ụnyẹ ju anyịrẹ, iru o-kuuu nya ata nya ang ịrụnyẹ, ọnggwọ ọchịchị nya anyịrẹ, ajị ọgbagba nya ang ịrụnyẹ chwokolo-chwokolo.

³Angị kụ anyịrẹ hụ keke, oge nyaa yẹ hwoohwoo; ịkpachị nyaa chị ahị ịraapya, angịnyị ịlẹ kị nwụ kụ ogu gbudum. Egu ju iru kịla ọwawa kịla, angịnyị chị achụụ bwu uhye nya egu.

⁴Chajị iNineve lala ọlakpara, ọ chẹhị gbọgbọ, ọ tị myị̀ la ijiga inyibyi; ọ pịrị ẹpwụma lụmẹ-lụmẹ ju bwula akpara ọhọhọ nyamwụ, ọ kpa ụhwa yẹ angịịwa la anyịhị nya ịlọmwụ.

⁵Amkpaa Agụgụ yẹkẹẹ, “M jam ka ya ẹla tang, ahụ iNineve, M ka ying apwụ ji lọhị-lọhị; M ka họ alẹpwụma ịkịla ka yẹ o-ji lọhị-lọhị nyang.

⁶M ka kpang hu utungguru, go ajeyi hụng, ká ka ri ang ọ-gbẹhị da tee nya angịnyị.

⁷Ọng myị ọng kọ chẹhị yẹng ka chị kee hing, ị ka ka yẹkẹẹ, ‘INineve, a kpụ egwawụ-egwawụ lẹ! Oowo tị́ ka bida chajị nyang kpong-kpong? Ale ị tị́ ka ye ọngọ ka myị-ị kpụng ẹjẹ bwu?’ ”

⁸INineve, á hagụ epweji nya iTibisi ka, ITibisi kụ ọ-ọnụ nya ihu ịNayịlị; enyi dagaga jwọọ, ihu a ri ẹga ọchẹwụ kọọ lẹ; enyi lala ajẹ ọlẹ kị chị yọọ dada.

⁹Ịpyị nya Itiyopyiya bala ịnya Ijipiti a ri ọngịrị ọtụkụ yi iTibisi lẹ, ọngịrị nyamwụ-ụ́ la ọbaba ka; ala ịPuutu bala ala iLibya chẹkpẹ jwọọ.

¹⁰Tị kpọkpọọkpọ, ị wu ala iTibisi kaka ri anyịhị ọ-ọpyị ọkịla; aluji go anjwo ichiche nyaa nwụ nmẹẹnmẹẹ u-uhye nya ajwọ o-opeje ọnyị myị ọnyị; ị da iwo ju angị la ihi-ihi nyaa, ị waa wuu ju agba kpa rụ.

¹¹INineve ee, ahụ ka nwa ere gbu ere ịnyịnyị; a ka tịtọ nya ẹga ká ka kpịbaa hi aluji nyang.

¹²Ẹga ọ-kpụ ịbaa nyang wuu ka lala okiledu ọlẹ ka egbe nyamwụ g; ó-ri kị hwọọ jigi-jigi, egbe nyamwụ ka wo ju ka ọnụ nya ọngọ ka ryọọ ri.

¹³Yẹ angịdẹwụ nyang wẹẹ! Ịwa wuu lala anyang; ogirigba nya ọpyị nyang wụrụ da dodo ha aluji, ila rụ ogbilo nya ogirigba nyang lẹ.

¹⁴Chị enyi ọlẹ kọ ka nwang lụka nya ẹwụ ọdada mẹ; nwụ egwalọ nyang me kị la ọngịrị, bwu ume, yọọ jula ọpyị, ka me ịbịlọọkụ mẹ.

¹⁵Ila tị ka rụng ẹ-ẹgẹwẹ, ị ka kpa oge nwụng; ẹwụ ka ring jaabwọ ká ịyịrị kaa ri ang; pyẹ ebile lala ịyịrị mẹ, ká ju iru lala agá mẹ.

¹⁶Alọhị nyang ju iru gụ ịdịchụ iluhye-ọgba; ma, jaabwọ ká ịyịrị kaa pyẹ achwọ maa kị kaa hụ rụ, ịnyịnyị alọhị ịịwa a rụ lẹ.

¹⁷Angị gbeji nyang lala iru nya agá, alegbeju ịtụkụ ying lụmẹ hyọọ lala ogu nya ịyịrị ẹnụ ka ohu-ú họ, ma ụka ka ẹnụ-ụ chị, ị ka hụ rụ; ọngọngọhẹ-ẹ́ jẹ ẹga kịị rụ ka ka.

¹⁸Adịrahụ nya ala Asiriya, alegbeju ịtụkụ ying nọ une lẹ; angịnyị nyang ilihi-ihi, une rwaa lẹ, angịnyị nyang ịlẹ kị nyi epepe tụ uhye nya ịgbọdọ da— ọngọ ka taa guru kpaa nya-á ji kaka.

¹⁹Utoji nya ẹbẹ ọ chịchị nyang ji kaka, ẹbẹ nyang ri ẹbẹ ọgọja lẹ; angị wo oja nyang wuu chị abwigo jung, chajị ọngọngọhẹ-ẹ́ be bwu ẹpwụ nya ọkwọ ọlala nyang myị ka.